van Ludgerd Lüske

---

ESA-Originaol-Bild hier Start-Video hier

An'n 3. Dezember 2015 steeg dei Drägerrakete üm 5:04 Uhr MEZ mit dei Testsonde Lisa-Paddseuker (Lisa-P) in Kourou up. Rund 16 Minuten nao dat Affhäwen was Lisa up einen eiersten provisorischken Eerd-Ümloop.

85 Minuten läöter sprüng dei Raketenmotor för anerthalf Minuten wedder an un dreef den Testsatellit in einen hochelliptischken Eerd-Ümloop. Üm 6.49 Uhr MEZ wörd dei veierde Raketenstufe affstött, un dat Europäischke Ruumfohrt-Kontrollzentrum ESOC in Darmstadt äöwernöhm dat Leit äöwer Lisa-P.

In dei taukaomen veier Daoge mäötet dor dei Missionskontrolleure den Satellit kontrolleiern un üm för dei Reise nao den Lagrange-Punkt L1 praot maoken. L1 ligg üm dei anerthalf Millionen Kilometer van dei Eern weg nao dei Sünne hen. Denn, twei Wäken läöter, werd Lisa-P mit ehr starket Driewmodul ut den Eerd-Ümloop sachte rutdräwen. Nao dat seßte Schuuw-Manöver verlätt Lisa-P den Eerd-Ümloop un gaiht up eine Baohn nao L1 tau. Bi disse Stä werd Lisa-P nao seß Wäken, midde Februar 2016, ankaomen.

Dei Fleigbaohn van Lisa-P in'n Weltruum; ESA-Originaol-Artikel

Nao disse Schuuw-Aktionen schmitt Lisa-P dat Driewmodul aff. Eiers dornao kann man dei Bordinstrumente för dei Wätenschkup anstellen.

Lagrange-Punkte; Wikipedia-Originaolbild

Dat Bild wieset dei Lagrange-Punkte L1 bit L5 in ein System ut Sünne (gäl) un Eern (blaw). Lagrange-Punkte sünd Punkte, an dei dei Schworkrafft van twei Himmelskörper — hier Eern un Sünne — ein Liekgewicht bildt, in dat sik ein anner Körper uphollen un mitroteiern kann, aohn dat hei rutdreiwen werd.
L4 löpp vör den Planet her, L5 löpp achteran.

süh Wikipedia-Originaolbild

Hier sünd dei Äquipotentiallinien (violett) van dat Schworfeld in dat mitümloopen Wesselwark-System inteiket (schnäen in dei Ümloop-Laoge as Gummidauk-Modell).
Dei Massen verhollt sick 1:10, so süht man dei Stäen L1 un L2 bäter.

Dei Instrumente binnen van dei Sonde; ESA-Originaol-Bild

Dei Teiknung baoben wiest dat Lisa-P-Technik-Paket. Dei beiden Goldwürfels, inschlaoten in Vakuumpötte (hier mit dat Affscheit-Schlott wiest), sünd dei Schläödels tau dei Lisa-P-Mission. In jedein'n Elektroden-Container is eine Gold-Platin-Testmasse. Lisa-P werd dei beiden Würfels bi Freifall-Aktionen mit ein hochpräziset Laser-Interferometer kontrolleiern. Dat Inferometer up eine optischke Bank ligg tüschken dei beiden speegeln Massen. Up einen 20 cm maol 20 cm groten Block ut Zerodur-Keramik-Glas sitt ein Satz van 22 Speegels un Straohldeilers.

Upbau van dat optischke Interferometer; EADS/ASTRIUM-Originaolbild; süh uck bi dei Max-Planck-Sellschkup

Dortüschken loppet Laser-Straohlen. Mit dei Laser-Straohlen kann man orig nau dat Bewägen un dei Laoge van dei frei schwäwen Würfels mäten. So schall Lisa-P dat eierste hochpräzise Mäten mi dei interferometrischke Laser-Methode testen. Dorbi werd dei Gravitationswellen (vertreckt dei Ruumtied üm dei Würfels) van dei ümloopen Objekte in den Weltruum faotet.

Nao Albert Einstein siene Relativitätstheorie is dei Schworkraft nich mehr eine Kraft, dei mit massive Objekte wesselwarket, so as Isaac Newton dei Gravitation sehg. Anstä dorvan krümmt nao dei allgemeine Relativitätstheorie dei Schworkraft dei Ruumtied-Geometrie.

In dei klassischken Physik löpp dei Tied staodig un unaffhängig för aale Objekte. In dei Relativitätstheorie is dei Ruumtied eine Kombination van dei drei bekannten Ruum-Dimensionen mit dei Tied-Dimension. Dat giff ein Kontinuum mit veier Dimensionen.

Tau'n Verkloren van dei Schworkraft in dei Relativitätstheorie mutt man dei Struktur van disse veierdimensionaole Ruumtied äöwer dei Regeln van dei klassischke Geometrie, wo sick parallele Linien malläwe nich draopet un dei Winkelsumme in ein Dreieck 180 Graod is, wieder faoten. In dei allgemeinen Relativitätstheorie is dei Ruumtied nich "plaon", sünners werd bi dat Ankaomen van massive Objekte krümmt.

Wirken van dei Gravitation in dei Ruumtied; ESA-Originaol-Bild
Süh hier den Originaol-Artikel

Dit Bild wieset dei Ruumtied as einen einfachen tweidimensionaolen Plaon, dei dör drei massive Objekte, as farwde Kugeln dorstellt, daoltrocken werd. Dit Daoltrecken is proportionaol tau dei einkeln Kugelmasse.

Upbau van Lisa-P; süh ESA-Originaol-Artikel

So ein Daoltrecken in dei Ruumtied lenket dorbinnen dat Bewägen van ein massivet Objekt. Anners seihn, wenn sick massive Objekte in dei Ruumtied bewäget, werd dat Daoltrecken ännert un dei Geometrie van dei Ruumtied ännert sick staodig. Gravitation beschriff dornao ein dynamischket Wark tüschken Materie un Ruumtied.

Süh ESA-Originaol-Bild un ESA-Missions-Siete.