Dat Stüern van dei Blaumensymmetrie

van Ludgerd Lüske


Se köönt de Fotos per Klick vergröttern. Trüch kaamt Se denn mit den Zurück-Knoop op de Browser-Symboolliest.


Kortens fünnen wi bi us up den Hoff einen wunnerlick wossen Fingerhaut. Sowat harn wi noch nich seihn.

Nu güng dat Seuken in dei Biobäuker un in't Internet los. Wi fünnen uck wat äöwer dei passen Genetik.

Dei binnenstüerten off butenstüerten Gene van dei eiersten Kontroll-Laoge legget faste, off Blaumen entstaoht off nich. Ehr Aktiveiern settet eine Riege van mehr Gen-Aktionen in'n Gang. Dat giff denn fardige Blaumen. In dat komplexe, blots deils künnige Programm van dei Blaih-Gene finnt man eine tweide Gen-Laoge, dei faoken unner dat Leit van dei Heterochronie-Gene staoht. Disse Gene regeiert dei naokaomen Gene. Dei neumt man Symmetrie-Gene off Katastergene. Disse werd an dei Stäe van ehre Aktion utbillt. Dei sorgt för eine gröttere Struktur van dei Blaumen un ehre Symmetrie-Laogen un uck för dei Taohl van dei Blaumen un ehre Orgaone. Mutationen up disse Gen-Laoge ännert meist nich dei Blaih-Tied, aower grotendeils dei Architektur van dei Blaumen un den Blaumenstand.


Symmetrie bi dei Fingerhaut-Blaumen

Bi dei Buuk-Rüggen-Blaumen (dorsiventraolen B.) sorget Mutationen in dei Gene Cycloidea (CYC) för ein Uphäben van dei Buuk-Rüggenstruktur. So entstaoht denn dreihsymmetrischke Blaumenformen. Man kunn experimentell wiesen, dat CYC sick blots in dat Rüggendeil utbillt un dor för mehr Zelldeilungen un Wassen sorgt.

Ein anneret Gen van disse Ort, Centroradiales (CEN), is uck för dat Utbillen van Buuk-Rüggen-Blaumen nödig. Dat Inaktiveiern van CEN giff dreihsymmetrischke Blaumen, aower recht laote bi dat geschlechtlicke Entwickeln. Dei freuhen Blaumen wiest noch den normaolen Wildtyp, läöter werd dei einzige dreihsymmetrischke Blaumen utbillt, dei den Blaumenstand baoben affschlutt. Disse Mutation finnt man mangers bi den Fingerhaut (Digitalis purpurea). Dortau segg man Pelorie.


Gen-Plaon tau dei Pelorie (Äöwersicht), Bild-Daoten: Ludgerd Lüske

Verklaarn:

  • Blaumen = Blüte/n
  • radiärsymmetrisch = dreihsymmetrisch
  • dorsiventral = mit Buuk-Rüggen-Siete
  • Pelorie = straohlige Blaumenform
  • Heterochronie = Ännern van den Tied-Affloop bi dat Entwickeln van ein läben Plant off Deiert
  • Wildtyp = Wildform bi Planten un Deierts, dei bi dei Evolution entstünd


Fotos: Ludgerd Lüske
4.7.2020


na baven