MarDaagbook-Notizen vun Marlou


29.2.24 ...Woso Gaza-Protest?

Woso kritiseert de Lü opstunns mehr den Krieg in Gaza as dat Massaker vun de Hamas? Ut twee eenfache Grünn:

1. De Gazakrieg passeert nu. Dat heet, dor kannst noch wat bi maken, noch Leven verschonen orr redden. Dorto feddert Minschen överall Israel op. Dat Hamas-Massaker weer al vörbi, ehrdat de Welt dorvun Künn kreeg. Nüms findt dat good, un dat seggt ok all; avers dat is verschüddt Melk. Kannst nix mehr ännern. Keen Massaker is good, avers to dat Massaker in Gaza kannst noch seggen: "Stopp!" Dorüm roopt dat so vele.

2. Israel seht wi as en "westlich" Land, ofschoonst dat in'n Orient liggt. "Westlich", wat heet dat denn? Dat sik dat Land an en Minimum vun Regeln höllt; de internaschonalen Instituschonen respekteert; halvwegs berekenbor hannelt; en Demokratie is; op Humanität Acht hett... oh, ik höör al sülvst, wo naiv dat klingt. Man düt Tovertruun hebbt wi in en befründten Staat as Israel. Vun de Hamas verwacht nümsnich ok bloots een vun düsse Pünkt. Dorwegen appelleert de Lü doch an Israel, an de Hamas avers nich, verdammi nocheens! Woso verstaht de israeelsche Regeern nich, dat dat en Kumpliment is?! Wüllt se etwa, dat de Welt an se datsülvige Maat leggt as an Hamas?! Ik bün en hoffnungslose Romantikersch un denk, de Minsch kann sik entscheiden...

Wenn in düssen Momang en Massaker-Akschoon gegen Jüdinnen un Juden lopen wöör, de een dör Proteste stoppen kunn — wat glöövt ji, wat dat Protesten geven wöör! Natüürlich. Man dat de Roop to Vernunft un Humanität bi de Hamas veel verslaan wöör, glöövt nüms. — Versleit dat noch wat bi Israel...?


23.2.24 ...So geiht Demokratie

Hurra, de Demokratie leevt noch! Naja, tominnst in'n Football. Tennisbäll smieten hett hulpen — de Volkswille hett sik dörsett. Na geiht ja doch! Dat is nau dat Geföhl, dat de Minschen hebben wüllt: Sülvstwirksamkeit. Dor hebbt de Lü in Grünheide doch glatt dacht, se köönt ok so'n Volksafstimmen maken un mit grote Mehrheit seggen, dat Elon Musk nich mehr ehr Water un ehrn Woold hebben schall. Nu man nich so kiebig, ji Brandenborger Stackels! Ji denkt, dat passeert ok, denn wi hebbt ja Demokratie? Dat warrt wi ja noch sehn.

Sehn warrt wi dat sünnerlich, wenn de Jury in London endlich över Assange befinnt. Wi all weet, de Mann höört nich in'n Knast, sünnern hett en Orden verdeent, wieldat he Kriegsverbreken opdeckt hett. Sien Haft, sien drauhen Utlevern an jüst den Kriegsverbreker is en Schann. För den "Westen", de sik sülven "frie" nöömt. Vun Lü, de dat anners seht, will ik keen Woort över Nawalny hören. Keen eenzig Woort.

The jury is out still. Ik warr al mal Tennisbäll horten. Un düsse genialen lütten Elektrofohrtüüg, de mit Rookgranaten över'n Rasen düüst. So geiht Demokratie.


18.2.24 ...Falsche Film

Robert Habeck harr nich veel Spood mit sien Inböötgesett (Heizungsgesetz) — blangen Spiet un Hohn is nich veel vun nableven. En anner Inböten maakt nu ok Malesch: de Golfstroom, btw. de Atlantische Deepden-Zirkulaschoon. Dat de Klimawannel em afwörgen kunn, weer al lang klaar; nu süht dat so ut, as kunn dat ganz fix gahn — un denn warrt uns klaar warrn, dat wi so etwa op den Bredengraad vun Halifax liegt... Dat Klima hier warrt uns gediegen üm de Ohren flegen, op de Süüdhalvkugel eerst recht. Tja, un dat is bloots een vun stückerwat Kipppünkt op den Highway to Hell.

Avers nee, wi hebbt ja wat anners to doon — wi mööt rüsten, Pengpeng-Tüüchs herstelln un uns ünnernanner kloppen.

Du glöövst, du büst in'n falschen Film. Een sünner Happy-End...


11.2.24 ...Mehr Bescheidenheit!!

Tja, dat 1,5-Graad-Teel is woll futsch. Maakt nix, wi arbeidt nu eerstmaal an't 2-Perzent-Teel — för de Rüstungsutgaven. Dat warrt ok noch duern, avers Bescheidenheit kannst vun de Bahn lehren:

De Bahn hett sik also dat 70-Perzent-Teel sett. Nu kunnst natüürlich seggen, eentlich is dat Teel bi de Bahn ja de Fohrplaan. Un wenn du so'n Fohrplaan maakst, seggst du dormit: So schallt mien Töög fohren. — Man mit so'n Halvsatz ".... to 70 Perzent" achteran maakt sik dat doch veel lichter! Wi schulln mal in dat Protokoll vun de Klimakonferenz vun Paris nakieken, wat dormalen nich ok een so'n Satz an dat 1,5-Graad-Teel anföögt hat. Heemlich. Un ganz bescheiden.

Man nu hebbt wi ja dat 2-Perzent-Teel vör de Bost, un dat heet: 2% vun'n Staatshuusholl för künftigen Schrott, Schutt un Rostbargen rutsmieten! Un för Personal, dat sien Hööfd-Opgaav dat Tweimaken vun heile un bruukbore Saken is. Un för Sprit un Knallkörper, de masse CO2 maakt. Jungedi, so richtig öko klingt dat nich! Is ok nich. Dat ganze Scheten un Tweimaken in de Ukraine alleen produzeert so veel Dreck as en ganzes Land so groot as Belgien. Tosättlich to dat, wat Ukraine un Russland in Fredenstieden utstöten wöörn. In't eerste Johr keem de Krieg op en Klimaschaden vun 120 Millioonen Tunnen CO2. Wenn'n dat Ganze wedderopbuun will, kost dat nochmaal 50 Millioonen Tunnen. Un wi hebbt ja noch anner Kriegen an't Lopen. To Vörsicht hebbt se ja dat Militäär ut dat Pariser Klimaafkamen ok utklammert. Dat is even unberekenbor. Tja, dor mutt dat 1,5-Graad-Teel sik to 70 Perzent gaaanz warm antrecken.

Natüürlich is dat en funnen Freten för de huuseigenen Ökos, de jedeen Branche nu hett. Gröne Stahl! Gröne Energie! Gröne Tourismus! Sogoor klimaneutrales Fleegtüüchflegen! Denn is dat al aftosehn, dat wi bald an gröne Kriegföhrung, Panzers mit Waterstoffandreev un klimaneutrales Bombardeern arbeiten warrt. Man ganz bescheiden — dat eerste Teel vun Kriege is nich de Klimaneutralität, sünnern de Sieg. As bi Stahl un Tourismus de Winst. Man dat warrt Tied för en Öko-Anstrich bi de Kriegsweerschap — dat warrt uns' Seelenfreden gooddoon. Un dat is ja ok al veel. Bescheiden blieven!!

Jichtenswenn seht wi villicht in, dat Freden dat Ökologischste weer. Orr west weer. Dat 1,5-Graad-Teel steiht denn al lang bi 3 Graad, un Belgien is denn villicht al lang CO2-frie.


21.1.24 ...Spaltungen

Kiek an, nu terleggt sik ok de CDU noch — en Rechtsbuten-Aflegger schall grünnt warrn. Natüürlich is de linke Siet vun't politische Spektrum in puncto Spaltungen wied vörweg, man de rechte Siet treckt nu na. Welk meent twoors, ok de Parteien, de wi al hebbt, sünd nich richtig nütt, woso bruukt wi denn noch welk? Man ik meen, dat hett villicht noch sien Godes: Kann sik nich ok mal de FDP spalten? Ik will twoors nich twee FDPs, sünnern lever gorkeen; avers de Spaltung wöör sekerstelln, dat se ünner 5% blievt. Also je mehr, desto minner. Prima.

Blangenbi maakt düsse Aart politische Zellteilung uns Welt bunter, ganz wöörtlich. Denn wat passeert nu mit de bunten Balken, wenn se Ergeevnissen vun Ümfragen orr Wahlen wiest? Dat warrt utsehn as de LGBTIQ+-Flagg — de Regenbagenflagg för diversity, Se weet al. De AfD warrt dat natüürlich argern, wat al mal en Vördeel an sik is. Un naklaar is dat beter as de Klören vun Länner as de USA, 'neem allens entweder rood orr blaag is. Avers wieder as bit LGBTIQ+ schulln se dat nich drieven. Achterna süht dat ut as dat Sünnenspektrum! Un wat deit een mit so'n Maximum an divide et impera ("spalt dien Gegenslüüd op un hiss ehr gegenanner, denn büst du de Baas"), wenn allens bloots divide is, avers keen impera nich mehr — wenn also nüms mehr Baas ween kann?

P.S. Gistern güng ik in en Supermarkt, 'neem ik sünst nich hengah, wieldat ik op de Söök na Wiehnachtsreste weer — ik mag so geern Leevkaken, un de kriggst ja narrms mehr... un as ik na de Disch mit de Saisonwoor gah, wat seh ik dor?

Oosterhasen. Batterienwies, kolonnenwies Oosterhasen.


14.1.24 ...Dat Swatte Lock

Utmusterte Scheepswracks? Af dormit na Nigeria, to'n Utslachten in Kinnerarbeit. Giftmüll? Af dormit na Aafrika, dor kann dat dat Grundwater versüken — för'n Spottgeld, Aafrika is ja de billigste Hoor ünner de Kontinente. De EU is sik to fien, sik de Hannen un dat Geweten dreckig to maken un de Bootsmigranten ut Aafrika sülven to verhaften, to verslepen, to versenken? Keen Problem — wi betahlt eenfach Libyen un Tunesien dorför, dat se dat glieks in Aafrika för uns erledigt, denn dor gellt ja keen Recht. De Briten wüllt ehr övertellige Migranten loswarrn? Maakt en Kohhannel mit Ruanda, dor warrt se de al lagern, bet se verfuult. Israeelsche Militärs finnt, dat de velen Palästinensers in'n Gazastriep jichenswie doch dull stöört? Fix warrt en Kontrakt mit en zentraalafrikaansch Land plaant, 'neem een de hen afschuven kann. Wat in Aafrika is, is ja weg. Aafrika is dat Swatte Lock, dat allens sluckt.

Un nu hebbt sik welk unsäägliche Möchtegern-Eichmanns in Potsdam en Plaan utdacht, potenziell een Veerdel vun de düütsche Bevölkern — nämlich de Minschen mit Migraschoonsachtergrund — to deporteern. Wüllt Se raden, wohen? Un wat is rassistischer — de Plaan, Minschen, de "nich düütsch noog" sünd, den Pass wegtonehmen un to verslepen, orr dat Bild vun Aafrika as Müllkipp vun de "Eerste Welt"?

Wenn wi Aafrika allens to slucken geevt, mööt wi uns nich wunnern, wenn dat sien övertellige junge Mannsminschen na Europa utspiet. En Kontinent, den wi as Dreck behannelt — wokeen will denn wohl dor leven? Un unsen Dreck freten?

En Utnahm sünd de Kreaturen dor in Potsdam, de sik de Plaans utdacht hebbt, Düütsche vun Düütsche un vun ehr Heimat wegtorieten, to entrechten un quasi ümtobringen. De kannst nich hart noog bestrafen. Worüm belangt uns Staat de nich stantepe?! Gifft dat mang de ach so rechtlosen Länner in Aafrika nich een, 'neem Rassisten vagelfrie sünd un apentlich dör de Straten dreven warrt? Dor much ik ehr hen deporteern. Nootfalls geev ik ok noch Geld dorto.


8.1.24 ...Nüchtern un hungrig

De Buerndemos hebbt mi hüüt Morgen ja doch faatkregen, so plietsch ik dat ok anstelln wull, na Hamborg in dat Seniorenheim na mien Mellersch to kamen. Den groten Treck heff ik ümfohren; man op de B432 harr sik en lütt Kontingent Treckers afsett, op de bün ik ropfohrt. Tje, dat weer denn en meditative Fohrt. Mediteern kunnst to'n Bispill över solk Schiller:

Soso, ahn de Landweerschap weer ik also nüchtern? Hallo?! Ik bün nüchtern!! Praktisch jümmers, un an't Stüer vun en Auto sowiso! Sünd ji villicht besapen op juun Treckers?! — Meddewiel weer ik sogor hungrig, ok mit ganz veel Landweerschap ümrüm. Tje, dor kriggst dat Nadenken, wokeen sik woll solk Schiller utdenkt.

ok

Wokeen sik avers de Ampel an'n Galgen utdacht hett, dat weet ik nu. Wenn Se dat Bild rechterhand vergröttert (eenfach anklicken), seht Se den Naam vun dat Marketing-Design-Studio. De Naam passt allerbest to den Galgen. Wat de dor wull stolt op sünd?

Meike Balzer-Fraun is liekers nich meditiativ stimmt, sünnern vull in Brass. Se schrifft mi ünner den Bedreep "Dat mutt rut!":

Vermuckte Tieden

Keen Breven gifft dat — blots Paketen.
Wat’n Tog woll fohrt, kannst ok nich weten.
Op Post un Bahn is keen Verlaat.
Mit Auto steihst meist op de Straat,
wiel Treckers jüst Vörfohrt geneten.

Ja, dat gifft noch veel mehr Problemen. Avers Troost gifft dat ok: An'n Stratenrand harr en Biohoff de Treckerkolonne tomööt en Schild opbuut: "Echte Bauern retten die Welt". De Welt warrt also reddt! Denn warrt dat mit de Post un de Bahn wiss ok wedder in de Reeg kamen!


30.12.23 ...Borendeenst

De gröttsten Böllerfans doot sik sülven den gröttsten Borendeenst: All de Nachten böllert se hier merrn in Hamborg in de Parks un Wahnstraten mit Kanonenslääg, in eensento, bet Klock twee, ahn Rücksicht... Mööt sik nich wunnern, wenn't jichtenswenn miteens en Mehrheit för en Böllerverbot gifft. Denn kiekt se dösig ut de Wäsch.


29.12.23 ...Politikers verklaagt keen Politikers

Andi Scheuer (CSU) sien dickköppsche Fahrlässigkeit hett uns Stüertahler*sche Milliarden kost. Nu kunn de Staat em verklagen. Dorto hebbt se en Goodachten maakt, wat dat woll wat warrn kunn. Nee, seggt dat Goodachten. Okay, seggt de Staat, denn nich. De Milliarden, de Andi verbrennt hett, harrn se sowiso nich ut em rutkregen. Villicht, wenn se de ganze CSU op Schadenersatz verklaagt harrn... Geern harr ik so veel Kooltsnutigkeit mal beten wanken sehn.

Denn wat hett Andi Scheuer in nau desülvige Laag seggt? Stückerwat Goodachten un vele Experten harrn wohrschuugt un wohrschuugt, dat dat europääsche Gericht de Maut nich dörlaten wöör. Ganz egaal, hett Andi seggt — "Die Maut kommt!" Wat keem, weer en düür Desaster.

Nu wöör he seggen: Ganz egaal, de Klaag kümmt! Un denn wöör wedder en Desaster kamen. Man nu seggt de Staat Stopp. Harrn se dormit man al anfungen, as dat üm dat Geldverbrennen güng — nich eerst nu, wenn dat üm't Wedderhalen geiht.


17.12.23 ...Wiehnachten opgeven?

Bet vör poor Johr woor de grote Boom op'n Horner Kreisel — he is woll 10 m hooch — vör Wiehnachten mit Lichter smückt. Wat weer dat 'n Staat! Un vör dat Altonaer Raadhuus de twee groten Wiehnachtsbööm — een links, een rechts — wat'n Pracht dat weer! Sogor de Verwaltung vun'n Freedhoff Ohlsdörp harr fröher 'n Wiehnachtsboom. Op'n Karkhoff so lebennig, so trööstlich! Woneem is allns dat hen?! Sporen? Stroomkosten? Och wat, wat verbruukt so LED-Lüchten denn noch! Kulturelle Neutralität? Och wat, Wiehnachten is Globalkultuur! Kennt apentliche Inrichten denn bloots noch griesen Alldag?

Man dat sünd nich bloots apensliche Buwarken, de nich mehr smückt warrt. Ok Privaatlü spoort an de lüttste Lichterkeed. Fröher heff ik meckert över den Wiehnachtsirrsinn à la Las Vegas, dor wöör ik hüüt för dankbor ween, wenn hier un dor mol wat blinken wöör. In Hamborg leevt mennig towannerte Lü, de de Wiehnachtsbrüük villicht egaal sünd, avers ok op't Land sühst minner un minner festliche Wiehnachtsdeko. Worüm?

Bi mi tohuus is dat düt Johr besünners wiehnachtlich. Bi den gresigen Tostann vun de Welt bruukst en beten Troost, Schöönheit, — ja — Glanz. Dat, harr ik dacht, warrt ok buten to sehn ween. Man nee... Is de Welt buten so depri worrn, dat se sogor dat nich mehr tostann bringt? Hebbt se opgeven? — Kann ik nich glöven...


14.12.23 ...Slechte Witze

In de Golfstaaten gifft dat anschienen bloots noch Witzveranstalten. De letzte Football-WM weer al provokant lächerlich; en Ünnernehmen as de Klimakonferenz COP is bloots noch en reine Spiet. Vör de WM woor al över en Boykott nadacht; mi dücht, bi de COP weer dat de eenzige realistische Opschoon west. Gor nich eerst henfohrn! Woto schallt 90.000 Lü — en stattlich Deel dorvun Lobbyisten vun Energieweertschap, Ööl- un Gasproduzenten — mit dreckige Fleegtüüch na Dubai jetten un na en Week orr so en Text produzeern, de totaal egaal is?! Üm jedeen Komma hebbt se feilscht, avers in Wohrheit bedüüdt dat Afslussdokment — gor nix. Dat sühst ja an dat Afslussdokment vun de COP in Paris 2015: Wat is mit dat 1,5-Graad-Teel? Ja, dat steiht dorbinn — un sünst nix. Nüms scheert sik an, de Welt stüert eenmödig op 3° Warmteplus to un maakt (dor) noch lang nich Hollstopp. Nee, mit COPs warrt gornix beschickt. De eenzige Entscheid warrt ween, wenn uns uns Levensbedingen so richtig üm de Ohren fleegt, de Weerschap to Blocks kümmt un dat so richtig düer warrt. Dat mutt wehdoon. En anner Spraak versteiht de Minsch nich.

