Lotos
Indische Lotosblume — Nelumbo lucifera
Familie Seerosengewächse

vun Anke Nissen


Se köönt de Fotos per Klick vergröttern! Trüch kaamt Se denn mit den Zurück-Knoop op de Browser-Symboolliest.

Käte un Kurt repen an, wi sullen se man mal besöken un denn kunnen wi fein tohoop na Ellerhoop föhrn un dor denn in 't Arboretum den Lotos ankieken, de nu graad blöht.
O ja! Dat weer wat för mi.

Ik mütt seggen, de Besöök vun den feinen Goorn is en Vergnögen. As wi denn aver an den groten Diek kemen un ik miteens den blöhen Lotos sehg, weer ik vör Överraschen ganz benaut. Ganz still stünn ik un staun: disse wunnerfien Blööd! Dorto de groten Bläder mit de glänzen Waterdrüppen babenup, de dicken Knospen, de Fruchtkapseln. Käte meen: "De seht ja ut as en groten Solt-Streuer!" Un dormit hett se würklich Recht.

Vör de Iestiet sall dat ok bi uns in Europa Lotos-Planten geven hebben, nu aver findt wi de blots noch in de Warmnis vun Asien, in Japan bet hen na Australien.

Lotos is en bannig mystisch, symbolträchtig Plant. Bi de Inder gellt se as hillig. De Chinesen möögt den Lotos vun Oldingstieden an heel geern, se verehrt em richtig. Ik heff leest, dat de Lotos-Bloom för de Chinesen en Symbol is för 't Vullkamen-Sien, för "Rein" un för "Unbestechlich". De Lotos-Bloom tellt to de acht Kostborkeiten vun 'n Buddhismus.

Se is schöön, de Lotosblööd, wunnerschöön — ik heff dat ja nu sülm sehen, sülm beleevt —, man Lotos warrt in Asien ok in de Köök un ok as Heilplant bruukt. So hett dat Rhizom, also de Wörtel, vele Kalorien un warrt as Mehl bruukt. Ok söten Kraam warrt dor ut herstellt. Ut de Stengel vun de Bläder warrt en Salat maakt. Un de Samen warrt kaakt orrer braadt, se warrt roh eten orrer kandeert.
In enen Film heff ik sehen, dat man ut Lotos-Fasern ganz fiene gespinstig Stoffe weven kann.

Up so en Lotosblatt, dor höllt sik keen Water un ok keen Dreck. Dat kümmt, wiel dat Blatt vun mikroskopisch lütt Wachskristalle övertrocken is. Ut den Grund behöllt en Waterdrüppen — de up en Lotosblatt fallt — sien kugelig Form. De Drüppen rullt dann över dat Blatt un nimmt allen Schiet un Stoff mit. So is dat Lotosblatt jümmers rein. Un dit warrt "Lotos-Effekt" nöömt.

Also, ik kann Käte un Kurt blots wohrschuun, sullen se wedder mal anropen, dat wi henkamen süllt — wi föhrt hen. Wer weet, wat wi denn allens findt.


7.11.2010


na baven