Moorddaten un Verunsekern

Weetst, wo de Bösen sünd opstunns?
Wat köönt se in ehrn Wahn maken?
Warrt Tied, de Sellschap stünd op; sunst
blievt Truern bloots un Mahnwaken.

Moinmoin, leve plattdüütsche Maten un Frünnen!

Ja, düsse Maand hett uns wedder erschüttert mit de Moorddaten, deels koolt un vull Haat, deels doch vull hittköppig Irrsinn. Mennigmaal wunner ik mi över de Lösigkeit un dat Sülvstvertruun vun de Zivilsellschap, de doch so verletzlich, versehrbor is un an vele Stelln so arglos apen för Angreep. Ik stah in'n Dammtorbahnhoff in Hamborg, kiek mi üm un denk: allens Glas; 'keen wull, kunn dat tweismieten... Man allens dör Metall ersetten? Nee; wi wüllt dat transparent un vull Licht hebben, un wenn een dat tweismieten wull, mit den warrt wi op anner Wies fertig. Süh, so is uns Sellschap ok: De Dören vun de Lokale staht apen, keen Gorillas staht dorvör -- en Möörder kann rinkamen un de Gäst doodscheten. Wi fiert grote Stratenfesten, Karneval mit Kinner un bunte Kostüme -- en Möörder kann in de Minschen rasen. Normaal avers deit dat nüms. Nu hebbt welk dat daan. Hebbt uns wiest, wo versehrbor wi sünd. Un nu? Wat wüllt wi maken? Vör de Bangnis kapituleern, de Dören tosluten, alltohoop Wapen dragen as in de USA? Uns Dag un Nacht förchten un överall Leges sehn? Schallt wi uns Levensaart wirklich bestimmen, dikteern laten vun de Mörders? Dat harrn de wull geern. Nee, mit de warrt wi op anner Wies fertig. --- Düsse apen Versehrborkeit is en Teken vun Starkde. Wi bruukt uns nich sülvst to verbögen. Uns Starkde is, tosamen gegen Rassismus un Minschenverachten to stahn -- dor passt keen Blatt twischen uns. Wi blievt fröhlich un gesellig, wieldat wi op vertruut, dat ok all de annern goden Willens sünd, so as wi. Wi blievt positiv, frie vun Bang un Argwohn. Wi blievt een Sinns. Un dor köönt wi stolt op ween.

Uff, nu heff ik ganz anner Gedanken opschreven, meddewiel sünd de Anslääg al dör dat Coronavirus verdrängt, un Se wulln doch den Överblick över Plattpartu! Also denn: Wi freit uns över en niege Stimm op uns Siet, Adeline Erika Decker ut Mönster. Se hett dat Afscheedsleed vun de beropen ooltgreeksche Dichtersfru Sappho in Platt bröcht un beschickt opstunns de Passioonsandachten. Willkamen! -- As jümmers hett uns de Aktualität to faten, in de Natuur so as in de Sellschap. Wolfhard Sauerbrey ringt dat Covid-19-Virus (Corona!) en deep Süüfzen af; de kurascheerte Dokter, de dat funn un publik maken wull, hett en Naroop in mien Notizbook. Natüürlich ok de Moordanslag vun Hanau. In't Natuurnotizbook findt wi Nieges vun de Mars- un Sünnenforschen un för de, de dat weten wüllt, de Bestätigen, dat Plattpartu en echte Öko-Websiet is.

Dat Johr peddt mächtig op't Gaspedaal. De Plant vun'n Maand sünd uns Fröhblöhers, sünnerlich de Krokus, de nu meist al afblöht sünd. De Natuur is ja de Tied wied vörut; so schient ok de Kinnermärken vun de Iesblomen un vun Sneesteern un Sneeroos as ut en anner Tied to kamen (wat ja ok stimmt). De ewige Regen in'n Februar hett Anlaat to en höögliche Sintfloot-Betrachten geven. En Zoo leggt sik ok gewisse Gören to. Anner langt en Hund un poor Göös. Kann avers ok to veel Swien an Bord geven! Ja, de Deerten sünd ok düssen Maand in Vertellsels un Riemels heel präsent. Un natüürlich noch düt un dat annere. Kiekt Se man sülvst! Wi leest uns neegsten Maand wedder.


Nu de Linklist. Op de Links bruukt Se bloots klicken, dat Se henkaamt.

Plattdüütsch Künst:

Sapphos Afscheed. Vun Adeline Erika Decker    (16.2.)
Notizen ut'n Heumaand. Fotos un Verse vun Marlou    (3.2.)


De Welt un Gott:

Seemannsgarn: Speen un Koffiesäck. Vun Günter Sohnemann    (23.2.)
Kinners un Deerten. Vun Wolfhard Sauerbrey    (23.2.)
Dat lebennige Fedderbett. Vun Heinz Tiekötter    (22.2.)
Uns eerste Gastarbeiter. Vun Heinz Tiekötter    (20.2.)
All de Leevde op uns Eer...? Vun Addi Kahl    (16.2.)
En Swien as blinde Passagier. Vun Heinz Tiekötter    (16.2.)
Noahs Blog. Plattdüütsch vun Marlou Lessing    (9.2.)
Hopp, hopp! Vun Silke Frakstein    (9.2.)


Natuur un Wetenschap:

Planten in Pagels' Goorn: Februar: Fröhblöhers -- Krokus. Vun Thomas Seemann un Marlou Lessing    (3.2.)

In't aktuelle Natuurnotizbook:

        De Mars bevert in eensento. Vun Marlou Lessing    (25.2.)
        De Tied vörut. Vun Marlou Lessing    (17.2.)
        Sauber surfen bi Plattpartu. Vun Marlou Lessing    (17.2.)
        Solar Orbiter truut sik wat. Vun Marlou Lessing    (16.2.)
        Dat mutt'n verklaarn. Vun Marlou Lessing    (3.2.)


Wat in de Welt vörgeiht:

De Maskentied. En Virus-Riemel vun Wolfhard Sauerbrey    (29.2.)

...un veer niege Indrääg in Marlous plattdüütsch Notizbook.


För Kinner:

Modder Sünn ehr Kinner: Sneesteern un Sneeroos. Märken vun Sophie Reinheimer, Platt vun Klaus-Dieter Tüxen    (22.2.)
Modder Sünn ehr Kinner: De Iesblomen. Märken vun Sophie Reinheimer, Platt vun Klaus-Dieter Tüxen    (16.2.)


Hartlich grööt

Marlou Lessing un dat lütte Plattpartu-Team