Dat Geld warrt denn natüürlich eerst recht knapp. Gifft ja ok noch Kriege to finanzeern! De Fonds, mit den de armen Länner sik gegen de Klimafolgen steilen schallt un in den se bet nu 800 Millionen (ja, Millionen, nich Milliarden) Euro sammelt hebbt — de Fonds warrt denn sang- un klanglos vergeten warrn. Weer ja vun Anfang an en Witz. Över den bloots nüms lachen kann.


2.12.23 ...En echt bleude Naam

Gistern weer ik doch wohraftig in de Hamborger Binnenstadt. Frost un Sünnenschien — de eerste schöne Sneedag. Wiehnachtsmärkte, Glitzer, Leckerien, vele Touristen. Geschenken warrt inköfft, avers anschienend ok Kraam för sik sülven. In't Koophuus in de Parfümafdelen höör ik en Fru seggen: "Ik harr geern dat blöde Chanel." Woso köffst du dat, wenn du dat so blööd finnst?, denk ik mi. Na, villicht will se dat en Frünnin schenken. Villicht een, de se nich so geern mag... — De Verköpersche is ok en Stoot perplex —"Welches Chanel?" "Dat Blö", seggt de Kunnin bloots, un fix hett de Verköpersch dat Rechte in de Hand: en Herrenparfum mit den idiootischen Naam "Bleu de Chanel", also "Blaag vun Chanel", franzöösch utspraken. Un dorbi is de Buddel nich mal blaag, sünnern meist swatt! Welk Klöör dat Tüüchs dorbinn hett, is mi eendoon. — Wo kann een sik so en blöden, nee: bleuden Naam utdenken?! Ja klaar, schall allens internaschonaal ween usw., un en Parfum warrt hüüt nich mehr extra för den düütschen Markt ümnöömt. Na, so harr ik wat to lachen. Un eenmaal dör't Gedrängel vun de Binnenstadt, dat langt ok.


30.11.23 ...Se köönt nich winnen

Wenn Wöör nich mehr bedüüdt, wat se bedüüdt (as Führung, Hass, Partnerschap, Rassismus un sogor Völkermoord); wenn een de Minschen partu in ethnisch-soschale Gruppen opdelen will (ok wenn een de gor nich defineern kann); un wenn denn noch en naive duale Logik dortokümmt ("De Fiend vun mienen Fiend mutt mien Fründ ween") — ja denn kümmt en kaptales Kuddelmuddel vun Begrepen, Gruppen un Akteure tostann, bi dat opletzt — orr sogor as eerst — Good un Leeg, Richtig un Verkehrt dör'nannerkaamt. Dat kannst amüsant finnen, woans sik Ideologen verheddert un sik sülven en Been stellt. Avers ik heff so'n gaaanz dumm Geföhl dorbi... is dat mööglich, dat de Hamas dat ok so plaant orr tominnst vörutsehn hett? In reinweg allens is se ehr Gegenslüüd en Nees vörut; jedeen Situaschoon hebbt se so inszeneert, dat dat gegen Israel utgahn mutt. Dat hett natüürlich dormit to doon, dat wi an en Land as Israel, dat tominnst maal en liberale Demokratie weer, en anner Maat anleggt as an Hamas — wat ganz in de ehrn Sinn un Kalkül is. Vun en Demokratie verwacht wi Humanität un Besunnenheit, vun de Hamas verwacht wi meist gor nix — en unschätzbore Vördeel för Hamas. Ahn den ringsten Respekt för Minschenleven hett sik Hamas all Zivilisten in Gaza as en Schutzwest üm'n Buuk bunnen — un togliek as en Sprengstoffgördel; denn wenn Israel düsse Schutzschicht toschannen bombt, üm an ehrn Gegner rantokamen, wokeen warrt denn woll versehrt? Na Israel — indem dat so sien Ansehn ruineert. Un wenn se nix doot, denn triumphiert Hamas ok. De eenzige gewaltlose Utweeg is de allerallerunwohrschienlichste. Jedeen Schridd, den Israel maakt, richt sik opletzt gegen se sülven — un Hamas hett dat wullt un plaant. Wenn se nich so to'n Spien weern, wöör ik seggen: Chapeau.

De israeelsche Regeern versöcht ok sülven den Trick mit den Schutzgördel ut Unschüllige: Se schnallt sik all jüüdsche Minschen in de Welt üm, nehmt sogor de Holocaust-Doden för sik in Ansprook, indem dat se allens, wat ehr sülvst nich passt, antisemitisch nöömt. Dat bringt Minschen in Gefohr, in't Visier vun ungode Kräft; avers opletzt richt sik dat ok wedder gegen Israel. Nich mal in Skrupellosigkeit köönt se mit Hamas gliekop kamen. Ehr Schutz- un Sprengstoffgördel versehrt bloots ehr egen Saak. Anfängers! De Profis wahnt in de Tunnels ünner Gaza.


4.11.23 ...Reflexe beherrschen!

As düsse Saak dor nerrn in Israel losgüng, mutt ik seggen, heff ik dat totaal ünnerschätzt. Eentlich — mal realistisch sehn — weer dat doch gor keen Krieg, keen Angriep vun en reguläre Armee, sünnern en Swaarverbreken vun Kriminelle. Also en Fall för de Polizei, heff ik dacht — so as Moorde un Entföhren bi uns behannelt warrt, ok wenn de Kriminellen ut dat Butenland kaamt. Jümmers noch kann ik bloots seggen: Harrn de Israelis de Saak doch ok so behannelt! Wo souverän weer dat west! Cool. Jedereen harr ehr bewunnert. Kannst seggen: Avers de Hamas-Angriepers harrn se mit Udels doch nienich bi de Büx kregen! Stimmt. Un mit Bomben? Kriegt se ehr dor? Kiek, so is dat. Bloots Unschüllige starvt nu, un de Hass wasst.

Un wat is mit dat Recht op Sülvstverteidigung? Natüürlich mutt de israeelsche Staat sik verdeffendeern — avers is dat dat, wat he jüst deit? Is dat ganze Militäär, dat Muskelnwiesen, nich en Fehlreakschoon? Ik bün en ole Asterix-Fan, un in een Heft kriegt Methusalix (de Klappergreis) un Automatix (de Dörpssmeed) sik in de Wull. Automatix haugt dorwegen Verleihnix (den Fischhändler) een rin. Verleihnix: "Woso sleist du mi?" Automatix: "Ik kann doch nich dat ole Wrack dor haun!"
Ja, dat klingt kooltsnutig na de barbarischen Verbreken, avers jüst so is dat bi Terrorismus orr in en "asymmetrischen Krieg": de, den du haugn muchst, den kannst nich haugn — tomehrst wieldat du em nich tofaat kriggst. Denn wohr di avers vör den Reflex "Ik wies juuch nu, wo stark ik bün"! Dat weer al 2001 so, as en Handvull Zivilisten ok so'n Swaarverbreken maakt hebbt. Wenn de USA dat mit Polizeimiddel verfolgt harrn, harrn se de ganze Welt op ehr Sied hatt. Militär harr in de Saak afsluuts nix verlaren. Se wulln avers unbedingt ehr Starkde wiesen un een haugn, un dor hebbt se sik den Irak utsöcht. Dat is ehr slecht bekamen. Lacht hett dormalen (bet hüüt) de Iran, un Putin ok al liesen.

Wennehr warrt de, de vun Terroristen orr in en "asymmetrischen Krieg" angrepen warrt, endlich düssen Lex lehren? Holl bloots dat Militär still, du fallst op de Snuut!


30.10.23 ...Alleen op de Welt?

As ik en Grundschoolkind weer, bröök jüst in düsse Oktoberdaag in Israel en Krieg ut. Wi Lütten wüssen nich, woans de Groten den nömen dään — Jom-Kippur-Krieg —, wi wüssen nich, dat Israel unverwohrens vun dree Naverstaaten överfulln woorn weer usw., avers all un jedereen in Öllernhüüs, School un Apentlichkeit weer klaar för Israel. Dat weer David gegen Goliath. Jedereen höög sik för de israeelschen Kriegserfolge. Een Mitschöler utnahmen: He harr en araavschen Vadder un kunn uns eenfach nich klaarmaken, wat he an de Saak anners sehn dä.

Un hüüt? Ganz anners. Israel is sülven to'n Riesen Goliath woorn — jüst dör solk Beleven. Togliek is de sülvstverständliche Sympathie weg, un de schreckliche Wohrheit is: Jüüdsche Minschen mööt överall in de Welt hüüt wedder üm ehr Leven förchten. De spontane Utbrook vun Moordlust an den Flooghaven in Dagestan, nee, dat kannst nich faten. Dat is apensichtlich nich alleen Israel, nee, jüüdsche Minschen warrt hasst. Dor warrt di koolt — noch koler, wenn de Welt apensichtlich Jüd*innen keen Schuul un Sekerheit geven kann (orr will?). Noch minner to faten is de unbannige Hass vun'e Hamas: Nich bloots sünd ehr Moorddaten gegen de jüüdschen Lü extrem pervers un grulig, nee, se bruukt ehr egen palästineesche Landslü — Kinner, Fruuns, alle — as Waff gegen Israel, en Publicity-Waff, de se so in Stellung bröcht hebbt, dat Israel sogor sülven den Trigger treckt un sik mit gresige Biller vun Gaza-Dode sülven in't Knee schütt.

Israel is dat een; avers jüüdsche Minschen sünd nich datsülvige. Mal ehrlich: Wenn'n sowat süht as in Dagestan, wokeen wunnert't, wenn ok jüüdsche Minschen bloots noch op Starkde sett, so as Israel dat al deit? Se sünd alleen op de Welt — un se kennt dat Risiko. De Welt schuult ehr nich — köönt se sik wirklich bloots op sik sülvst verlaten?

De Holocaust, so schient dat, is noch nich vörbi. Wi köönt dat nich tolaten.


22.10.23 ...Apen Falle

Good för de AfD is, wat slecht is för Düütschland un de Lü argert. Düsse Insicht kennt meddewiel jedeen. Un liekso kunnst dat för de Palästinenser seggen: Wat slecht is för Gaza, is good för de Hamas-Miliz. Se sünd twoors sülven an de Regeern, avers dat föhlt sik för de Inwahners nich so an. — Natüürlich will de Hamas Israel in en blödigen Bodenkrieg trecken; de Falle hebbt se mit ehrn gruligen Överfall wied apen opstellt. Muttst mal överleggen, wat een för de Bande doon wöör, wenn de IDF in de Falle rintappt... mit Dode över Dode... Un wo de Welt opaten wöör, wenn de Israelis vermellen dään, dat se dat nich doot. — Woso de Israelis? Wieldat se nu vör de Wahl staht. Ehrdat se ehr Moord-Attacke start hebbt, harr Hamas de Wahl; se hebbt sik nich besunnen, se hebbt verseggt. Mutt Israel datsülvige doon?

En Verzicht op Gewalt. Wat för en Verlichtern för de Welt.


15.10.23 ...Logik vun'n Krieg

Papst Franziskus feddert in'n Nahen Oosten...

a) ...de humanitären Regeln to beachten.
b) ... stantepe mit alle Gewalt optohöörn, wesselsiedig üm Vergeev to bidden un sik to versöhnen.

De israeelsche Verdeffendeernsminister seggt: "Die Hamas ist auf Dauer nicht zu besiegen ohne...

a) ... einen umfassenden Friedensplan."
b) ... eine umfassende Bodenoffensive."

Wisslich hebbt Se ahn Möhg de richtigen Zitate ankrüüzen kunnt. So wied is dat also. Nich bloots de Staats-Offiziellen sünd so blind as jümmers, seht bloots de Logik vun'n Krieg, denkt bloots, wenn Gewalt nich hölpt, denn hölpt villicht mehr Gewalt, un wenn dat nich hölpt, noch mehr Gewalt. Nee, ok de Paapst rekent al mit den Krieg as sülvstverständlich un unafwendbor un röppt bloots to en Krieg na Regeln staats na sofortigen Sluss mit all Undöög. Wo doch kloor is, dat mehr vun dat Falsche narms henföhrt. Un Gewalt un Starkde weer alltied falsch. De eenzig wohre Nahoost-Experte hett nich Starkde predigt, sünnern Nageven, Gewaltlosigkeit, gegensiedige Leevde un den oprichtigen Willn, Freden to schaffen — ok to'n egen Nadeel. Gegensiedige Leevde. Leevde för de Fienden. De, de di allens nahmen hebbt, Land, Leven, dien Lü. Unmööglich? Denn warrt sik nienich wat ännern. Un staats Gewalt warrt wi bloots mehr Gewalt kriegen. Un mehr. Un noch mehr.

Ik stellt düt hier ok in't Gebeedbook. Dat höört an beid Steden.


12.10.23 ...Villicht langt en Börgermeester...

Jichtenseen mutt sik oppern un de AfD ranlaten, heff ik in'n Sommer schreven — un as dat utsüht, oppert sik welk Kommunen reinweg willig un begeistert. Dorünner solk grundsolide Öörd as Raguhn-Jeßnitz in Sassen-Anhalt. Se hebbt sik en AfD-Börgermeester wählt. Un toverlässig passeert, wat all Politikers passeert: De groten Spröök warrt vun de "Sachzwäng" pulveriseert. Un de Minschen warrt sehn, dat de AfD nix anners maakt as de annern Partein, bloots slechter. Villicht mutt sik ja gor keen Bundsland oppern. Villicht langt ja al en Börgermeester. Beter weer dat, denn in'n Bund wüllt wi de Bande wirklich nich hebben. Dingsdag, an'n 10.10., in de "Anstalt" hebbt se dor en super Begrünnen för levert. Kiek mal af Minute 41. — Also, leven Lü, verschafft sik in de Kommunen Kloorheit över de Fähigkeiten vun de AfD. Dat mutt langen.


7.10.23 ...Putin lacht

Putin wull en langen Krieg in de Ukraine (un mööglichst ok annerwegens, bloots nich in Russland), un he kriggt em. Frünnen ut Syrien (se kennt em as Gegner) seggt, Putin kann düssen Krieg noch heel lange dörchhollen — "He hett sien Kampftüüchs noch gor nich antrocken, he is noch in'n Pyjama", meent welk. Gas un Ööl swemmt em masse Geld in't Huus — Putin lacht. De Westen blöödt ut an Geld un Wapen — Putin lacht. De EU liggt sik in de Hoor, in Serbien un Kosovo geiht dat al handgemeen to — Putin lacht. Wi köönt un köönt em nich ünnerkriegen. So hebbt de US-Republikaners sik en niege Strategie utfunnen, em to begegen: Se scheet sik sülven un de kumplette US-Regeern inclusive Ukraine-Hölp af — Sülvstmoord in Clownsmanier. Ehr Teel is apensichtlich, dat Putin sik doodlacht.

Un de niege Tagelie in Israel? Hm, de Hamas deit sik dicke as man wat, wieldat se den övermächtigen Gegner mal so richtig in'n Been bieten kunnen; un Israels weltberopen Geheemdeensten sünd twoors blameert, avers de Regeern is ut'n Snieder un kann de Lü wedder achter sik versammeln. Gifft nix beters as en Fiend vun buten, wenn en Regeern an't Wackeln is. Natüürlich warrt se nu dreeduppelt so veel Palästinensers doodbomben, avers dat is kloor un versammelt de palästineeschen Lü denn wedder achter de Hamas. En Win-win-Connection also. En Glücksfall. Utnahmen för de Doden op beid Sieden. Un för de Ukraine — se is bloots noch Nummer twee, Opmarken un Ressourcen gaht woanners hen. Un jichtenswo lacht wedder Putin.


29.9.23 ...An'n Anslag

Kennt Se dat ok, dat se welk Kabels orr Fadems lang nich anröögt hebbt, un wenn Se denn dor mal bigaht, hebbt de sik sowat vun vertüdert, dat Se, wenn Se een dor ruttrecken wüllt, glieks dat ganze swore Knäuel an'n Hals hebbt? Un een so'n Kabel orr Band will dor partu nich rut, Se mööt den ganzen Kraam entwirren?

So geiht dat de Poletik mit de Flüchtlingskries. Treckt se dor an, kaamt Wohnungskries, soschaale Ungliekheit, Rechtspopulismus, Arbeitskräftemangel, Europa, Krieg, Klimawannel un opletzt ok Digitaliseern un KI mit; dat ganze Knäuel hangt tosamen un nixnich kann alleen lööst warrn. De Kommunen sünd an'n Anslag un warrt bilütten opsternaatsch. Wat doon? Weet ik ok nich.

Johrteihnten un Johrteihnten heff ik de hoochbedüden Lü vun alle Staaten seggen höört: "Wir müssen nicht die Flüchtlinge, sondern die Fluchtursachen bekämpfen." Dat weer al jümmers so verlagen, dat kann ik bloots op Hoochdüütsch weddergeven. En Schiet hebbt se natüürlich daan. Se harrn denn ja Geld in de Hand nehmen müsst — gegen en Övel, dat eerst veel later lästig warrn wöör. Wo redig se dat doot, sühst ja an de Klimakries. Nee, de Minsch hannelt eerst, wenn dat to laat is — un denn langt dat Geld ja bloots noch för den Kampf gegen de Folgen, nich de Uursaken. Denn de Folgen, de argert ja uns hier direkt in't rieke Düütschland. — Jaja, an dat Modell Minsch mutt de Evoluschoon noch veel arbeiten...

