Brune Schöönheit

En Uul an't Kökenfinster

vun Antje Heßler


Se köönt de Fotos per Klick vergröttern. Trüch kaamt Se denn mit den Zurück-Knoop op de Browser-Symboolliest.

Dor seet doch wohrhaftig in de Gardin vun't Kökenfinster en Uul! Keen grote Uul mit en Fedderkleed, ne, en Nachttuul. Dat weer en Nachtfalter. So en smucke Uul heff ik dat eerst Mal to Gesicht kregen.

Toeerst dach ik, dor harr de Wind en verdröögtes Blatt hinweiht un dat harr sik in de Gardin verhaakt. Ik wull dat wegdoon, aver dor röög sik dat Blatt. Keek mi mit grote Ogen an. Dat weer ja en Deert, en Bottervagel! En Bottervagel in den Dezembermaand! De söch seker de Warms.


Se maakt grote Ogen...

Eenige Bottervagels överwintert in Muerritzen un up Bööns ünner de Dackpannen. So as de lütte Voos to'n Bispeel. He kümmt bi den eersten warmen Sürmenschien in't Fröhjohr to'n Vörschien. Aver dat weer keen Voss.

Dat Deert sehg na en Nachtuul ut. Aver in den Dezembermaand?


...un bevert...

Up den Rüüch harr se en ganz smucket Muster. As ik se anfaten wull, zitter se an't ganze Liev. Se möök sik warm un breed denn ehr Flünken uteenanner. Dorna flöög se en lütt Stück. Sett sik aver glieks up den Kökendisch daal un leet sik vun mi goot knipsen.

 


...un bevert

Ik müss nu unbedingt weten, mit wokeen ik dat to doon harr. Seet dor würklich en Nachtuul in mien Köök? Ik müss lang söken, bit ik den Naam funnen harr. Dat weer en Achat-Uul. De Naam pass goot to ehr „Outfit". De Flünken harrn dat Muster vun en Achat in brune Farven.

Ik heff se richtig bewunnert un se denn vörsichtig na buten bröcht.

Ünnerwegens leet se sik aver ganz eenfach ut mien Hand up de Eer fallen. Ik heff söcht un söcht, aver kunn se nich wedderfinnen. Hoffentlich pett ik se nich breet! An't Kökenfinster harr nu eenmal en Uul seten!


19.12.2014


na baven