Unnerwägens mit Hanns Tinker

van Hans Ballach un Ludgerd Lüske

Se köönt de Fotos per Klick vergröttern. Trüch kaamt Se denn mit den Zurück-Knoop op de Browser-Symboolliest

Vörweg

Mien Frönd Hans Ballach maoket in siene Freitied heel lüttke Figuren. Wenn ick bi üm up Beseuk bün, denn frai ick mi immer wedder äöwer dei orig lüttke Welt. Dei Figuren passet in einen Ruum van rund 15 cm maol 15 cm. Achter eine Postkorten kann man dei verstäken. Hans schreew eine lüttke Geschichte tau einen Deil van siene Figurenwelt. Dei häbbe ick in Platt bröcht. Väl Pläseier!

Ludgerd Lüske

Tinkers Hanns is'n origen "Jackelmoors". Hei is staodig up'n Padd. Dat ligg woll an siene Gene. Siene Vöröllern kaomt ut Schottland. Dor neumt man dat feuhern Volk uck "Tinkers".
Nu dräöwt wi eis'n bäten in sien Fotoalbum blören.

Wi beseuket in dat Land van siene Vöröllern Sir Pommeroy. Milord krigg immer leipe Luune, wenn sien Butler, Meschken Ernst, üm eine dütschke Zeitung in dei Hand giff.

Wedder trügge an Land, achter'n Diek: Läsen is för Grundmanns Gotthelp dat üppste. Hei is Schaulmeester tau Uthülpe an dei Tetje Brusewind Schaule un baobenschkup ein Philosoph. In siene Freitied schriff hei — orig tau'n Verdrutt bi siene Schäulers.

Dei Tetje-Bruusewind-Schaule (TBS) ligg wat achtertau in'n Norden van dei Stadt Husum.

In dei Pausen "gaiht hier dei Bär aff". (Fotos: Pause an dei TBS.) Nomiene wiest ehren Schaulkameraoden Mandingo dei kolde Schullern. Hei is'ne orrige Plaoge.

Up'n Schlag werd Schaulmeester Mortensen (süht blots noch sien Spinnenvolk dör sien Kiekglas) un sien Menschke dör ein lutet Larmen upjaoget — up Nomiene ehr Pult landet eine fette Huxe. Fix haut dei beiden Lümmels van dat aopen Fenster aff.

Dei Huusmeester Carlson hätt aals nau in't Ooge, Schraoders Malte aals verschlaopen un Mandingo aals anzeddelt.

Gründen dö dei TBS dei beneumte Otto van Schliem, för den stellde man in den Schlottpark van Husum ein Denkmaol up. Weltruhm kreeg hei dör sien Utgraoben in dei Husumer Bucht.

Blots hier geef et den Schniggenmenschk, einen utstorben Sietentaug van den Homo sapiens. Van Schliem siene Theorie sägg, dat dei in urolde Tieden wehrlose Huusschniggen äöwerfüllt un ehr dat Huus wegnöhm. Mit dei Tied wöss hei immer grötter. So passden üm dei Schniggenhüser bold nich mehr (Fotos), dat kunn man ut siene verwussen Knaoken affläsen. Van Schliem kunn dör sien Forschken einsiets dat Upduken van Naokedschniggen verkloren un annersiets dei olden Wuddeln van dei Klaustrophobie dorleggen.

Ut Otto van Schliem sien Forschkungsarbeit:

Dei fossil vörkaomen Schniggenlüe stammt ut dei Husumer Bucht. Dör sien reukloset Seuken nao Schniggenhüser tau'n Bewaohnen köm et tau ein Upträen van dei Naoked-Schniggen. An dei Gelenk- un sünners uck an dei Koppknaoken giff et wisse Unformen, dorümme glöwt man, dat dei Schniggenhuuslöcker up dei Duur meist tau lüttket wörden.

Dei in disse Tied upkaomen Höhlenmenschk har einen grooten Vördeil, sien Sorgen för't Äöwerläben güng nich forts buten vör sien Huus los. Eiers as dei Schniggenmenschken Schliem affsünnern dön, wörd uck dei ehre Läbensqualität dütlick bäter. Dei Naokaomen van den Schniggenmenschk finnt man mangers vandaoge noch, man wortau is dei Schliem gaut? Väle warket in dei Schmeerstoff-Fabrik, sei häbbet dei bestschmeerten Dörns.