Klaar is, dat de entwickelten Länner över kort orr lang ehr Humanität gegenöver Flüchtlinge un Migranten ganz opgeven warrt. Veel is nu al perdü. All Verfolgte orr Minschen ut Kriegs- un Nootrebetten Obdack geven — de schiere Masse vun Minschen warrt düt Konzept, dat eentlich good is un mi dull an't Hart liggt, to'n Mallöörn bringen. Angeevlich sitt weltwied tominnst 600 Millioonen Minschen op packte Koffer — 300 wüllt na Europa, 300 na Noordamerika. Ik bün beförchten, dat wi schreckliche Szenen sehn — un hinnehmen warrt. Militär gegen hülplose Zivilisten, sowat in de Aart. Ik bün nu 59 un hööp dull, dat dat nich mehr to mien Leevtieden passeert; warrt avers sachs doch.

Dat Düütschland denn nootfalls ok sien Verfaten ännern warrt, de Migraschoon to begegnen, is ok klaar. Mien Vörslag, den ik al vör lange Tied maakt heff: Opstunns kaamt 80% Männer; wi doot wat dorgegen. Konkret:

  1. All afghaansche Oortskräfft, de nu noch in Afghanistan in Gefohr leevt, mööt foorts herhaalt warrn — mit ehr Familien. Dat sünd wenige dusend Lü, en Klacks, un dat se dor jümmers noch ahn Schuul sünd, is en Schann för Düütschland. En Schann.
  2. Familientosamenföhrn för Lü, de sik good integreert. Dat is grausam, wat dor an Trennung stattfindt.
  3. Dorna nehmt wi bloots noch Fruuns op. Un lüttje Kinner. Dormit is en grote Deel vun Migraschoon utsorteert.
  4. Un endlich endlich doot wi wirklich wat gegen den Klimawannel un de Fluchtursaken. Kriege in Aafrika? Dor sünd överall ok düütsche Waffen bi...

Afsiedig? Ok grausam? Ja. Avers jichtenswat mööt wi maken, vörslaan, versöken. Allens warrt jichtenswie grausam ween. Wiederhen nixdoon mag sik moraalsch anföhlen, is avers feige.


13.9.23 ...Bahnfohrers ünner sik

In Russlands feernen Oost dreept sik opstunns de "Allianz pro Schiene" — nee, nich düsse hier, sünnern düsse. Beid staht so'n beten mit'n Rüch an'e Wand; de een hööpt op Stütt bi'n Doodmaken, de anner op Stütt to'n Överleven. Op't Överleven verstaht se sik, dat is ok nödig, denn se hebbt wenig Frünnen — nich maal enanner. Dorwegen sünd de twee Swienjacken beid mit'n Toog anreist. Nee, nich vunwegen de Ökobilanz. Toogfohren, sünnerlich in so'n schusssekeren, panzerten Luxustoog, is eenfach beten sekerer as Flegen. Prigoshin kunn dorvun en Leed singen — wenn he kunn.


31.8.23 ...De letzten Politikers

En Nazi-Floogblatt ut de Schooltied! Tja, Hubert "Hubsi" Aiwanger (he sprickt sik "Oiwonger" — ja, he is schreeg) hett dat nu erwischt. Wenn wi ehrlich sünd, weern wi in de Pubertät ja all so'n beten schreeg. Nich ganz so schreeg as Aiwanger, he schütt wirklich den Vagel af. Avers in dat Öller weet een even noch nich so recht Bescheid. Un nu packt ok ole Schoolkameraden vun "Hubsi" ut...

Wat passeert woll, wenn nu bald de "Generaschoon Social Media" in de opwussen Politik drängt? Is ja al so wied — een junge Fru bi de Grönen hett sik vör'n längere Tied al sülvst afschaten mit en Tweet. De Generaschonen na "Oiwonger" & Co. hebbt ganz apentlich pubertiert — ehr Klassenkameraden weern de ganze Welt. O Mann, wat för Schaneerlichkeiten warr dor vörtüüg kamen! Un se warrt beurdeelt warrn jümmers na de aktuellen Moraalmaatstääv — de jümmers strenger un strenger warrt. Muttst perfekt ween — un jümmers perfekt west ween. Nüms vun de digitalen Generaschonen warrt vör de apentliche Meinung bestahn könen, wenn ehr Facebook- orr Insta-Chroniken vun de Presse op Fehltritte scannt warrt! Ik glööv meist, wi seht opstunns de letzten Minschen, de sik noch in de Politik hollen köönt. De letzten ut de analogen Generaschonen.

Un denn? Twee Szenarien: Entweder de Social-Media-Bedrievers erpresst de Politik mit all dat Materiaal, dat se hebbt, un dikteert ehr ehr Wünsch; oder — de KI övernimmt. De hett keen persöönliche Geschicht un hett nienich pubertiert. Mi weer dat da Leevste.


24.8.23 ...Prigoshin dood? Nee!

Soso, nu is he also "dood", d.h. verswunnen, afduukt. Denn dat he dood is, glööv ik keen Momang. Ik meen Jewgeni Prigoshin, den Söldnerföhrer, Glücksritter un undörsichtigen Halunken ut Russland. As ik em to'n eersten Mal sehn heff, wüss ik: Dat is he. Long John Silver. De Piratenföhrer, Glücksritter un undörsichtige Halunke ut de "Schatzinsel". Kiekt Se doch de Biller an, den achtertückschen Blick, de bereken Skrupellosigkeit bet in't deepste Binnerste — togliek de Redigkeit, jedeen Risiko intogahn, ok brutal to warrn — un allens un jedeen to verraden üm den egen Vördeel. Dat een is Prigoshin, dat anner Ivor Dean, de Schauspeler, de in de bekannte Schatzinsel-Verfilmung den John Silver speelt hett. Welk welk is, dröfft Se sülven rutsöken.

Sietdat verfolg ik Prigoshins Hanneln mit en Aart Grusel-Faszinaschoon. De Typ danzt in eensento op'n Vulkan. Bloots John Silver kunn sien mörderischen Piratentrupp bändigen, wenn ok mit Möhg; bloots Prigoshin kunn de Söldner- un Mörderrott "Wagner" ünner Kuntrull hollen. Solk Typen gaht nich ünner! John Silver hett sik afsett ut de "Hispaniola", 'neem he ankeedt weer; un Prigoshin hett nu, denk ik, datsülve daan. Düsse Typen intresseert mi, jüst dat Lege in se, wieldat dat so afsoluut schient. Ok wenn Stevenson den John Silver utfunnen hett, harr dat doch ok Shakespeare ween kunnt, de sik dat Drama üm Putin un Prigoshin un düsse Charaktere utdacht harr. Un so een schall sik eenfach vun Putin in'n Lüttfleegtüüch afscheten laten? Dat glööv ik nich. Dat weer bloots en Trick. De duukt wedder op. Prigoshin leevt.

So dull ik gegen Krieg un Gewalt bün: Ik hööp dat. Gifft langwieligere Typen!


19.7.23 ...Wat wirklich slimm is

De CDU-Vörsitter Merz hett de (Oost-)Düütschen wohrschuugt, AfD to wählen. "Elkeen Stimm för de AfD", so hett he preestert, "is opletzt en Stimm för de Ampel!"

Ach ja. Un dat is ja dat Slimmste an de AfD: de Ampel.


7.7.23 ...Krieg is gröön

Düt hier nerrn is en Informaschoon vun den Bundsverband vun'e düütsche Sekerheits- und Verteidigungsindustrie — översett: de Rüstungslobby. Ok de Bott sülven muttst översetten — "Sicherheit ist die Mutter aller Nachhaltigkeit" — ja, genau: Krieg is öko.

Good, dat wi dat endlich to weten kriegt. Kunnst ja sünst denken, Panzers, Fleegtüüch, Bomben un Granaten wöörn Ressourcen vergeuden, CO2 maken un Bööm un Natuur schaden, wenn se dor överpanzert orr inslaat. Kunnst ja denken, annersrüm warrt en Schoh ut de Saak: Bloots mit Nahaltigkeit köönt wi uns vör de enormen Sekerheitsrisiken vun Klimawannel, Natuurkatastrophen, Massenmigration, Kriege üm letzte Natuurressourcen usw. wohren. Kunnst ja denken.

Man nee — Rüstung ("Sekerheit") is de Uurgrund, de Moder vun Öko; also: Nahaltigkeit gifft dat bloots mit Rüstung ("Sekerheit"), seggt uns de unsäägliche Verband. Rüstung is de Moder, kümmt also toeerst. Mit anner Wöör: Geevt uns mal toeerst mal de dickste Schiev vun'n Koken, denn laat wi juuch mit den Rest maken, wat ji wüllt — ok grönes Gedööns, wenn't unbedingt ween mutt. Man toeerst kümmt de Rüstung ("Sekerheit"), also wi. — Un wenn nich? Wenn wi de Rüstung ("Sekerheit") nix afgeevt...?

Ik glööv, dat is en Industrie, de een nich to'n Fiend hebben will. Un ok nich to Moder.


6.7.23 ...Krieg — keen Fraag

De Tafeln hebbt nix mehr to eten för de Lü, de vör ehr Dören Slang staht. Un för de Myriaden, de in ehr Töövlisten Slang staht — mit de Höpen, jichtenswenn den Verlööf to kriegen, vör de Döör Slang to stahn. Avers se kriegt nix mehr. Wenn de Minschen sik op Soschaalämter besweert, dat dat Geld nich langt, warrt se op de Tafeln verwiest. En Unding: De Staat schuuvt sien uuregen Opgaven nich bloots in den kommerziellen privaten, sünnern sogor den ehrenamtlichen Sektor af — se kalkuleert de Ehrenamtlichen driest in, as weer dat Sülvstverstand! Dor schallt de Lü man Slang stahn gahn. Avers dat gifft nix mehr. De Tafeln in ehr Vertwieveln staht bi de Supermärkt Slang, bedelt bi ehr — avers dat gifft nix mehr. Nu feddert se en Gesett, dat de Supermärkt ehr Resten dwangswies an de Tafeln afgeven mööt. To'n Mitschrieven: Se feddert vun'n Staat en Gesett, dat den Privatsektor verdammt un dat Ehrenamt helpt, em — den Staat — sien egen Opgaven aftonehmen. Avers dat nütt allens nix: gifft nix mehr. Bedürftige un Ehrenamtliche (de Besten vun uns Sellschap!) gaht bedeln. Un över ehr Köpp, wieldat se Slang staht, fleegt de Privaatjets hen un her. Is de Rieken ja nich totomoden, sik ok bloots op Ogenhööcht mit solk Lü to bewegen, de dor Slang staht (orr ehrenamtlich ahn Geld arbeidt, de Idioten!). Se maakt dormit de Levensgrundlagen vun all toschannen; man ehr is dat egaal, denn se köönt sik mit Geld afsekern. Un de Kluft twüschen Arm un Riek wasst wieder un wieder.

De "allgemeine Daseinsvorsorge" is en Plicht vun'n Staat. Avers de Staat, dücht mi mennigmaal, is al lang Partei in den Krieg, de ganz reaal toovt — den Krieg Riek gegen Arm. Düt korte Video vun de legendären Georg Schramm schulln Se sik unbedingt ankieken. Man een Saak mutt ik dor doch korrigeern: Much Buffett ok denken, dat sien Klass den Krieg winnt — en Krieg is eerst wunnen, wenn de Gegner opgifft, un düssen Krieg warrt wi nienich to Enn gahn laten. Nich ehrdat dat gerecht togeiht. Ik nich.


5.7.23 ...Krieg oder nich Krieg, dat is de Fraag

Dat Bild nerrn is en Screenshot vun "Spegel online", jüst even maakt. Bloots mal, dat'n weet, wat en Krieg is un wat bloots Randale orr de mystische "Militäroperation". (Spoiler: Nich dat Ding in de Ukraine.) Denken dröfft Se sik dorbi sülven, wat Se wüllt.

spon


22.6.23 ...Deep in de See

Bet toletzt hebbt se Höpen hatt. En levigen Minschen to redden. Dorför weer jüm ok nix to düür. De Medien sünd vull dorvun, de hele Welt kiekt op dat Unglück in't Meer — bangt mit de Reddungsmissioon, truert mit de nableven Minschen, Moders, Öllern, Wittfruuns. So en gresige Dood! Ja, deep in de See, dor liegt se nu...

...de fiefhunnert, villicht sösshunnert Doden, Mannslüüd, Fruuns un Kinners, vun dat Schippsunglück vör Grekenland an'n 14. Juni.

Hä, wer, wokeen? Nee, de hele Welt kiekt op en obszön düres un överflödiges Aventüür vun rieke Idioten. De Jünger vun Gott Mammon wulln dat Wrack vun de Titanic besöken — kieken, woneem sik de Hautevolee vun dunntomaals in'n Dood fiert hett — un dat geiht so ut. Spegelbiller. Lieknisse. — Op de Titanic weern ok arme Minschen, de Twüschendeckspassagiere. Ballast. Na versunken Slaavenscheep dükert ja ok nüms. Dat Middelmeer is en Graff mit dörtigdusend bet föfftigdusend Lieken. Man bi arme Sluckers maakt dat nichmal de Masse. Een Promi orr Rieke is mehr wert. Sien Dood is en Schandaal — un heet sogor al "OceanGate".

Nee, Gott Mammon is nich mien Gott.


12.6.23 ...Een mutt sik oppern

Oh, wat sünd se all an't Bevern vunwegen dat de AfD bi de tokamen Wahlen in poor oostdüütsche Bundslänner de Stärksten warrn kunnen — orr sogor de Mehrheit kriegen kunnen. Na mien Menen is dat dat Eenzige, wat helpen kann. De AfD mutt endlich mal an't Ruder kamen, dat se sik enttövern kann. Op't Best as Alleenverantwoortliche, also mit en afsolute Mehrheit, dat se sik nich op en nixnütten Koalischoonspartner rutsnacken köönt. Na een, twee Johr AfD-Regeern warrt de hele Oost kureert ween. Op jeden Fall is de so nöömte "Brandmuur" gegen de AfD — de Verweigern vun Tosamenarbeit mit ehr, egaal wat de Wahlen un Afstimmen seggt — tominnst so undemokraatsch as de AfD sülvst. Wat is dat anners as en Opfeddern, de AfD en afsolute Mehrheit to geven?!

Welk Bundsland schall sik nu oppern un de AfD an't Stüer laten? Mi dücht, de best Kandidat weer Thüringen — se hebbt ok de radikaalste AfD. Dat warrt en Rosskur. Nich dat dat de AfD gefalln wöör — nee, denn sünd se ja nich mehr Protestpartei. Woans kunn en Regeernspartei dat ween? (Utnahmen natüürlich dat Natuurwunner FDP.) Avers wenn de Lü ehr wählt, mööt se in den suern Appel bieten un regeern. Kannst ja slecht seggen, du wullt gor nich regeern. (Bloots de FDP kann dat.) As Regeernspartei muttst wat maken — un kriggst de Verantwoorden dorför, wo de Saken sünd — ok wenn du dat gor nich verschüllt hest. Denn warrt all de Lü sehn, dat de AfD ok bloots en Partei is, de den ganzen Kraam mehr slecht as recht verwalten deit. "Mehr slecht as recht" muttst, denk ik, bi de AfD wöörtlich nehmen. Länger as een Legislaturperiood warrt dat nich duern, wenn överhaupt so lang; un dorna is de Spuk vörbi. De vun de AfD, heet dat. Dat leidige "Gedankengut" vun Autorität, Minnerwertigkeitkomplexe un Bangnis vör Frömdes un Unbekanntes warrt wiederhen dör de Bregens vagabundeern. Mal kieken, woneem dat as neegst sesshaft warrt. De Demokratie mutt dormit trechtkamen.


11.6.23 ...En Held in Russland

Dat passeert so veel, un wat teihn Johr trüchliggt, vergeet wi meist — süht ja ok meist ut as ut en anner Welt. Denkt noch een an Edward Snowden, de de illegale Datenspionaasch vun de US-Behörden publik maakt hett? Siet teihn Johr sitt he in Moskau fast. Utrekent dor. Hett de russ'sche Staatsbörgerschap annahmen. In sien Heimaat wöör he nienich wedder dat Daglicht to sehn kriegen. En Held. Gewaltlos. — Wat he dormalen enthüllt hett, reegt hüüt nüms mehr op. Dat geiht al veel slimmer to in de Welt. Avers dat maakt dat Unrecht nich wett.

Jümmers, wenn de westlichen Politiker*schen grootsnackt vunwegen dat wi de Demokratie redden mööt un wo slimm dat üm de Minschenrechten annerwegens steiht — denn kiekt jüm ut'n Spegel Snowdens Gesicht an. Un dat vun Assange. Un vun de Oppers vun de Verbreken, de düsse Minschen apentlich maakt hebbt.


28.5.23 ...Olaf un de Drogi

Hach ja, allens blifft, as dat jümmers weer: Erdogan is wedder Düütsche Meister, un de FC Bayern regeert ok wiederhen in de Törkei. Bloots een Naricht hett mi ophorken laten: de Vörfall mit Olaf Scholz un de Sekerheitspanne an'n Flooghaven. Een Typ harr sik mit'n Auto in de Kanzlerkolonne rinmogelt, un de Sekerheitslüüd hebbt dat nich merkt. De Fohrer is op't Rullfeld mit de annern utstegen un op Scholz togahn — dat kunn en Attentäter ween! En Terrorist! Allens höllt de Luft an. Wenn de Keerl en Metz orr en Bomb hett, orr sogor en Sprenggördel, mit den he den halven Laden ümrüm in'e Luft jaagt — na denn Goodnacht, Marie! Denn is allens ut. Man wat för en Afgang för Olaf! As Terror-Opper starven, in't Amt, bi sien Plichterfüllen, sotoseggen för Düütschland starven — dat kannst nich toppen, dat maakt Olaf to'n Naschonaalhelden un sekert de SPD ok de neegste Kanzlerschap, egaal, wokeen Olaf sien Arv antridd. De SPD is denn de Partei, de ehr Liddmaten ehr Bloot för den Deenst an ehr Land vergaten hebbt... Kritik an Olafs Kanzlerschap müss för alltied verstummen... de mortuis nil nisi bene, över Dode kannst bloots Godes seggen. Ja, kunnst meist seggen, Scholz is för sien Partei in düssen Momang dood mehr weert as levig!

Allens höllt also den Aten an. Un wat deit nu de Keerl op't Rullfeld? He geiht op Olaf to un —— ümarmt em un smuust em af! Na, dor weer ja allens klaar. Se hebbt sik den Keerl grepen un foorts op Drogen test't. Een, de sowat deit, kann ja nich bi Verstand ween.

