Rosetta

Dei Rosetta-Mission


 

Dei Rosetta-Sonde

Rosetta is eine Weltruumsonde van dei ESA, dei an den 2. März 2004 mit eine Ariane 5 G+ starten dö un nao den Komet 67P/Tschurjumow-Gerasimenko flügg. Rosetta, bawet van EADS Astrium in Friedrichshafen, is dei eierste Kometen-Orbiter un schall in dit Johr 2014 in eine Ümloopbaohn üm dit lüttke Hemmelsobjekt inschwenken un dat ünnerseuken. Up dei Reise dorhen güng et in dei Johre 2008 un 2010 an dei Asteroiden (2867) Šteins und (21) Lutetia vörbi, vördem man Rosetta an den 8. Juni 2011 up den van dei Sünne an'n wietsten affliggen Baohndeil in einen "Deipschlaop" (Deep Space Hibernation) leggen dö. An den 20. Januar 2014 waokede dei Sonde van dissen Ruhetaustand wedder up un maoket sik nu praot för dat Draopen mit den Komet.


Rosetta up ehr Reise. Bild ESA

Dei Mission


Klick up tau'n Vergröttern!

An Bord van Rosetta is uck dei 100 kg schwore Landeapparaot (= Lander) Philae. Dei schall up den Komet landen un Experimente maoken, dei Wiesteiken gäwet äöwer den Upbau van den Komet. Dei Daoten gaoht an dei Rosettasonde, dei up eine Ümloopbaohn üm den Komet bliff, un werd denn an dei Eern wiederleitet. Solange man nich naug äöwer den Upbau van den Komet weit, werd Rosetta vör dat Affsetten van Philae eiers maol dei Butensiete kartograopheiern un analyseiern. So will man eine passen Landestä finnen, uck wenn man vörweg nich naug Künne doräöwer hätt.

Ansick was dei Start van Rosetta all för den 13. Januar 2003 plaont un dei Landestä schull up den Komet 46P/Wirtanen wän. Dat Ariane-5-Raketenprogramm mök Probleme, so wörd dei Start üm ein Johr verschaoben. Uck den nächsten Start an den 26. Februar 2004 möß man wägen leipet Weer 20 Minuten vör dat Affhäben affbräken. Wägen den starken Wind in dei bäöweren Atmospäre wörd disse Termin up den 27. Februar 2004 verleggt. Man an dissen Dag fünd man einen Fähler an den Hitteschutz un dei Start wörd up Anfang März verschaoben. Eiers fief Daoge läöter was denn dei Start van Rosetta an'n 2. März 2004 van dat Weltruumzentrum Kourou in Französischk-Guayana. Dei Drägerrakete van den Typ Ariane 5 G+ steeg up üm 8:17 Uhr MEZ mit dei drei Tonnen schwore Sonde an Bord.

Dei Sonden-Naome Rosetta kummp van den Stein Rosetta, womit man den Code för dei ägyptischken Hieroglyphen in dei Hand har. Up dei süftige Ort schall dei Sonde Rosetta dorbi helpen, Künne tau kriegen äöwer den Taustand van dat Sünnensystem as dit entstünd. Dei Naome van den Lander Philae kummp van eine Nil-Insel, up dei man einen Obelisk fünnt, dei bi dat Entziffern van den Stein Rosetta hülp.

An Bord van Philae is ein Prototyp van dei so neumte Rosetta Disk, eine bold fief zentimeter groote Schiewe ut eine Nickellegierung. Up dei sünd so üm dei 15000 Textsieten mit Informationen äöwer 2500 Spraoken mikroskopischk lüttket inätzet.


Baohnen van Rosetta (schwart), Eern (greun), Mars (rot), Jupiter (bruun) und 67P/Tschurjumow-Gerasimenko (blaw). Dei Taohlen staoht uck in den Text.

Fleigbaohnen

Et giff tau Tied kiene Drägerrakete, dei eine so schwore Last direkt up dei Baohn van einen Komet bringen kann. Dortau ligget Dei Eern un dei Kometen in dat Gravitationspotentiaol van dei Sünne tau wiet uteinanner. Dei bäöwerste Arianestufe bröchde Rosetta blots up eine Baohn duune bi dei Eern üm dei Sünne ümtau, somit blots ut dat Gravitationspotentiaol van dei Eern rut. Dit is in dat wieste Diagramm mit "1" anteiket. Nao ein poor Daoge stünd faste, dat man dei vörseihn Baohn nau naug draopen har, so har Rosetta naug Driewstoff för dei heele Mission, uck besünners för dei Baohnkorrekturen bi dat plaonte Vörbifleigen an dei beiden Asteroiden.

