Dat Seuken nao dat Higgs-Boson un dat Herkaomen van dei Masse, Deil 5:
Higgs-Deilken an't CERN funnen?

van Ludgerd Lüske


Äöver den LHC
Nao Deil 1
Nao Deil 2
Nao Deil 3
Nao Deil 4
Nao Deil 6
Nao Deil 7

An dat Europäischke Forschkungszentrum CERN hebbet dei Physikers ein Deilken mit eine Masse tüschken 125 bit 126 Giga-Elektronenvolt (GeV) funnen. Et is mutz 134-maol so schwoor as ein Proton. Wohrschienlik is et dat lange söchte Higgs-Deilken. Aover man kann noch nich faste anseggen, wo dat mit dit Deilken nau is.


Dei Atlas-Detektor an't CERN hett in ein Kollision dit Spurenbild opnahmen. Links dei rüümliche Ansicht, dat Runde is dei Opsicht op dat Spurenbild, in dat dei Physikers dat Higgs erkennen köönt. Klick up tau'n Vergröttern! — Bildquell

Dissen Fund mellde dat CERN an'n 4. Juli 2012. Dei Daoten wörden tüschken April un Midde Juni mit dei Experimente ATLAS un CMS spiekert. Dei Experimente hebbet dei Reaktionen, dei dör dei Kollision van Protonen mit üppste Energien utlöst wörden, unnersöcht. In den ATLAS-Detektor kunnden in eine Sekunde eine Milliarde Protonen tausaomestöten. Dat Deilken, wat man nu fünnt, wörd meest äöver dat Updeilen in twei Photonen un twei Z-Bosonen naowiest.


Dat Spurenbild, nateikent vun Ludgerd Lüske. Klick up tau'n Vergröttern!

Nu schall et dat Higgs-Deilken wän, aover staotistischk up't leßte wisse sünd sik dei Forschkers noch nich. Eiers wenn noch mehr unnersöcht werd, kann man seggen, of et wohrhaft dat noch fählen Deilken för dat Standardmodell is. All in'n Dezember 2011 geef et dei eiersten Anteiken för dat neie Deilken. Don wören dei Haupt-Signaole gägen dei Rauschsignaole noch nich stark naug afsettet. Nu ligget disse neien Resultaote mit mehr as dubbelt so väle Daoten vör.


Op 5 Sigma (de Standardafwieken) nau is dat Deilken naowiest. Klick up tau'n Vergröttern! Bild: LL

Pass tau dei eiersten Hochenergie-Konferenz (ICHP-Konferenz = International Conference on High Energy Physics) van den 4. bit tau'n 11. Juli in Melbourne wörden disse neiesten Resultaote van dei Deilkenphysik rutgäben.


Klick up tau'n Vergröttern! Bild: LL


Originaoltext: Posted By Jacobasch in Scienceticker

8.7.2012


na baven