Un de SPD bliff ok wiederhen de HSV ünner de Parteien.


12.5.23 ...Mal en Hoorspalterie

Bi Itzhoe wüllt se nu sachs en niege Batteriefabrik buun — för Autobatterien. Wat bitte?! So'n fette Batterie warrt na een Entladevörgang ut dat Auto reten un wegsmeten? Tosamen mit de annern Altbatterien ut'n Sammelkarton in'n Supermarkt? Un dat schall "gröön" ween?! — Ach nee, wegsmeten warrt se doch nich? Se blifft in't Auto un warrt wedder oplaadt? Denn is dat amenn etwa keen Batterie, sünnern —— en Akku? Ja, dat is en Akku. Un dormit keen Batterie. Bitte, wenn wi, anners as dat Ingelsche, twee Wöör för solk Saken hebbt, denn bruukt wi ja nich ut reine Solidarität mit dat Ingelsche dat falsche Woort bruken un "Batterie" seggen. Wi köönt de fienen Ünnerscheed beteken.


6.5.23 ...Gefährliche Tügen

Vör Gericht köönt Tügen ja heel verhängnisvull för schüllige Minschen ween. Ehr Utsaag hett al mennigeen to Fall bröcht. Man welk Tügen sünd ok denn gefährlich, wenn se gor nix utseggt — Truutügen. Dat, so lett dat opstunns, sünd de gefährlichsten Tügen överhaupt. Wenn du Politiker*sch büst, kannst dien Suupkumpaan en Job toschostern orr dien Skatbroder, dien Schoolfründ un dien Golfkumpaan sowiso; man sodraad de anner dien Truutüüg weer, büst in Gefohr. Swager un Swiegersch sünd liekso vigeliensch. Dorbi passeert dat licht maal — en Zirkel vun Facklüüd kennt sik ünnernanner, arbeidt tosamen, warrt Frünnen, welk heiraadt, se maakt alltohoop Karriere, un miteens sitt se dor un sünd en Korrupschoonsfall.

Ik heff ja al jümmers seggt, dat Heiraden nix döcht, avers nu is doch würklich jedeenen klor, dat tominnst Politikers zölibatäär leven un gor nich friegen schulln. Kannst ja sehn, wohen solk as Schröder dat bringt, de en halv Dutz Maal friegt hebbt. Woveel Truutügen de wull hett?! Un wo vele dorvun hebbt Jobs kregen? Un wat passeert, wenn du en Frömden en Job giffst, frünnst di mit em an, wieldat he so good un flietig arbeidt, un amenn warrt he dien Truutüüg? Muttst em denn rutsmieten? Un wenn du nu womöglichen den Truutügen glieks sülven friegst? Dat maakt nu ok den Letzten kloor, dat Politikers nicht friegen dröfft. Nich friegen un nich tügen. Dor kenn ik keen Verwandten.


30.4.23 ...Putzige Ansichten

Un wedder de FDP! Weer de FDP en Minsch, wöörn se uns al brüden, "wat sik kabbelt, dat leevt sik". Is avers nich so. Wat is, is Kommunaalwahl in Holsteen, un de unnachahmliche FDP hett de ganze Hööfdstraat vun mien Heimatoort mit düt Plakaat plastert. Se meent hier natüürlich de Heizungspolitik, Energiepolitik un Co. Na klaar — so lang de Ümwelt doroptahlen mutt, is de FDP dorför, dat dat Leven för de Minschen billig blifft. Sodraad dat avers üm betahlbore Mieten op Kosten vun de Vermeders un Wahnhüüs-Egendömers geiht, is dat nich mehr so wichtig; wichtig is denn, dat dat lukrativ för ehr Klientel is.

Man bloots good, dat op de glieke Straat "De Partei" en Plakat opstellt hett mit de Opschrift "Geldprobleme? Erb doch einfach!". Dor bruukst nix mehr to seggen.


23.4.23 ...Irrige Ansichten II

De kloken Demoskopen hebbt rutfunnen: En ganzen Barg Lü sünd beförchten, dat de Klimaschuul ehr orrig in't Portjuchee wehdoon warrt.

Tja. Hebbt sachs recht.

Blifft bloots de Fraag: Denkt jichenseen, dat keen Klimaschuul to maken finanziell günstiger kümmt? Echt? — Fraag mal de Lü in't Ahrdaal.

Eben. Segg ik doch.

Bild: Screenshot ZDF.de

18.4.23 ...Irrige Ansichten un objektive Wohrheiten

De FDP höllt bannig veel vun de Wetenschap. Nich dat een vun ehr sik de Möhg maken wöör, so'n vigeliensch Fack to studeern, 'neem een sik för anstrengen mutt staats bloots Geld to maken — nee; man de Lü, de so doof sünd, dat to doon, de köönt sik denn ja ok nütt maken, meent de FDP.

Wenn't na ehr geiht, schallt Ingenieure un Erfinners gefälligst dorför sorgen, dat de FDP-Wählers wiederhen flegen un Porsche fohrn köönt, indem dat se eenfach ehrn Grips anstrengt un wat erfinnt, wat uns den Klimawannel un de ganze lästige Natuur vun'n Hals schafft. Dat dat mööglich is, dor glöövt de FDP inbrünstig an — weer ja sünst to un to schrecklich!! Nee, de Krisen weg-erfinnen, dor hett een ja de Facklüüd un Experten för. De schallt sik bloots richtig anstrengen, denn bruukt wi Investmentbankers & Co. nixnich an unsen Levensstil ännern. —— Un nu kümmt düsse dösige Expertenkommission un seggt, de Klimaschuul-Tögels mööt straff trocken warrn, en Tempolimit mutt her, un de FDP-Verkehrspolitik is en Desaster. — De dummen Hunnen schallt nich kritiseern, sünnern gau wat erfinnen!!!

"Darüber hinaus muss die Wissenschaft auch auf Skeptiker oder Vertreter irriger Ansichten zugehen, ihnen zuhören und versuchen, ihnen objektive Wahrheiten nahezubringen. Welche Mittel und Wege hier erfolgreich sind, muss dringend erforscht werden." So steiht dat bi de Wahlpröövsteen vun de FDP.

Klingt verdächtig na Sülvsterkenntnis.


10.4.23 ...ChatGPT kann Platt...

...avers (noch) nich beter as jedeen tolehrte Plattdüütsche. Ja, de Text-KI (KI = Künstliche Intelligenz) ChatGPT hett sik bi dat Dörchforsten vun frie Webtexten (also ok düsse hier) ok Platt bibröcht. KI kann ja sülven lehren. Man as dat Bild nerrn wiest (kannst dör Anklicken vergröttern!), is ehr Platt noch fehlerhaftig, sünnerlich ok bi längere Texten; un wenn een ehr nich in eensento anstött, fallt se trüch in't Hoochdüütsche. Kannst ehr denn avers bestrafen mit den Duum daal (rechts blangen de Antern).

KI warrt veel verännern, dat is klaar. Wieldat se sik sülven anduernd verännern un verbetern kann. To'n Verbetern raadt wi: mehr godes Platt lesen! Natüürlich hett de KI uns hele Websiet Plattpartu al veelmalen dörchnudelt; un düssen Indrag över sik sülvst un ehr Plattsnacken warrt se ok wedder bruken, beter Platt to snacken. (Dat nööm ik wohraft rekursiv!) Man de Dialektmix hier op uns Websiet verbiestert ehr apensichtlich noch. Wennehr kümmt de Tied, dat ik de KI seggen kann: Snack Elvmärscher Platt mit mi! (Orr holsteiner, westfäälsches, oostfreesches, vörpommersches, Westküstenplatt...)

Ja, wennehr warrt de Tied kamen? — Gauer as du denkst. De KI lehrt in jede Sekunn un vun elkeen Woort, dat wi snackt. To'n Fiend muchst ehr nich hebben. Sorg dorför, dat se dien Fründ is.


6.3.23 ...Toleranzgrenzen

"Leicht beieinander wohnen die Gedanken, doch hart im Raume stoßen sich die Sachen." Schiller harr good Snacken; hüüt gellt dat so nich mehr. Dat warrt eng — ok in de Welt vun de Gedanken un Ideen. Se stött opnanner — schienbor benaverte, verwandte Anliggen kaamt in Konflikt. Welk Fridays-for-future-Gruppen warrt Antisemitismus vörsmeten, welk hebbt sik al sülven oplööst, wieldat se (sik) nich divers noog weern — allens witte Middelstandskinner... Un nu kollideert de Energiewenn mit indigene Autonomie. Mien Indruck: Överall op de Welt mutt opstunns so veel ünnerscheedlichs Godes daan warrn, dat wi Minschen — as enkelte orr Gruppen — nich good noog för allens ween köönt. Wi mööt Afstriche maken. Villicht bloots in een, twee Hinsichten good noog ween, bi den Rest uns bescheiden. Dat heet ok Prioritäten setten. Un denn ok dat Gode gellen laten, dat solk doot, de in anner Hinsicht nich perfekt sünd. Nich Personen verurdelen un ehr Wark glieks mit. Wenn een för Minschenrechten striedt, nich fragen: "Is se ok Veganersch?" Un wenn een wat Goods för de Ümwelt deit, nich fragen: "Is he denn ok Feminist?" Ik sülven bün ja tolerant. Wenn een wat Goods deit, fraag ik nich na de Fehlers vun den Minschen, de dat deit, sünnern nehm dat dankbor an. Fehlers stöört mi nich. Nich mal, wenn de Minsch tofällig Liddmaat in de FDP weer.

Ofschoonst — de FDP, dat is wirklich de Grenz vun mien Toleranz.


28.2.23 ...Orwell lett gröten

Nee, na Berlin bün ik nich mitkamen. Frünnin Secil weer dor, op de Demo, ok annere Bekannte. Ik heff opstunns en Kurs halv vull mit ukraiinsche Fruuns, de ehr Männer, Bröder, Söhns an de Front sünd — un de Fruuns mit ehr Harten ok. Ik bün tweedeelt. Vun mien Temprament her much ik Putin geern so richtig in de Klüten pedden, mit Anloop. Em fertigmaken, egaal wat dat kost. As de Ukrainerinnen. Man wenn ik denn uns Medien lees, so besapen vun niegen Militarismus un dorvun, dat se endlich, endlich seht, wat för en Verbreker Putin is... denn denkst: Düsse niege Kloorsicht is ok bloots en niege Aart Scheuklappen. Pazifisten wohrschuugt vör en Eskalation. Anter: "Ja, avers dat is doch Putin, de eskaleert!" Natüürlich. Un nu? As wenn dat Problem lööst weer, wenn een en Schülligen hett. Vergliek (de natüürlich hinkt): Klimawannel? "Ja, avers dat is doch China, de de ganzen niegen Kohlekraftwarken buut!" Ah, wi hebbt en Schülligen. Problem lööst? — Un: Köönt wi Putin so wirklich fertigmaken?

Natüürlich wüllt ok de, de Fleegtüüch un U-Boote in de Ukraiin schicken wüllt, Freden. Se denkt even, "Krieg is Freden". Un wokeen dat antwievelt un seggt, stunn dat nich bi Orwell?, de is glieks en Putinist... Putin gefallt dat, he kennt sien Orwell ok un ergänzt dat Zitat: "Nix to weten is Starkde, un Frieheit is Slaaveree". — O Schiet. Rüstung un Wapen sünd för mi dat Letzte. Un doch will ik Putin in de Klüten pedden. Mutt ik dat hööchstpersöönlich doon?

— En schönen Artikel hett Antje Vollmer schreven, hier is dat Link. Lohnt sik.


19.2.23 ...Raadlos

De Münchner "Sekerheitskunferenz" is toenn gahn, un mehr un mehr warrt mi kloor, dat wi op en Achterbahn Richt Höll sitten doot. De Rüstungsindustrie sitt an't Stüer. (Jaja, Achterbahns hebbt keen Stüer, is kloor.) In en Tied vun Klimawannel un Noot överall ritt de Krieg uns ganze Weerschap an sik. Wenn düsse Krieg mal vörbi is un de Welt denn noch steiht, — warrt de Rüstungsindustrie sik dat eenfach gefalln laten, dat wi ehr den Stüergeld-Hahn wedder todreiht? Warrt se nich ehrder jichenswo en niegen komodigen Krieg anzetteln, dat dat Geld wiederhen fleten deit? Ik wöör dat maken, wenn ik Wapenproduzentin weer. Is doch schöön, wenn de Nafraag löppt un een de Priesen bestimmen kann... paradiesisch!

Ja, wenn de Welt denn noch steiht. Natüürlich steiht de Eer noch — avers wat wi "Welt" nöömt, uns Welt, is doch bannig fragil. De drütte Weltkrieg, dat warrt jümmers klorer, warrt nich twüschen Russland un de Nato lopen, sünnern twüschen China un de Nato. Noch unheimlicher. Russland is bloots en Funke. De dat Ganze gauer maken kann — sünst harrn se villicht noch Tied hatt, to Verstand to kamen...

Och Verstand! Woneem is noch Verstand? Mien Hart sleit ganz op de Siet vun de Ukraine, ik much sülven jedeenen ümbringen, de mi sowat andoon wöör... man liekers eskaleert düsse Krieg vör uns Ogen. Se warrt de Ukraine Fleegtüüch levern, un dat sünd Angriepswapen... Köönt wi nich de Ukraine defensiv waterdicht maken? So dat de Luftafwehr 100% funscheneert un an de Front keen russ'sche Panzer mehr een Millimeter vörankümmt? Dat weer mi ok dat Geld weert. Dat jedeen Angriep sik doodlöppt. Dat de Minschen seker sünd. Un denn: verhanneln — tonoot laadt wi Lawrow doch na München in, kidnappt em un dwingt Russland so an'n Verhannelnsdisch! Ik weet, dat geiht allens nich. Putin lacht bloots, wenn wi Lawrow kidnappt, un wat schallt wi denn mit em maken? So richtig nütt is de Mann ja ok nich. Villicht sett wi em in een vun de Leos un schickt em in de Ukraine an de Front. De Russen warrt liekers scheten. Man denn drippt dat tominnst nich den Falschen.


10.2.23 ...Överhaalspoor

De Ukraine will flott in de EU, opleevst güstern. Kannst ja verstahn. Man dat kann un dröff de EU nich maken — un wenn't bloots üm de annern Bitriddskandidaten weer, de al siet Johr un Dag vör de Döör staht un sik afmaracht, rintokamen. Wenn en Överfall vun Putin langt, dat een op de Överhaalspoor in de EU kümmt, denn wöör Putin bald en Koppel Inladen kriegen: "Köönt ji uns nich mal överfalln? So'n beten tominnst? Anners kaamt wi nich in den Vereen!" So'n Bispill dröff de EU nich setten.


24.1.23 ...Leo, wir fahrn nach Donezk!

...oder so etwa güng en Slager ut de 1970er Johr. Hellsichtig, nich? Düütschland hett so lange bockt, Leoparden to levern, bett de USA nu ok fette Panzer levert. De Steert hett driest mit den Hund wedelt. Nu levert wi ok Leos. Un wieldat de ganzen Leos in Lodz orr Donezk orr Lugansk op Nimmerweddersehn versacken warrt, mööt heel fix gaaanz vele nabuut warrn. Uns Industrie mutt op Kriegsweerschap ümstelln, feddert al welk Militärs. Kriegsweerschap?! Höör ik richtig? Ja, leider. So wied sünd wi al. Un wo wied warrt wi noch kamen?!

Dat sünd Milliardenwerte, de dor över de Grenzen wesselt. Wunner nimmt mi ok, woso Russland den ganzen Kraam in't Land lett. De 5000 Helme vun'n Anfang kannst ja prima rinsmuggeln, avers so'n Leo is ja doch en wat grötter Objekt — den warrst gewohr, mit Drohnen, sogor mit Satelliten, un mit Spione sowiso. Russland weet, wennehr de kaamt — un wo. Dat gifft bloots bestimmte Routen, op de so'n gewaltige Brummer in't Land kamen köönt — Bahnlinien un heel grote Straten. Russland kunn dat licht verhinnern, kunn düsse Linien bombardeern. Doot se nich. Dat warrt jümmer klorer, dat mien syrische Frünnen recht hebbt: Putin will, as in Syrien, en langen Krieg. Un den warrt he kriegen, so orr so, denn dat steiht ganz bi em. Woveel Lü, ok sien egen Lü, dorbi in't Gras beet, is em eendoon. He will den Westen spalten, erschüttern un weerschaplich utblöden. Kriegslogik. Un dat funscheneert.

Un en grundkorruptes Land as de Ukraine weet ja ok, wat to doon is, wenn solk Millardenweerte vun överall in't Land ströömt. De jungen Männer un ok Fruuns oppert an de Front ehr Leven, un de Bonzen füllt sik de Taschen. Oh, entlaten, ja — Selensky hett se all entlaten! Ja hebbt de denn nich opstunns Kriegsrecht in de Ukraine?! Wat passeert ünner Kriegsrecht mit Plünnerers un Deven...?

De Ukraine will ja avers in de EU. Dor mööt se nu wat gegen de Korrupschoon doon. Dat lohnt sik ok för de korrupten Bonzen, denn de Fleeschpött vun de EU sünd ja noch veel beter füllt. Kiek na Ungarn, Rumänien, Bulgarien...

Man dat dat so wied kümmt, dor steiht noch Putin vör. De en langen Krieg will. Johrenlang. Allens kann noch ganz anners kamen. Un wi hier ergeevt uns in Putin sien Kriegslogik. De funscheneert.


31.12.22 ...Allens warrt good!

Düsse letzte Dag vun't Johr füllt mi mit Höpen, dat allens nich so slimm is: De mehrsten Minschen mööt den Euro dreemaal ümdreihn un ok den Cent noch tweemaal? Na dat wüss ik avers! Kiekt sik an, wat an Böller verköfft woor! Un wat den ganzen Dag al verballert warrt! Wenn dor nich so mennig Familie ehr Hülpspaket verknallt, denn weet ik nich. Un as mien Leevsten (he sülven knallt geern so'n beten) ja seggt: Mit de Böllerie warrt ja de ganzen bösen Geister verdreven. Dat is de Sinn dorvun. Twee Johr woor nich böllert! Wegen Corona. Un wat weern dat för lausige twee Johr! De bösen Geister weern ut Rand un Band. Wenn wi verleden Johr böllert harrn, meent mien Schatz, harrn wi villicht Putin un den Schietkrieg afwennen kunnt. Muttst bloots an glöven! Dorüm böllert se nu ut all Rohre. — Also wenn dat funscheneern schull, denn warrt 2023 bestimmt en super Johr. Villicht ok för de armen Hunnen un Wildvagels, wenn se sik wedder berappelt hebbt.


