Zibbeltied!

vun Thomas Seemann


Se köönt de Biller per Klick vergröttern.
Trüch kaamt Se denn mit den Zurück-Knoop op de Browser-Symboolliest.

Nu is de rechte Tied, Zibbelplanten för neegst Johr to setten! Ik heff t.B. beslaten, dat üm mien Kompost Krokus wassen schallt. De Rasen dor is oolt un dicht, un dor dörtokamen is swaar. Woans krigg ik de Zibbel dor rin?


Hier in den Rasen schallt de Krokus hen!

Nu heff ik sehn, dat dat so Plantensettgeräte gifft, de ut so'n Rohr bestaht, 'neem een de junge Plant bloots baven rinschuuvt un denn dat Rohr nerrn in de Eerd stött; dat maakt dat Lock automaatsch un de junge Plant rutscht dör dat Rohr eenfach na nerrn in dat Lock rin. Denn warrt dat Rohr bloots noch ruttrocken. Dat warrt t.B. bi de Grote Gröne Wand insett. Dat is elegant un geniaal un geiht heel fix; ik much geern so een hebben, man tovöör heff ik mi en egen Methood utfunnen.

Ik nehm en oles Rohr vun üm un bi 40 mm Dörmeter. Dor maak ik en Markeern op, wo deep de Zibbeln för de Krokusse in'n Bodden kamen schallt; ik heff mi för 8 cm entscheden. (Wenn Se Narzissen sett, nehmt Se beter dat Duppelte.)


Bipackzedel vun de Krokus studeern: Sünd de richtigen Afstänn wählt?


Dat Rohr ansetten un mit dempte Knööv in'n Bodden haun

Un denn haug ik dat Rohr mit en Kantholt in'n Bodden — nau bet na de Markeern. Na en beten Dreihn hett sik de Grasbodden in dat Rohr fastsett, un ik kann em tosamen mit dat Rohr eenfach rutheven.


Dat Rohr mutt orrig dreiht warrn, denn ruttrecken.


Nu kümmt de Zibbel in dat schöne runde Lock

Rin mit de Zibbel in dat Lock — un denn mit en Bessensteel de Eer ut dat Rohr rutkrupeln. Dor kümmt en schöne zylindrische Proppen Eer rut! Mit den gröttsten Deel dorvun füll ik dat Lock wedder op.


Mit'n Bessensteel vun achtern stötten...


...denn kümmt dat vörn rut!


Dormit kannst dat Lock allerbest wedder toproppen!

Dat geiht nich so fix as dat Warktüüch, dat allens in een Schritt maakt, avers ik höp op allerbeste Ergeevnissen — wenn wedder Lent is un de Krokus blöht!


Alll Biller: Thomas Seemann
25.10.2020


na baven