Bliev du man still

vun Heinz Tiekötter


Schäuble seggt, he harr 23 Milliarden mehr erwirtschaftet, as ploont weer. Wi Mallbüdels freit uns doröber. Nu looft se em. Kummt dat Geld vun em orrer vun di un mi? As de Zigorrensmeuker Ludwig Ehrhardt Minister weer, harrn wi 90.000 Lüüd ohne Arbeit. Hüüt sitten in de Nürnberger Agentur 120.000 Mitarbeiters. Grood hebbt se mellt, se harrn wedder 'n Öberschuss erwirtschaftet. De sünd woll mall; de köönt nix erwirtschaffen. De kassiert nur, wi betohlt dat! De Agentur stellt nix her un hannelt mit nix.

Rund 55 Milljarden betohlt de Autofohrers in de Stootskass un dorvun ward foftein Milljarden för de Verkehrswege utgeben. Se snackt de hele Tiet öber de PKW-Maut, dormit se Brücken repariern köönt. Kiek di uns Stroten an. De Verkehrsfunk duert all länger as de Norichten. Keen Minsch reegt sik doröber op. An de Leipziger Energiebörse liggt de Strompries mit 3 Cent/kWh so deep, as ninich tovör. Dat liggt an all de velen Windmeulen un Sünnenkollektoren. Bi uns ward de Kilowatt-Stünn Johr för Johr dürer. To Tiet betohlt wi üm un bi 28 Cent. Wokeen reegt sik doröber op?

Minister de Maizière hett mol so eben 550 Million Euro för siene Drohne in de Tünn haut. Achteran hett he vergeten, de Inspruchsfrist to wohren. Nu kriegt wi keen Geld trüch, ok wenn de Herstellers dat falsch lepert hett. Dat is nu verjährt. Op siene Euro-Fighters hett de Maizière siet 20 Johren teuft. Nu bruukt he se nich mehr all. För den entgangenen Gewinn will de Herstellers för weniger Fleegers mehr Geld hebben. Un mit de Stormgewehren kannst nich drepen, de scheten üm de Eck, wenn se to warm ward. Nüms protestiert!

Siet tein Johr kriegt de Rentners jedet Johr weniger, as de Steigerung vun de Lebenshollung dat utmookt. Dat hett dorto feurt, dat sik de Tall vun Rentners in de letzten tein Johr verduppelt hett, de nebenbi arbeiten mööt. Se bruuken den Toverdeenst, ansünsten koomt se nich öber de Runnen. Neegst Johr koomt 80.000 Rentners mehr in de Stüerplicht. Goht de Rentners nu op de Stroot?

Helmut Kohl wull mit 10 Milliarden för een blöhende Landschop in Osten utkomen! Siet twintig Johrn betohlt wi Soli. Een Enn is nich in Sicht. Nu seggt Fro Merkel, dat geiht ook no 2019 so wieder. Se verlangt 15 Milliarden jedet Johr. Wokeen reegt sick doröber op?

No Griechenland schickt se öber hunnert Milliarden, man nich to de Minschen. Nee, dat kriegt de groten Banken. An de Griechen suust dat vörbi un is fiev Minuten loter wedder in Frankfurt. Hest du heurt, dat nu een dorüm bi siene Bank Adschüss seggt hett un to de Sporkassen wesselt hett? Wi bekoomt op uns Konto 0,15% Zins. Wenn wi in de Kried sünd, betohlt wi 16%! Mookt jo nix.

Wenn een Minister no acht Johrn nich wedder wählt ward, hett he 'n Anspruch op een Ollersversorgung, as 'n Arbeiter eerst no 45 Johrn. Reegt sik de Arbeiters doröber op?

Krischan Wulff weer een Johr Bundespräsident; nu betohlt se em lebenslang 200.000 Euro in Johr, ne Sekretärin un 'n Deenstwogen mit Fohrer. Dat schient, de Lüüd find dat good. Ik heur nix vun Empörung.

In'n Supermarkt ward di Peerfleesch as welk vun Ossen verschüert. De Oss büst du sülmst, denn du geihst dor wieder hen un köffst jem den Schiet af.

Uns Norichtendeenst leepert un hoolt sik jemmer Informatschoon bi de Amis. De hebbt allerwegens Oppasser sitten. Se sünd in Internet bi de Providers un bi Facebook togangen, wohrschienlich sitt een in diene Telefonleitung un een anner leest diene Post un villicht dörchweult se ok aff un an diene Affalltünn. Googel du man ruhig wieder. Se weten all lang allens vun di!

Wenn uns dat allens egol is un nüms sik opreegt, woran liggt dat nu? Is in uns Drinkwoter 'n Beruhigungsmittel in? So'ne Ort Tranquilizer? Un dat hollt uns denn alle 'n beten dösig? De Lüüd, de vun all dat profitiert, de sünd nich so gliekgüllig. De leevt ohne Beruhigungsmittel. Man de drinkt jo ok keen Woter; de drinkt jo Schampus!


10.9.2017


na baven