Notizen ut'n Saatmaand


un denn, een dag, dor sühst du em:
den regenbagen vun bethlehem.
he wannert, 'neem du wannerst, mit
un wiest as en beharrlich bidd
op een bestimmten placken dal.
gah hen! liggt dor en kind in'n stall?

du stellst di dwars. de wulk blifft stahn.
se wannelt sik in nacht.
du sühst dor bloots en maisfeld stahn,
mann nee! nu kümmt't! pass acht:
de mais steiht praat to aarn, dat feld
mutt hüüt noch af! du büst erwählt,
du büst de guldmarie, dat broot
ut'n aven haaln! ach wees so good!

opletzt kümmt de maschien to aarn,
de farvwulk wiest dorhen.
naja, denkst du in't wiedergahn,
dat weer schon beter, wenn
sik nich so veel geschichten in
mien bregen mengeln wöörn,
de sik to'n bild in dutzen finn'!
dat deit doch orrig stöörn.


dunkel steiht de stadt vun tegel,
bloots den boom sien topp
klöönsnackt mit den sünnschien kregel,
un sien hart is licht towegel.
he hett sien egen kopp!


Fotos un Texte: Marlou Lessing
mehr dorvun: hier

Mit de Anschaffung vun en lütte Digitaalkamera heff ik anfungen, in'n Alldag un bi't Rümströmern in min holsteensche Heimaat eenfache Biller to knipsen vun Ansichten, de mi opfullen, un mit lütte Versen dorbi to seggen, wat mi anspreken dä. In elk Maand kemen poor tosamen. Op Plattpartu bringt wi ehr mit en halv Johr Tiedünnnerscheed rut. Dat is Afsicht: Wat nu is, hebbt wi vör Oogen; man Biller un Versen schallt erinnern an dat, wat us nu feern is, un an de Annershaftigkeit vun'e Natuur in'n Johrsverloop.
Marlou Lessing


trüch


na baven


na't Flack

na de Startsiet