17.12.22 ...Freden op Eer...

Dat gifft de Parabel vun den Pogg, de in hitt Water smeten warrt un mit'n galligen Quiekser stantepe wedder rutjumpt; wieldess en anner Pogg, den sien Water vun Normaaltempratuur gaaanz langsam hitter un hitter maakt warrt, sik nich wehrt, sitten blifft un langsam kaakt warrt. Wi sünd düsse Pogg.

Ik bün en Kind vun'n Kolen Krieg. Wat wi dormalen allens wennt weern, harr ik glücklich vergeten — avers nich ganz, denn nu kümmt de Erinnern mit'n veniensch Grienen wedder. Hier warrt en Munischoonsfabrik buut — dor en Kampfjet anschafft — hier en Manöver afhollen — dor en Dubbelwumms spendeert. Rüstungsgöder, Jets, Panzer, Wapen un Munischoon sünd Schrott sünner Egenweert, ahn jeden zivilen Sinn orr Nütten, nich mal dekorativ sünd se. Un allens kost Milliarden, Milliarden, Milliarden. Uns Sellschap geiht sutje dorto över, ehr Kapital wedder dat Kriegsmonster in't Muul to smieten. Un sik to militariseern. Dat as ganz normaal antokieken.

Militär schafft keen niege Göder un Weerten. Dat erfinnt nix, buut nix op, maakt nüms glücklich. Dat is bloots dorto nütt, dat sik nich jichenseen anner Militär an uns Göder un Weerten bedenen orr ehr tweimaken kann. Dat Best, wat Militär leisten kann, is also den Status quo aftosekern — gegen hoge Kosten. Militär bingt uns narms hen, bloots dor, neem wi al sünd. Dat is so as mit de Zigarettenreklaam: Dor striedt se ok bloots noch üm Markt-Andelen, also wo veel Perzent vun de Smökers welk Marke smöökt; de Markt sülven warrt nich mehr grötter, d.h. keen niege Smökers kaamt dorto. Avers de Reklaam, den egen Andeel to behollen, kost veel Geld. Un wenn de anner Firma mehr Reklaam maakt, mööt de annern mitdoon. Rüstungsspirale heet sowat. In'n Kolen Krieg hett düsse Idiotie tominnst Lü in Lohn un Broot bröcht; hüüt avers is nich mal dat mehr eh Vördeel, wieldat wi jedeen Minschen in de Pleeg un in de Scholen bruukt. Un jedeen Euro!!

Wenn'n sik mal ankiekt, wo schädlich un gefährlich dat is: Hebbt wi keen Alternative? — Fief Minuten nadenken, "Nee!" seggt de mehrsten Minschen. Man de Saak verdeent mehr as fief Minuten. In de 1970er wüssen dat eerst heel wenig Minschen, avers hüüt weet wi all: Wi hebbt'n Klimawannel vör de Bost. Dat geiht üm allens. In Militär to investeern is reinweg en Kapitulaschoon vör de egentlichen Problemen. 100 Milliarden för de Rüstung? Mien Generaschoon is dorgegen op de Straat gahn: Keen Cent mehr in de Rüstung! Un wat seggt hüüt "Fridays for future"? "Wi wüllt ok 100 Milliarden!", seggt se. Dat is Kapitulaschoon vör de Kapitulaschoon.

Wi mööt uns wirklich un endgültig mal överleggen, woans wi Freden op Eer schaffen köönt. Sünner Wapen.


5.12.22 ...Nee danke!

Ik heff en Kiekschapp tohuus. Dat is so üm un bi 12, 13 Johr oolt, avers schöön groot. Heff ik dormalen noch för mien Moder köfft. Un ik heff en Satellitenantenn.

Siet 15. November sitt ik dor: keen Sender Phoenix, Arte un One mehr. Se hebbt ehr Programm heel op HD ümstellt, un düsse Senners kriggt mien Kiekschapp nich rin. Utrekent düsse Senners! Schrott kann ik dorgegen masse finnen. Avers keen Phoenix, keen Arte. Sennersöökloop hülpt nix. De Elektronikfackmann seggt, de inbuute Receiver is to oolt. Dor fehlt de nödigen Chips, dat he de HD-Senners kriggt. Ik: "Denn kann ik ja en niegen externen Receiver köpen!" He: "Och wat! Smiet Se doch den Fernseher weg! So veel kost de Dinger doch nich mehr!" — Wat?! Ik schall den ganzen funkschoonstüchtigen Fernseher wegsmieten vunwegen — en poor Chips?! Ik nich! Över so'n Konsumverhalten un sien Folgen heff ik al mennigeen Doku sehn. Op Phoenix. Un Arte. Snüff! Mutt ik nu allens streamen.


1.12.22 ...Nu endlich...

... versteiht een de Geste vun de düütsche Mannschap vor ehr eerstes Speel:


"Och du Schiet, wi warrt verkimmeln!"

Neegst Maal treedt de Kickers glieks mit düsse Geste an:

Hüüt avend hebbt de Fans dat glieks mal vörmaakt. Aver lustig weer't doch. Go, Japan, go!


23.11.22 ...Wat passeert eentlich...

... wenn dat in Katar nu utnahmswies mal regen deit, un wenn de Sünn dörbrickt, steiht an'n Heven en grote — äh — na, dat Düwelsdings —— de nich uttospreken is —— de Regenbagen even! De Gottstahunsbi? De as Armbinde al de Kataris in konvulsivische Krämp stött? — Wat denn???

Ik bün ja jümmers noch höpen, dat een uns mal dat Rumpelstilzchen maakt. Ik wöör dat to geern sehn, wenn dat de pummelige Emir vun Katar weer...


20.11.22 ...Knuddel-Behöörd

Jaja, de Mächtigen sünd skrupellos, se löögt un roovt, Katar is anschienend pleite (woso hebbt se sik denn sünst nicht den Schiri vun't Eröffnungsspeel köfft?! Mit noog Geld kunnen se sik den Sieg liekso köpen as dat Turnier!), un de Klimakonferenz is nix as en Energieversleudern west. De Welt is so slecht as jümmers. Avers dat gifft ok Saken, de to'n Knuddeln sünd. So as de Missen annerletzt. Ok ik heff so en Momang jüst beleevt. Leeg doch in mien Breefkassen en Breef vun dat Bundsverwaltungsamt, dat de Bafög-Schulden verwalten deit, mit düsse moie Bott:

Süh an, "wegen guter Führung" entlastet! Un is nich eerste April! — Man de Knuddel-Momang, de kümmt nu. Direkt dorünner stünn nämlich düt:

Hach, sünd se nich sööt? De Rechtsbehelfssaak mutt eenfach hen. De Schnuckelchens. Wenn ik so'n Weddersprook schrieven wöör, wöör ik em mit'n 1. April dateern, mal kieken, wat een dat wieswarrt!

Op de anner Siet harr ik nich slecht Lust, ehr to fragen, in wat för en Welt wi leven doot, wenn een för ganz normalen Anstand un Ehrlichkeit so belohnt warrt. Is dat denn so roor woorn, dat een den Staat nich beschubsen deit, dat een sien Stüern un Schülligkeiten recht un richtig maakt un alltohoop sien Plichten nakümmt?! — Un dormit sünd wi wedder bi de Slechtigkeit vun de Welt, un de korte Knuddel-Momang is vörbi. Hett avers gooddaan, nich?


6.11.22 ...Schietjob

Hüüt heff ik so blangenbi in de Narichten höört, Luise Amtsberg, de Minschenrechtsbeopdragte vun de Bundsregeern, harr Ägypten (dat Utrichterland vun de UN-Klimakonferenz) kritiseert vunwegen dat se Oppositschonelle wat groff anfaat usw. Ach ja, dach ik spontaan, Ägypten is also keen wichtige Hannelspartner, hett ok keen Gas för uns. Dat weer mi in düssen Momang klaar; tovöör harr ik dat nich wiss wüsst. — Äh, wat bitte? Wenn de Minschenrechtsbeopdragte Kritik öövt, weetst automatisch, dat Land is en tähnlose Tiger Hamster, Nacktmull, Mettenworm?! Erbärmlich, is avers wohr. De Minschenrechtsbeopdragte is quasi uns personifizeertes Dilemma. So mutt de arme Fru sik ok gebärden. Vun Katar un China höllt se sik feern. To dünn Ies. Den Rand hollen, wenn dat Land bieten kann, un bi de Schurkenstaaten op ruge Eier pedden... Na danke för so'n Job!


4.11.22 ...Miss + Miss = ?

De Welt is ja al lang en Dullhuus, as wi all weet, vull mit irrwitzigste Ideen un Begeevnissen, un wohrschienlich is se nienich wat anners west. Avers af un an wiest düt Irrenhuus sik vun en Sied, de is so to'n Knuddeln, dor kunn en "vernünftige" Welt nienich mithollen. Dor is t.B. doch düsse totaal beknackte Inrichten vun Miss-Wahlen. Schullst denken, de Fruuns, de dor mitmaakt, mööt ok so'n lütt beten beknackt ween; un dat mag so ween. Op jeden Fall tummelt sik op de Miss-Wahlen luder Fruuns, na de de Keerls sik all Fingers lecken doot. Un wat doot düsse Droomfruuns? Se verleevt sik. Avers nich in een vun de sabbern Keerls, sünnern — in'nanner. Fraagt Se mi nu nich, wat orr woso Lesben bi Misswahlen mitmaakt (woso nich, kunnen de Lesben fragen) orr wat de twee bloots ehr lesbische Ader entdeckt hebbt, as se op'nanner drepen dään — eendoon, Miss Puerto Rico un Miss Argentinien hebbt nu friegt. Na twee Johr Romanze. Vulle Latina-Power. Is dat nu to'n Knuddeln orr nich?! Wat se sik en gemeensamen Eh-Naam wählt hebbt, weet ik ok nich. Müss denn ja so ween, dat elk vun beid "Mrs. Puerto Rico-Agentina" heet, oder?


31.10.22 ...Snacken! Verstahn! Versöhnen!

Deep spaltene Länner. Nu ok Brasilien. Meist 50% för Bolsonaro. Den unsäglichen Kotzbrocken un Verbreker Bolsonaro, wull ik eentlich seggen, avers dat blifft mi nu meist in'n Hals steken. Denn wat schall warrn ut en Land, dat so en Afgrund trennt, dat all Verstännigen, Diskereern, ja de Spraak sülven reinweg verlischt un de een de annern bloots noch schamfeern doot? Wat passeert, wenn nich mehr snackt warrt? Richtig, denn folgt de Gewalt. Un so en Afgrund geiht dör mennig Länner un Staaten opstunns. An slimmsten sünd de USA, denn dat Land is vull mit Wapen, de düsse Irrsinnigen —— nee, ik will ja nich schamfeern, also: mit de de Minschen sik panzert, de glöövt, dat se anduernd vör jichenswat Bang hebben mööt. Un dat sünd ja nich allens slechte Minschen. Man wenn se in ehrn Wahn Fehlinschätzen glöövt, dat se vun ehr annersdenken Landslü bedrauht warrt, denn hebbt wi wedder en utwussen Börgerkrieg dor; un ik denk mennigmaal, mit wat Ringers as so'n Blootbad sünd se nich to kureern. Un villicht nich mal dormit. Noordirland harr johrteihntenlang Börgerkrieg, un kiek, dat kann nu bald wedder losgahn, wenn dat Noordirlandprotokoll vun'n Brexitverdrag platzt. Dat lett, as weer Rechthebben de Minschen mehr wert as Dood un Ünnergang. Un spaltene Länner kaamt nich wieder, blockeert sik sülven un — opslimmst — de ganze Welt, de nu wohraftig mennig Problemen to lösen hett. Staats dat striedt se sik doröver, wat wohr is, un bringt de Schienwirklichkeiten ut ehr jewielig Internet-Filterblasen gegenanner in Kampfstellung! Ok de groten Diktatuurn China un Russland warrt dat so gahn, wenn Menen un Presse dor mal frie warrt. Se warrt so veel dormit to doon hebben, to klareern, wat histoorsche Wohrheit is un wat nich un wokeen de Goden un de Legen sünd, dat se de Tokumst vergeet. — Uns Land schall dat nich passeern! Ik bün praat, mit all to snacken. Nootfalls ok mit de Rechtsbuten. Ahn Schamferen, ahn vöruttosetten, dat een Good un een Leeg is. Gewaltfrie Kommunikaschoon is ganz schön anstrengend. Liekers warrt wi uns in ehr öven möten, denn veel steiht op't Speel. De Tokumst kannst över Grull un Rechthebberie vergeten, avers se kümmt doch. Wi köönt dat bloots tosamen wuppen. Wi mööt all Minschen mitnehmen.


15.10.22 ...#ichbinarmutsbetroffen

Nee, bün ik nich — Gottloff. Ik wunner mi bloots över den Hashtag. Wat heet dat denn, "armutsbetroffen"? Dat heet: arm. Arm will avers nüms ween. Dat is en Stigma. Kann ok sülvstverschüllt ween. Un sünnerlich: vun Duer. Arme hebbt ji alltied bi juuch, sä Jesus — un behöll leider recht. Nee, arm will nüms ween.

Anners is dat, wenn een vun en Unglück orr Natuurkatastrooph bedrapen is. Dor heet dat jümmers gau: "De bedrapen Lü mutt gau un ahn Ümstänn hulpen warrn!" "Den Betroffenen muss schnell und unbürokratisch geholfen werden!" Ja, dat much jedereen geern. — Bavento kann "bedrapen" ok eenfach bloots heten, dat een intensiv Andeel nimmt. Bedrapenheit kannst ok för frömdes Unglück föhlen. So schuuv ik mit de Bedrapenheit mien Armoot op Distanz — se is mehr so en allgemeen Phänomen. Ik bün op jeden Fall nich arm.

Is nu also dat eenfache Adjektiv sien Tied vörbi? Warrt wi in Tokumst bloots noch Bedrapene sehn? "Ik bün krankheitsbedrapen!" "Ik bün migraschoonsbedrapen!" "Ik bün riekdomsbedrapen!" Ja, sünnerlich ok dat, denn to seggen "Ik bün riek" klingt so ordinär...

Bloots een Satz warrt wi nich höörn: "Ik bün dummheitsbedrapen!" Denn de Dummen, pardon, de Dummheitsbedrapenen glöövt ja typischerwies, dat se klook sünd. Avers de achtersinnigen Hashtags denkt sik annere ut.


13.10.22 ...Tolstoi lett gröten

Dat passeert mennigmaal, dat ganze Gruppen vun Minschen, ok ganze Völker, so teemlich as een Minsch funscheneern doot. An de Ukrainers in ehr momentane Kriegslaag köönt wi dat ganz good sehn. — Dat weer Tolstoi, de seggt hett, mit dat Böse schull de Minsch sik gor nich eerst befaten, ok sünnerlich em nich wedderstahn; denn ok dör den Wedderstand un Kampf gegen dat Böse wöörn wi em liek warrn. Dat weer dat Wesen vun dat Böse, meen Tolstoi, dat dat allens sik "anverwannelt", wat dat anrögen kann. As en Gift.

Nu hebbt de Ukrainers dat Pick, dat en Bösewicht in ehr Land infulln is — den kannst slecht ignoreern. Un wat mit ehr nu passeert, is, dat se jümmers spietscher un naschonalistischer warrt. Spiet deit mennigmaal hartens good, sünnerlich wenn dat mit Plie maakt is; de tweie Krimbrüüch t.B. gifft dat in de Ukraine al as Koken un in Moskau ok as Disch. Humor deit Lü as Putin weh — prima. So'n Aart Spiet kann ik verstahn.

Avers as annerletzt de Fredensnobelpriesen an en russ'sche un en ukrain'sche Minschenrechtsgrupp un an een wittruss'schen Minschenrechtler vergeven woorn, dach ik, ik fall vun'n Stengel, as welk Ukrainers muult hebbt, se wulln den Fredenspries nich mit düsse annern, "fiendlichen Naschonen" tosamen hebben. Minschenrechtlers sünd ehr Fienden?! Natüürlich nich, un klorere Köpp hebbt dat fix richtigstellt. Man dat Geföhl is dor; un dat is en krasse, giftige Naschonalismus. Putin lett gröten. Tolstoi ok. De russ'sche Spraak un Kultur, de nu wirklich keen Schuld an den Krieg hett, kümmt in de Ukraine överall in Verroop un warrt trüchdrängt. Dat Präsident Selensky, de sünst mal Coolness, mal theatralischen Heroismus wiest, dat also Selensky denn ok ganz kooltsnutig vörslaan hett, de Westen schull doch poor Nuklearwapen op Russland füern, dat se gor nich eerst op dumme Gedanken kaamt — dor will ik gor nich vun snacken, denn dor fehlt mi de Wöör.

Dat is bannig swoor, in en Krieg gegen en anner Volk to strieden un dorbi nich antofangen to hassen. Natüürlich sünd wi op de Siet vun de Ukrainers in düssen Konflikt; avers mien Respekt wöörn se sik verdenen, wenn se besunnen un gerecht bleven un sik nich an dat Böse anglieken wöörn. Över de moralische Gefohr, de ehr drauht, köönt se ja bi Tolstoi nalesen. Man nee — dat doot se nu nich mehr: Tolstoi weer ja en Russ. Dat Böse, dat Gift is al dor.


