Wappen

Möhlendag

vun Antje Heßler


Se köönt de Fotos per Klick vergröttern. Trüch kaamt Se denn mit den Zurück-Knoop op de Browser-Symboolliest.

An'n 2. Pingstdag is in unser Land Schleswig-Holstein ümmer de Möhlendag. Geern föhrt wi denn över Land un kiekt uns ole Möhlen an. Dittmal harrn wi uns de Watermöhl in Klein Rönnau utsöcht. Bi herrlichen Sünnenschien sünd wi dörch de schöne hügelige Welt up smalle Landstraten na Klein Rönnau föhrt. Rechts un links vun de Straten wussen hoge Gräser mank Kälverkruut un sümten unsen Weg. Wi müssen blots dat letzt Enn en Hauptstraat föhr'n.


Wegrand-Idyll


De Watermöhl


Möhlendiek-Idyll

Vör de Watermöhl up den Parkplacken stünnen al veel Autos. Wi harrn Glück un hebbt wohrhaftig den letzten frien Placken kregen. Weern wi to laat? Ut de Möhl, en smuckes oles Fachwarkhuus vun 1649, kemen al allerhand Lüüd. Aver de güngen in dat vun den Möhlenvereen upbute Zelt vör de Möhl.

 


Möhlendiek


Düsse wunnerschöne Fedderlibell warrt präsenteert vun'n Rönnauer Möhlendiek

Wi hebbt uns eerstmal buten ümkeken. Achter dat Fachwarkhuus liggt en vun ole Bööm infaten Möhlendiek. An't Över wussen verscheden smucke Waterplanten. Veel blage Fedderlibellen sweevten över dat Water un setten sik up en gröön Blatt in de Sünn.


Lütte Holtbrüch

De Wulken un de blage Heven spegeln sik in dat blanke Water. Dat weer so'n richtig smuckes Bild. Mitünner krüsel sik dat Water. Grote swatte Schatten weern to sehn. Dat weern Karpen. Ok de ole Watermöhl spegel sik in den Diek.


Möhl un Spegelmöhl

 

Denn ratter miteens dat Möhlwark. Gau güngen wi in de Möhl. Dor weer en Führung in Gang. Ganz ünnen weer de Maschinenruum. Mit en Turbin wöör de Möhl andreven.

 

 

 


Fällt in Rönnau 'n Sack Mehl üm...


De Möhlsteen


Seilwinsch heel baven

Bit 1900 wöör de Antrieb vun de Möhl noch mit en ünnerschlächtiges Waterrad bedreven. Denn güng dat för uns in dat neegst Stockwark. Dor weern de Möhlsteen in Holtverkleedungen to sehn. Ganz bit baben sind wi de Treppen hochstegen. Bit up den letzten Böhn, wo dat Koorn in de Trichter schütt warrt. Wat en Glück, dat de enkelten Stufen nich so hoch weern. För de Müllerburschen, de de groten Säck up den Rüüch na baven slepen müssen, weern de Afstänn vun de Stufen extra wat lütter maakt. Bald wöör aver en Seilwinsch anbröcht, üm de Säck na baven to trecken. Likers weer dat för de Müllerburschen noch en swoor Stück Arbeit mit de velen Säck.

Deep beindruckt vun dat Müllerhandwark klattern wi vörsichtig wedder na ünnen. Buten hebbt wi denn noch den Abfluss vun de Möhlenbeek bekeken. In dat klore Water kunnen wi veel lütte Fisch utmaken.


In düt klare Water...


...sünd düsse lütten Fisch tohuus


Möhlenafscheed: Dat Telt warrt afbuut

 

Unsen Nahuusweg güng wedder över de Nevenstraten. So kunnen wi noch mal de smucken Gräser an de Stratenkanten bewunnern. De Roggen un Gassenfelder lüchen in Avendsünnenschien. De Möhlendag weer wedder för uns en groot Beleevnis.

 


To'n Anhören hier klicken:

Lesen deit Antje Heßler in holsteiner Platt.

3.6.2012


na baven