Notizen ut'n Maimaand 2009. Biller un Texte

Notizen ut'n Maimaand
"Drei Laub auf einer Linden Blühen also wohl, ja wohl. Sie tat viel tausend Sprünge, Ihr Herz war freudenvoll..." dree loof op bark un böken, op ellerhorn un weid — se truut sik nich to rögen, se bevert lies vör freid — se maakt ehr telgen apen, laadt schuug den himmel in — un weet nich, himmel wahnt ja in elkeen blatt dorbinn.

kolonie dat över bewahnt de elv, de elv bewahnt dat över: sachtens tröck dat op den poller, de planten klaagt nich — is dat stück holt in't water land orr fluss?

dat wasst un stiggt as blind un sücht na nix as na den heven, bet dat in't licht tosamenbricht in düsse floot vun leven

o tweeboomsmuus! de wulkenblues heevt an, as ji noch swöögt; ji höört dat nich, wiel binnerlich rapsblödenwalzer höögt.

automarders enn de marder is dood! op'n asphalt liggt he. sluss is mit kabelbieteree. min halven motor hett he verdaut — wat hett denn den stevigen racker ümhaugt? stürv he an autofohrers flöök? da dä mi nagraad leed — so leeg weer he doch nich, he weer ja graad man david gegen goliath! för plattfohrt deerten dag üm dag nehm he reinweg noch sanfte wraak. schafutert woor he; 'neem he stickt, wüss nüms; man nu op'n asphalt liggt he eensam, still un stief. — dat weer doch nich so meent! — dat helpt nich mehr.
Fotos un Texte: Marlou Lessing mehr dorvun: hier Mit de Anschaffung vun en lütte Digitaalkamera heff ik anfungen, in'n Alldag un bi't Rümströmern in min holsteensche Heimaat eenfache Biller to knipsen vun Ansichten, de mi opfullen, un mit lütte Versen dorbi to seggen, wat mi anspreken dä. In elk Maand kemen poor tosamen. Op Plattpartu bringt wi ehr mit en halv Johr Tiedünnnerscheed rut. Dat is Afsicht: Wat nu is, hebbt wi vör Oogen; man Biller un Versen schallt erinnern an dat, wat us nu feern is, un an de Annershaftigkeit vun'e Natuur in'n Johrsverloop. Marlou Lessing