Notizen ut'n Saatmaand 2016. Biller un Texte

Notizen ut'n Saatmaand
wo fien de wulken weiht un flüggt! dat loof so licht, so fee! as weer't noch sommer, de allee... doch tüüscht se sik, se lüggt. dat johr stellt enen afscheedskranz vun nix, vun luft un licht üm sik as enen slier vun glanz un slüppt ganz lies in de distanz... so schöön weer sien gesicht.

wo schöön de bööm den rand vun feller maalt, em wölvt un fast ümrullt, en noble brandung, de stahn blifft in de lucht un sünner landung, en bild bloots vun en vörgang, en gestalt. un kiek, mit wo veel grazie dat feld ehr antert, mit sien hang sien swungen glieden, fien kanelleert, versliert gröön mit sieden un eenzigaardig vör den himmel stellt. kann so veel anmoot kamen un bestahn sünner en oog, dat kiekt un wunnerwarkt? hett sik düss schöönheit uns to'n spott versworen? se spott uns, dat is wiss: se driggt uns nohren as wenn nix weer; se is, wat nümsnich markt — een stoop in de vullkamenheit ehrn plaan.
de wulken kemen an in't land un bröchen em den schadden. un liekers leggt se sachten sik as hannen op de matten vun wintersaat, un op den knüll un in de woolden warrt dat still... vergeten warrt de padden.
Fotos un Texte: Marlou Lessing mehr dorvun: hier Mit de Anschaffung vun en lütte Digitaalkamera heff ik anfungen, in'n Alldag un bi't Rümströmern in min holsteensche Heimaat eenfache Biller to knipsen vun Ansichten, de mi opfullen, un mit lütte Versen dorbi to seggen, wat mi anspreken dä. In elk Maand kemen poor tosamen. Op Plattpartu bringt wi ehr mit en halv Johr Tiedünnnerscheed rut. Dat is Afsicht: Wat nu is, hebbt wi vör Oogen; man Biller un Versen schallt erinnern an dat, wat us nu feern is, un an de Annershaftigkeit vun'e Natuur in'n Johrsverloop. Marlou Lessing