So weer dat Wedder in Augustmoond

Dat Wedderdaagbook vun Uwe Mohr


De Noom hett he von Augustus, de eerste Kaiser in't römische Weltriek. Anner Nomen sünd Oorn-, Ahren- un Hittenmoond. Hüüt, an 1., is dat over noch nich dull mit Hitten, un regent hett dat ok al. Mook nix: "Regen vör ach, ward dröög över Dach." So is dat ok worn. Mit 27°C harrn wi schönstes Sommerwedder. So ok an 2. De Hunnen hebbt düchtig Larm mookt. Bit op 32,5°C sünd se mit eer Bellen komen. "Fangt de August mit Hitten an, kümmt en Winter, de recht lang."


Bi de Aarn. Foto ML

Na, na, nu wöllt wi erst mool de Sommer geneten un noch nicht an Winter denken. Bitlang hebbt wi al 5 Sommerdoog un een hitten Dag in Moond achter uns. Dat is Wedder för de Buern, för uns alle un de Natur. In de Luft hörst Meihdöscher brummen. De ersten Stoppelfeller sünd dor. Koppeln, de sünst geel weren, seht nu al wedder swatt ut. Wenn ik de groten Maschinen arbeiten hör, dorto ovens noch dat Zirpen von Flipp, dat Heuperd, dann denk ik ümmer, duert nich mehr lang, denn is de Sommer vörbi, un de Harvst kloppt an de Döör.

Nanu, wat is denn dat? Hebbt de Hunnen al uthechelt? Hüüt morn bloots 11°C . Wi hebbt doch erst de 7. Egentlich is dat hitte Bellen doch erst an 24. to Enn. Nu, in Augustmoond, fallt wedder veele hunnert Sternsnuppen an Ovend von Heven. Dat is immer wedder en funkelndes Schauspeel. — Se süllt jo ok Wünsche erfüllen. Üm de Snuppen to sehn, mutt de Heven allerdings kloor un ohn Wolken sien. Dat ward over gor nich so eenfach. Nu, an Enn von der erste Dekade, is Petrus wohl slecht in de Mütz. He hett Deep "Gert" op Tour schickt. Mit fette, swatte Wolken un marklich köllere Temperaturen. So geiht dat ok noch wieder. In Dörchsnitt 15°C un Pusterich ut W-NW loot schon mol lichte Harvststimmung opkomen.


Foto ML

Huch, wat is dat? An 13. üm Meddag rüm, fürchterlichen Larm an Heven. Hoch "Cornelia" un Deep "Gert" hebbt sik doch nich in de Wull kregen? Ne, dat is Gewiddergott Thor! He poltert mit sien Wogen, trocken von teihn Zegenböck, de Heven lang. Smitt sien Hommer, de ümmer wedder no em torüch kümmt, dat de Donner grollt, un de Blitze zucken. Hölpen deit em noch dat Gewidderdeep "Franz" bi dat Spektokel, un Regentrude meent, poor deftige Schuern gehört ok dorbi. Wat snackt de Buern? "De Augustmoond sünd Donnerwetter nich Schand, se hölpt de Luft un ok dat Land."

Nu, to'n Enn von de tweete Dekade, ward dat langsom weniger mit de sommerliche Knööv. Liekers, Hoch "Elyza" lött sik noch nich ünnerkriegen. Obschon de Nächte mit nur 6° - 11°C al recht frisch sünd, bringt de Sünn de Temperaturen an Dag op leefliche 20° - 25°C. Ok Hoch "Fortuna" hett sünniges Lootsommerwedder in de Packeloosch. Wer kann, gau noch mol düchtig Sünn tanken, denn de Doog mit Sünnenschien waard weniger.


Kohlwittling. Foto Uwe Mohr

Hüüt, an 23., dor weer doch watt, — kloor, de Hundsdoog goht to Enn. Se hebbt uns veer Wochen schönens Sommerwedder bröcht. So ok hüüt, 22,6°C, tein Stünn Sünnenschien, mit O-SO Wind. Gode Teken för noch länger schönes Wedder. Un de Buernspruch: "Wi de Bartholomäidag sik hölt, so is de ganze Harvst bestellt." Dat sün doch gode Utsichten. Villicht hölpt dat ok de Bottervogels in de Luft, denn dor sünd egentlich bloots wenige op Tour. Sühst keen Truermantel oder Admiral op en rodde Plumm. Wenig Dachfauenoogen, Fuchs und Distelfalter. Kohlwittlinge un Zitronenfalter sühst uns to'n Vergnögen noch övern Rosen sweben.

Nützt allens nix, de letzte Sommerwuch geiht to Enn. Wi mööt uns an Harvstanfang gewöhnen, denn: "Üm de Tied von Augustin (28.) trecken de warmen Doog dorhin." Un recht veel körter sünd se ok al worn. Veer Stünn hett de Dag siet Sommeranfang al afnohmen. En sünnigen, to drögen un to warmen Augustmoond liggt achter uns. De drütte Johrstied lött gröten, seggt de Meteorologen. Anners de Natur. Se tövt noch mit Sommersluss bit an 22. En Oltwieversommer is also noch binn. Dat bringt Vörfreud vör uns, over ok nierdings Empörung bi enige recht sensible Tiedgenossen över de johrhunnerteohle Nomensgewung "Oldwieversommer".


Foto ML

Wedderdoten Moond:

  • De Dörchsnittstemperatur in 2m Hööchte harr 17,4°C. Dat weern 0,39°C övert Middel.
  • De hööchste Temperatur harrn wi an 2. mit 32,5°C, un de deepste an 15. mit 6,7°C.
  • 20 cm in de Eer harrn wi in Dörchsnitt 18,07°C, un 5 cm över de Eer de deepste mit 6,1°C an 7.
  • De Sünn hett dat wedder düchtig goot mit uns meent. 230 Stünn hett se schient.
  • Dat hett in Dörchsnitt 316 W/m² bröcht. Hoch weern an 11. 1162 W/m².
  • Allerdings weer dat mit Regen man recht knapp. In 15 Doog sünd 35,8 l/m² fullen. Fehlen noch 34,2 l/m² an't Soll. Aftrocken dörch Evapotranspiration sind denn ok noch 83 l/m².
  • De Pusterich hett am meisten mit 29% ut WSW pustet un an stärksten mit 41 km/h (6 Beaufort) ut WSW.
  • De Moond harr 6 Sommerdoog (Tmax >=25°C), een hitten Dag (Tmax >= 30°C) un 31 warme Doog (Tmax >= 18°C).

Mehr Wedder gift dat ünner: hartenholmer-wetter.de.


2.9.2013


na baven