So weer dat Wedder in Januarmoond

Dat Wedderdaagbook vun Uwe Mohr.
All Biller: Uwe Mohr

Dorto schrift Heinrich Hoffmann vun Fallersleben:

Dat ohle Johr is vergohn, dat niede Johr fangt an.
Wi dankt Gott för düsse Tiet, sünd froh, dat wi noch sünd!
Wi seht op ohle Johr torüch un hebbt nieden Moot:
Een ni'et Johr, een ni'et Glück! De Tied is ümmer goot.

Wi trecken froh gliek rin, denn vörwarts! Vörwarts! Ni torüch!
Dat sall uns Losung sien.

Platt: Uwe Mohr

Twölf Moonde 2014 liegt achter uns. Dat warmste Johr, sieht af 1881 Wedderopteknungen mookt ward.

Wokeen kiekt hier so skeptisch — He oder Se?
De Meesch is de eenzige inheimsche Lüttvagel mit blaugele Feddern

Nieges Johr, over ohles Wedder bringt dat erste Deep "Alexander". 2015 hebbt de Deeps Männer- un de Hochs Fruennomen. Fröher weer dat jümmer annersrüm, aver de Feminismus hett nu ok de Meteorologie footkregen! Man wi sünd ja alltohoop Gentlemen un Kavaliere un seht dat Gode an de Saak: Wenn Ehr Leevste ehr Noom mit P, Q oder Z anfangt, köönt Se ehr noch en schönes Hoochdruckrebett köpen!

Wo blifft se bloots, de Leevste?

Veel loos över See un Land! En reines Hoch-Deep-Gerangel. Over ok 2015 ward uns de Sünn schienen. An 4. weer se twee Stünn to sehn. Grau in grau sünd de Dooch. Hüüt, an Dreekönigsdag, heet een Spruch: "Is bit Dreekönigsdag nich Winter, kümmt keen mehr dorhinner."

Veele smucke Dannbööm hebbt uns Wiehnachtsstimmung bröcht — un nu fleegt se rut! Seker ward Orkandeep "Elon" mit Hölper "Felix", de noch över Island för hohe Wellen sorgt, mit düchtig Storm un Böen ut W-SW noch mol de Twiegen schüddeln. Mit Blitz un Donner ward de Wedderpott to'n Koken bröcht. Ut de Wedderköök dampt Schuerwedder, Sneeregen un Hogel.

In Sommer mag he Moden, in Winter geern mal Knödel!

De 2. Dekode start mit Stormdeep "Felix". Mit +12° will he al Fröhjohrsstimmung moken. Over nee, he besünnt sik anners. Bloots noch +6°. Binnen is beter as buten! — No en Koltfront bloots noch +2° . Mehr Regen as Snee fallt von Heven. Dat is verrücktes Winterwedder!

"Kann mi mal een Foder geven? Wat Leckers?"

Hüüt is de 13. un dat Wedder ännert sik — von Smuddelwedder in Sauwedder! Kann ok nich anners sien, Deep "Herrmann" is övern Atlantik in Anmarsch. In Wedderbüdel bloots Smuddelwedder. Wat kümmt dorbi rut? Batz, meern in Moond is dat Regensoll in Pott! Von 15 Doog weern dörteihn Regendoog! 91 l/m² sünd dat worn.

Huch, wat is dat? Geihst rut — un warst nich natt! Statt Regen von boven Sünnenstrohlen von blauen Heven. Stimmt de Snack: "Friedagswedder = Sünndagswedder"? Jedenfalls dröög is dat hüüt, to'n Niejohrsempfang von uns Gemeen.

"Is dor ünnen villicht noch wat to freten? Hier boven heff ik Tabula rasa mookt!"

De 3. Dekode bringt uns Snee un en schöne Winterlandschaft. "An Fabian fangt eerst de rechte Winter an." Stimmt, wi hebbt al de veerte Dag mit Duerfrost, un hüüt, an 24., sünd 3 cm Niesnee fullen. Allerdings bi Temperaturen över 0°.

Deep "Kurt" is mit veel Undöög ünnerwegs. Harr hier bi uns over nich recht wat in de Mau. Dorwegen kümmt nu Deep "Leonhard"; mit Nevel, Regen, Sneeregen, beten Sünnenschien, -4° bit +7° un Storm will he uns de letzten Doog in Wintermoond verdarven.

"Sankt Agatha, de Gottesbruut, mookt, dat Snee un Ies gern daut." Nu sünd wi al in letzten Wintermoond. Villicht bringt he uns noch Snee, denn: "De witte Kapp in Februar bringt Glück un Segen för't ganze Johr."

Wedderdoten letzte Moond (in Klammern de Doten vun'n Vörmoond):

• Dörchsnittstemperatur in 2 m Höchte +2,5°C (Vörmoond +2°), dat sünd 1,3°C över't Middel.
• De höchste Temperatur mit 11,7°C (10,9°) harrn wi an 19., de deepste mit -4,7°C (-5,8°) an 23.
• In'n Dörchsnitt harrn wi 20 cm in de Eer +3,9°C (4,8°) un 5 cm över de Eer de deepste Temperatur mit -6,7°C (-6,7°).
• De Sünn weer 22 Stünn (21,4) to sehn, rund 42% von't Soll.
• De Solorstrohlung keem op 53 W/m² (45). Se weer an hööchsten mit 425 W/m² (294) an 31.
• Tja, uns Regentrude harr sik wohl de Bloos verköhlt. An 22 Doog (24) sünd 109 l/m² (174) ut ehrn Rock fullen.
• Dörch Evapotranspiration sünd 7,6 l/m² (5) wedder aftrocken.
• De Wind hett an düllsten mit 76 (73) km/h (9 Bft) ut W pustet un keem mit 35% ut W-SW.
• De Moond harr 3 Iesdoog (T_max < 0°C), 9 Frostdoog (T_min < 0°C) un 30 Kole Doog (T_max < 10°C).

"Hier is jedenfalls nix to bieten un nix to knacken!"

Mehr Wedder ünner hartenholmer-wetter.de.