De
Hering is dor!
Vun Antje Heßler
De Biller köönt Se per
Klick vergröttern!
Up gröön, solten, suer oder rökerten Hering, dat gifft
wull kuum enen Fisch, de up so veel ünnerscheedsche Oort bi uns
to'n Eten up den Disch kümmt. In fröher Tieden hett he oftins
de Minschen sogor vör't Verhungern bewohrt. Welkeen wunnert dat
denn, dat veel Minschen up de Been sünd, wenn in de Laichtied
Heringsschwarms meldt warrd.
Man vertellt sik, fröher wöör sogor de Gottsdeenst
ünnerbraken. En Uppasser stünn an Haven un luur na den Heringsschwarm.
Wenn he Bescheed geev, reep de Köster luut: "De Hering sünd
dor!" Denn hett de Prester sien Predigt ünnerbraken, un
de Fischer lepen na ehr Boot in'n Haven.
Nu
is dat wedder so wiet, de Hering sünd dor. Dat müss ik mi
doch ankieken. Fröhmorgens bün ik mit mien Fohrrad na'n
Haven rünner föhrt. De Lüttfischer legen al an de Kaimuer.
De Netten weern mit Hering prallvull. In ehr Ööltüüch
stünnen de Fischer mank de vullen Netten. Se müssen jedeen
Hering enkelt ut dat Nett pulen. Denn smeten se de Hering in en Plastikwann.
Nu müssen noch de Köpp af un de Darms rut. Dorbi helpen
ehr de Fruunslüüd. En lütten Jung weer ok dorbi. De
heele Affall keem denn över Bord. De Möwen
legen al up de Luur, weern an't Schriegen un störten sik up de
Resten. An't Enn wöörn de Hering noch mit Water afspöölt
un denn to'n Verkoop verladen.
Egens wull ik mi Hering köpen. De Lüttfischer verkööpt
ok direkt vun Bord den Fisch. Männig Lüüd slepen grote
Tüten vull Hering na Huus. Mi weer aver bi't Tokieken de Lust
vergahn.
Up
den Nahuusweg föhr ik an de Trav lang. Up'n Kai stünnen
dicht an dicht de Angler. Aver de Hering wull nich so recht anbieten,
dat weer wull noch to koolt.
An nächsten Dag sünd wi denn mit dat Auto na Schlutup an
den Haven föhrt. Dor harrn wi mehr Glück. Ok hier stünnen
de Anglers dicht an dicht. Üm enen goden Angelplacken to kriegen,
weern eenige al morgens üm fief to Stell. Wi hebbt denn enen
ganzen Stoot tokeken. Rechts un links vun mi trocken de Angler de
sülvern blenkern Heringe mit de Paternosterangel ut dat Water.
Mit veel Glück
harrn ok welk glieks twee Hering an de Angel. De zappelnden Fisch
nehmen se vun den Haken. Dormit de Fisch nich ut de Hand glitsch,
nehmen se en Dook tohelp. Denn kreeg he mit den Hamer enen lütten
Slag up den Kopp un keem in den Ammer. Düsse Oort, mit den Hering
ümtogahn, hett mi gefullen.
Man
seggt, Heringe, de bi't Angeln vun den Haken fallt un na de man sik
bücken mutt, heet "Bücklinge". Ik kenn den Bückling
blots as Rökerhering. De süht ut as Gold. Wi weern annerletzt
in Eckernför, dor steiht an en Rökerie: "In Eckernför
dor hebbt se't rut, ut Sülver Gold to maken!" De Hering
is överhaupt de Fisch, dat is al seggt woorn, de bi uns in Düütschland
an mehrsten up den Disch kümmt.
Hüütigendaags kümmt he oftins ok in de Doos to uns.
De Hering is even en heel intressanten Fisch. He hett sogor wat mit
de Geschicht to doon. De Hanseaten hebbt groten Hannel mit em dreven.
Un dorbi is ehr dat nich slecht gahn. Ok de Lüneburger hebbt
mit ehr Solt Godes dorvun hatt. Schon üm dat Johr 1000 hett man
den Hering insolt un in Tunnen packt. So weer he över lange Tiet
to geneten. Man kunn em up grote Seefohrten mitnehmen un harr so länger
wat to'n Eten. He hett dordörch dorto bidragen, annere Kontinente
to entdecken.
Nu noch wat to den Fisch, den Hering:
He ist en Swarmfisch, leevt in Oost- un Nordsee un ok noch wieder
in't Nordmeer. He is en Koltwaterfisch. Sien Nahrung besteiht in de
Hauptsaak ut Plankton. So'n Heringsswarm kann vele hunnert Tunnen
Fisch groot sien. Düsse velen Fisch warrd "Heringsbarge"
nöömt. De Swarm bedüüd för de Heringe en
Sekerheit. Ok findt he in den Swarm bi de Laichwannerung seker enen
Partner. Se treckt geern de Strööm hoch un laicht in siedes
Water un up Sandbänke. 20000 bet 50000 Eier köönt de
Heringe afleggen. In twee Weken kruupt de Larven ut't Ei. Sünd
de lütten Heringe 2 cm groot, kriggt se de eersten Schuppen.
De Hering warrt bit to 40 cm lang un kann sogor över 20 Johr
oolt warrn. In't Water lüücht he sülvern, vun geel
över gröön un blau in vele Farven. Man nöömt
em ok "dat Sülver vun't Meer".
Wenn wi in August in de Oostsee baad, hebbt wi al oftins en Swarm
junge Heringe sehn. De sünd denn so 4 bit 5 cm lang. Se lüücht
sülvern. Wenn dat Water besonners schöön ruhig is,
springt se ok. Dat is denn ümmer en besonnere Freud för
uns.
|