Biblische Planten:
Passionsbloom

vun Anke Nissen

Passiflora coerulea, Familie Passionsblumengewächse

Anner Namen:

Passionsblume
Sammelt warrt:
in'n Sommer de hele Plant, solang as se blöht
Warrt bruukt:
maakt ruhig, lööst Krämpfe
För buten: bi Entzünden vun de Huut, ok bi Verbrennen

Wirkstoffe:

Alkaloide, Glykoside, Enzyme




Ik bün en groot Fründ vun de Passionsbloom, dat heet, ik bün en Fründ vun ehre Inhaltsstoffe, de tohoop mit Johanniskruut in uns "Zauberdrüppen" wunnerbor beruhigen un utglieken wirken köönt. Ik kann mit Help vun disse Drüppen veel beter grote Beunruhigungen un Upregen dörchstahn.

Ik heff leest, dat Jesuiten disse aparte Plant in Paraguay entdeckt hebbt. Se hebbt de Plant ok den Namen geven. "passio" is dat latiensch Wort för Lieden un "flos" bedüüdt Bloom.

De Passionsbloom is eerst in'n Anfang vun't 17. Johrhunnert na Europa kamen. Dormals is de Plant mit de Leidens-Saken vun Christus in Verbinnung bröcht worrn:

  • De drei Griffel symboliseern de Nagels, mit de man Christus an't Krüüz slaan hett,
  • de "Staubbeutel" hett man mit de Wundmale Christi vergleken,
  • den Fadenkranz mit de Dornenkroon,
  • de Ranken mit de Geißel,
  • in de Bläder hett man de Lanze sehn,
  • in de stielten Fruchtknoten den Avendmahlkelch,
  • de 10 Blödenbläder symboliseern de 10 Apostel, de bi de Krüüzigung dorbi weern.

De Passionsbloom is en mehrjährig Schlingplant. Se kann mank 1 un 8 m hooch warrn. De Blöden sünd witt-blaag, de purpurnen Staubfadens in de Mitt seht ut, as harr de Blööd ene Krone.

De wat egenordig Blöden vun de Passionsbloom erreegt noch hüüt veel Upsehen.

De Frucht vun de Passionsbloom gifft uns den Saft, den Passionsfruchtsaft. De stammt vun de "Passiflora edulis". Edulis is latiensch un bedüüdt eetbor. Disse Früchte warrt hier bi uns ok Grenadillen nöömt.
Maracujasaft stammt ok vun de Passiflora edulis, aver vun ene Ort, de mehrst in Südamerika wassen deit.

Dat gifft vele, vele verschieden Orten vun de Passionsbloom, wohl so an de 500. Ut den Grund gifft dat ok vele ünnerschiedliche Farven vun ehre Blöden: as gröön, witt, rosa, pink, rot, lila, violett, himmelblaag, düüsterblaag, sogoor swart. Ik heff mal ene blage Passionsbloom in enen Blomenpott up de Finsterbank hatt. Vele Johr heff ik mi dor an freut. Man denn wull se nich mehr, denn is se ingahn.




De Passionsbloom warrt recht oft in de Homöopathie bruukt

  • To'n Daldükern vun'n Blootdruck,
  • to'n Lösen vun Krämpfe,
  • to'n Stillen vun Smarten,
  • to'n ruhig maken
  • as Slaapmittel.

Wegen disse Wirkungen helpt de Bloom ok goot gegen lichte Depressionen un nervöse Unruh-Tostänn (as Bispill in't Klimakterium).

Wenn de Minsch nich slapen kann, wenn he nervös is, denn warrt Heilplanten insett, de en entspannen un beruhigen Wirken hebbt. Un dorto höört nu ganz bestimmt uns Passionsbloom.

Geern bruukt man denn Teemischungen, as Bispill:

  • 25 g Passionsblomenkruut
  • 30 g Melissenbläder
  • 35 g Baldrianwörtel
  • 10 g Lavendelblöden
  • 1 uphümpelt Teelöpel vull vun disse Mischung
  • mit 1 Tass hitt Water övergeten
  • 20 Minuten todeckt kaken laten
  • afköhlen laten
  • afseihen.
  • Övern Dag bet to 5 Tassen drinken / avends 2 bet 3 Tassen!

För Kinner

Wenn Kinner — ok lütte Kinner — wat unruhig sünd, nich slapen wüllt, denn kann uns Passionsbloom en Help sien.

  • 10 g Passionsblomenkruut
  • 20 Melissenbläder
  • 10 g Lavendelblöden
  • 20 g Appelminze,
  • 10 g Himbeerbläder
  • 10 g Zitronengras
  • 20 g Fenchelfrüchte
  • 1 Teelöpel vull vun disse Mischung in'n Mörser tweidrücken
  • mit 1 Tass kaken Water övergeten
  • 5 Minuten kaken laten,
  • afseihen.
  • De Kinner avends ¼ bet ½ Tass dorvun drinken laten

Wenn Kinner bang sünd un nervöös, denn kann en Passionsbloom-Tee beten wat helpen:

  • 1 Eetlöpel Passionsblomenkruut
  • mit 1 Tass kaken Water övergeten.
  • 5 Minuten kaken laten,
  • afseihen.

För Kinner af 3 Johr is disse Tee oft en gode Help.
2 bet 3 mal an'n Dag ½ bet ¾ Tass dorvun geven.

Ok en Teemischung ut veer ruhig maken Heilkrüder kann Kinner gegen dat Bangsien helpen:

  • 30 g Melissenbläder
  • 30 g Lavendelblöden
  • 30 g Passionsblomenkruut
  • 10 g Johanniskruut
  • 1 Eetlöpel vun disse Mischung
  • mit 1 ½ Tassen kaken Water övergeten
  • 10 Minuten trecken laten,
  • afseihen.

Kinner vun 4 un 5 Johr drinkt 2 mal an'n Dag ½ Tass vun dissen Tee.
Kinner vun 6 bet 14 Johr drinkt 1 bet 1 ½ Tassen vun dissen Tee.






Mehr biblische Planten: hier
Fotos: Anke Nissen
9.4.2012


na baven