Dat Nest in Besitt nehmen

In't fardig Nest sett!

vun Antje Heßler


Se köönt de Fotos per Klick vergröttern. Trüch kaamt Se denn mit den Zurück-Knoop op de Browser-Symboolliest.

Up unsen Spazeergang an den Karpendiek lang luurt wi ümmer na dat Swanennest. In de letzten Johrn seet dor in't Fröhjohr ümmer en Swaan up dat Nest. Aver vun de beiden Swaans weer nix to sehn. Dörch de Sneelast weer dat ganze Schilf in düssen Winter ümbraken. Dat leddig Nest weer dordörch goot uttomaken.


Dat lerrig Nest


Dat Nest is al mit Dunen polstert

Enes Dags beweg sik wat up dat Nest. Dor weer en Vagel — un keen Swaan. De Vagel weer meist so groot as en Swaan. Aver dat Fedderkleed weer nich witt, dat weer griesgrau mit lütte witte Feddern ünnern Buuk. Dat müssen wi ünnersöken.


De Goos ritt sik ehr egen Dunen ut de Bost...

De Vagel seet dor ganz ruhig in den Avendsünnenschien. Denn stünn he ok mal up, plück sik weke Dunen ut sien Fedderkleed un polster dat Nest dormit ut. Dat weer en Graugoos! De harr sik ganz eenfach in dat fardige Swanennest sett. Hett dat blots noch mit ehr weken, warmen Dunen verbetert. Wat wull passeer, wenn de Swaans wedder up ehr Nest wullen?

Nu kiekt wi jeden Dag na de Graugoos. Se sitt dor alleen un ganz ruhig up dat Nest. Mal kiekt se na de en Siet un mal na de anner. Vun den Ganter weer nix to sehn. Wi hebbt in unsen Kallener anschreven, siet wann se up dat Nest sitt. Üm un bi dörtig Daag duurt dat, bit de Lütten ut de Eier kruupt. To geern wüllt wi doch de lütten Gössel bekieken!


...dat Nest to polstern! So'n Opperbereitschap röögt een an


De Diek liggt ruhig...


...de Goos maakt Paus

Enes Daags wöörn wi enen Swaan wies. He swomm upreegt up den Diek hin un her in de Richt vun dat Nest. De Graugoos harr em ok sehn, sloog mit ehr Flünken un zisch den Swaan an. Denn reep se luut um Hölp. Dat duur gor nich lang, un över den Diek fullen fief Graugöös in. Mit "Ga, ga, ga!" leten se sik up dat ümbraken Schilf daal.

Wat dat wull afgeev? De Göös recken ehr Köpp in de Höcht un slögen mit ehr Flünken. De Swaan möök ok de Flünken breet, wull de Graugoos vun sien Nest verdrieven. Aver de Göös weern in de Övertall un hebbt den Swaan verjaagt.


Swaan un Goos (vörn rechts) swemmt Patrouille


So'n Schiet!, denkt de Swaan

De Goosmodder harr üm Hölp ropen un dat hebbt de annern Göös höört. Up den Diek patruleern in de neegsten Daag noch ümmer en poor Göös. Se passen up un swömmen vör dat Nest hin un her! Ok de Ganter weer sietdem ümmer dor. Den Swaan harrn se verjaagt, he leet sik nich mehr sehn. Na de Upregen swömm de Ganter mit sien Fru en poor Runnen up den Diek. Vörher harr se de Eier fien mit Dunen todeckt. Se düker noch mal richtig ünner Water un schüttel sik den Stoff ut de Feddern. Denn steeg se dörch dat Schilf up ehr Nest. Vörher dreih se noch mal de Eier üm. Nu müssen bald de lütten Gössel ut de Eier krupen. Wo veel Eier wull in dat Nest legen? De Tiet weer üm. Vör 28 Daag harr de Goos sik up de Eier sett.


He un se...


...polstert na, ...


...bröödt...


...bröödt...


...deckt de Eier af...


...swemmt en Runn...


...gaht trüch an de Arbeit...


...un bröödt. Gott, is dat ööd!


Endlich!

Wi keken ümmer wedder na dat Nest. Aver noch weer nix to sehn. Dor, uns Gedüür harr sik endlich lohnt! An Himmelfohrtsdag swömmen de stolten Öllern mit ehr Kinner över den Diek. Fief lütte Wullbällchen hebbt wi tellt. Vun de Öllern goot höödt, paddeln de lütten genau maank de beiden över den Diek! Wat hebbt wi uns freut. Wi kunnen uns gor nich vun den Anblick trennen.

 


Sooooo sööt!

Up unsen Nahuusweg müssen wi natüürlich noch wedder an den Diek vörbi. De lütte Familie weer nich to sehn. De weern up de Wisch un freten vun dat frische gröne Gras. Se harrn de Ramp funnen, de för Watervagels buut woorn weer. Satt un mööd kropen de Lütten na'n Stoot ünner de Flünken vun Modder. Vadder Ganter pass mit upreckten Kopp up sien Familie up.

Twee Daag later keken wi wedder na de Goosfamilie. De harrn sik in Sünnenschien in dat Gras daallaten. Vadder un Modder passen up. Dor kemen över de Wisch lütte Kinner anlopen. Mit "Oh, wie süss!" hebbt se de Gössel hochjaagt.


Mama schuucht ehr lüttje Bande...


...achter Papa ran

Vadder un Modder jumpen över de Holtkant in't Water. De Lütten kregen Bang, breden ehr lütten Flünken ut un jumpen achterna. Dat Water spritt richtig hoch. In Kiellinie swommen se nu up den Diek. Dor föhlten se sik seker.

Up dat Water kunnen se aver nich de Nacht tobringen. Se müssen doch wedder an Land. Dat Nest söökt se nich wedder up. Wi hebbt noch en ganzen Stoot töövt.

Endlich kemen se mit ehr Öllern wedder över de Ramp an Land un hebbt sik ünner Modders Flünken verkrapen. En keek neescherig ünner de Feddern rut.

 


Breit aus die Flügel beide... Dat Inbild vun Borgenheit

Annern Dag weern noch alle fief dor. Wedder swömmen se mit ehr Öllern up den Diek. Dorna kemen se an Land un freten sik satt. Wüllt höpen, dat de lütten Gössel groot warrd. Dat Hunnen un anner Deerten sik nich över de sööten Gössel hermaakt. Weer ja ok en Jammer. De Goosfamilie up den Karpendiek is en richtigen Hinkieker för vele Tramünner woorn.

 


20.5.2013


na baven