Dat Kruut för'n Saatmaand:
Rizinus

vun Anke Nissen

Ricinus communis (Communis is latiensch un bedüüdt, dat de Plant allgemein to finnen is)
Familie Euphorbiaceae = Wolfsmilchgewächse

 

Anner Namen:

 

Wunderbaum, Kreuzbaum, Christuspalme, Hundsbaum, Läusebaum,
plattdüütsch: Wunnerboom, Krüüzboom

anner Namen för de Samen: Purgierkörner, Treibkörner, Zeckenkörner, römische Bohnen

Sammelt warrt:
Samen, Semen ricini

Warrt bruukt:

 

Oleum Ricini = Rizinusöl, Kastoröl.
Kolt preßt Öl ut de Samen, warrt blots för medizinisch Zwecke bruukt.
Rizinusöl is dat bekanntest Mittel to'n Afföhrn!

In de Kosmetik: in Brillantine, Haaröl. Haarpomade.

Warm utpreßt Öl warrt in de Technik brukt:

  • to'n Smeern vun fiene Maschinen, Motore,
  • to'n Infetten vun Leder (Chromleder),
  • to'n Herstellen vun Seep,
  • to'n Farven vun Tüüg (türkisch-root).

So warrt't anwennt:

  • Kinner = 1 Teelöpel Rizinusöl
  • Utwussen Lüüd = 1 ½ bet 2 Eetlöpel, an'n besten in Kaffee orrer Malzbeer orrer ok in Fleeschbrüh nehmen.

 

 

Rizinus is wohl in Indien, China un Afrika tohuus, dor wasst he bannig gau un warrt mehrere Meter hooch. Bi uns warrt he geern in'n Goorn plant. He warrt hier man blots enen goden Meter hooch, un wiel em dat nich warm noog is, geiht he meist na een Johr wedder in.
RizinusDe Rizinus-Plant is wunnerschöön. Se hett grote, schöön formte, gelappte Bläder, de oft rot un düüsterfarven sünd.

De Samen glänzen un sünd in ünnerscheedlich Farven sprenkelt. Se sitt in en runde, stachlig Kapsel.
De Samen seht beten ut as Bohnen, dorher de Naam "Römische Bohnen".
De Samen seht aver ok in ehre Form beten ut as Zecken, dorher de Naam "Zeckenkörner". Aver ok de Naam "Rizinus" för disse Plant sall dorher stammen; denn dat latiensch ricinus bedüüdt Zecke.
Anner seggt, de Naam Ricinus stammt vun dat hebräisch Wort rikar, wegen de runden stachlig Früchte. Un noch anner seggt, de Naam kümmt vun dat griechisch Wort rikonos; dat bedüüdt so veel as "Wunderboom", un so heet he, wiel he so gau wassen deit.

De Samen sind dull giftig. Dat Gift geiht aver nich in dat Öl över, dat ut de Samen wunnen warrt. — Rizinusöl is dat eenzige Öl, dat sik in Wiengeist lösen deit.

De Rizinus-Frucht is en runde stachelig Kapsel. Foto: Anke Nissen
De Rizinus-Frucht is en runde stachelig Kapsel. Foto: Anke Nissen

Rizinus is en oll Nutzplant. Se is al fröh in warme Länner anplant worrn wegen de ölig Samen. 4000 vör Chr. hebbt de ollen Ägypter de Lüüchten in ehre Tempel mit Rizinusöl brennen laten.

In dat oll Arzneibook vun 1500 v.Chr. "Papyrus Ebers" warrt över Rizinusöl al as Mittel gegen Verstoppen un Buukweh schreven.

In Ägypten un in 'n Orient hett man dat Öl ok bruukt as kosmetisch Mittel to 'n Plegen vun Huut un Hoor.
In Krüderböker ut 't Mittelöller leest een veel vun den "Wunnerboom". So wörr de Rizinus nöömt, wiel he so gau wasst.
In de Klosterheilkunde wörr Rizinus as "Purgiermittel" bruukt, dat is en Mittel to "Inneren Reinigung".

Foto: Rudi Witzke
Foto: Rudi Witzke

De afföhren Wirken vun Rizinusöl is al siet de Antike bekannt, un de is in uns Tiet vun de Wetenschaft nawiest worrn. — Ok bi Vergiften dörch Nahrungsmittel kann Rizinusöl helpen.

In de Kosmetik warrt Rizinusöl gern bruukt bi dröög Kopp-Huut. Dat Öl dringt besünners deep in de Twischenrüüm vun de Hornschicht in. Ut dissen Grund warrt dat Öl ok veel bi dat Plegen vun de Huut vun 'n ganzen Körper bruukt. Hoor un Huut warrt dörch dit Öl week.

 

 

Rizinus is en Plant, de al in de Bibel vörkümmt. Dor heet dat bi Jona 4, in der Versen 6-10:

6. "Dor leet Gott en Rizinusplant wassen. De keem in de Hööcht un wörr so groot, dat se över den Kopp vun Jona Schatten geev un em so vör Leges wohren kunn. Jona freu sik bannig dull över den Rizinus.

7. As dat aver an annern Morgen even hell wörr, leet Gott enen Worm kamen. (Ik denk mi, dat weern villicht Raupen.) De freet den Rizinus an, un he dröög ut.

Foto: Rudi Witzke
Foto: Rudi Witzke

8. Un as de Sünn upgüng, leet Gott enen glöhnig Oostwind weihen; un de Sünn brenn Jona baven up den Kopp, dat he ümfüll un ahn Besinnen leeg. Dor harr he dat satt un leng na den Dood. He sä: "Beter dootblieven as noch leven!"

8. Gott aver sä "Meenst du, dat is recht vun di, so füünsch to warrn wegen den Rizinus?"
Jona geev to Antwort: "Doch, dat is recht! Ik heff allen Grund, bet up den Dood vertöörnt to sien."

10. Gott sä: "Du jammerst um den Rizinus, wo du keen Hand för röögt hest. Un uptrocken hest du em ok nich. In een Nacht is he worrn un in een Nacht vergahn..."


30.9.2008


na baven