Da bün ik!Besöök up den Karpendiek: Goossager!

vun Antje Heßler


De Biller köönt Se per Klick vergröttern!
Torüch kaamt Se denn mit'n Zurück-Knoop vun den Browser.

En Aant? Nee, en Goossager!"Kiek mal, wat is denn dat för en Aant dor up den Diek?", fraag mien Mann. "De is meist ganz witt un ornlich wat gröter as de annern Aanten!" Nu wöör ik se ok wies. De grote Aant trock ehr Runnen mank de Stockaanten. "Du, dat is en Gänsesäger," anter ik. "Dat is en Mannskerl! Denn is sien Fru seker ok nich wiet!" Un wohrhaftig, glieks as wi över de lütte Brüch güngen, wöörn wi up den tweeten Diek sien Fru wies. De sehg ganz anners ut. Ehr Fedderkleed weer in de Hauptsaak gries. Blots de Kopp harr bruunröötlich Feddern.Fru Goossager

Dat weer ja meist en lütt Sensatschoon, Gänsesäger bi uns up den Karpendiek! Zappen un Stockaanten weern Duergäst. Aver Goossager harrn wi up den lütten Karpendiek noch nich to sehn kregen. Nu güng dääglich uns Spazeergang na den Karpendiek. Bi goot Weder kemen de Goossager sogor an Land. Leggten sik dor in de warme Sünn. De Erpel weer ornlich wat dickdreevsch. He leet uns teemlich dicht an sik ran. Aver sien Fru weer bannig schuug, se güng ümmer glieks to Water, wenn wi in ehr Neegt kemen.

He an Land, se op Afstand

"Ich bin von Kopf bis Fuß auf Liebe eingestellt..."De Mannslüüd överleggt sik dat noch...

Eenmal harr de Aant sogor twee Erpel bi sik. Wat dat wull afgeev? Dat weer wull de Balztiet. De Erpel harrn ehr Prunkkleed an. De en wies de Fru stolt sien witten Buuk. Aver as wi uns dat Speelwark wat neger bekieken wullen, güngen de dree in de Luft. Se flögen altohoop in Richt Woold dorvun. An'n neegsten Dag weern se wedder to dritt an den Diek. De Erpel legHerr un Fru Goossageren in de Sünn. De Aant swömm unruhig up den Diek hin un her un reep na de Erpel. Aver de leten sik nich ut de Rooh bringen.

Nu hebbt wi de Goossager al en poor Daag nich mehr sehn. De Balz is wull vörbi un de Fru hett en Boomhöhl in den Woold funnen. Dor kunn se ehr Eier afleggen. Villicht harrn de Natuurschütter ok enen Nistkassen för se buut. Man welk vun uns twee Erpel — wenn överhaupt! — nu Vadder warrt, dat weet Fru Goossager alleen!

Herr un Fru Goossager  hollt Siesta, dat Blesshuhn is noch ingang

Gänsesäger (Mergus merganser)

Herr Goossager seggt: Klei mi an'n Steert!De Goossager is en Aantenvagel. He is ornlich wat gröter as de Stockaant. Sien Grött liggt twischen Goos un Aant. De grote rode Snavel fallt in't Oog. An de Spitz is he as so'n Haken na ünnen bagen. Dormit kann de Goossager goot Fisch fangen. Lütte Fisch bit to teihn Zentimeters lang mag he besünners geern. De Snavel süht en Saag liek; dorher hett he den Naam Gänsesäger kregen.

Erpel un Aanten hebbt en recht ünnerscheedlich Fedderkleed. Dat Prunkkleed vun de Erpel is in de Hauptsaak witt mit swarten Kopp. Blots up den Rüüch hebbt se swarte Feddern. Dat Fedderkleed vunFru Goossager de Aanten is in de Hauptsaak gries. Blots de Farv vun den Kopp is rootbruun. In de glieke Farv hebbt se en Fedderbüschel an'n Achterkopp. De witte Kehl vun de Aanten is scharp gegen den Kopp afsett.

De Goossager leevt meisttiets in Noorden vun Europa. Bi uns is he mehrstendeels en Wintergast. He bröödt geern in de Neegde vun Water un Woold. He is en Höhlenbröder. In dat Nest leggt de Aant acht bit twölf Eier. Na de Balz verlött de Erpel se. De Brööderee möökt se ganz alleen. Na rund dörtig Daag kruupt de lütten Küken ut dat Ei. As de Nester meisttiets baben in en Boomhöhl sünd, mütt de lütten Küken glieks na den eersten Dag up de Eer hindaal jumpen. Dorto nehmt se de lütten Stummelflünken as Fallschirm to Hölp.

Nu laat mi man in Roh, ik mutt slapen!Na den Sprung geiht Modder gau mit ehr Kinner to Water. Up Strööm leggt se grote Strecken mit ehr Kinner torüch. In de eerst Tiet dörvt de Lütten huckepack up Modders Rüüch mitföhrn. Na üm un bi söventig Daag sünd de jungen Küken flügge. In't ehr tweet Levensjohr künnt se denn sülven Küken groot trecken. Un denn seht wi den Nawuss wedder op uns' Karpendiek balzen!


20.4.2008


na baven