So weer dat Wedder in Maimoond

Dat Wedderdaagbook vun Uwe Mohr


De letzte Fröhjohrsmoond, Wonne- un Blötenmoond Mai is anbroken. He kann as warme Moond komen, over ok mit Regen, Gewidder un Frost. An de Eer kann he bi junge Planten un Blööten veel Untööch moken. Dorto noch kole Luft von Deep "Ursula" — vörbi mit Wonne. "Mai kohlt un natt, füllt de Buern Schüün un Fatt!"


De Rotdorn blöht. Foto Uwe Mohr

Huch, wat is dat? Hebbt de gestrengen Herrn sik in de Tied verbiestert? An drütten -2,2°C Luftfrost un an de Eer -3,3°C. Man good, wi harrn de Kantüffeln noch ünnerhüpelt. To'n Glück hölpt uns over Hoch "Reinhold" mit Sünnenschien, dat de Temperaturen wedder stiegen. Bloots so mollig warm as toletzt will dat noch nich warrn.

"Erst Midde Mai is de Winter vörbi." Kohlt hin, natt her, so möögt wi dat Wedder nich mehr. Maiwedder in April, Aprilwedder in Mai, dor sünd Handschen bi't Radföhrn noch goot to bruken! Must bloots oppassen, dat de Kuckkuck di nich rinschitt. Siet Anfang von Moond is he al düchtig an't Ropen un söcht sik Nester för sien Kuckucksei.


Huusbesetter in't Nest von Wüppsteert. Frech schriet he no Foder von sien Trecköllern. —
Foto: Stephan Tödt. Klick op to'n Vergröttern!

Op he mit Regentrude ünner een Deck stickt? An 8. hett se, no sien Ropen, doch wohrhaftig 39 l/m² ut ehren Rock fallen loten. Wieder geiht dat mit Hogel, Gewidder, over ohn' Warms, in de 2. Dekode. Dor luern an 11., 12. un 13. de Ieshilligen. Groffen Wind ut W-NW un Regenschuer hebbt de kohlen Herren over dat Frostspelen vermiest — wenn dat ok heet: "Vör Nachtfrost büst du seker nich, bit dat Sophie vörröver is": Se is ohn Frost aftrocken.


Immerhen, de witte Fleder blöht! Foto Uwe Mohr

An 16. is dat Thermometer allerdings von bloots 4,4°C morgens denn over doch bi blauen Heven un Sünnenschien op 19°C kladdert. Wat besünners opfallt: de geelen Rapsfeller verleert ehr Pracht. Statt lüchtende Blööten sünd gröne Schoten an't Wassen. As wull de Natur för Ersatz sorgen, fangt nu Linnen, Robinien un Flederbeeren in de Tuuns an, sik op Blöhen intostellen. Se schaukelt ehr Blötendolden un -druven in en leider recht kohlen Oost-Südoostwind. Mien Fru mookt ut de Dolden von de Flederbeeren smackliches Gelee un Fledersekt.


Ok de Grote Sternmiere blöht teemlich smuck. Foto Uwe Mohr

Anfang drütte Dekode, nu de eerste Vörsmack op Sommer. De 21. is denn en Sommerdag worn (Tmax >= 25°C). Wiel dat so schön weer, an nächsten Dag de tweete düt Johr.

Och du leeve Tied, nu sünd wi doch al in Ogenblick an Enn von Moond! In söss Doog is meteorologische Sommeranfang, de wärmste Tied von de veer Johrstieden. Hüüt, an 28., jammert wi: "Wat is dat kohlt!" Duurt nich lang, geiht dat loos mit: "Man, is dat en Hitten!" Dat is nu mol so in Johrsloop, dat Fröhjohr is vörbi, nu fangt de Sommer an.

Wedderdoten letzte Moond (in Klammern de Doten vun'n Vörmoond):

  • De Dörchsnittstemperatur harr in 2 m Höchte 12,3°C (Vörmoond 9,9), dat sünd 0,06°C ünnert Middel.
  • De Höchsttemperatur mit 29°C (21) harrn wi an 21. un de deepste mit 2,2°C (-1,7) an 3.
  • In'n Dörchsnitt harrn wi 20 cm in de Eer 13,7°C (10,2) un 5 cm över de Eer de deepste Temperatur mit -3,3°C (-2,8) an 3.
  • De Sünn hett uns 201 Stünn (184) anstrohlt.
  • Solorstrohlung keem op 301 W/m² (275) un weer an hööchsten mit 1155 W/m² (983) an 29.
  • Regen an 19 Doog (15) hett fix wat bröcht. 103,6 l/m² (59) sünd fullen. Aftrocken dörch Evapotranspiration sünd 80,3 l/m² (46).
  • De Pusterich hett an meisten mit 25,4% ut W-NW weiht un an düllsten mit 45 km/h (6 Beaufort) ut W-SW an 9.
  • De Moond harr 1 Frostdoog (Tmin < 0°C), 2 Sommerdoog (Tmax > 25°C) un 12 warme Doog (Tmax > 18°C).

Mehr Wedder? hartenholmer-wetter.de.


3.6.2014


na baven