Seis-Logo

Dei Start van InSicht

van Ludgerd Lüske

Gistern an'n 5. Mai is dei Rakete mit dei InSicht-Sonde losflagen. Allens bi den Start hett klappt.

Dei Nasa will mit dei InSicht (InSight)-ULA Start-Mission studeiern, wo dei Mars entstünd.

Up dat bäöwere Centaur-Deil (mehr Infos: süh hier) van dei Rakete köm dat Ruumfohrtüg 13 Minuten un 16 Sekunnen nao dat Affhäwen in den Ümloop üm dei Eern an. Einunseßtig Minuten läöter sprüng Centaur noch maol wedder an un dreew InSicht up dei Baohn nao den Mars. Nägen Minuten dornao — 93 Minuten nao den Start — verlöt InSicht dat Centaur-Raketendeil un nöhm üm 17.41 Uhr (PDT, also Pacific Daylight Time, dat is dei Pazifische Summertied — süh hier) Kontakt up mit dei Boddenmanschkup van dat Deep Space Network van dei Nasa.

Nao eierste Berichte sehg man dei upstiegen Atlas V-Dräger-Rakete van dei United Launch Alliance (ULA) van Carlsbad in Kalifornien bit nao Oracle in Arizona. Eine Person nöhm ein Start-Video van einen Privat-Fleiger ut up, dat an dei kalifornischke Waoterkant langers flög.

InSicht up den Weg nao den Mars

Dit Bild baoven wiest dei Spauer van den Nasa-Mars InSicht-Lander an den Himmel äöwer Los Angeles nao den Start van dei Vandenberg Air Force Base in Zentraol-Kalifornien an'n 5. Mai 2018. Dit is ein Staopel van Upnaohmen van Mt. Wilson. Urhäwer is D. Ellison.

InSicht schall an'n 26. November üm 3 Uhr EST (also Eastern Standard Time, dat is Middag PST) up den Planet Mars landen. Dor schall dei Mission bit tau'n 24. November 2020 duurn, dat sünd ein Johr un 40 Daoge up den Mars off twei Eernjohre.

Dei Landeapparaot van InSicht dait Daoten äöwer Marsbäwern, dat Fleiten van Warmte ut dei Binnenlaogen van den Planet un dei Oort un Wiese, at dei Planet wackelt, ünnerseuken un faoten, wat den Mars täögelt un wekke Prozesse dei veier Stein-Planeten in use Binnen-Sünnensystem formden. InSicht schall so up eine neie Oort dei deip in den Planet liggen Laogen studeiern.

Man nu mutt man eiers eis teuwen, bit dei Sonde bi den rotfarwten Planet ankummp.

Klick up tau'n Vergröttern!