Notizen ut'n Nevelmaand


dat windrad föhlt
nich regen noch tied:
de wind alleen is't,
sien gripp,
de dat levig maakt,
de rotor sien hartslag,
düsse ogenblick
sien ganze welt.
nich so an'n borrn;
hier slummert de tied,
hier is dat weten, dat töven tohuus.
nix dreiht sik; allns is
krinkloop. de spargelbetten
sünd al bestellt
för en niegen mai.


wat nimmt uns dat johr
wenn dat land de sünn
ünner sien achsel bargt?

överall
an uns weeg
blifft ehr lüchten stahn —

wieldess de weeg loopt
in düüster grenzen rin.

man nevelmaand hett weeg na överall
un vun överall. en spoor langt em.
ut dat narms duukt se op, miteens
bemött di
un böögt af. ehrn utgang verraadt se nich.

torüch blifft dat gröön, nieg
un oolt. du hest keen wahl:
truu dat, un

in en himmel vull bläder
sünner hollfast
sweevt dien nest

bit du gahn muttst.
is den weg ok
nich to truun:

de wulken seggt:
hier geiht't lang.


Fotos un Texte: Marlou Lessing
mehr dorvun: hier

Mit de Anschaffung vun en lütte Digitaalkamera heff ik anfungen, in'n Alldag un bi't Rümströmern in min holsteensche Heimaat eenfache Biller to knipsen vun Ansichten, de mi opfullen, un mit lütte Versen dorbi to seggen, wat mi anspreken dä. In elk Maand kemen poor tosamen. Op Plattpartu bringt wi ehr mit en halv Johr Tiedünnnerscheed rut. Dat is Afsicht: Wat nu is, hebbt wi vör Oogen; man Biller un Versen schallt erinnern an dat, wat us nu feern is, un an de Annershaftigkeit vun'e Natuur in'n Johrsverloop.
Marlou Lessing


trüch


na baven


na't Flack

na de Startsiet