Dat kloke Schaap Vun Rudi Witzke Eerst willt wi uns maal ümseihn, wat de Lüüd so vun't Schaap seggen: Dat Schaap truut blots den, de em de Kehl dörchsnitt. Wo een dat blöken höört, dor sünd
ok Schaap in't Land. Pazifisten sünd as Schaap: De glöven,
de Wulf weer en Vegetarier. Een Schaap blökt jümmer glieks. In en Schaapstall kann en Kalv König ween. Wetenschopler unnersöökt allens: Nu hebbt sik welk an de Arbeid maakt un üm de dummen Schaap
bekümmert. Se knipsten Schaap un hüngen Purtretts in'n Stall
vör de Schaap up. Wat passeert nu? In uns un ok in de Schaap
gifft dat en besünnern Saft, de uns un de Schaap in lieke Wies
so ornlich in Raasch bringt. De heit Adrenalin. Na, un denn hebbt de kloken Forscher de Schaap afstrakte Biller henhungen,
so welk mit Zacken un ornlich Farven dörcheenanner. Wat nu? De
Harten vun de Schaap füngen an to rasen. 113 maal slöög
so en arm Schaapshart in de Minuut. Un denn rönnten se dörcheenanner,
sprüngen över eenanner un blökten luuthals. Un dat
nu allens nich ut Freud. Orrer? Rudi Witzke P.S.: Nich verraden: Wi hebbt mien Purtrett in en Schaapbucht hangt. Dreemaal dörffst raden, wat de Schaap makt hebbt. |
|