Ein Johr läöter, an den 4. März 2005, flög Rosetta ein eierstet Swing-By-Manöver, wobi dei Sonde bit up 1900 km an dei Eern ranköm. Dei Sonde was vör dit Draopen "2" ein bäten butsiet van dei Eerdbaohn flaogen un dei Eern har dei mitschläpet un up Geschwinnigkeit bröcht.


November 2009 Foto van dei Eern: Deile van Südamerikao un dei Antarktis. Mehr Biller hier

Dornao flög dei Sonde orig drocke nao buten weg un verlös so minner Energie, as sei vördem van dei Eern krägen har (Swing-by-Manöver). Dei Sondenbaohn löp nu bi "3" äöwerkrüz tau dei Marsbaohn, den sei dor nao einen wiederen Ümloop un Kurskorrekturen an den 29. September (32 m/s = 115,2 km /h) un an den 13. November 2006 (0,1 m/s = 0,36 km/h) tau ein orig knappet Swing-By dröp. Dat nächste Begägen an den 25. Februar 2007 mit den Mars mit einen Minimaolaffstand van blots 250 km mök Rosetta üm 2,19 km/s (= 7884 km/h) langsaomer. Dat bröchde för Rosetta bi dat naokaomen Wesselwarken mit dei Eern orig wat in. Dit Wark bi "4/6" bestünd ut twei Swing-By-Vörgänge ümmer an den 13. November in dei Johre 2007 un 2009 mit dei Affstände van 5295 un 2481 km. Dei wunnen Energie kan man kennen an dat Taunähmen van dei groote Halfassen van dei Baohn up knapp 1,6 un 3,1 AE - 3,5 AE is dei Wert för den Komet 67P/Tschurjumow-Gerasimenko, an den dei Sonde sietdem duuner rankummp.

Dat Vörbifleigen an Asteroiden

Rosetta köm up ehren Kurs dör dat Astroidenband duune an dei beiden Asteroiden Šteins und Lutetia vörbi. Dit kunn man aower eiers nao den Start fasteleggen, an den 11. März 2004. Eiers don kunn man affschätzen, woväl Driewstoff för dei Swing-bys nödig was.


Düt is kein Kartüffel, sünnern de Asteroid Eros.
Asteroiden sünd nu mal kein Schöönheiten. Foto: Nasa

Dat Vörbifleigen an den Asteroid (2867) Šteins

An den 5. September 2008 köm Rosetta bi dat eierste Dörfleigen dör dat Asteroidenband an den 4,6 Kilometer grooten Šteins in rund 800 km Affstand vörbi. An dissen Asteroid kunn man dör eine van dei ESA eiersmaols brukte optischke Navigationsmethode in einen exakt plaonten Affstand vörbifleigen. Dortau settde man dei beiden Navigationskameras un dei Wätenschkupskamera OSIRIS in, dei möken eine plaonte Riege Biller van den Asteroid. So duuner dei Sonde an Šteins ranköm, so nauer kunn man dei Baohn van disse beiden Objekte taueinanner beräken. Tüschken dei Sonde un den Asteroid was dei Geschwinnigkeitsunnerscheid 8,6 km/s (= 30960 km/h).

Dortau möß man dei Sonde so hendreihen, dat dei Kommunikationsantenne nich nao dei Eern wiesen kunn. Nao 90 Minuten Funkstille kreeg man all dei eiersten Telemetriedaoten, aals was gautgaohn. Dei dortau rutgäben Biller wieset ein Objekt mit Brillantform mit väle Impaktkraoters.

Dat Vörbifleigen an den Asteroid Lutetia

Rosetta köm an den 10. Juli 2010 an den rund 100 km grooten Asteroid (21) Lutetia in einen Affstand van 3162 km un eine Relativgeschwinnigkeit van 15 km/s (= 54000 km/h) langers.


Asteroid Lutetia, fotografeiert van "Osiris"

Bi dit Vörbifleigen schull nich blots disse Asteroid faotet wern, up den orig groote Kraoters, Graote un Eerdaffrutschke un eine Riege groote Felsen vörkaomet. Et schullen uck dei Wätenschkupinstrumente van Rosetta un ein't van dei teihn Experimente van den Lander Philae testet wern bi groote Kölde, 407 Millionen km van dei Sünne un 455 Millionen km van dei Eern weg.


ESA-Originaol-Artikel; Südollnborger Platt: Ludgerd Lüske
Biller: ESA

2.2.2014


na baven