Koornbloom
Centaurea cyanus — Familie Compositae (Asteraceae)

vun Anke Nissen


Se köönt de Fotos per Klick vergröttern! Trüch kaamt Se denn mit den Zurück-Knoop op de Browser-Symboolliest

To'n Anhören hier klicken:

Lesen deit Anke Nissen in holsteiner Platt.

Anner Namen:

 

Engelblume (Westfalen), Hungerbloom, Kreuzblume (Rheinland-Pfalz), Liebherrgottskrönli (Baden), Preußisch Bloom, Zachariasblume

Sammelt warrt:

enkelte Röhren-Blöden = Flores cyani sine calice

Warrt bruukt:

 

  • in Teemischen gegen Maag- un Verdauungs-Besweer
  • to 'n Farven vun Medikamente un Teemischen un in de Kosmetik

Ik find Kornblomen schöön. Richtig schöön! Dat Blau vun ehre Blöden, dat lüücht so wiet.
Se höört to mien Kinnertiet, de Kornblomen. In'n Sommer kunn ik se överall in mien Ümfeld wassen sehen, up Getreidefeller, an sandig Feldweeg — un jümmers tohoop mit den wunnerschöön roden Mohn.

Johrhunnerte lang gell de Kornbloom as "Hungerbloom", denn wenn se sik to dull in Kornfeller breet maakt, harrn de Buurn Bang, dat dat keen gode Oorn geev.

Ik heff up olle Altäre — up Dorstellungen vun Maria — oft unse slichte Kornbloom funnen. In anner Gegenden gifft dat Namen för unse Kornbloom, de up en christlich Bezug hen düüdt: Liebherrgottskrönli as Bispill. Ik heff leest, dat man in Baden an'n Fronleichnamsdag, den "Herrgottsdag" (dat is de Donnersdag na Pfingsten) den Altar mit disse blage Bloom prächtig utsmückt.
Engelbloom (Engelblume) seggt man in Westfalen to uns Kornbloom. Man windt dor an 'n Schutzengelfest Kränze ut Kornblomen.
Krüüzbloom (Kreuzblume) warrt de Kornbloom in Rheinland-Pfalz nöömt, wiel se in de Krüüzwoch blöht. Mit de Krüüzwoch is nich uns Karwoch meent — also de Woch vör Oostern —, nee, dor is dat Fest vun dat Krüüzupfinnen (Anfang Mai) dörch de Hillig Helena mit meent.

De Naam "Centaurea" sall sik vun den griechisch Kentaur Chiron herkamen. Na de Legende kunn de Wunnerheilen. — De ollen Griechen un Römer hebbt ehre Oorngötter Kornblomen-Smuck up 'n Kopp sett.

Üm 1800 rüm wörr hier bi uns in Düütschland dat unleev Ackerunkruut to en Symbol för en nieget Natürlichsien. Un as de junge Königin Luise doot bleev, wörr uns Kornbloom to de Preußisch Bloom. De Söhn vun Luise, de later Kaiser Wilhelm I. worrn is, de hett de "preußisch blage" Kornbloom to sien Lieblingsbloom erklärt.

Na de Revolution 1848 wörr uns Kornbloom to dat Sinnbild för den düütschen Nationalismus. De Konkurrenz to uns lütt blage Bloom weer to disse Tiet de rode Nelke. De weer dat Symbol vun de Arbeiterbewegen.


De Arbeiterbewegen harr doch glieks den Mahn nehmen kunnt, de is noch roder!

To Kaisers Geburtsdag fier man den "Kornblomendag" un de Royalisten dregen Kornblomen in 't Knooplock. Theodor Fontane hett disse Kornblomenmanie up 't Korn nahmen, he schreev:

"Es ist eine lederne Blume,
bloß blau,
ohne Duft —
irgendwo müsste sie noch einen roten Hosenstreifen haben."

Ik glööv, jedereen kennt un mag se, de lüchen blagen Kornblomen, de sik mit enen heel kargen Boden tofreden geevt. De Fehmaraners aver, de möögt se bestimmt besünners geern; denn wenn de ehr Gillnfest fiert, denn hebbt all Mannslüüd enen Zylinder up 'n Kopp, enen Handstock in 'e Hand un ene blage Kornbloom in 't Knooplock.


Foto Mohn un Ackerrain: Antje Heßler
Annere Fotos: Anke Nissen
27.6.2010


na baven