Swulken an'n Heeven

vun Richard Weigand


Dat is son laaten Sommmerdag, de Luft is warm un sieden un de Schadden lang.
Still is, keen Vagel singt un keen Kuckuck röpt mihr.


Teknen: Richard Weigand. Klick op to'n Vergröttern!

An'n Heeven de lütten Swulken, se fleegt hoch, de Insekten na, sammelt Fudder vör de tweete Brut. Jümmerto mööt se Fudder haln, de Lütten mööt flink wassen un Fleegen lehrn, den bald ward wedder rüst för de grote Reis. Uns Herrgott hett jem son Reis todacht, över dusende Kilometer un veele Gefohr'n, mit Storm, Regenschur un Hogelslag, bit hen no Afrika in't Winterloger.

Överall gift dat Minschen, de Smacht hebt or Langewiel — un Vagels fangt.

Dor much ik jüst wünschen: "Lütte Swulk, koam heel wedder torüch, ob den warmen Luftsrom na'n hogen Norden hen, wenn't wedder Fröhjohr ward! Kleester dien Nest ünner't Dack, ik arger mie og nich över de Schiet, de ik obfegen mutt, og nich över de witten Plaaken ob de rode Huswand. Lot mie wedder dien Gezauster hör'n ut dien Nest rut un sing düchtig mit bi dat Vagelkonzert an'n freuhen Morgen, wenn de Sünn obgeiht!"

Lütte Swulk, koam wedder torüch na'n Norden — dat weer mien Wunsch al 2015. 2016 hebt wi lang utkeeken; all de Johr'n weern de Swulken so üm foffteihnsten bit twintigsten Mai wedder dor — doch dütt Johr nich.


Dor harn wi mol son Doppelwopper!

De Juni vergüng bit an'n twintigsten, un dor weern denn twee enkelte Swulken dor. De harn in twee Daag ehr Nest torech un an'n drütten Dag seeten se al ob dat eerst Ei to brüten. Ik heff mi bannig freit — un an'n veerten Dag wedder argert. Dor har'n de Lünken Stried mokt, dat Ei rutsmeeten un de Swulken verjoagt.

De Lünken hebt in de letzten Johr bannig tolehrt, sünd nu al meist so geschickt as en Swulk or en Mees, un dumm Tüch harn's al jümmer in'n Kopp.


Nisthülp buun: De Gipsmischung anrögen


Nisthülp buun: De Gips warrt ob de Styroporballdelen
ob dat Brett opdragen

Nu heff ik no en Anleitung vun'n Nabu mi an Nisthelp versöcht, dat heet:

  • Twee Holtbreed as Eck tosomenklütern,
  • een Styroporball, in veer Stück'n snieden, twee Stücken in de Eck ob dat Holt leggen un Folie överleggen.
  • Gips mit Saagspöön un fien Kreumel vun Holtkohle mischen, anrögen,
  • ob Folie un Styropor obsmer'n.
  • Wenn't allns hatt word'n is, de Folie un Styropor rut, un allns as Nisthelp ünnert Dack nogeln.


De fertige Nisthülp

Nu mutt ik ob 2017 töven, ob dat noch Swulken gifft un ob jem mien Arbeet gefallt.


Fotos un Teknen: Richard Weigand

7.8.2016


na baven