Plattsounds.de — De plattdüütsche Bandcontest

vun Thorsten Börnsen


2011 gifft't en niegen Wettstried för nedderdüütsche Musikers, den "Plattsound Bandcontest". Dat geiht nu los, Finale is in'n Harvst. So löppt dat:

  • Dat is 'n Bandwettstriet för junge Musikers twüschen 25 un 30 ut Neddersassen.
  • Mitmaken künnt enkelte Musiker oder Bands, de tominnst een plattdüütschen Song speelt.
  • Dat Stück kann uns ok eerstmol op Düütsch, Engelsch oder 'n anner Spraak tostüert warrn, bi't Översetten in't Plattdüütsche gifft dat denn Hölp vun Platt-Profis.
  • Egal, op Techno, Rock oder Rap, all Musikrichten sünd bi uns willkamen.

De Songs warrt toeerst op unse Hompage www.plattsounds.de sett. Dor hebbt wi extra 'n Afdelen "Warksteed" inricht, un dorbinnen kann so lang an de Songs klüttert un klamüstert warrn, bet dat de Musiker mit dat Resultot tofreden sünd un de Text platt is.

Enn August is Bewerbungsstopp. All Songs, de denn 'n nedderdüütschen Text hebbt, kaamt in de Afdelen "Wettstriet" un nehmt an den Vörentscheed för dat Afslussfestival an'n 8. Oktober in Ollenborg deel.

Wokeen sik dorför qualifizeert, de hett denn de Schangs, vör groot Publikum un 'n prominente Jury optotreden un Priesen to winnen. De 1. Pries is 1000 Euro, de 2. Pries 500 Euro, de drütte Pries 250 Euro.

In de Twüschentiet hebbt de Besökers vun de Siet 'n Maand lang, vun'n 31. August bet to'n 1. Oktober, de Mööglichkeit, för ehrn Favoriten in't Internet to stimmen. Daför is en besünner Pries utsett. De Sieger vun düt Internet-Voting kriegt sien Pries vun 250 Euro ok bi dat Afslussfestival.

Ok na dat Festival warrt de Homepage as Forum för junge plattdüütsche Musik bestahn blieven.

De "Fofftig Penns" und "Die Tüdelband" hebbt wiest, dat Platt un moderne Musik goot tosamenpassen doot un Plattdüütsch dat Leven ok vundaag utdrücken un beschrieven kann. Also truut sik ran un schickt Songs!

Dat is 'n Projekt vun un de Landschapsverbännen un dat Ministerium för Wetenschap un Kultur in Neddersassen. Ünner den Link findt Se de Presseinformaschoon vun Ministerium för Kultur.


Bild: www.plattsounds.de
16.1.2011

trüch


na baven


na't Flack

na de Startsiet