Karl H. Nissen

Lübeck. Grafik vun Jutta BredowHerrenfähre


Se köönt de Biller dör Klick vergröttern. Trüch kaamt Se denn mit'n Zurück-Knoop op de Browser-Symbolliest!


Na de Herrenfähre woor de Herrenbrüch buut, Europas gröttste Klapp(brüch)

 

En Fierdag is dat nu graad nich un en Gedenkdag ok nich. Man dat is nu 108 Johr her, dat keen Fähr mehr över de Trave föhrt. Dat weer 1902, dor weer de eerste Brüüch trecht, en Dreihbrüüch. 1964 is de grote Klappbrüüch inweiht, wi harrn denn en Tietlang de gröttste Klapp in Europa. Nu hebbt wi enen Tunnel, an den sik en poor Lüüd noch nich so recht mit anfründt hebbt.


De Himmel över den Herrentunnel is nich wulkenlos

Wenn dat stimmt, wat in de Böker steiht, denn geev dat de Fähre al vör 800 Johr. De Lübecker hebbt se köfft vun den holsteiner Grafen, un se hebbt utmaakt, dat dat keen anner Fähr över de Trave geven dörv as blots disse Herrenfähr.

För den Fährmann weer dat keen licht Broot. De Trave harr allerhand Bagen un Windungen, de Seilschipp müssen männichmal treidelt warrn, dat bedüüdt, se müssen vun Land ut mit Tauwark trocken warrn. Disse Taue hebbt avers de Fähre stöört un denn geev dat Arger. Later sünd grote Schilder upstellt, de kunn man bewegen un so wüssen Schipper un de Fährmann bi Tieden, wer wo weer. As denn de Dampers kemen, geev dat wedder Arger: de möken so hohe Wellen. Veel later, as de Fährmann en Telefon kreeg, dor weer dat allens en beten lichter, he müß blots lehrn, mit dat dore Dings ümtogahn.

De Fährmann müß ok kassieren, Fährgeld. En Wagen mit en Peerd kost 2 Schilling, mit 2 Peerd kost dat 3 Schilling, en Footgänger müß 3 Penning betahlen — un en Swien kost graad so veel.

Mal hett de Fährmann sien Swiegermudder in dat Fährhuus wahnen laten. Wat weer dat för en Arger! Dat dörv nich sien, dat stünn nich in den Pachtvertrag!

Bi dat Fährhuus weer ok en lütt Gasthuus, 48 Plätze harr dat. As de Stratenbahn bet na Israelsdörp föhr, weer dat vun dor bet an de Trave nich mehr wiet, dat weer en schönen Spaziergang. In dat Gasthuus kemen jümmer mehr Besöker, avers ok nie Sorgen: nu müssen Klos her för Fruunslüüd un för Mannslüüd ok.

An 'n 26. November 1902 weer de Tiet för de Fähre to End, de nie Brüüch weer buut worrn. Vun dat Fährhuus is nix nableven, dat is 1905 afbrennt.

De Herrenfähre müß avers noch eenmal för en poor Maand wedder ran; denn en Damper hett 1909 de Dreihbrüüch rammt; mit dat Dreihn weer dat nix mehr. —
Mal aftöven, wat as nächstes kümmt.


30.1.2011


trüch


na baven


na't Flack

na de Startsiet