De Eemkenhügel — Deel 1:
Warme Sünnenstrahlen!

vun Antje Heßler


na Deel 2
na Deel 3

Se köönt de Fotos per Klick vergröttern. Trüch kaamt Se denn mit den Zurück-Knoop op de Browser-Symboolliest.

De halve Februar weer al vörbi! Endlich geev dat mal en Dag Sünnenschien. Verleden Johr in'n Februar harrn wi al mehr Daag godes Weder mit warmen Sünnenschien. Dor weern wi mit Auto ünnerwegens. Wi föhrn in den Woold. De leeg an de ole Tramünner Landstraat. Vun't Auto weern wi enen Eemkenhügel vun de roden Wooldeemken wies woorn. Den müssen wi doch ünnersöken!

Ok dütt Johr hebbt wi wedder enen Eemkenhügel sehn. De sehg meist genauso ut as verleden Johr. Un dor weer nich blots en Hügel. Dat weer'n noch mehr. De Hügel harrn all grote Dellen. Wer harr de Hügel twei maakt? Seker weern Kinner mit Stöcker dorbi ween. Wullen ünnersöken, op de Eemken noch leven. Unerhört, de Eemken stünnen doch ünner Naturschutz!

Wi hebbt uns alle Hügel genau ankeken. Narms röög sik wat. Keen Eemken weer to sehn. De höllen seker noch Winterslaap in de ünnereerdschen Gänge. De böberste Deel vun de Hügel deen för de Eemken as Frostschutz.


Wat sünd dat för Dellen?!

So'n Hügel kann över de Eer bit to twee Meter hoch warrn. Ünner de Eer is he oftins so groot as över de Eer. De Temperatur güng in Winter in den Hügel ok ünner null Graad. Denn fallt de Eemken in so'ne Oort Kältestarre un bruukt keen Foder. Eerst wenn de Sünn mit ehre warmen Strahlen up den Hupen schient, warrd de Eemken waak un nehmt up de Kupp vun den Hupen en Sünnenbad. Mit ehrn upwarmten Liev bringt se Warms in den Bu. Dat Leven fung denn wedder an.


Madam Eemk — oder eher Mamsell, denn Madam is hier bloots de Königin

In so'n Eemkenhügel leevten vun 100000 — 2000000 (hunnertdusend bit twee Millioonen) Eemken. In de böveren Schichten weer dat Bumaterial Dannennadel. In't Innere weer veel Eer dormang. Anleggt hebbt de Eemken de Hügel meist an'n Wooldrand an sünnige Placken. Wi hebbt uns den Placken markt un wüllt de Eemken övert Johr wieder bekieken. Wi müssen doch rutkriegen, nümms de Hügel demoleert hett. Ok weern wi al neescherig, wat wi nu to weten un to sehn kregen.


na Deel 2
21.2.2016


na baven