Coccionella

vun Anke Nissen


De Biller köönt Se per Klick vergröttern!
Torüch kaamt Se denn mit'n Zurück-Knoop vun den Browser.

Anner Namen:


Colchinille, Cochenille, Koschenille
Karmin, Karminsäure
Sammelt warrt:


de dröögten Weibchen vun de Nopalschildluus (Coccus cacti)

Warrt bruukt:


Bevör de chemischen Farven, de Teerfarven, erfunnen worrn sünd, weer Coccionella een vun de wichtigsten Farven för dat Färven vun Textilien un in de Maleri.
Fien-pulvert wörr 't nahmen för Tähnpulver, Tähnpasta, Mundwater.


Dode Lüüs, nix as dode Lüüs!

Coccionella is en tierisch Droge. Coccionella sünd de dröögten Weibchen vun de Nopalschildluus (Coccus cacti). Se warrt regelrecht zücht, se mehrt sik flietig, se köönt veermal in 't Johr afsammelt warrn. Se hebbt Karminsäure in sik.


Dree Liedensgenossinnen

Karmin is de rode Farvstoff vun de Coccionella. Disse Farvstoff deent to 'n Farven vun kosmetische Produkte, as Schminken, Lippenstift, Hoorwater, Tähnpleegmittel, man ok vun Nahrungsmittel un söten Zuckerkraam, vun Tinte un Tusche un vun den begängschen Drank "Campari". Ja — Campariroot sünd dode Cochenille-Lüüs!

Aver dat Cochinelle-Root kann hüüt al synthetisch, also chemisch herstellt warrn.

Ik heff leest, dat de Azteken al de Cochenille-Schildluuus to 'n Färven vun Tüüg un Levensmittel bruukt hebbt. Karminlack warrt blots in de Maleri bruukt.

Ik bruuk Coccionella elkeen Johr, üm Oostern en wunnerschöön Pink up unse Oostereier to "tövern". Ik kööp de lütten Lüüs in de Apotheek. Wenn een ganz nipp un nau henkiekt, kann een de lütten Deerten wies warrn.


De Haas weer da!

Uns beiden Enkeldeerns un ik verwannelt de Köök denn in en Ort Hexenköök. Wi stellt poor Pött up 'n Herd, füllt Water rin un geevt denn in elkeen Pott een vun de Färbedrogen. De warrt denn eerstmal — tohoop mit lütt beten Essig un Solt — to 'n Kaken bröcht. Se mütten denn so 10 Minuten utkaken.

Wi nehmt — as Bispill — Kamille. De gifft en schöön hell österlich Geel. De Farv warrt an'n schöönsten, wenn een witte Eier dorför nimmt.

För en satt, deep Pink kaakt wi Cochinelle ut. Hier kann een goot witte un brune Eier för nehmen, dordörch entstaht denn hübsche ünnerscheedlich Farvnuancen.


"Hm, wat? Ik weet vun nix!" — Klaar: Sien Naam is Haas! (Foto: Antje Heßler)

Blauholz [Lignum campechianum] hebbt wi ok mal utprobeert. De Eier wörrn so düüsterblaag, dat se binah swart wirken. Aver — wunnerschöön!!

Gröne Eier hebbt wi mit Malven versöcht. Wi weern aver nich recht tofreden. Ok mit Mate un mit Brennetteln hebbt wi farvt. Hett uns ok nich gefullen. Wenn överhaupt, denn warrt dat blots wat mit witte Eier. — Anner Mal nehmt wi Spinat, mal sehen, wat wi dor mehr Glück mit hebbt.

Wunnerschöön warrt Eier, wenn man de in enen Sud vun Walnuttschalen leggt. Se warrt deep bruun un seht ut as Eier ut Schokolaad.

Solang as de Krüder kaken, pieken de Deerns mit veel Möh — ünner Ächzen un Stöhnen — in elkeen Ei en lütt Lock. Lene güng disse Arbeit en beten wat gauer vun de Hand. Stineken weer jümmers in Sorg, ehr kunn een vun disse "kostborn" Höhnerprodukte tweigahn.


Mit Coccionella farvt

Un denn füng Stineken an, de eersten Eier in den Coccionella-Pott to leggen. De Klock wörr up söss Minuten stellt.
Lene bestück den Kamillenpott.

Allens mütt ja nu gau gahn, allens is hitt, allens damp, vör den Herd is för drei "Köökschen" kuum Platz.

As de Eier goot weern, hebbt wi se ünner kolt Water afschreckt.

Wi hebbt poor Eier mit Fett inreven (dor kann man en Speckswart, Öl orrer Botter för nehmen), denn kriegt de Eier enen besünners schönen Glanz. Man miene Enkeldeerns weern de Meen, dat de annern Eier — also de ahn Fett — beter utseht. Also hebbt wi se so laten.

De Deerns hebbt denn Baguette-Brot in Schieven sneden, de Botter fein smückt, se hebbt de wunnerschöön farvten Eier hitt in enen mit Heu utleggten Korv packt un dregen allens to Disch.

Dat weer ene fröhliche Rund, de sik över de 70 farvten Ostereier hermaakt hett.
In uns Köök aver weer en Rüük, as weern dor Hexen an 't Wark west.


Fotos: Anke Nissen
5.4.2010


na baven