Nieswurz un Christroos
— Helleborus —

vun Antje Heßler


De Biller köönt Se per Klick vergröttern! Torüch kaamt Se denn mit'n Zurück-Knoop vun den Browser.

 


Stinkende Nieswurz

In mien Goorn wasst dree verscheden Oorten vun Nieswurz: De stinkende Nieswurz, de witte Sneeroos un de rode Sneeroos. Rifft man de drögen Wötteln mütt man niesen. Doher hebbt de Bloom den Naam Nieswurz kregen. Se warrt ok Christrosen oder Lenzrosen nöömt un höört alltohoop to de Hahnenfußgewächse.

Dat Besünnere an düsse Bloom is, dat se in de Wintertiet blöht. Sülvst bi Ies un Snee drifft se ehr Blödenknuppen dörch den Snee. Se blöht vun den Christmaand bit in den Märzenmaand.


Rose Sneerose in'n Snee


Balgenfrücht bi de witte Christroos

Wieldat in de Wintertiet kuum Insekten fleegt un to'n Bestöven kaamt, driggt se lang bit in't Fröhjohr ehr Blöden. De Narven blievt länger befruchtbor. Wenn't nödig warrt, bestöövt se sik ok mit egne Pollen. Ut de Fruchtbläder wasst bit to acht Balgenfrüchte. In de riept de Samen. De warrt in Sommer vun Ameisen un Snicken wieder verdeelt.

Uns Goorners tücht besünners geern de witte Sneeroos. Se behannelt se so, dat se in de Wiehnachtstiet ehr Blöden upmaakt. Denn warrt se as Christrosen verköfft.
Wieldat se so smucke Blöden hebbt, gifft dat veel Legenden över de Christroos. Se is aver ok en Heelplant un warrt noch hüüt as Huusmiddel nütt. Dat Pulver vun de Wötteln wöör fröher as Niespulver ünner den Snuuftabak mengt.
Alle Oorten vun Nieswurz sünd giftig.

Blomensüstern — Striethamels?

Buten in de Blomenrabatt stünnen twee Blomensüstern. Al in den Nevelmaand güng en Trecken dörch ehr Wötteln. Noch weern se ünner dat verdröögt Loof versteekt. Dat leeg as en warme Deek över de Blomen. Aver nu kunnen se de Tiet nich mehr aftöven. Se recken un strecken sik un schöven de warme Deek an de Siet. Mit de eersten lütten Blääd kregen beid niege Knuppen. De en harr witte Knuppen un de anner düsterrode. De twee stünnen nich wiet uteenanner. Se kunnen sik gegensiedig goot beluren.

Glieks keek de witte na ehr rode Süster. "Ha, ik bün man de eerst, ik bün al dor!" "Tööv man af," dach de rode Bloom, "ik kaam ok un war di bald överhalen!", dorbi reck se sik düchtig in de Hööcht. Dat duur gor nich lang un se weer liek groot as ehr witte Süster. De wöör dat wies. "Vun di snackt aver nümms," reep dor de witte Bloom. "Över mi hett man sogoor en Leed schreven, wieldat ik to Wiehnachten in den Sneemaand mien Blöden upmaak! Man hett mi den fienen Namen Sneeroos geven. Ok war ik Christroos ropen!" "Un wenn denn wohrhaftig mal Snee fallt, bün ik in den Snee veel beter uttomaken as du", full ehr de rode Süster in't Wort.

Dat güng noch en ganzen Stoot so wieder. Dor keem en Stimm vun ganz achtern ut den Goorn: "Geiht dat al wedder mit de Striederee mank juuch los?" mell sik en gröön Bloom. "Ik höör doch ok to juuch. Bün ut de glieke Familie. Ok ik driev mien Blöden in de Wintertied!" De beiden Striethamels dreihn sik üm un keken na achtern. Se kunnen ehr anner Süster aver nich sehn. De stünn to wiet weg. Se kunnen se blots höörn.

Na'n poor Daag harrn de beiden Bloom al ehr Blöden upmaakt. Se weern al so groot, dat en lütt Deern de roden un witten Blöden wies wöör. Se wull glieks welk plücken. Dat harr ehr Modder ut dat Kökenfinster mitkregen. Mit Sorg in de Stimm reep se: "Nich mit de nakelten Hannen anfaten, de Bloom sünd bannig giftig!" "Ok de witten Bloom?" fraag de lütt Deern, "dat sünd doch Christrosen!"

Dor hett se ehr lütt Deern verkloort, dat beide Bloom ut de glieke Familie kaamt. Hett ehr ok noch de gröne Bloom achtern ut den Goorn wiest. "Dat sünd alltohoop Nieswurz, de sünd all giftig. De sall man nich mit blode Hannen anfaten. De gröön dor achtern heet sogoor stinkender Nieswurz!" "Denn sünd dat doch egentlich all Christrosen?" fraag de lütt mit grote Ogen. "Worüm hett den de witte Bloom alleen den Naam Christroos kregen?"

"Dat heet, dat en Mönk meern in'n Winter, as he ünnerwegens weer, de witte Bloom funnen hett. Se weer merrn mank ieskolen Snee an't Blöhen. Un dat weer in de Wiehnachtstied. De witten Blöden hebbtem so goot gefullen, dat em en Leed infullen is. Dat Leed kennt wi all: Es ist ein Ros entsprungen... " De Deern keek ehr Modder an. "Wenn he nu en rode Sneeroos funnen harr, weer dat denn ok en Christroos woorn?" —

Dütt allens harrn de Bloom, de beiden Striethamels in den Goorn höört. Dor meen de rode Sneeroos to de witte Sneeroos: "Wi wüllt ni wedder miteenanner strieden. Freut wi uns, dat wi hier in den Goorn so gut wassen köönt!" De gröön Nieswurz nik mit den Kopp dorto un reep vun ünnen ut den Goorn: "In't Öller seht wi doch alltohoop teemlich liek ut. Uns smucken Blöden sünd denn so'n beten griesgröön!"


Witte Sneeroos, verblöht


Rode Sneeroos, verblöht


All Biller: © Antje Heßler
20.12.2009


na baven