Dat Bawhuus, Deel 14:
Dat Körnhuus van Carl Fieger

Van Ludgerd Lüske

An den sünnigen Dag in Dessau lööten wi us den Beseuk van dat Körnhuus an dei Elbe nich dör dei Lappen gaohn. Bi ein mojet Kännken Kaffe mit Kauken dorbi harrn wi eine schöne Utsicht up dei feuhern Schippe. Dit Utflugslokaol Körnhuus wörd in dei Tied van 1929 bit 1930 in den Updrag van dei Stadt Dessau un dei Schultheiss-Patzenhofer Brauerei baoben up den Elbdiek dune bi den Anlegger för Dampers bawet. Dei Naome kump van einen Körnspieker, dei hier bold 120 Joahr bit 1870 stünd. Dei Plaon van Carl Fieger harr bi dat Utschrieben nich den eiersten Pries krägen, aover disse Plaon was woll van dei Kosten her günstiger.

Dat Körnhuus steiht up Staohlbetonstütten un up Backsteinmürns. Dei einkeln kubischken Bauformen sünd üm dei Käöken un den Wirtschupstrakt herümme anleggt. In dei bäöversten Etaoge wör dei Danzsaol un ein Restaurantafdeil. Van dorut kunn man up dei Elbterassen gaohn. Dei Vörbau, ein Halvkring, up dei Westsiete was eiers as ein aopen Balkon plaont, aover dei kreeg all bi't Bawen eine Glasfront. In dei neern liggen Etaoge was eine Halle mit'n Beierstand. Dei harr einen eigen Ingang.

Dat Körnhuus wörd fäökener ümmebawet. Dei Baudeile bleven grötsdendeils originaol. Siet 1966, as Denkmaol pass saneert, wiest sik dit Huus, uk vandaoge, wedder als ein Lokaol mit Geschichte up eine beste Stäe in Dessau.

Dei Sünne schinnt dör eine Glasfront up Bawhuusoart up dei Stückesammlung an dei Lokaolwand. Biller, Textilwarke un annere Saoken van wisse Bawhuuskünstlers hett man dor sammelt. Et was wisse mank ein Kännken Kaffe nödig, we'm dat alls g'nau bekieken wull. Hier was för us ein gauet Verhaolen van den länger duuren Gang dör dei Anlaoge mit dei Meesterhüüser, dei nich wietaf ligg.