Mutterkruut
Tanacetum parthenium, Familie: Korbblütler

vun Anke Nissen


Anner Naams: Falsche Kamille, Zierkamille, Römische Kamille, Fieberkraut

Sammelt warrt: Kruut — allens, wat baven vun de Eerd wasst
So warrt't bruukt:
  • gegen Migräne
  • fröher gegen Fruun-Besweer


Se köönt de Fotos per Klick vergröttern. Trüch kaamt Se denn mit den Zurück-Knoop op de Browser-Symboolliest.

 




Dat witte hübsche Mutterkruut wasst veel in Kloostergoorns un Buurngoorns, as Zier- un Heilkruut. Ok bi uns in'n Goorn wasst dat, mal hier mal dor, wo't graad Lust hett. Andrepen kannst dat ok an Wegränder un Wischen, dat hett geern satte, beten lehmige Böden un en sünnige Laag. De smucke Plant warrt bit 90 cm groot.

Mutterkruut blöht vun Juni bet September. De Blöden seht ut as lütte Kamillen orrer as lialütte witte Margeriten; se hebbt aver veel mehr vun de smucken Blödenköpp. Üm un bi 20 bit 30 Blöden bildt tosamen en Doldenrispe.

De Plant rüükt bannig aromatisch, ik meen, liek as Kamille. Anner seggt, dat Kruut rüükt mehr as Rainfarn (Tanacetum vulgaris).

As de Naam dat al seggt, hebbt uns Vöröllern meent, Mutterkruut kunn Fruun bi ehre Fruun-Besweer helpen. So sall dörch Mutterkruut de Menstruation utlööst warrn un dat Aflösen vun de Plazenta fördert warrn. So kunn dat ok för Afdrieven bruukt warrn. "Wiese Fruuns", so warrt ja seggt, hebbt sik fröher ok mit sowat utkennt. — Ok bi de Wesseljohrn sall Mutterkruut en Help wesen.


Klick op tau'n Vergröttern!

Mutterkruut is al fröh as Heilkruut beschreven worrn (Dioskurides in't 1. Johrhunnert).
In't Mittelöller wörr't gegen Fever bruukt un ok gegen Pien in'n Kopp.

Hüüt warrt Mutterkruut as Heilkruut kuum noch anwendt. Blots as Help gegen Migräne heff ik dorvun höört. So as bi en Kur sall man 3 bet 5 Weken lang elkeen Dag Mutterkruut to sik nehmen. Dat sall eenmal bewirken, dat de Smarten nich so dull warrt, un to'n annern, dat so'n Migräne-Anfall nich to oft to'n Utbruch kümmt.

Woans nimmt een dat Kruut to sik? Allens an dat Mutterkruut smeckt licht bitter. De Bläder kannst op Broot vertehren. Aver de frischen Bläder vun't Mutterkruut reizen de Sliemhuut, ut den Grund — so meen ik — sull man lever Drüppen orrer Dragees ut de Afteek halen.

Anner historisch bekannte Anwendungen sünd, de dröögte Plant mit Essig un Solt to eten orr de ganze frische Plant op de Huut to leggen.






 

Ik heff den Namen "Mutterkruut" ok noch för anner Planten funnen:

  • Mutterkruut för Küchenschelle (Pulsatilla vulgaris)
  • Mutterkruut för Bienenkruut (Melissa officinalis)
  • Mutterkruut för Germanderehrenpreis (Veronica chamaedrys)
  • Mutterkruut för Kamille (Matricaria chamomillae)

Dat is antonehmen, dat all disse Planten fröher as heilsam bi Fruuns-Lieden güllen.

Ik glööv ja, dat in de olen Kloostergoorns teemlich veel Planten-Wiesheit verstekt weer. Nich bloots dat, wat de hillige Hildegard wüsst hett, sünnern ok veel gegen Fruunslieden. De Krüder, de gegen Fruunslieden un sogor för Afdrieven to bruken weern, sünd wisslich nich tofällig in de Nonnenklööster anbuut worrn.

 
 

25.7.2019


na baven