10.10.22 ...Porsche reddt sien Lü

De Malaise vun de FDP dreiht een wirklich dat Hart in't Lief üm. Se staht vör'n Afgrund — woneem schall dat hengahn? Warrt de opletzt alle liek as dormalen Möllemann ut't Fleegtüüch jumpen?! Dat wüllt wi nu ja nich, ok bi all uns Antipathie nich! Mien Schatz Klaus, de praktisch denkt un jümmers de besten Ideen hett, hett den ultimativen Vörslag to Reddung: Vör de neegste Wahl röppt de FDP eenfach en Gewinnspeel ut: "Jedeen 1000. FDP-Wähler winnt en Porsche." Dorto mööt de FDP-Wählers natüürlich friewillig vun ehr Wahlgeheimnis afstahn un in de Wahlkabien t.B. en Handy-Bewiesfoto vun ehrn Wahlzedel maken un dat denn online inschicken, dat se an de Verlosung deelnehmt. Is ja friewillig. — Man woneemher kaamt de velen (?) Porsches?! Ha, vun Porsche natüürlich! De FDP is doch bloots de politische Arm vun de Porsche AG un hett ehr sooo good deent! Se hebbt also reinweg de Plicht, noog Gratisautos ruttorücken un de FDP to redden! Un redden warrt se dat, keen Fraag: Dat bringt masse Wählerstimmen vun impotente Möchtegern-Machos in'e Midlife-Crisis — also ok Stimmen vun de AfD! Stimmenkoop, denk ik, is de Tokumst för de FDP. Dor schulln se mal över nadenken.

Ach, Se meent, dat allens geiht rechtlich gor nich? Is gegen dat Grundgesett un dat Wahlgesett un överhaupt? Na, för wat, bitteschön, is de FDP vull vun Juristen? Wenn de dat nich henkriegt, döögt se wirklich gornix.


9.10.22 ...Mal wat Lustigs

Juchhein un Frohlocken mit'n lütten Achtergedanken: De FDP is rut ut den neddersäss'schen Landdag. Man dat heet ja leider ok, dat se nu ümso mehr in de Bundsregeern ehr "Profil schärpen", also in'n Kloortext: Amok lopen warrt. Dat warrt noch lustig. Wenn een sünst nix to lachen hett...

Noch lustiger sünd de Lü, de AfD wählt hebbt, wieldat se mit de Verhältnisse nich tofreden sünd. To veel Inflaschoon, to wenig Gas. För de Rechtspopulisten gellt ja bekanntlich: Je slechter dat Düütschland geiht, je beter för de AfD. Keen Wunner also, dat de Rechten dor nix an ännern warrt. Nich bloots, wieldat se ja nich an de Regeern kaamt; denn wenn se mal an de Macht kaamt, as in Italien, denn wiest sik: se köönt dat gor nich ännern. Hööchstens blameert se sik un dat warrt wedder lustig. De Lü wüllt eenfach glöven, dat de Problemen vun uns Tied to lösen de Saak vun en Wahlkrüüz an de richtige (rechte...) Steed is. Un na een, twee Johr maakt se benaut "Oooch, de maakt ja allens jüst liekso as de annern!" Un denn kiekt se sik na de neegste, noch extremere Protestpartei üm.

Leider sünd uns Probleme bloots mit vigeliensche, taagnackige un kompetente Arbeit to lösen. Dat is nich lustig, un dorwegen ok nich de Saak vun de Rechten.


27.9.22 ...En Schann, de nich vergeiht

Edward Snowden, en anstännige, rechtlich denken Minsch, mutt utrekent in düsse Tied de russ'sche Staatsbörgerschap annehmen, vun nüms anners as den Verbreker Putin! Wat för en Demödigen. Snowden hett nix anners daan as Verbreken apentlich to maken. Dorför verfolgt em en so nöömte "Demokratie" mit en unnasichtigen Hass bet op't Bloot. He müss in en krasse Diktatuur flüchten, na Russland. Dor is de Welt för em to Enn, denn wenn he dor ok noch den Mund opdeit un de Wohrheit seggt, kann he bloots noch in den Dood flüchten. In Russland, utrekent in Russland, mutt Snowden den Mund hollen. Em sünd de Hannen bunnen — wieldat de USA, sien Heimat, partu sien Bloot sehn wüllt. Putin weet dat. Un as en Spiet liekso gegen Snowden, de USA un all oprichtige Minschen verleiht he em nu sien Staatsbörgerschap!

Dat is en Schann för mennig Minschen un Naschonen. Natüürlich för Putin, avers vun em kannst nich verwachten, dat he sik schaamt. Schamen mööt sik avers de USA, de sogor in düsse Laag nich över ehrn Schadden jumpen köönt un nich schafft, to seggen: "Wi hebbt Schiet buut, Snowden kann trüchkamen un warrt nich behelligt" — orr, wenn se denn partu ehr Unrecht nich togeven köönt, tominnst "Wi vergeevt em". Schamen mutt sik ok Düütschland, dat sien Bangbüxigkeit vör de USA nich afleggen kunn un Snowden keen Asyl geven hett. Schamen mööt sik all westliche Naschonen, de dat nich maakt hebbt. Schamen mööt sik ok all, de de russ'schen Kriegsverbreken anprangert un nix doot gegen de Utlevern vun Julian Assange, de liekso beestige Kriegsverbreken vun US-Truppen apentlich maakt hett. Mark di: Wenn du mit'n Finger op anner Lü wiesen wullt, schullst seker ween, dat dien egen West, op de veer Fingers trüchwiest, reinlich is.


25.9.22 ...FFF is to witt?

En physikaalsches Prinzip is, dat en Saak an'n stärksten mit en Hindernis vun ehr egen Grött wesselwarkt. Nimm en Auto un en Kuhl in de Fohrbahn. Wenn de Kuhl man bloots sticknadelkoppgroot is, dennso spöörst dat gor nich — egaal, wo deep dat is, dor rullst eenfach över weg. Is de Kuhl kilometergroot, dennso denkst du "Hach, so en schönes Daal, dörch dat ik fohr!", un rullst dor rin un wedder rut, ahn dat wiestowarrn. Is de Kuhl avers jüst so groot as dien Vörrerrad orr as dat ganze Auto, dennso maakt dat Rumms, un du sittst dor binn.

De Klimawannel is na mien Menen en Kuhl vun de övergrote Aart: Wi sünd dor ahnmarken rinrullt un hebbt dacht, dat hett doch allens sien Richtigheit, de Straat is schöön glatt. Will seggen: Wi warrt dat Problem nich richtig wies, wieldat dat to groot is. För sowat sünd wi nich maakt — dat is nich uns Grött. Uns Opmarken wannert vun ganz alleen na de Probleme, de jüst de richtige Grött hebbt. Un so befaat sik "Fridays for Future" (FFF) nu opleevst dormit, dat se nich divers noog sünd. To witt. Fien, dor köönt wi wat bi maken, lichter as bi'n Klimawannel tominnst. Erfolge spören. Dat Problem lösen.
Kunnst denken, wi hebbt keen Sorgen. Kunnst avers ok denken, wenn al en Grupp as FFF sik so sülven verunfähigt, köönt wi uns man begraven laten. Villicht is FFF ja ehrder to wirr...?

Merke: En Graff is en Hinnernis vun jüst desülvige Grött as de Minsch.


5.9.22 ...En Schandaalbild?

Nu böögt se langsam, avers seker verkehrt af. En junge austraalsche Maler hett an en Muur in Melbourne en Versöhnensbild maalt — en russsche un en ukrainsche Suldat ümarmt sik. En Wunschdroom, en Fredensvischoon, en paradiesische Szene, in de de russsche Suldat sien Hanneln beduert un de Ukrainer em vergifft. Alle Menschen werden Brüder usw. Avers de ukrainsche Bottschaper in Australien hett stantepe ramentert: Dat güng nich an, dat Bild wöör de Ukrainers beleidigen, dat müss weg. Un de junge Maler hett dat wohraftig överpinselt — un sik ok noch entschülligt. Wat?! En arglos Fredensidyll, villicht naiv, avers rein goodaardig: en Bild in'n Konjunktiv, en Drüppen Hartblood — sowat is nich mehr politisch korrekt?! Empörend? Gegen de Ukraine? Nu överdrievt se dat avers. Mehr noch: Se böögt moralisch verkehrt af. Wenn de Mööglichkeit vun Versöhnen nich mehr ehr Teel is, verleert de ukrainsche Saak ehr Aura vun dat Gode. Se schulln sik överleggen, wat se sik dormit en Gefalln doot. Wenn Putin dat schafft, den Hass to festigen un de ukrainische Siet sik "antoverwannneln", denn hett he ok op een Aart wunnen. Dat dröff nich ween — Putin dröf nich winnen, de Hass ok nich. Sogor de Düütschen na den 2. Weltkrieg woor vergeven. Bloots so endt Kriege wohraftig — nich mit Siege. Vergeven un Versöhnen kann keen Beleidigen ween.


31.8.22 ..."Gorbi rut!"

Wokeen is so en Idioot un wiest dat ganze, grote russische Volk vun Westeuropa weg? Sparrt ehr ut, verwehrt ehr dat Reisen in de EU?! Un dat an so en Dag, an den en Mann as Gorbatschow aftreden is! Wüllt se ok Gorbatschow rutsmieten, bestrafen för dat, wat Putin deit? Dat lett, as wull dor een so veel minschlich un histoorsch Porzellan tweislaan, as man bloots geiht. Maakt nich alleen de Naam Gorbatschow klaar, dat wi fröher orr later ganz wiss wedder mit düt grote Volk tosamenarbeiden mööt? Woso schallt wi Gräven deper maken, uns Fienden schaffen un uns sülvst to Fienden maken? Wa dumm is dat?!?! Dat gifft noch en geschichtliche Tokumst na Putin!! Wat is natüürlicher, as de Hand utstreckt to hollen för de eenfachen Russ*innen, wieldess wi Putin liekso entslaten de rode Koort wiest! Düsse Entscheid vun de EU, Russ*innen keen Visa mehr to geven, is dat Dümmste un Schändlichste siet lange Tied. Wenn desülvigen Idioten nu apentlich Gorbatschows Dood beduert, schulln se eentlich rood warrn un dat Stillswiegen kriegen.


29.8.22 ...Entlastenspaket funscheneert!

In Hamborg hebbt de eersten Lü ehr Geld ut dat Entlastenspaket vun de Regeern op't Konto kregen. Dat Geld kriegt Lü, de ok Transferleisten kriegt— Hartz 4, Soschaalhülp usw. —, dat se de Energiekosten in'n tokamen Winter beter stemmen köönt. Wokeen alleen leevt, kriggt 200 Euro, Familien mehr. Ik heff mal rümmerfraagt ünner mien migrantische Schölers, wat se meent, dat se dormit utkaamt. "Ich hab das auf meinem Konto gesehn", seggt M., "und sofort nach Syrien geschickt. Meine Familie in Aleppo kann endlich Medikamente kaufen!" —— "Ich hab doch noch drei Kinder in Ghana", seggt B. meist verlegen, "ich hab es ihnen gleich geschickt, dann können sie weiter zur Schule gehen. Ich schicke immer alles hin, was ich habe." —— "Die Geld ist schon in Afghanistan bei mein Schwester, sie Brot kaufen kann für ihr Kinder", seggt Zahra. Un de kole Winter? "Ach Frau Marlou, in Afghanistan wir mehr frieren", seggt Zahra ganz souverän.

Dat Entlastenspaket funscheneert. Wirklich.


15.8.22 ...Minschen mit Haltung

Een Johr Taliban in Afghanistan. De Laag is to'n Vertwieveln. De Minschen sünd so arm, se verkööpt ehr letzte Saken, Möbel, Betten —— "Marlou, sie verkaufen ihre Kinder!", seggt Zahra to mi mit Tranen in de Ogen. Ehr Familie is noch dor... Achtjöhrig Deerns warrt in de Eh verköfft, avers ok Babys — ehrdat söss Kinner verhungert, verkööpt se een, un fief överleevt — noch en poor Daag länger... Un wokeen köfft lüttje Kinner un woto? "Ich nicht weiß", schüddköppt Zahra, un ehr Ogen sünd as Gespenster. "Ich nicht weiß."

Un in düt Inferno sitt jümmers noch Minschen, de wi dat schüllig sünd, se un ehr Familien to redden: ehmalige Oortskräfft vun de Bundswehr un anner Organisaschonen. Liehrersche. Fruunsrechtlersche. De ehr Leven insett för ehr demokraatsche Övertügen. Dat sünd Minschen mit oprechten Gang, mit Haltung — ik kann üm düt hoochdüütsche Woort nich rüm. Un solk Minschen sünd hüüt en rore Ressource op'n Globus. Dat is nich bloots Düütschlands Schülligkeit, sünnern ok vun Vördeel, solk Minschen in't Land to halen. Wenn Düütschland noch lang tögert, wiest wi, dat uns düsse oprechte Haltung fehlt.


31.7.22 ...Wi mööt nix mehr bewiesen!

Den ganzen Maand keen Kommentaar schreven — so veel harr ik mit Footballkieken to doon, naja, un anneres. Man nu hett dat ja nich klappt in't Wembley, England hett dat schafft, alltohoop verdeent. Wat mi avers fuchst hett bi dat ganze Turnier, dat sünd de grottigen Scheedsrichterleistungen. Woso in Dreedüvels Naam hebbt se sik in'n Kopp sett, dat dat partu Scheedsrichterinnen ween schulln?! As wenn wi hüüt noch bewiesen mööt, dat Fruuns dat ok köönt... Wi hebbt 2022! Köönt se nich eenfach bloots de Besten, also ok Mannslüüd dorför nehmen? Langt dat nich, dat de Spelerschen Fruuns sünd? Dat gifft doch noog gode, versierte Scheedsrichter — wenn een de Männer dortonimmt. För so'n Turnier! Man nee, se wulln ja wiesen: Fruuns köönt ok schiedsen. Merke: Wokeen partu wat bewiesen will, bewiest faken dat Gegendeel. Hülplosigkeit, Fehlentscheide, översehne Ölbenmeter... un wat de Lü in den Videokeller maakt hebbt, weet nüms, bloots kuntrulleert hebbt se nix. In't Halvfinaal gegen Frankriek hebbt se en Scheedsrichtersch op'n Platz schickt, de 21 Johr oolt weer. Bi de Männer weer sowat nienich passeert — bi so'n Turnier. Dat is ok en Nichtachten gegen den Fruunsfootball — man to'n letzten Maal, is to höpen. Na so'n Turnier!


24.6.22 ...Déjà vu

Wat för en Luud is dat? Ik kenn em, man heff em lang nich höört. Dat warrt luder un luder... un miteens bruust en Militär-Düsenjager över mi weg. — Wo lang heff ik dat nich höört, nich höörn müsst?! Weer mi gor nich bewusst. Un misst heff ik dat ok nich. Dat schien mi jümmers unsinnig. Sinnlos un brutal Versleudern.

Nu is dat wedder so wied. In düsse Welt sünd wi trüchfulln. Wi sünd wedder Neandertalers. Sinnlos Versleudern vun Tied... Wo lang warrt wi bruken, uns dor wedder ruttoentwickeln...


21.6.22 ...Nix lehrt?

Wi smiet Putin vör, dat he de Regeln un Afmaken vun't Völkerrecht braken hett, un wat maakt wi sülven?! Wi smiet uns Regeln mal wedder afkant. De Ukraine schall nu stantepe EU-Bitriddskandidat warrn. De Ukraine!!!! En korrupt, ruineert un terreten Staatsgebild, dat de EU anners an'n gaaanz langen Arm harr verhungern laten — so as wi de Törkei un den Balkan al lang op Afstand hollt un dor verhungern laat — völlig to recht, se hebbt in de EU nix verlaren. De Ukraine ok nich!! Ik verstah ja, dat se böös in Bedrängnis sünd un jedereen ehr geern en Freid maken wull. Man denn wöör ik ehr lever en poor Dutzen Panzer henstelln as en utwussen EU-Kandidatenstatus orr sogor Liddmatenschap! Vun Opperbonus steiht doch nix in de EU-Verdrääg?! — Nee, man staats dat wi versöökt, de uteneenflüchten EU fast tosamentohollen un nootfalls "gesundtoschrumpfen", —— staats dat rutscht nu op dat Ukraine-Ticket sachs ok noch de ganzen Balkanstaaten un Georgien mit rin in den Kandidatenstatus — denn de staht ja al länger vör de Döör, un wenn wi de Ukraine rinlaat, kannst de annern ja nich butenvör stahn laten... Ohauahauaha!

Dat warrt uns noch böös op de Fööt falln. De eerste Sünnenfall weer ja, as Grekenland in den Euro opnahmen woor, ofschoonst se mogelt harrn un de Kriterien dörchut nich erfüllen dään un jedereen dat wüss. Avers Grekenland as Weeg vun de europääsche Zivilisaschoon müss ja dorbi ween...! Weet nümsnich mehr, wo dat utgahn is?! Kann ween, dat uns düsse Beliebigkeits-EU bald üm de Ohren flüggt. Putin lacht al.


19.6.22 ...Nich nieg

För de ukraiinschen flüchteten Lü gifft dat nu en nieg Projekt in Hamborgs Kurs- un Förderlandschap; en Projekt, 'neem se den Alldag in Düütschland in de Künn kriegen schallt. Klingt ganz nütt. Un as sik dat höört, heet dat Projekt New Step. De eerste Lekschoon hebbt se dormit denn al lehrt: Wenn dat jichens geiht, versöökt wi in Düütschland Ingelsch to snacken, orr wat wi för Ingelsch hollt — egaal wat dat üm Ukrainer*sche un Düütsch geiht orr üm Gott un de Welt — wennt sik al mal fix doran!

Ja, dat is iedel un kruuperisch togliek. Idiotisch. Dumm. Dat is allens — bloots nieg is dat nich.


24.5.22 ...Autarkie?

De Nazis harrn blangen mennig idiotische Ideen de Idee vun "Autarkie", dat heet, totale weerschapliche Sülvstversorgen. Dat harr so lustige Utwüss as Autos, de mit Holtkahlen föhren, un ok so nütte Saken as Viskose staats Boomwull. De Grundidee weer, nich versehrbor to ween, wieldat een nich afhängig weer — vun nüms.

In de School heff ik lehrt, dat na'n 2. Weltkrieg ganz bewusst de Autarkie-Idee dör en Prinzip vun gegensiedige weerschapliche Verflechtung ersett woor. Dat weer ok en Fredensprojekt: Lü, de ehr Rohstuffen orr Afsatzmärkte een bruukt, de grippt een nich an. Wieldat dat all Länner bloots good güng, wenn dat de annern ok good güng, schull en Krieg unmööglich warrn. Jichenswie lüch dat in.

Un nu? Ik seh överall Länner ehr weerschapliche Verbinnen kappen un de Sülvstversorgerschap anpeilen. Wohl warrt mi dorbi nich. Verflechtung kann Fredenswark ween! Erinnert sik nüms...?


