Dat
Bawhuus was wiss kiene Anstalt blots för Kunst-Kerls; van dei Kunst-Fraulüe,
dor stellt disse Bidrag Petra Petitpierre geb. Frieda Kessinger
vör.
Frieda Petra Kessinger, so heet Petra Petitpierre vördem as sei
sik befreiede, kööm an' 13. Mai 1905 in Zürich up dei
Welt. Dor belävde sei uk ehre Jugendtied.
Sei kunn nich gaut gaohn; as sei 9 Joahr old was, harr sei ein füürig
Hüftgelenk hatt, aover sei wull Bildhawerschke wern. So möök
Petra Petitpierre 1923 bi den Züricher Bildhawer Eduard Bick einen
Modellierkurs. 1929 wörd sei van dat Bawhuus in Dessau up ehr Anseuken
hen upnaohmen. Dor füng sei in' Oktober mit den vörschräben
Vörkurs bi Josef Albers an un was Schäulerschke in dei freien
Maolklasse van Wassili Kandinsky. Läöter, 1930, wesselde sei
in dei freie Maolklasse van Paul Klee.
Dei
Lehre äöver Bildgesette un äöver tau dei Tied loopen
Kunst wörn dei Grundlaoge van dei reellen Bawhuus-Utbillung. Uk
dei krägle Stimmung an dat Bawhuus stöttde an tau ein deipergaohn
Befaoten mit den avangardistischken Kunstbedriev. 1931 güng sei
mit Paul Klee an dei Staotlike Kunstakademie Düsseldörp, wor
sei ehr Studium 1932 as Meesterschäulerschke van Paul Klee afschlööt.
1934 hieraode sei den Architekt Hugo Petitpierre ut Murten. So bit
1940 kunn sei wägen minne Tied künstlerischk nich wiederkaomen.
Up dei eine Siete stünd ehr dei traditschionelle Frauenrulle in'
Weg as Frau in dei Kunst tau warken. Up
dei annere Siete harr sei Last mit Huushollen un Kind un b'sünners
mit ehre recht schwor loopen Ehe. Tauleßte kööm et uk
tau eine Trennung. In Murten warkede sei denn recht ievrig, was bi Utstellungen
mit dorbi, in dei Schweiz un uk in't Utland. 1945 kreeg sei mit ehre
eierste Einkelutstellung in Bern dat eierste öffentlike Anerkennen.
1957 kreeg sei eine recht leipe Polyarthirtis, so kunnde sei kiene
Arbeit mehr daun. Petra Petitpierre störv an' 23. Dezember 1959
in Murten. Sei achterlööt ein recht grootet Wark, dat bit
vandaoge hen aktuell bläben is.
Hier en Link:
Homepage
van P. Petitpierre
|