Dor hebbt wi den Salaat!

Fröhjohrssalaat!

vun Anke Nissen

Dat eerst Gröön, dat sik wiest — Giersch, Hirtentäschel, Schafgarbe, Gänseblöömken — wörr fröher geern as Fröhjohrssalaat eten. Na de lang Wintertiet weer dat wichtig, frisch Gröön to sik to nehmen. Un dor weern disse Wildkrüder graad richtig.

Giersch un Aronstab. Foto Heßler

Mi is dat ja so'n beten komisch, wenn ik Giersch — dit lästig Unkruut — eten sall, man de ersten, ganz jungen, lütten Bläder smeckt würklich goot.
Een kann dat ja kuum glöven, aver Giersch is ok en Heilkruut, so kann Gicht beten wat linnert warrn, wenn een tweistött Gierschbläder up de Stellen leggt, wo't weh deit. Uns Grootvadder hett jümmers — wenn een vun sien Immen uns Kinner steken harr — en Gierschblatt up den Stich leggt.

Lüüd, de dor wat vun kennt, de eet geern de lütten "Täschel" vun dat Hirtentäschelkruut, disse winzigen dreieckig Schoten. Se smeckt beten as en Nutt. Een kann aver all Dele vun de Plant eten, de baven — also över de Eerd — wasst. Jüst so is ok allens, wat över de Erd wasst, as Heilplant to bruken.

Ok de jungen, zorten, lütten Bläder vun de Schafgarbe kannst' eten. Se smeckt beten wat herb, se reegt den Appetit an.
As "Soldatenkruut" is Schafgarbe al vör 1000 Jahren in Kriege bruukt worrn, üm bi Verletzen dat Bloot to stillen.

Un denn uns lütt Gänseblöömken! De ganz jungen, lütten Bläder vun't Gänseblöömken sind goot to eten. Ok de eersten Blöden köönt mit in enen Salaat rin. Dor freut sik denn dat Oog.
De Blöden köönt ok för enen Tee sammelt warrn. De helpt gegen Verköhlen un gegen Nieren- un Blasenlieden.

Mien Rezept för Fröhjohrssalaat geiht so: Frische, ganz junge, lütte Bläder vun'n Giersch, Vogelmiere, Brennnettel, Hirtentäschel, Löwenzahn goot waschen un frisch mit Marinaad ut Suurmelk anrichten. Ok lüttsneden Suuramper smeckt dor in. Un de Gänseblöömkenblöden laat allens fein utsehen.

Mienen leven Mann aver, den kann ik mit dissen Salaat ut'n Huus drieven.