Biblische Planten:
Wienrebe

vun Anke Nissen

Vitis vinifera, Familie Rebengewächse = Vitaceae

 

Anner Namen:
Weinstock / Wienstock, echter Weinstock, Weintraube / Wiendruuv, Traubenstock / Druvenstock

Warrt bruukt:

 

 

  • to Krüderwien un Magenwien, Pepsinwien (Vinum pepsini),
  • Kampferwien (Vinum camphoratum),
  • Druvensaft
  • Wienessig, (acetum Vini)
  • Weinstein, Weinsteinsäure
  • Weinbeeren as Rosinen, Korinthen
  • Traubenkernextrakt, sall helpen bi slecht Dörchblöden vun de Been

Wien is en Plant vun de Bibel. Över tweehunnertmal warrt dat Wort "Wien" in de Bibel bruukt, dat Wort "Wienbarg" kümmt över hunnertmal vör.

Noah weer — na de Bibel — de eerst Minsch, de Wien anbuut hett (1. Mose 9, 20). Bi Amos 9, Vers 13 gellt Wien as Teken för de Fruchtbarkeit un för den Segen.

In 't Niege Testament warrt de Wienstock to en Symbol för Christus. He seggt: "Ik bün de Wienstock. Ji sünd de Reben. Wokeen in mi blifft un ik in em, de bringt veel Frucht" (Johannes 15, 5).

Dat Abendmahl warrt mit Brot un Wien fiert (Matthäus 26, 28). Gott sien Riek warrt bi Matthäus 20, 1 mit den Wienbarg vergleken.

Bi de Hochtiet to Kana warrt Water in Wien ümwannelt (Johannes 2,3-10).

Wi kennt wohl altohoop de Geschicht vun den barmhardig Samariter (Lukas 10, 30-37): Ok in biblisch Tieden geev dat al Gewalt up de Straat. En Mann — wi kennt sienen Namen nich — is up den Weg vun Jerusalem na Jericho vun Rövers brutal dalhaut worrn. Vele Lüüd güngen vörbi, man en Mann ut Samarien güng na den Verletzten ran un kümmer sik üm em. He desinfizeer de Wunnen — mit Wien! Dormit hett sik disse Mann för alle Tieden den goden Ruf as barmhardig Samariter schafft.

Ut de Früchte vun den Wien, ut de Druven warrt de Druvensaft rutpresst. Un ut dissen Saft warrt dörch Gären de Wien herstellt.
In lütte Mengen kann Wien för utwussen Lüüd, de beten wat swak sünd, en Help sien. Ik erinner, dat mien Vadder in'n Krieg mit Lungenbesweer na Huus keem un de Familie em mit düchtig röögt Zuckerei, dat mit Wien upfüllt wörr, hochpäppelt hett.

För Kinner aver is Wien schädlich!

Ik drink ganz geern mal en Glas Wien. Ik weet ok, wat mi disse Sorte smeckt orrer nich. Man veel mehr weet ik nich över Wien; un so staun ik jümmers fix, wenn ik höör, wat anner Lüüd över Wien allens vertellen köönt.

In en Wienkort heff ik kortens leest, dat de Wien "eenfach lecker" weer, "Fienfruchtig un saftig mit de Aromen vun riepe Aprikosen, Appeln un Ananas". Wo kann in den Wien Ananasaroma rinkamen? Un wo kann en Wien — en Flüssigkeit also —, wo kann de nu ok noch "saftig" wesen? En anner Wien wörr anpriest, dat he "en saftig un satt Fruchtaroma na swarte Kirschen un Waldbeern mit würzig Nuancen" hett, — un he harr en "vulle Struktur".
Un vun en Burgunder-Wien weer schreven, he weer "unheimlich filigran mit düütlich Fruchtaroma vun Ananas un Honigmelone in en cremig Schmelz".
En australische Wien hett verspraken, dat he "kraftvull" weer mit "konzentrierte Aromen vun fleeschig Brombeern un swarten Peper" un nu harr he "harmonisch Fülle".

Ok Plummen hebbt wi funnen, de in den Wien sien sullen, un Birnen un swarte Johannisbeeren, Erdbeeren un Akazienblöden, Passionsfrucht un Wildhornig. Ik kunn't ja verstahn, wenn dor Bowle anpriest wörr. So 'n Erdbeerbowle, ja, de smeckt mi goot wenn 't warm Weder is un wi mit Frünnen in'n Goorn sitt.
Ok Wien, de "licht rauchig" is, mit "sööt Noten vun Karamell un Vanille" hebbt wi funnen.
As wi denn aver lesen, dat de Wien "ausdrucksstark", mit "lang un kraftvull Finale" weer, dor sünd wi uphollen in de feine Wienkort to stövern. Wi müssen to dull lachen.

Wi hebbt würklich enen heel vergnöögt Wien-Avend beleevt — drunken hebbt wi aver kenen — tominnst an dissen Avend nich. So beleevt in Burgstaaken up Fehmarn.


Mehr biblische Planten: hier
Fotos: Anke Nissen. Se köönt de Fotos per Klick vergröttern.
Trüch kaamt Se denn mit den Zurück-Knoop op de Browser-Symboolliest.

7.10.2012


na baven