Tappi, de Waldwicht:
Tappi seggt den Snee Adjüs!


 

 

Moin, leev Kinner!

Bevör dat Fröhjohr warrt, mütt ik nakieken, wi dat bi juuch utsüht. Vör goot veer Weken leeg noch överall hogen Snee. Nu sünd dat blots noch Sneeresten.

Mit mien Snowboard müss ik vun Sneeplacken to Sneeplacken föhrn. Dat weer de reinste Flickenteppich ut Snee. Un denn keken al de ersten lütten Krokusse ut den Rasen.

Meist harr ik een ümföhrt. Dat Snowboard müss nu in den Schuppen.


De Krokus is doch bannig in'n Weg!

Dat neegst Mal heff ik lever enen Schirm mitnahmen. Över Nacht harr dat düchtig Regen geven. Bit up de Terrass weer ik sünst missennatt worrn.


Regenschirm

Mank de lütten Winterlinge puss de Wind üm de Eck. He harr mi binah den Schirm ut de Hand weiht. Aver ik heff dat schafft!

Bit ik up de Terrass weer, harr de Sünn sik en Lock mank de Wulken söcht. Nu weer mien Schirm mit eens en Sünnenschirm.


Sünnenschirm!

Bevör ik mi up den Nahuusweg möök, heff ik noch den Hasen besöcht. De seet up enen groten Steen. He vertell mi, dat nu bald Oostern weer. Sien Sipp weer al düchtig bi de Arbeit.


De Haas is vull in'n Stress

Ünnerwegens heff ik noch fief lütte Wichten drapen. Se danzen vör Freud üm de Sneekieker un üm de Winterlinge. Se sungen dorbi en fröhlich Leed. Ik wull meist mitmaken.


Wichteldanz,...

Fief lütte Wichtelchen, de danzen üm de Sneekieker, ok wenn se de Fööt noch in Snee harrn. De danzen se sik warm.


...Wichteldanz,...

Üm de Winterlinge güng dat ok in'n Kreis. Se faten sik bi de Hannen un mit Heidi güng dat rundüm!


...Wichteldanz överall!

Ünnen an de Goornport heff ik noch Snief un Snuffi drapen.


Snief un Snuffi

De beiden wullen na den Weg kieken.
Se harrn Glück. De eerst Sünnschien harr den Snee meist ganz uplickt.

Snuffi kreeg Moot un klingel mit den Sneekieker an de Goornpuurt. Dor heff ik em de Puurt upmaakt.


Klingeling!

Nu segg ik aver Tschüüs bit to'n neegsten Winter. Denn köönt juuch mi vertellen, wat Snief un Snuffi allens beleevt hebbt!

Laat juuch dat goot gahn!
Ik freu mi al up en Weddersehn!

Juuch Tappi



Fotos un Text: Antje Heßler
6.3.2013


na baven