Efeu
Hedera helix, Familie: Araliaceae

vun Anke Nissen

Sammelt warrt:
junge Bläder = Folia hederaceae

Warrt bruukt:

As Tee, Extrakt, Uplaag gegen:

  • Infekte vun de Atemweeg, Krampfhoosten, chronisch entzündlich Bronchial-Besweer
  • ok homöopathisch: bi Schilddrüsenöverfunktion un Rheuma
  • Un ok in de Erfohren-Heilkunde as Uplaag gegen Gicht, Rheuma, Nervensmart, Venenentzünden

Wohrschuu:

Dörch Efeu kann 't to allergisch Reaktionen kamen.
De hele Plant is licht giftig — bitte nie nich sülvst behandeln!


Efeu an en ole Muur

Efeu is en ranken, jümmers gröön Plant mit hartförmig, lappt Bläder. Disse Blatt-Telgen dräägt keen Frucht, se sünd "steril". Wenn de Efeu denn aver in de Johren kamen is, denn warrt siene Bläder glatt an'n Rand, se hebbt denn also nich mehr de bekannten Zippeln. Un blots an disse Telgen bildt sik in'n laten Sommer Dolden ut mit gröön-gele Blöden.

Efeu nimmt allens in'n Besitz, Efeu bedeckt allens, so man em lett: Muurn, Hecken, Goornbänk, Bööm, sogoor ganze Hüüs kann he gröön verpacken. Bi Frünnen hett he sik de Stratenlateern utsöcht un nu mütt he jümmers wedder stutzt warrn, anners kann de Lateern nich mehr dat doon, wat se doon sall, se kann nich mehr lüchen.

Wenn de Efeu denn aver trecht is mit dat Kladdern, wenn he baven anlangt is, wenn he nich mehr wieder kann, denn lett he siene Haftwörteln verswinden un he fangt mit dat Blöhen an. Anners as de mehrsten Planten wiest he siene Blöden in'n Oktober, November. Gröne lütte Blöden mit veel Honig. Dor freut sik de letzten Smetterlinge, Flegen, Sweevflegen, Immen.

In 't Fröhjohr, wenn de mehrsten Planten blöht, denn sünd de "Beeren" vun 'n Efeu riep. Un denn freut sik as Bispill de Stare.


Hier versöcht Efeu de Barkenbööm to entern. Leider warrt de Bööm an'n End doot gahn. Natur!

Efeu wörr von de ollen Griechen as Plant vun den Wiengott Dionysos ansehen.
In de Bibel, in 't 2. Book vun de Makkabäer 6, Vers 7 köönt wi lesen:

"Zu ihrer Erbitterung zwang man die Einwohner, am Fest der Dionysien zu Ehren des Dionysos mit Efeu bekränzt in der Prozession mitzugehen."

In 't olle Ägypten gell Efeu as Symbol för den Sonnengott Osiris. Later is Efeu ok to en christlich Symbol worrn:

  • He gell as Symbol vun de Beständigkeit, denn he is ja jümmers gröön.
  • He gell as Sinnbild vun de Fründschaft, denn he verbindt sik dörch siene Haftwörteln duurhaft mit Bööm un Wände.
  • He gell as Symbol för de Unsterblichkeit, dorüm wörrn Dichter gern mit en Efeu-Kranz smückt.
  • He gell as Sinnbild för de Truu, dorüm warrt he oft up 'n Friedhof plant.


Efeu in romaansch Gewölv

Ik mag Efeu lieden, man, as ik al seggt heff, he nimmt allens in Besitz, he bedeckt allens — so man em lett.


To'n Anhören hier klicken:

Lesen deit Anke Nissen in holsteiner Platt.


2.11.2010


na baven