Dei Naokaomen van dei Höhlenmenschken läwet mit wiet aopenstaohn Fensters un Dörns, woran dei Schniggenlüe nich maol denken käönt. Disse unnerscheidlicke Läbensort verklort, worümme et bit vandaoge kiene Vermehrung tüschken disse twei Unnerorten gäben dait.

Bi dat Denkmaol för den Forschker dröpp man faoken Kannenbeckers August. Dei is Kunstmaoler un maolt an'n leiwsten dei minne vörkaomen Möwe mit Hollkrüz. August waohnt in Kotzenbüll up Eiderstedt. As hei laote in sien Läben an't Maolen köm, midden in eine Midlife-Krise, bestünd hei dorup, dat man üm up Französchk anspräken dö. För "Ohgüst" kien Problem, man mit "Kannenbecker" ... off mit "Kotzenbüll"??

Einmal in't Johr gasteierden Tinkers Hanns siene Frönde van den Circus Ballacio in dei Stadt. Dei akrobaotischken Inlaogen sorgden immer weer för Begeisterung.

As dör ein Wunner hätt dei Tante-Emma-Laoden van Eugen Wudtzke & Säöhn äöwerläwed. Dei Konsumrausch trück aohne eine Spauer vörbi.

Hier warkde man all immer nao dat Motto: "Wat wi nich häbbet, dat bruuket gi nich!" Sien Verkoopschlaoger wörd dat Backfischk-Korsett ut greunen Satin-Drell mit Staohlinlaogen för blots 1,90 M. Uck dei Ohrenbinnen gägen affstaohn Ohren kömen orig in Maude. Dei kunn man wägen dat Weer in Nordfreisland jao uck dat heele Johr äöwer drägen.

Dönnerdaogs is in Husum ein Wäkenmarkt, denn kann man Bolles mit ehren Inkoop draopen.

Dat aals stört Niemklinskis Evelyn nich, sei hätt nämlick ein Schreikind.

Up disse historischke Upnaohme ut Wacken kann man dei eierste Stünn van dat gröttste Heavy-Metal-Festival marken. As sick Bernd taufällig mit sienen Presslufthaomer gägen Kuddel mit siene Dreihörgel upbawde, köm so dei eierste Heavy-Metal-Song up. Dei Begeisterung finnt kien End un Johr för Johr trecket ut aale Welt dei Fans nao Wacken.

Dei Wacken-Ballaad

Et güng los in Wacken,
dor kunnen wi dat packen:
Ut eine groote Hand
sprüngen wi an Land.
Heel lüttket sünd wi worn,
dat gellt uck för usen Korn.
Nu sünd wi dor
un gi heel Ohr.
Ick sing jau wat,
hei brummt jau dat.

Vörher brezelt sick aale eiers maol mächtig up. Schopffs Roswita maoket dei Daomen in ehren Friseursalon moje taurechte.

Un wekker denn noch wat in dei Knippen hätt, dei köff sich forts gägenan einen feinen Koppschmuck. Schwenks Dora hätt sogor garneierte Daomenheue.

Ida un Norbert sünd uck immer dorbi, vör dat Festival werd eiers maol reell baodet, jüst as bi dei Naoberlüe.

Tinkers Hanns is uck all in südlicke Länder wän. Hei sehg all väle exotischke Deierts un frömdländschke Menschken.

An einen Dag kreeg hei eine Inlaodung tau ein Dörpfest. An dat Malheuer mit den tweibraoken Kraug kann hei sick bit vandaoge noch besinnen. Halebashis Ibrahim, dei danzen Derwisch, kreeg dat aal nich mit, un uck Mr. Singh löt sick nicks anmarken. Un off hei dei mojen Deerns ut dit Dörp tau seihn kreeg, weit uck nümms.

Wenn Tinkers Hanns bi Huus is, dröpp hei sick tau'n deipet Naodenken mit Gotthelp. In'n Kraug sinneiert hei denn: "Weeß du, aals fallt daol, blots dei Wust hätt twei. Et is jao uck noch kien'n Meester van'n Himmel daolfallen."

"Ach nee", meent Gotthelp, "wat is den mit den Baron Münchhausen, as hei up sienen Kanonenkuller seet, was dat nich dei wohre Meester, un wat glöws du denn; dat hei noch vandaoge dör dei Gägend flügg?"

Hans Ballach, November 2013
Südollnborger Platt: Ludgerd Lüske

24.3.2015