Lüttes Glück ut Asien: Marienkäver

vun Antje Heßler

De lütten bunten Käver harrn sik düssen Sommer mienen Goorn as Kinnerstuuv utsöcht. Dat weern asiatische Marienkäver. Se sünd mit unsen Marienkäver eng versippt. De Goorners hebbt sik düsse Oort wegen de velen Blattlüüs vör enige Johrn ut Asien halt. Unsre lütten roden Marienkäver, de Sünnenkinner mit de söven swarten Punkten, hebbt se meist so'n beten an de Siet schaven.

De Marienkäver mit de söven Punkten un sien rode Farv is wull de Käver, den alle Welt över dusende vun Johrn kennt. He höört to de Käver, de flegen köönt. In Frankriek in de Dordogne hett man en sneden Marienkäver ut Mammut-Elfenbeen funnen. De is wull 20.000 Johr olt!

Mit sien upfallend rode Farv un de söven swarten Punkten is de lütt 2-12 mm grote Käver nich to översehn. He is överall beleevt un hett veel ünnerscheedlich Naams. De Buurn ut fröhere Tieden dachen, dat weer en Gaav vun de Modder Maria. Dorher ok de Naam "Marienkäver". De Käver helpen de Buurn bi't Kaputtmaken vun Blattlüüs. Een Larv vun de Marienkäver fritt an Dag wull 50 Blattlüüs. Wenn se nich noog Foder finnt, köönt de Larven un ok de Käver to Kannibalen warrn. Den freet se de egen Oort.

Se överleevt enen Winter, selten twee. Den verbringt se nich alleen. In Sellschop vun ehr Oort verkruupt se sik in Doppelfinsterrahmen oder in Holtritzen un dröges Loov. Wenn dat in't Fröhjohr warm warrt, fiert se Hochtiet un leggt dorna ehr Eier up Planten af.

Düsse lütte halfkugelig rode Käver mit de söven Punkten sall Glück bringen. Dat Muster vun den Käver findt wi up Breefmarken un Glückwunschkorten. Ok gifft dat männich Riemels över em. De lütten Kinner laat em up den Wiesfinger na baven lopen. Dorto tellt se, bit he flüggt. Jeedeen Sekunn bedüüd en Johr bit to ehr Hochtiet.

De Marienkäver is in dat Johr 2006 vun de Nabu as Käver vun dat Jahr 2006 utsöcht woorn.

Asiatische Marienkäver in mien Goorn!

De lütten asiatischen Marienkäver sünd aver ok smuck un seht uns Sünnenkinner bannig liek. Se hebbt mehr verscheden Klöörn un ok ünnerscheedlich veel Punkten. En lütte Galerie wiest de Biller hier. Ok baven sünd allens asiatische Marienkävers.

Alleen in mien Goorn heff ik söven verscheden Orten andrapen. Welk harrn över twintig Punkten, anner wedder harrn blots twee oder veer, un de Farven wesseln över rotbruun, bruun, geel bit swart. Een harr sogoor de Punkten in en annersfarvig Rahmen. De swarten mit de twee gelen Punkten un in de Meern vun den Punkt noch wedder en swarten Punkt sehgen meist verdüvelt ut, kunnst bang vör warrn.

Mitünner meen ik mank de veel verscheden Käver en anner Oort wies to warrn. Aver ne, se kemen altohoop ut de glieke Kinnerstuuv. Ik harr de verscheden Käver to Welt kamen sehn. De lütten Halfkugeln glänzen üm de Wett in'n Sünnenschien, as weern se jüst frisch lackeert.

Mien Enkeldochter hett mi up de Marienkäver in mien Goorn hinwiest. In Fröhsommer güngen wi twee dörch den Goorn. Ik wull en poor Bloom plücken. Dor seten up en Blomenblatt twee Marienkäver övereenanner. "Oma guck
mal, was machen die Marienkäver da?" Ik wüss in Ogenblick nix to seggen. Dor keem al vun ehr de Anter. "Ich weiß, was die Marienkäver machen, sie machen Bockspringen!" —

Wat en Glück, dat ik mien Knipskassen to Hand harr. Ik kunn dat Leevsspeel vun de Käver glieks fasthollen. Heff denn eerst faststellt, dat dat asiatische Marienkäver weern. Vun den Dag an heff ik ümmer wedder de Blomen up Marienkäver ünnersöcht. Aver dor weer nix to sehn.

Na en poor Daag wöör ik so komische lütte Rupen up en Blomenblatt wies. Se weern swart mit orange Striepen. Dat weern aver gor keen Rupen, ne, dat weern Larven vun en asiatischen Marienkäver. De weern ut de lütten Eier vun de Marienkäver utkrapen!

Wedder en poor Daag later meen ik en lütten Marienkäver to sehn. Aver nee, dat weer en Popp vun en Marienkäverlarv. De harr en ähnlich Farv as de lütten Käver. Denn wöör ik noch mehr Poppen wies. Dor weer en richtig lütt Kinnerstuuv vun Marienkäver in mien Goorn. En lüttes Glück ut Asien! De Larven harrn sik all verpoppt un seten in ehr Hüll, de sehg meist en lütt Huus liek.

Na dree Daag kunn ik denn tokieken, wi en jungen Marienkäver sien Popp, dat lütt Huus, verlaten dee. He harr noch ganz dörchsichtig hellgeel Flünken. Vun de anstrengend Arbeit müss he sik eerstmaal verhalen. Sien Flünken müssen uthärten, as dat in de Fachspraak heet.

Na dree Stünns Tiet nehmen de Flünken eerst ehr Farv an un de swarten Punkten kemen to'n Vörschien. De Käver böör ok al mal de Flünken an, as wenn he dat Flegen öven wull. Dat duur aver noch en ganzen Stoot, bit he up de eerst Reis güng. Ik heff em noch nakeken, as he in den blagen Heven flöög. — Wüllt höpen, dat he nich vun en Vagel freten warrt. Dat heet aver, dat de Vagels em glieks wedder utspeet, wiel he so bitter smeckt.

Mien lütt Enkeldochter harr en Käver in de Hand. Se hauch em ümmer wedder mit ehr'n warmen Aten an. He sull up ehrn Wiesfinger na baven klattern. Se wull doch ok weten, in wo veel Johrn se Hochtiet hett. Dorna meen se: "Oma, riech mal an meiner Hand, der Marienkäver stinkt ja!" Up ehr Hand weer so'n lütten gelen Punkt trüüchbleven. Up dat villicht ok Glück bringt?