21.5.22 ...Wohrheit ut Versehn

Dat Politikers de Wohrheit seggt, kümmt ja fakener vör, as mennig Lü meent. Ik denk, so bi 50% vun'e Tied seggt se de Wohrheit. An schöönsten is dat avers, wenn se dat ut Versehn doot. Dat wiest an mehrsten. So en Freudschen Verspreker hett sik Ex-US-Präsident George W. Bush gönnt. De Demokratie in Russland is nixhaftig, sä he, un so keem dat, dat en eenzige Mann entscheiden kunn, ahn jedeen Recht un op brutale Wies in den Irak intomarscheern. —— Äh, in de Ukraine.

De Mann hett Recht. De USA sünd en Land, 'neem de Demokratie kumplett in'n Dutt is — un Bush weet dat. He sülven is en Kriegsverbreker, liek as Putin. Un dat weet he ok. He weer dat, de de unberechtige un brutale Irak-Invasion befahlen hett. 200.000 Irakers bleven dood. Ok de USA hebbt dormalen vun "Befrien" snackt un dat se ja bloots en verbrekerisch Regime wegmaken wulln — as Putin hüüt över de Ukraine seggt. Dat maakt nix beter. Kloor is: Bush höört na Den Haag. Liek as Putin. Un he weet dat.

Avers de USA verweigert sik den Straafgerichtshoff in Den Haag — liek as Iran, Irak, China, Nordkorea, Kuba, Russland... Se weet dat, man kehrt sik eenfach nich an. Un ok för uns in de "westlichen" Naschonen is Putin en Verbreker, Bush avers en Elder Statesman. Wi weet dat ok, man wi kehrt uns nich an.

Bushs Publikum hett lacht.


10.5.22 ...Laat mi denken!

Ik denk geern na. Un twoors ok un sünnerlich bevör dat ik wat do. Nadenken duert bi mi en Momang. Mag ja Genies geven, de dat in Mikrosekunnen schafft un denn ehr fundeertes Urdeel fix un fertig hebbt; ik bün keen so'n Genie un tru de Mikrosekunnendenkers ok nich recht. Weer ik Politikersche, wöörn se mi nu al as "Bremser" orr "Tögerer" schamfeern, un wieldat dat in de Ukraine üm Minschenleven geiht, harr ik denn ok fix "Bloot an de Hannen". Ik bün wohraftig nich niedsch op de Politiker*schen, de ünner so en Druck Entscheiden fällen mööt. Ik bün ok skeptisch, wat ünner solk Bedingen gode Entscheiden entstaht; avers de Bedingen köönt wi uns nich utsöken, se sünd nu mal dor, un de Entscheiden mööt her. De Lü avers, de düssen Druck maakt, doot dat nich bloots ut Angst un Vertwieveln üm de bedrauhten Minschen in de Ukraine; dat wöör ik respekteern. Avers mennigmaal stekt dor en Bereken achter, un ik heff sogor den Verdacht, welk vun de Druckmakers wüllt, dat wi nich nadenkt, sünnern blind hannelt. Un dat kann bloots heten, se wüllt, dat wi wat doot, wat een bi kloren Verstand nich doon wöör. Dat is wat, wat mi opstunns in de Debatte üm Rüstungslevern gor nich gefallt. Dorto is dat to eernst. Un wieldat de ganze Ukrainekrieg vun Naziverglieken wimmelt, hier nu en Nazivergliek vun mi: Gifft en berüchtigtes Nazi-Leed, 'neem dat in heet "Warum jetzt noch zweifeln, hört auf mit dem Hadern, es gibt kein Zurück mehr und keiner darf zagen! Volk ans Gewehr! Volk ans Gewehr!" O Mann, wenn ik sowat ok bloots twüschen de Reegn anklingen höör: dor warr ik so richtig bockbeensch — un nehm mi gründlich Tied to'n Nadenken!


8.5.22 ...Verleren un Verlichtern

Lehr ut den 8. Mai, speziell för uns Düütsche un för de Russ*innen hüüt: Dat kann ok mal ganz good ween, en Krieg to verleren. Kann verlichtern. Kann di frie maken.


7.5.22 ...Krieg as Mootproov

"Wi sünd mal wedder de Letzten. Dat is trurig." De Reed is nich vun en Sport-Event orr den Song Contest, sünnern vun dat Panzerlevern an de Ukraine. Orr is dat doch en Sportveranstalten? Meddewiel dücht mi dat so. Orr worüm sünst schull dat trurig ween?! — Dat Ganze lett mehr un mehr na en Mootproov för Jungs. Wokeen is de Gauste, Stärkste, wokeen truut sik an'n mehrsten? "Atoomkrieg? Ach wat! Keen Risiko." Un wenn? Truust di? Ha, du truust di nich! Bangbüx, Bangbüx! Wokeen truut sik noch bi 10, 20 orr 50 Perzent Atoomkriegs-Risiko? "Wer bremst, hat Angst!" Ik glööv, de ganze Kraam warrt to noch so en Steertvergliek ünner Mannslüüd. Krieg as Mootproov, as Männlichkeitswettstried. Dat passeert fröher orr later mit allens, wat se in de Finger kriegt.

De, de se all anhissen deit as bi en Klopperie op'n Schoolhoff, is de ukraiinsche Bottschaper Melnyk. Jedeenen, de ok bloots "nu mal sachte" seggt, den röppt he bookstäävlich "Oorslock", un wokeen gor nich mitdoon will bi de Klopperie, is för em en Putinkomplize un Mörder. Wi schallt blindlings, ahn Tögern un Henkieken, allens an Waffen na de Ukraine smieten, wat wi hebbt. Un allens, wat he will, feddert he. Bitte un danke kennt he nich. Villicht will he as neegst Atoomwaffen för de Ukraine. Bi em weer ik nich wiss, dat he de nich insetten deit. — Ik denk ja, de Ukraine kann allens an Hülp bruken, un wi köönt ehr blangen Waffen noch wat anners schicken, wat se nödig bruken deit: en wehrfähigen Mann. Mien Vörslag: Andrij Melnyk an de Front! Dor kann he wiesen, to wat he sünst noch Moot hett.


30.4.22 ...Juun Optridd, Mr. Musk

Süh, de Oligarchen warrt bilütten jümmer füünscher: Ehr Winsten un Profite gaht in de Knee wegen de Sankschoonen, un de Krieg in de Ukraine flutscht ok nich so richtig. Al is en radelhaftige Sülvstmoord-Süük ünner ehr utbraken; dor sünd welk sachs al vun de Fahn gahn. Dat is doch de Momang, den Keil deper rintodrieven. Un wieldess Putin bloots de Spraak vun de Gewalt versteiht (as seggt warrt), verstaht de Oligarchen allerbest de Spraak vun't Geld. Juun Optridd, Mr. Musk: Köfft Se de Oligarchen Putin af! 40 Milliarden, 50 Milliarden, wenn sien Mob sik gegen Putin wendt un em utlevert! Denn kann dat fix gahn. Wat Beters hebbt se mit Ehr Penunzen noch nich daan. Leider wirklich nich.


21.4.22 ...40 Johr

40 Johr. Üm 40 Johr warrt wi trüchsmeten, in uns Jöögd ünner den Kolen Krieg, in de Welt vun de Blöcke. Wi dachen, wi harrn dat 21. Johrhunnert, man dat 20. Johrhunnert is noch nich vörbi un haalt uns in — en Undode, en Zombie vun Johrhunnert. De Rüstung warrt wedder uns Budgets freten, wi warrt wedder Kriegsangst in Düütschland hebben, un de Politik warrt as verklaamt in Lager erstarren, liek as de ganze Welt. De Globaliseern harr wohraftig ehr Nadelen, man nu seht wi, wat wi över all de Johren wunnen harrn. Man bloots langsam kapeer ik, dat ik nich kapeer — dat is surreal, as in den Murmeldeert-Film: Wi waakt op un dat is güstern. Bloots dat China nu keen Entwicklungsland mehr is, sünnern de niege grote Bedrauhn in'n Achtergrund — de niege Block in de Welt vun Blöcke.

O nee! Ik will uns niege, apen, na vörn utricht'e Welt trüch, de Welt vun't 21. Johrhunnert! De Welt, in de ik jung weer, is vörsintflutlich as Blie, de Welt vun vör dat Internet; avers de Welt, in de is as opwussen Fru öller un öller woor, is en kulturell explosive Welt, in de wi alltohoop sotoseggen jung weern, merrn in de Welt stunnen, veelsiedig informeert un aktiv — un nich an een vun ehr Ränner, verklaamt vör Bang.

De Krieg hett uns dorhen trüchsmeten, de ruge, konventionelle Militärgewalt. Dat schien uns soooo vun ehrgüstern bet dorhen, so lächerlich obsolet. Dor seet en Uul: Dat hett de Welt wedder ümdreiht, op den Kopp. De brutale ideoloogsche Eigensucht warrt ok "bi uns" wedder Ruum griepen: Grootbritannien warrt sachs Assange an de USA utlevern, den Mann, de de USA ehr Kriegsverbreken vör de Welt apenleggt hett, un wat för en "Westen" is dat, 'neem solk Lü verurdeelt warrt?! Un mit welkeen blödigen Finger will düsse "Westen" denn noch op Putins Kriegsverbreken wiesen?

Dor wiest sik bloots en betongriese Öödnis, överall. Ik will mien Leven trüch!


16.4.22 ...Webb warrt utmustert

Nu hett dat James Webb drapen. De Nasa-Baas, na den dat niege Weltruumteleskop nöömt is, dat wi hier leeftallig beobachten doot — de Minsch James Webb also weer en Kind vun sien Tied: He kunn Schwule nich af un hett ehr in de Nasa benadeligt. Nich good. Pick, dat se dat Teleskop na em nöömt hebbt — nu mööt se dat sachs ümdöpen. So as överall Straten ümnöömt un Denkmäler afbuut warrt. Man wokeen is ahn Sünde? Beter nix na en Minschen nömen! Wokeen weet t.B., woans Edwin Hubble to Schwule stünn? Fruuns woorn dormalen sowiso överall apen benadeligt, un Rassismus weer begäng. Wi all draagt Naams, ünner de jichenswenn mal Minschen unvullkamen weern orr sik sogor schüllig maakt hebbt. Klaar, een mutt nich de, vun de een weet, besünners exponeern orr ehren. Avers wi geevt de Nawelt en verkehrt Bild, wenn wi bloots de Künn vun Hillige achterlaat, en püük korrigeerte un klinisch reine Welt vun Menen un Benehmen. Un wokeen vun uns Hütige is qualifizeert, dat ok bloots en Parkbank na uns nöömt warrt? De Maatstääv an uns Hütige sünd heel streng: Vegetarismus, Toleranz na all Sieden, bloots nich de verkehrte Menen in jichenseen wichtigen Punkt, un SUV fohren dröffst ok nich. Wehe, wenn later rutkümmt, dat du in't 21. Johrhunnert noch Floogreisen maakt hest! Stantepe warrt dien Parkbank ümnöömt. — Och weet ji wat, ji överkorrekten Tugendbolde? Kleit mi doch. Nöömt bloots nix na mi, sünst warr ik juuch böse Överraschen bereiten. Ik fohr twoors keen SUV un fleeg ok nich, avers ik warr mi wat utdenken. Juun keimfreie Billigung will ik nich.


10.4.22 ...Bayerns Bad Bank

Markus Söder schütt mal wedder dwars: Fracking! Dat weer doch eentlich good, meent he, de USA harrn sik dormit meist to'n Gas-Sülvstversorger maakt! Dat schulln wi man namaken. Avers: Natüürlich liggt för Söder dat düütsche Fracking-Potenschaal nich in Bayern, woneem sien Wählers sitt, de keen Bock op Fracking hebbt; nee, för em sitt dat gröttste Fracking-Potenschaal in — Noorddüütschland! Heiliger Sankt Florian, verschon mein Haus, zünd andre an! In Noorddüütschland vermoodt Problem-Outsourcing-Experte Söder ja ok de mööglichen Atoommüll-Endlager — eentlich överall, bloots nich in Bayern. Mi dücht, wi Noorddüütsche un de ganze Rest vun'e Welt sünd för Bayern bloots sowat as de "Bad Bank" — de Müllhalde, 'neem allens Problematische aflaadt warrt. Na, dat schall he mal versöken!


6.4.22 ...Wissing un de Schiller

En allgemeen Temoplimit op Autobahnen geiht nich, meent Verkehrsminister Wissing (vun de, na raat mal!, FDP natüürlich) — denn: Dorför hebbt wi nich noog Schiller!! Ja, so! Orr — äh — Momang: Wenn de Gesettgever en Tempolimit vun, seggt wi mal, 120 km/h op Autobahnen as Gesett beslütt — denn bruukt dat doch keen Schiller?! Ik meen: In de Stadt, dor steiht doch ok nich all 100 m en Schild mit "50", sünnern dat weet een eenfach: In slaten Oortschapen is 50, Punkt, Sluss, Ende. Op Landsstraten, Bunds- un Kreisstraten gellt blangenbi 100 km/h als Limit — standardmäßig. Ahn Schiller. Un so kunn dat ok bi dat Tempolimit op Autobahnen gahn. Een Fedderstreek, mehr nich.

Dat "Argument" vun Wissing is also gor keen Argument. Avers dat sünd wi ja wennt — vun de FDP natüürlich.


5.4.22 ...Ready for Takeoff

Un wedder schickt Ludgerd Lüske en sülvst maakte Karikatur:


Bild: Ludgerd Lüske. Klick op to'n Vergröttern!

Wohraftig, Orban hett en galaktischen Sieg infohrt — begünstigt dör sien manipuleert Wahlrecht. Wenn em düsse mächtige Impuls nu wirklich achter'n Maand katapultiert, kann ik bloots eens wünschen: dat he dor blieven much!


18.3.22 ...Is he dat?

Düsse Fraag (süh Bild) schick mi Ludgerd Lüske:


Bild: Ludgerd Lüske. Klick op to'n Vergröttern!

Tje, dor bün ik nu ja ok överfraagt! Ik kenn avers Experten, Lüüd, de ut Idlib un Aleppo lebennig rutkamen sünd; un de seggt, optisch kannst dat överhaupt nich nau seggen, wat Putin dat is. Dat föhlst eerst, wenn di sien Bomben op'n Kopp fallt. Dat is so'n ganz sünnerlich Geföhl, dat Putin-Bombengeföhl, dat kannst nich verwesseln.

Also soooo nau wull ik gor nich weten, wat dat Putin is.


8.3.22 ...Weltfruunsdag för Mannslüüd

Hüüt is Weltfruunsdag. För de Rechte vun Fruuns to strieden is hüüt so nödig as jümmers, ok bi uns is noch veel to doon, un in mennig Länner löppt en harte Gegenslag gegen de Fruunsrechte — wi all weet üm Afghanistan (dat blangenbi vör en Hungersnoot steiht). Liekers will ik hüüt mal op de annere Siet vun de himmelschriegen Ungliekheit vun de Geslechter henwiesen: de Minnachten för dat Leven vun Mannslüüd. Kiekt an de Grenz na de Ukraine: wehrfähige Mannslüüd warrt nich röverlaten, se mööt ümkehren un kämpen. Ehr Leven riskeern. Dwangswies. Ok hüüt. As Johrdusende lang. Fruuns dorgegen dröfft ehr Leven in Sekerheit bringen. Över de Grenz. Is dat gerecht? Natüürlich nich. Nich mal, wenn een op henwiest, dat dat doch jümmers annere Mannslüüd sünd, de de Mannslüüd doodscheet. Nee. De Reddungsboote sünd för de Fruuns un Kinner, de Mannslüüd mööt ünnergahn. Un nich mal jammern dröfft se. Orr hebbt Se mal een Mann över düsse Tostänn klagen höört?

De Wöttel vun düsse "Arbeitsdelen" liggt natüürlich in de ünnerscheedliche Reprodukschoonsrate. En Fru kann in ehr Leven villicht 20 Kinner hebben. En Mann dorgegen Dusende. Dschingis Khan schall över 10.000 Kinner hatt hebben, Hinrich IV. vun Frankriek jümmerhen noch 6.000. Männer warrt also minner bruukt. Wenn in en Krieg all de wehrfähigen Mannslüüd vun en Volk doodblievt — also de Mannslüüd so twüschen 18 un 60 —, denn geevt de Fruuns de poor Jünglinge un Olen ünner sik rüm, dat langt, en niege Generaschoon to tügen, de natüürlich ehr Mudderspraak spreken warrt — Kultur un ethnische Identität, also dat Volk, sünd reddt. Wenn avers all de Fruuns twüschen 18 un 60 doodblievt, is dat Volk dood. Punkt. En uurole, zynische Logik — man passt de noch in uns Tied?!

In uns Tied, 'neem so en Szenario undenkbor is un ok Fruuns överall friewillig to de Wapen gaht, in de avers ok Mannslüüd sik üm Kinner un Familie kümmert — in uns Tied mutt en niege Logik her. De kann avers nich heten, dat all Börger*sche twüschen 18 un 60 to'n Kämpen dwungen warrt — dat ok Fruuns an de Grenz ümkehren mööt un bloots de Kinner röverlaten warrt. Nee, de Lösung för nu un de Tokumst mutt en Fredensordnung ween, in de ok dat Leven vun Mannslüüd en Weert hett, gliek mit den vun en Fruunsleven. Wi mööt för sorgen, dat nümsnich mehr doodschaten warrt. Bi de Reddungsboote sünd wi al so wied: Gifft noog för all. Nu bruukt wi noog Freden för all. De Weltfruunsdag dröff ok Weltfredensdag heten. Wenn de Mannsminschen dat nich fertigkriegt, warrt wi Fruuns dat tostann kriegen.


6.3.22 ...Swatt un Witt

In so en Tied as nu trennt sik de Sieden verdächtig klaar in Swatt un Witt, so klaar, dat dat tüüschen kann — tüüschen mutt. Oppers sünd op jeden Fall gode Minschen, de annern diabolisch, Grauzonen verswinnt. Jedeen Siet schall nu allens integreern. Uns Siet schall de Ukraine erlösen, indem dat wi ehr ganz opnehmt — in Nato un EU, un den ganzen Balkan noch dorto, denn de wackelt ja ok, sünnerlich Serbien, se wackelt Richt Putin, un bloots wenn wi ehr en echte Perspektive in de EU geevt, köönt wi ehr övertügen, indem dat wi den Geldhahn opdreiht natüürlich...

