So weer dat Wedder in Septembermoond

Dat Wedderdaagbook vun Uwe Mohr.
All Biller: Uwe Mohr

Dat is jo egentlich rein to dull, over nützt allens nix, de drütte Johrstied is dor. Hüüt is meteorologische Harvstanfang. Mit 14°C, Smuddelregen un düster, gifft he uns al mol en lütten Vörgesmack op dat, wat komen kann. Wenn denn noch liest: "So wi dat Wedder an Ägidien (dat is hüüt), ward de ganze Harvst"...! Bi so'n Wedder dörfst denn al mol en Sommerdroom hebben.

De Woterjumfer sleckert an'n Blootweiderich un lett sik den Harvstanfang den Puckel dalrutschen

Gifft ok noch ole Nomen statt Septembermoond: Scheidling (wiel de Sommer scheedt), Holtmoond, wiel nu dat Wuracken in Holt anfung. — Harvst is ok de Tied, üm in de veelen Tuuns bi uns hier in Slewig-Holsteen ümsünst von uns Natur leverte Früchte to oorn. Vitamine, goot to bruken, gegen Halsweh un Verköhlung, over ok bi Snuppenwedder.

Op bederes Wedder lött uns "Christobal" hopen. Noch is he övern Atlantik, over mit Hölp von en Hochdruckflach över Russland besteiht goode Schangs för schönes Laatsommerwedder — menen de Meteorologen.

"Na, is noch en Imm ünnerwegens?", fraagt de Sünnbloom

Se hebbt Recht! Af tweten sünd de Ooltwiever in't Land. Mit Warms un Sünnenschien ümgornt se uns. Siet 17. Johrhunnert gifft dat al düsse Beteknen. Dat Fru Schwarzer dor noch gor nich gegen weddert hett?! De hett wohl anner Sorgen. — De Noom "Ooltwieversommer" hett jo egentlich ok nix mit Fruunslüüd to doon, mehr mit Spinnenwüppen un -foden, de dörch de Luft flegen. "Wiever" hett mit "Weber" to doon, nich mit "Wief".

An 6. harrn wi bit Klock halvig fief en Sommerdag (över 25°). Dorno over swatte Wulken, keen Sünnenstrohl, keen Pusterich, over Gewiddergrummeln an Heven. Mit Nevel an Morgen geiht dat in de 2. Harvstwuch. Schient, as ob de olen Tanten in't warme Huus trocken sünd un Strümp för de Enkel knütten.

Mien Enkel is bi düt Wedder lever buten — rin in de Kantüffeln!

Op Tour is nu Deep "Biggi", se bringt afwesselnd Op- un Dolwedder. Sünnenschien, Regenschuer un bloots kohle 13°C in Dörchsnitt. Dat blifft hüüt ok so, denn: "Sünnschien op natte Blatt gifft licht wedder wat." Liekers, Bottervogels un Woterjungfern sünd düchtig an't Flegen un erfreut uns mit er smuckes Utsehen un ehr Flattern dör de Luft.

De Admiraal is vun den Woterdost ganz begeistert

Na ja, dat Koorn is in Sack, de Raps för de nächste Oorn in de Eer, nu koomt Kantüffeln, Grööntüch, Appeln, Beern un Plumm an de Rech. Nich to vergeten, over bloots för Kenner, de smackhaften Poggenstöhl in Woold. Admiral, Citronenfalter, Fuchs, Kohlwittling, Bläuling, Fuchs un noch anner Bottervogels sünd op affull'n Swetschen; uns Klockenopa sien Snack weer denn jümmers to Swetschentied: "Erst mit krusen Moors sünd se sööt un riep."

To'n Sleckern droopt ok noch Horntjes, Jiddeln un Miegmutzen in. Keen Wunner, no en Wuch Lootsommer mit bit to 23°C!

Düsse Poggenstöhl wöörn Kenner lever stahn laten!

De tweete Halfpart von'n Moond is anbrooken. Deep "Gudrun" un "Flora" sünd ünnerwegs. Se mookt dat koolt, bringt düstere Wulken, Wind, Nevel un Regen. Dat ward sik over ännern. An 22. hett sik Hoch "Josef" meldet. Wenn he dor is, ward wohl ok wedder warmer. Poor sünnige, schöne Doog sünd uns förwiß noch no de Mütz.

23. is astronomische Harvstanfang. Dag un Nach sünd gliek lang. Mit kohle 4°C an Morgen un Sünnschien von blogen Heven leggt he loos, de eerste Dag in Harvst. Hoch "Kieron" un Fründ "Lutz" wüllt uns de letzten veer Doog in Moond noch bi Sommerluun hol'n. Von de Norsee her koomt se mit Sünnenschien un Warms. Godes Wedder för de Kinner to'n Laternelopen!

De Harvst is dor, un mit bloots veer Stünn Sünn an Heven geiht en recht warmen, beten drögen September in en hoffenlich goldenen Oktober.

"Mit kunstgeübtem Hinterbein" repareert de Krüüzspinn ehr Nett

Wedderdoten letzte Moond (in Klammern de Doten vun'n Vörmoond):

• De Dörchsnittstemperatur harr in 2 m Höchte 16°C (Vörmoond 16°), dat sünd 2,06°C övert Middel.
• De höchste Temperatur mit 26°C (28,1°) harrn wi an 5., de deepste mit 3,6°C (3,1°) an 23.
• In'n Dörchsnitt harrn wi 20 cm in de Eer 16°C (17,3°) un 5 cm över de Eer de deepste Temperatur mit 2,8°C (3,3°).
• De Sünn keem bloots knapp op ehr Soll. 185 Stünn (196) weer se to sehn. Dat sünd 99,4%.
• De Solorstrohlung keem op 265 W/m² (301). Se weer an hööchsten mit 990 W/m² (1049) an 1.
• Beten dröög weer de Moond. An18 Doog (24) sünd bloots 35 l/m² (90) fullen. Slappe 49% von't Soll.
• Dörch Evapotranspiration sünd 45 l/m² (76) wedder aftrocken.
• De Wind hett mit 43 km/h (6Bft) ut W-NW pustet un keem ok mit 25% ut W-NW.
• De September harr 1 Sommerdag (T_max > 25°C) un 21 warme Doog (T_max > 18°C).

Mehr Wedder? hartenholmer-wetter.de.