 |
De Aadebor is wedder dor! vun Antje Heßler Se köönt de Fotos per
Klick vergröttern. Trüch kaamt Se denn mit den Zurück-Knoop
op de Browser-Symboolliest.
Afwesselnd kaamt se mit lütte Stöck un leggt de in dat Nest un up de Kant. Dat is en Kamen un Gahn! Denn sett sik de Fru mal up dat Nest un probeert, up allens richtig liggt. Se kuschelt sik richtig in dat Nest. Dat süht so ut, as wenn se bald ehr Eier leggt.
Letzt Johr weer de Aadbor al an veerten März ankamen. Dat weer ganz eenfach to fröh. De Winter keem nochmal mit grote Küll un veel Snee torüch. De ganze Vagelwelt hett leden. Se kunnen keen Foder finnen. De Aadbor hett dorüm dat Wiede söcht un keem ok in Sommer nich wedder na Warnsdörp. Wi hebbt ümmer wedder na em utkeken. Dat Nest aver bleev lerrig, Unkruut möök sik in dat Nest breet. Keen Aadbor weer to sehn.
2012 hebbt wi de jungen Aadbors in Warnsdörp ranwassen sehn. Ok dor hebbt de Öllern toeerst dat Nest utbetert. Un denn hebbt de beiden Hochtiet fiert! Dorna kunn dat mit dat Eierleggen losgahn. Bi dat Utbröden hebbt Vadder un Modder sik afwesselt. Na 25 bit 38 Daag kropen de Lütten ut ehr Ei. Denn duur dat gor nich lang un se keken över den Nestrand. Dat weer ümmer en grootoordigen Anblick, wenn ener vun de beiden de Flünken utbreedt un dorvun segel. Ik heff lang luern müsst, bit ik mal en Bild dorvun maken kunn.
Na 50 bit 100 Daag sünd de jungen Aadbors flügge. Selten bün ik so oft na Warnsdörp föhrt. Aver ik harr Glück. Toeerst heff ik blots bi dat eerst Flünkenslagen tokeken. Se hopsen wat in de Luft, lannen aver ümmer wedder up den Nestrand. Denn aver an enen Dag kreeg ik sogor den Start mit. Wat de Lütten wull stolt weern, as se wi ehr Öllern sik in de Luft afheben kunnen. Villicht heff ik dütt Johr wedder Glück un kann de lütten Aadbors afflegen sehn!
20.4.2014
|
