Rosetta
Landeapparaot Philae:
Eine sünnige Landestä up den Kometenkopp


Komet mit Landestä. Klick = Vergröttern!

Landung up den Kopp van den Komet

Wenn dei Landeapparaot Philae, so as vörseihn, an den 11. November 2014 up den Komet Churyumov-Gerasimenko upsetten dait, denn töff up üm eine Landestä mit eine wesseln, aower nich tau daone upkielte Landschup, gaut utlüchtet van dei Sünne un meist aohne schraote Affhänge. Nao ein twei Daoge duuren Utseuken hätt dei Philaekring unner dat Leit van dat Dütschke Zentrum för Luft- un Ruumfohrt (DLR) nu van dei fief passen Stäen dei Landestä J fasteleggt. Dei Gägend up den Kopp van den tweideiligen Komet gewünn nao ein nauet Utwerten van aale vörliggen Daoten tauleßte dat Rennen.


Ansicht van den Kometenkopp. Süht ut as dei Kopp van eine Löwin...
Krüüz = Landestä. Klick = Vergröttern!

"As wi up dei aktuellen Naohupnaohmen seihet, is dei Komet Churyumov-Gerasimenko eine moje un uck recht besünnere Welt — dei dait dei Wätenschkup bewägen, hätt aower eine Form, up dei dat Landen wohrhaft nich licht is", sägg dei DLF-Forschker Dr. Stephan Ulamec, dei Projektbaos för den Landeapparaot Philae. "Nich ein'n van use fief Kandidaoten hätt dorümme 100 Prozent van aale Kennteiken wieset, aower dei Landestä J is wiss dei beste Utwaohl."


Nahupnaohme van dei Landestä. Klick = Vergröttern!

Bold säben Stünn schall dat duuren, bit Philae nao dat Afftrennen van dei ESA-Sonde Rosetta up den Bodden van Churyumov-Gerasimenko upsetten dait, un so ampart tau't eierste maol ein Landeapparaot up einen Kometenbodden tau Staohn kummp. Dat giff naug Tied för dei Ingenieure un Wätenschkuplüe, nich tau väl Energie tau verbruuken un so forts nao einen utklamüsterten Plaon aale teihn Instrumente van Philae in'n Bedriew tau nähmen. In disse so neumte "First Science Phase" ("Eierste Forschkungs-Dörgang") werd dei Landeapparaot, dei van dat DLR- "Lander Control Center" in Köln stüert, bedräwen un kontrolleiert werd, van siene Batterien versorget. Dornao sorget meist säben Sünnenstünn an einen Kometendag dorför, dat sick siene Batterien staodig wedder uplaodet — dorümme was dei Forscherkring orig dorup bedacht, dat Philae an eine sünnige Stä landen dö. För dei Wätenschup interessant is dei Gägend besünners dör dei Aktivitäten van den Komet up sienen Weg nao dei Sünne hen: Duune bi dei Landstä J ligget Leegden, dei vellicht nu all aktiv sünd.


Flach up den Komet. Klick = Vergröttern!

Analysen för ein sekeret Landen

Den uträkten Fleigplaon, dei eiersten Resultaote van dei Instrumente an Bord van dei Rosetta-Sonde un uck dei Daoten van eine Riege van Landetests an dat DLR in Bremen dö man för dat Urdeil bruuken. Bi Tests in dei Maitied 2013 haren dei Ingenieure dor ein 1:1-Landemodell up einen harten un einen weiken Unnergrund in dei Lama-(Landing and Mobility Test Facility) Anlaoge utprobeiert. In Computersimulationen kunn man so dei Probleme up dei unnerscheidlicken Landestäen unnerseuken.
In dei taukaomen Wäken werd dei Landestä nu duunerbi unnersöcht un et werd immer nauere Fleigbaohnen för Rosetta un Philae beräket. Schull man dorbi marken, dat dat Gelände binnen in dei Landegägend dütlick upkielter is as dacht off dat ein beachtlicket Utgasen van den Komet dat Landen an disse Stä schwor maoket, hätt dei Stüermanschkup tau'n Landen dei Stä C as tweide Waohl utsöcht. Uck disse Landstä, dei up dat grötere End, dat Hauptdeil, van den Komet ligg, krigg up dat orig lieke Gelände naug Sünnenlecht.


Flach up den Komet. Klick = Vergröttern!

Dei annern Landestäen I, B un A, dei man uck nähmen kunnde, füllen bi dat Urdeil herut, wiel man bi dei gründlicken Anaolysen marken dö, dat sei wichtige Eigenheiten nich harn. So sehg man up Naohupnaohmen ut rund 30 Kilometer Affstand dütlick, dat up dei Landestä B binnen van eine kraoterähnlicke Struktur mehr grötere Brocken ligget, as man eiers dachde.

Vörbereiten för den grooten Dag

Mit dat Fasteleggen van eine Landestä un dat dortauhören nauere Uträken van Fleigbaohnen käönt dei Ingenieure van dat DLR-Lander-Kontrollzentrum (LCC) in Köln uck den Affloop för dat Affstiegen un dat Landen anpassen un optimeiern. Dat dait Philae sülwstännig — aohne ein Ingriepen van dei Eern ut — up den Komet daol laoten un för sienen Bedriew up Churyumov-Gerasimenko vörbereiten. Testet werd dei Aktivitäten van dei Fleigeinheit vörweg mit ein Boddenreferenzmodell van den Landeapparaot in dat LCC. Dei Kommandos för Philae un siene teihn Instrumente an Bord werd up dei Mission van dat DLR-Kontrollzentrum nao dat europäischke Missions-Kontrollzentrum ESOC in Darmstadt un van dor ut äöwer dei Boddenstation nao Rosetta un Philae schicket. Dei Telemetrie van Philae geiht ümmedreiht äöwer dat ESOC nao dat LCC.

An den 15. Oktober 2014 wörd dei utsöchte Landestä denn bestätigt. "Nu häbbet wi eine Landestä — nu käönt wi us up einen grooten Dag vörbereiten", sägg Lander-Projektbaos Stephan Ulamec.


Philae up den Planeten. Bild: ESA

Dei Mission

Rosetta is eine Mission van dei ESA mit Bidräge van ehre tauhören Staoten un van dei NASA. Dei Landeapparaot van Rosetta, Philae, werd van ein Konsortium unner dat Leit van dat DLR, MPS, CNES un ASI bistüert.

  • DLR: Deutsches Zentrum für Luft- und Raumfahrt
  • MPS: Max-Planck-Institute für Sonnensystemforschung,
    Göttingen
  • CNES: Centre national d'études spatiales,
    französchke Weltruumagentur
  • ASI: Agenzia Spaziale Italiana,
    italiäönschke Weltruumagentur


Autorin: Manuela Braun/DLR, Projektbaos: Dr. Stephan Ulamec/DLR
Bildherkaomen: ESA/Rosetta/MPS for OSIRIS Team MPS/UPD/LAM/IAA/SSO/INTA/UPM/DASP/IDA
Oginaolartikel un Rosetta-Blog; Südollnborger Platt: Ludgerd Lüske

23.10.2014


na baven