Oosterlämmer

vun Katja H. Renfert

Nu is dat bald wedder so wiet, Oostern steiht vör de Döör.

In de Tied üm Oostern kaamt in Schleswig-Holstein jedes Johr bi 200.000 Lämmer op de Welt.

Traditionell steiht en Lamm as Teeken för dat Leven un de Unschuld; dat meist witte Fell is en Symbol för binnere Reinheit un Frömmigkeit. In de christliche Kunst is en Lamm oftins en Symbol för Christus un wiest sien Sieg över den Dod un dormit sien Operstahn op.

En Barg vun düsse Tieren sünd bi en Spazeergang op'n Diek un dorvör in dat
Naturschutzgebiet an de Elv bi de „Hetlinger Schanze“ to sehn. De Schanze weer vun 1659 bit 1768 as Bollwerk gegen fienern Truppen opbuut un üm den Toll för den dänischen König intodrieven. Bit 1865 weer dat Rebeet den König sien Privatbesitz, aver 1929 keem de verwaltungsrechtliche Gutsbezirk to dat Land Schleswig-Holstein. De ganze Tied weer dor uk en Buurnhoff, un de is bit hüüttodaags bleven.

Klick op to'n Vergröttern!

An'n Strand staht uk de gröttsten Frieleitungsstrommasten vun Europa, un dat gifft en Sportboothaven.

Wenn Se en Utfloog dorhin maken wüllt, köönt Se mit'n Auto achter Wedel över de B 431 bit Holm un denn links affahren. Uk mit de S-Bahn vun'n Dammtor-Bahnhof bit Wedel un denn mit'n Bus 589er is dat licht hentokamen. Un wenn Se denn mööd sünd vun't Spazeerengahn: besöökt Se Familie Körner in ehr Café (Tel. 04103-2214)!