Bottervageljohr 2018

In de verleden Johrn sünd uns flegen Insekten gewaltig trüchgahn. Dorüm hebbt wi düt Johr en Kalenner uns Bottervagels toegnet. Thomas Seemann hett för en Fotokalenner (rutbröcht vun sien Team "Tandem"/OBW) de schöönsten Bottervagelfotos tohoopstellt. Wi bringt de Fotos hier, stellt de Bottervagels vör un ehrt ehr mit en Vers.

Se köönt de Fotos per Klick vergröttern. Trüch kaamt Se denn mit den Zurück-Knoop op de Browser-Symboolliest.


Bottervagel vun'n Augustmaand:
Dat Dagpfauenoog

vun Thomas Seemann un Marlou Lessing


Eentlich müss dat ja op reines Platt "Pagelunenoog" heten, man "Pfauenoog" geiht ok. Düsse smucke Oogenfalter weer al de Bottervagel vun't Johr 2009. Wievken un Heken seht sik liek.


Aavtblöden smeckt good!

Dat Ogenspeel op de Flünken is prächtig: En blaages Funkelwark vun gläunige Ogen kiekt di ut füürigen Grund an — tominnst vun de Bavensiet; vun nerrn seht de Flünken heel unschienbor ut, griesbruun un schuppig, as'n Stück Holt.


Ünnersiet vun't Dagpfauenoog. Bild Didier Descouens/Wikimedia Commons

Wat sien smucke "Ogen" nu de vun Pagelunen liek seht, glööv ik nich. Spontan denk ik dorbi ehhrder an de Ogen vun en Tiger, ok vunwegen den orangen Grund. Dat Bild rechts is de Bewies: Pagelunen hebbt swatte Ogen. Avers ehr Blaag strahlt liekso schöön! So is de Pageluun sachs in den Bottervagel sien Naam kamen.

Den Grund för düssen Trick vun de Natuur hebbt wi al mal verklaart: Dat is de effiziente Kommunikation mit Freetfiende, also Vagels, Igel orr Müüs. Sitt de Bottervagel an en Boom, klappt he de Flünken tosamen un seggt: "Ik bün bloots en dröög Blatt, bloots en Stück Holt, mi kannst nich freten!" Hett de Fiend em avers utfunnen, denn klappt he de Flünken op un seggt: "Buh! Ik bün en groot wild Deert mit glöhnige Ogen! Ik bün di över!" Dorbi köönt de Falters ok noch zischen! — Op't best avers flüggt se denn weg.

Dat dat so veel Ogenfalters gifft un dat se all kandidel leeevt, bewiest, dat düsse Strategie funscheneert. Sünst weern se utstorven. Wenn de hungrige Vagel sä: "Ha! Du wullt en Tiger ween? Dor lach ik doch över!" un den Bottervagel liekers freten wöör — dennn wöör sik de Natuur nienich de Möhg maken, düsse Ogen to teknen.

Dagpfauenogen sünd vun ehr Levenswies Allrounder un kaamt in ganz Eurasien vör, ok sünnerlich in minschenmaakte Kulturlandschapen. Se hebbt de Brennettel geern, legggt dor ehr Eier op, denn ehr Rupen bruukt de to'n Freten — un de Brennnettel kümmt ok in't Gefolg vun Minschen veel vör, wieldat se veel Stickstoff in'n Borrn mag, un Minschen bringt den Stickstoff dör Düngen in den Borrn. Ik krigg jümmer gröttern Respekt vör düsse Plant. Rund 50 Bottervagelaarten bruukt de Brennettel to'n Överleven för ehr Rupen! Un de Rupen freet de Plant denn ja ok weg, wi weet ja, wo ratzekahl Rupen freten köönt. Wi schulln de Brennnettel wirklich nich överall utrieten! För uns Holsteiners is se ja ok de Naschonaalplant.


Sünnenhoot mag he avers ok!

Dagpfauenogen sünd ganz taage Kanuten, se överwintert ok in Keller usw. un fleegt denn al wedder in'n Mai los. As ik Kind weer, geev dat noch en ganzen Barg Pfauenogen, se weern överall un flögen uns ok faken in de Stuuv. Nu sünd se wat rorer worrn; man jümmers noch seh ik ehr af un an flegen orr ut de Vageldränk drinken. Ok doran schulln wi in düssen drögen Sommer denken: Geevt de Insekten to drinken!


Start vun'n blöhen Aavttelg

 

ogen
kiekt mi an,
wüllt, dat ik
dör ehr seh:
de welt
ehrn duft
dat ruseln vun de bööm...

ik kiek
un kiek
dör pagelunenblaag...
ik bün
ganz oog


5.8.2018


na baven