So weer dat Wedder in Januarmoond

Dat Wedderdaagbook vun Uwe Mohr


Nieges Johr — ohles Wedder. Ännert sik jo veeles in't niege Johr 2014, bloots dat Wedder blifft wie in't ohle Johr. Natt, windig, wenig Sünnenschien, over mit Fröhjohrstemperaturen geiht dat erst mol wieder. Von Winter nix to marken.


Gott Janus kiekt togliek in de Vergangenheit un in de Tokumst, he is de Gott vun den Övergang. Römische Münze

Den Nomen Januar hett de eerste Moond in't Johr von Gott Janus, een oltrömischen Gott. He harr en Doppelkopp un bewohr dat Huus.

Nu kümmt Stormdeep Anne mit Schietwedder. Ok an Dreekönig ward nich beter. Stimmt de Buernspruch: "Is Dreekönig keen Winter, kümmt keen mehr achterran," künnt sik de Menschen, de keen Winer mögt, een högen.

De eerste lange Wuch licht nu vör uns. Ik weet, dat Moondag is, un verbiester mi nich mehr in de Doog. Nodem uns Deep Dagmar en frische Bries üm de Nees weiht hett, treckt se nu af na Russland. Kollegin Elfriede licht over al op Luer. Mit Regentrude in Slepp sorgt beide nu för Natten un Wind.


Foto ML

In de Mitt von Moond, allerdings mit Nevel bit Meddag, een schönen Winterdag mit sogar twee Stünn Sünnenschien. Hüüt hebbt wi Vullmoond, un de Dag is siet Winteranfang al een halvig Stünn länger. Is jo schön, over: "Wenn de Doog anfang to langen, kümt de Winter eerst ingangen." Wi möt dat nehmen, as dat kümmt.

Siet vör över hunnert Johr hebbt wi de tweet wärmste Januar, no Anfang von Wetteropteknungen. Anfang drütte Dekade heet en Buernspruch: "To Fabian / fangt de rechte Winter an." Wat passert? Schon de veerte Dag mit Duerfrost, osigen Wind ut Oosten, un Snee! Hoch Benjamin sorgt dorför, dat de Temperaturen iesig blieven.


He mag Maden in Sommer un Knödel in Winter, de Buntspecht.
Foto: Uwe Mohr. Klick op to'n Vergröttern!

Nu gifft dat ok düchtig wat an't Vogelfudderhuus to kieken. De ganze Vogelschor freut sik, dat se Fudder finnen, un de Buntspecht wiest, woans Knödel bearbeitet ward. No söven Doog mit Duerfrost krüzt nu Deep Lilli op. Un wat hett se in de Packeloosch? Dauwedder! Weer man bloos een Eendagsfleeg, dat Dauwedder. No veer Doog, mit Duerfrost an Enn von Moond geiht de Januar — un de Frost erstmool suutje in de Knee.


Foto ML

Wedderdoten letzte Moond:

  • De Dörchsnittstemperatur harr in 2 m Höchte 0,92°C, dat sünd 0,28°C ünnert Middel.
  • De Höchsttemperatur mit 11,1°C harrn wi an 9. un de deepste an 26. mit -13°C.
  • 20 cm in de Eer in Dörchsnitt 3,8°C, un 5 cm över de Eer de deepste mit -12,8° an 26.
  • Un de Sünn? Nur 19,5 Stünn is se ut eer Wolkenbett krabbelt. Dat sünd nur 38% von't Soll.
  • Solorstrohlung slappe 53 W/m². Hoch weern 295 W/m² an 27.
  • Nedderslag an twintig Doog hett 55 l/m² bröcht (80,3% von't Soll). Aftrocken dörch Evapotranspiration sünd 5,34 l/m².
  • De Pusterich hett am meisten mit 52,7% ut O-SO weiht, un am Düllsten mit 53 km/h (7 Beaufort) an 7. ut W-SW.
  • De Moond harr 11 Iesdoog (Tmax < 0°C), 15 Frostdoog (Tmin < 0°C), negenuntwintig kohle Doog (Tmax < 10°C) un un twee sehr kohle Doog (Tmax < -10°C).

Un nu de Dotentorüchblick op 2013 (in Klammern 2012):

  • Höchsttemperatur in 2m Höchte an 2. August 32,5°C (33,4°).
  • De deepste in 2m Höchte an 12. März - 14,6°C (-19,9).
  • De Dörchsnittstemperatur leeg 8,6°C (8,5°) , somit 1,1°C (1,2°) ünnert Middel.
  • 20cm in de Eer harrn wi in Dörchsnitt 9,8°C (10,1°), un 5cm över de Eer 8,7°C (8,8°).
  • Regen an 214 Doog (244) hett 750 l/m2 (660 l/m²) ansammelt. De meiste Nedderslag full mit 50 l/m² an 22. Mai (22,8 l/m² an 5.1.)
  • 1674 Stünn (1449) weer uns Sünn to sehn. Am längsten stünn se an 11. August mit 13 Stünn an Heven (25. Mai 14 Stünn).
  • De Wind keem mit 19% ut W-NW un harr an 28. Oktober de höchste Böe mit 93 km/h =10 Bft. (17% W-SW, 5.1. 65 km/h = 8 Bft).
  • Iesdoog harr dat Johr 26 (Tmax <0°C) (25), Frostdoog 96 (Tmin< 0°C) (78), Kohle Doog 152 (Tmax < 10°C) (143), Sommerdoog 23 ( 16) (Tmax >= 25°C), Hitte Doog 3 ( 2 ) (Tmax >= 30°C), sehr kohle Doog 4 (9) (Tmin <= -10°C) un warme Doog 112 (106) (Tmax >= 18°C).

Mehr Wedder gifft dat hier: hartenholmer-wetter.de.


2.2.2014


na baven