Un denn, wenn — wenn — sik jichenswenn allens wedder beruhigt, warrt sichtbor warrn, dat dat en Tüüschen weer, an de Realität vörbi. En EU, de düsse vun unbewältigte histoorsche Konflikte terreten, vun Korrupschoon trefreten Länner opnimmt, nimmt en döödlich Gift to sik un warrt dat nich lang överleven. En nieg Kerneuropa warrt sik denn rutbillen. Un de Länner, de op dat Putin-Ticket in de EU seilen wulln, hebbt denn wedder nix dorvun.

So köönt wi düssen Konflikt nich lösen. Al nu is de EU överdehnt. De Realität lett sik nich afschüddeln, nich övertünchen. Allerdings is dat de mehrsten Politikers klaar. Man wo faken hebbt se nich ut'n Momang rut wat gegen ehr beter Künn daan?


26.2.22 ...Arme Welt

Düsse anrögen, wohre, richtige Appell full mi in de Hannen ut en Blatt, dat sachs vör den Angriep op de Ukraine druckt woor. De blaage Faltzedel weer en Bilaag. Nu köönt se den so good as wegsmieten. Na klasse. Denn to den ganzen Schiet un Düvelskraam vun'n Krieg dorto — Dode, Ümstörten vun'e Regelordnung in'e Welt, Weerschapskollaps un wat nich allns — to all den Schiet dorto kümmt nu en grote niege Well vun Oprüsten överall in de Welt. "Wi mööt uns wehren könen" — düsse eene Lehr warrt jedereen dorut trecken, wat nu mit de Ukraine passeert. Ok de letzte Hungerleiderstaat warrt Wapen köpen as mall; wokeen kann, warrt in de Nato flüchten, un sogor Düütschland warrt sien Rumpelbundswehr opklaarn un amenn sogor dat Nato-2%-Teel erfüllen. Nau dat bruukt wi natüürlich mit de Klimakrise vör de Bost — dat Geld, dat för Wapen un annern Militärschrott verpulvert warrt, fehlt achtern un vörn bi den klimagerechten Ümbu vun de Welt. Denn dat is de wohre Krise, in de wi rinsliddert — un de wi slimmer maakt dör so'n Unsinn as Kriege. Dorför hebbt wi wirklich keen Tied!! Arme Welt.


22.2.22 ...Datsülvige Muster

Üm un bi 140 Fruuns per Johr warrt in Düütschland vun ehrn Mann orr Partner ümbröcht — faken wenn se gahn wüllt ut en Eh orr Partnerschap, de düssen Naam al lang nich mehr verdeent. Dat is jümmers datsülvige Muster: De Keerls kiekt op de Fru as ehr Egendom, ehrn Besitt, un hollt ehr in permanente Bang. Mannslüüd mit düsse Mentalität köönt dat nich utholln, dat "ehr" Fru ehr egen Weeg geiht — ok in ehr Gedankens köönt se dat nich utholln, veel minner in de Wirklichkeit. "Du kannst nich gahn, du höörst to mi", seggt se, un wenn de Fru doch geiht, denn flütt Bloot. "Se höör doch to mi!" is ehr "Argument", wenn de Fru denn dood dorliggt.

"Die Ukraine hat als selbstständiger Staat keine Existenzberechtigung", seggt Putin. "Die Ukraine ist untrennbar mit Russland verbunden..."


20.2.22 ...Wo geiht dat eentlich üm?

8 vun 42 Millionen Ukrainer sünd ethnische Russ*innen. Se leevt tomehrst in'n Oost vun't Lann. Un se föhlt sik angeevlich slimm ünnerdrückt, warrt vun de ukraiinsche Armee schikaneert un sogor bombardeert un sünd nu al op de Flucht na Russland, wieldat de ukraiinsche Armee angeevlich an'n Start is, in dat Donbass intomarschiern (en Rebett, dat al to de Ukraine höört). Wladimir Putin dreiht de Laag vun de doren Russ*innen dat Hart in't Lief üm, he kann bi Nacht nich mehr slapen un hett all sien Truppen an de Grenz opfohrn laten, dat sik de Ukraine ja nich truut, in ehr egen Staatsrebett intomarschiern! Un dor — ja, wat to doon? Seelenruhig en apentlichen Völkermoord an 8 Millionen egen Börgers begahn?

Nu fraagt sik de westliche Welt, gifft dat Krieg? Un se fraagt Putin, wat mutt passeern, dat he sien Truppen aftreckt? Ha, seggt Putin dor, mien Lü in de Oost-Ukraine, de mööt to ehr Recht kamen! Se mööt mehr Autonomie hebben un dröfft nich drangsaleert warrn! De Lü dor liedt, mi blöödt dat Hart för ehr! Süht dat keen?

Äh, nee, dat seggt Putin nich. Staats dat seggt he: 1. Blievt mi mit juun Nato vun't Lief! 2. Liberale Demokratien much ik ok nich direkt an mien Grenzen hebben, dat bringt mien Lü bloots op dumme Gedanken!

Huch? Wo geiht dat hier üm? Üm de armen russ'schen Lü in de Oost-Ukraine orr doch üm Putin sien Diktatoren-Komfortzone? Wenn Letzteres: Is dat nich en sünnerlich zynische Missbruuk vun de Oostukrainer as fadenschienig Feigenblatt? Nee, ehrder as Klopapeer, mit dat Putin sik den Diktatorenmoors wischt.


7.2.22 ...Överall nix as Gas

De Nordstream-Pipeline warrt to Unrecht slechtmaakt un schull drievens fertigmaakt warrn. Kann ween, dat se noch heel nütt ween kann — sünnerlich, wenn dat twüschen Russland un de Ukraine to'n Krieg kamen schull. Kiekt sik mal de Pipeline-Röhren vun binnen an! De sünd heel ruum, op düsse lütten rullen Sleden köönt masse Lü komodig dör de Röhren rulln ... t.B. ukrainische Elitesuldaten! Wenn Russland de Ukraine vörn to Kopp geiht, biet vun achtern de ukraiinschen Suldaten ehr in'n Moors — Suldaten, de stiekum dör de Pipeline kamen sünd un en Invasioon in Russland maakt! Tja, so'n Pipeline kann mehr transporteern as Gas. Dat Gas sülvst — de Atenluft — warrt för unse James-Bond-Jünger sachs en Problem, avers se kriegt Suerstofflaschen op'n Rüüch un de Sleden kriegt Elektromotoorn. Un wieldat düsse Afschrecken funscheneert, gifft dat keen Krieg. Hach, ik heff den Ukraine-Konflikt lööst! Ik denk sowiso, dat sik dat as Luftnummer entpuppt. Gas even.


3.2.22 ...Iesküll ut China

In Peking is dat gor nich richtig Winter, se mööt as verdull ut de Sneekanonen füern, dat dor överhaupt beten Snee liggenblifft. — Man ut Peking weiht en ieskole Hauch över de ganze Welt, de sik to en bizarres Rituaal dor versammelt. Dat is de Ieswind vun de Diktatuur, de ok hier in de "frie" Welt — de sik düssen Naam verdammt nocheens verdenen mutt! — seelenruhig na uns Medien, Levenswies, Frieheiten grippt. Se will uns bregenwaschen, so as se meist ganz China bregenwuschen hett. Man nich etwa, wieldat ehr dat wichtig is, wat wi vun ehr denkt; nich etwa, wieldat se geern wüllt, dat wi en gode Menen vun ehr hebbt. Nee. Bloots dör en Bregenwäsch köönt se uns hüüttodaags beherrschen. Dat heet toeerst: de frie Informaschoon afwörgen. Wenn wi ut China bloots noch schöne Narichten höört, maakt wi ehr keen Probleme dorbi, den Rest vun de Welt to övernehmen. Un billig is dat ok. — Schull dat so nich klappen; schull sik etwa Kritik mellen: denn kiek na Hongkong, denn weetst, dat de rohe Gewalt alltied praat is. So warrt dat ok in Europa gahn: Welk Länner sünd al so verschüllt bi China, dat se sik nich mehr Piep to seggen truut. Denn tuckt Peking bloots licht mit dat Metz, dat düsse Länner an de Kehl sitten hebbt. — De Iesenfuust treckt sik den Samthanschen an, un wi assisteert ehr dorbi. Olympia in Peking is ut jede möögliche Sicht en Katastrooph.


25.1.22 ...Ganze Johrhunnerte ahn Paapst

Soso, de Ex-Paapst Benedikt hett in den Pädophilieschandaal lagen un mutt dat nu togeven, un de Bülgen gaht hooch: He schall sien Paapstnaam opgeven, feddert de Lü — trüchtreden is he ja al, dat köönt se nich mehr feddern, sünd wöörn se dat doon. Een, de vun so en Schandaal överhaupt bloots anröögt woor, kann nienich de Bövelste Harder vun de kathoolsche Welt ween! — De Gedanke is wirklich düüster: Düsse papeernen Bürokraten, de dat Unheil bloots na den Bookstaven vun ehr Gesetten verwalten doot, stüürt de Systeme, de ehr anvertruut sünd, unweigerlich in Deepden vun Unheil, de se sülven nich mal begriepen köönt. — Aaavers: Wo vele, orr ehrder: wo wenige vun de Pääpste sünd wohraftig integre Minschen un rein an de Gräten west? Woneem sünd de Tieden bleven, as de Pääpste ehr Amt köfft hebbt — Bosse vun ehr egen groten Mafiamob weern — sik Paläste buut un de Taschen vullstoppt hebbt — Mätressen un Kinner to Dutzen harrn — Kriege föhrt hebbt...! So'n lütten Kinnervergewaltigerschandaal harrn de dormalen gor nich merkt, se stunnen wied över de Moraal för normale Lü, nüms kunn ehr wat. "Werte"?? Pah!! — Avers hüüt meet wi de Pääpste driest mit düsse menschliche Moraal. Na düssen Maatstaav wöörn de alltohoop trüchtreden un ehrn Paapstnaam opgeven möten. Wieldat se keen rechtmaten Seelenharders weern. Na denn: Wo veel "echte" Pääpste hett dat sachs geven? Wenn de apensichtlichen un nawiesten Schubberjacken ut de Paapstregister tilgt warrt, weer de Katholikenheit wiss över lange Tieden heel un deel paapstlos. Wat dat ehrder nütt orr schaadt hett orr eendoon is, kannst diskereern.

Man good, dat dat noch en gröttern Harder in'n Himmel gifft.


22.1.22 ...Wieldat wi Fruuns sünd

CDU/CSU op ehrn digitalen Parteidag. All de Mannslüüd snackt vun Fruunsfördern un en "weiblichern Vörstand", avers Quote? Nich doch, denn "de Fruuns wüllt vörankamen, wieldat se good sünd, un nich, wieldat se Fruuns sünd", heet dat unisono. Schallt wi ehr dat glöven, dat de Fruuns in de Union so dösig ehrpusselig sünd...? Dat Ergeevnis warrt ween, dat de Fruuns nerrn sitten bleevt, nich wieldat se slecht sünd, sünnern wieldat se Fruuns sünd. So is dat al dusend Johr west.

Wieldat wi Fruuns sünd, hebbt wi in sössdusend Johren Patriarchat Nadeel üm Nadeel hennehmen, Daalstuken üm Daalstuken düllen müsst. Nu schallt wi en Vördeel annehmen, "wieldat wi Fruuns sünd" un de nödige Qualifikaschoon hebbt. Nich mal bloots, wieldat wi Fruuns sünd! För Mannslüüd weer dat Argument "Wieldat ik de Mann bün!" jümmers noog. — Wokeen woneem henwill, kann bi de Wahl vun de Middel nich jümmers zimperlich ween.


17.1.22 ...Parlamentsnarren

En poor Lü mit Ambischoonen hebbt annerletzt feddert, de Bundsrepublik schull en Parlaments-Poetin anstelln. De Diskuschoon geiht hen un her. Buukpinselie un Oden an Herrscher vun betahlte Lohnschrievers hett dat ja in de Geschichte noog geven, steiht dat woll en Demokratie an?! Un wokeen schall dat nütten? De Mächtigen hebbt keen Fiechelee mehr nödig orr verdeent. Nee, Fiechelee schall dat ja ok nich ween, seggt annere. Man leest överhaupt noch jichenseen Poesie?

Mien Leevsten, de ja jümmers för en Vulldreper good is, sä: "Poetin hen orr her, man wat wi op jeden Fall bruukt, is en Hofnarr. Also de Regeern bruukt dat. De jumpt denn jümmers in'n Bundsdag rüm, sleit Kabolz, maakt Radau mit sien Schellen un snackt Dummtüüchs." — Dat mag woll ween, nu bi de Regeern de CSU nich mehr dorbi is. De fehlt sachs bannig, so vun'n Narrnstandpunkt. Avers is de Narr nich dorför dor, dat he de ganze Bande de Wohrheit seggt?

So sehn, bruukt wi en ganzes Parlament vull Narren.


30.12.21 ...Danish Dynamite

Mien Leevsten is en grote Fründ vun de Silvesterknallerie. Nu gifft dat ja keen to köpen. In Düütschland. In de Naverslänner woll. "Harrn wi dat man ehrder wüsst, wi harrn na Dänemark fohrn kunnt un Böller köpen", seggt he un schuuvt na: "Danish Dynamite!", denn he is ok en geniaalen Spröökklopper un Woortspeler. "Avers dat is doch wegen Corona", wend ik in. "Jüst wegen Corona mööt wi ballern!", bruust Klaus op. "De Böllerie schall doch de bösen Geister verschuuchen! Siet twee Silvester böllert wi nich, un siet twee Johr hebbt wi de Pandemie an'n Hals! Kapeert dat nüms? Wenn wi nich bald mal richtig böllert, warrt wi düssen bösen Geist nienich los!"

Düssen Aspekt hebbt Politik un Wetenschap apensichtlich betherto vernalässigt. Köönt wi villicht wirklich Corona wegböllern? In't Middelöller hebbt se deelwies versöcht, de Pest wegtodanzen. Hett man bloots mäßig klappt. Is dat en Versöök weert?


29.12.21 ...Spegelbiller

Wenn een weten will, wat dat "postfaktische Tiedöller" eentlich bedüüdt, muttst bloots na Russland kieken. Orr na China. Fakten staht samt un sünners to Disposischoon, sünnerlich de Fakten, de sik nich wehren köönt — t.B. Fakten ut de verleden Tied un de Geschichte. In China warrt nich bloots de Geschichte passlich ümschreven un Hongkong in Nullkommanix op links dreiht; se arbeidt nu ok doran, dat Corona op keen Fall in China opkamen is, un dat schall de ganze Welt glöven. In Russland sünd se nich so smödig; se versöökt sik doran un verbeedt een Vereen un Organisaschoon na'n annern. Nu is "Memorial" terslaan, de oprechte Vereen, de de Geschicht vun'n Totalitarismus oparbeiden wull. De russ'sche Regeern will, dat de russ'schen Börgers dorvun nix künnig kriegt — nix as wat de russ'sche Regeern will.

Ironie: Indem dat de Regeern so dat Düüster hollen will, erhellt se dat, meist as en Spegelbild. Wo de Stalinismus funscheneern dä, köönt de Russ*innen nu nich mehr vun Memorial lehren, avers doch an Memorial. 15 Johr Arbeitslager dorför, dat een de histoorsche Wohrheit seggt. Mehr bruukst gor nich weten. Man de Fakten sünd ja wehrlos, as de Minschen.

Wokeen uns de Geschichte un de Fakten wegnehmen will, will uns de Welt wegnehmen. Wokeen uns de Minschenrechte wegnehmen will, will uns an't Leven.


23.12.21 ...Lachen höllt sund

Een Aart, sik gegen de Pandemie to Wehr to setten, is, ehr nich ganz so eernst to nehmen. Nee, nich vunwegen de Vörsicht, de Maske un dat Boostern! Dat schallst allens maken. Man de Rest is faken noog lächerlich, sünnerlich de Verswörens-Theorien. De ünnerbelichtetsten Lü wüllt di wat vun Wetenschap & Weerschap vertelln, dat de Pharmaindustrie dat Virus konstrueert hett, ehrn Profit to boostern usw. Dat hebbt se allens "aus dem Netz". En Frünnin vertellt mi, se dröff ehrn lütten Neffen nich mehr besöken, sietdat se impft is, wieldat de Moder vun den Lütten övertüügt is, "de Impfung överdriggt sik op dat Kind". Also wenn de Impfung ansteken is un nich de Krankheit, denn hebbt wi wiss bald Herdenimmunität!

Opleevst wöör ik hier en Galerie vun de dösigsten Coronalegenden opmaken, man denn wöörn wi sachs bald överfleten... Dat Bild nerrn hett Ludgerd Lüske ut sien Beleven bistüert. Dösigkeit gifft't ok bi de Vörsichtigen!


Klick op to'n Vergröttern! Bild: Ludgerd Lüske


10.12.21 ...De Pröövsteen

Julian Assange mag en iedeln Fatzke un en Kotzbrocken ween; eendoon, wat een persöönlich vun em hollen deit. Man he hett swaarste Kreegsverbreken — nee, nich begahn, sünnern opdeckt; un de, de ehr begahn hebbt, wüllt em dorför för all Tied wegsparrn. (Orr hinrichten.) En Gericht in England hett nu urdeelt, dat Grootbritannien em an düsse Lü utlevern dröff. Hüüt, an'n internaschonalen Dag vun'e Minschenrechte. Proost Mahltied.

De Kriegsverbrekers wüllt, dat jedereen weet: Wenn du de Mächtigsten nich maken lettst, wat se wüllt, denn büst du so good as dood. Dat is desülvige Bott as vun de Drogenmafia. Dat is nedderste Schuuvlaad, unwördig, ünner all Diskuschoon. Keen Land, dat so en Bott sennen deit, dröff sik Demokratie nömen. De Ümgang mit Whistleblowern is de Pröövsteen överhaupt för jedeen Demokratie. Wenn China en Sportlerin hops nimmt, de sexuellen Missbruuk apentlich maakt, denn schriegt de ganze "westliche Wertegemeenschap" op; avers wenn een as Assange merrn in düsse "Wertegemeenschap" hops nahmen warrt, is dat Stillswiegen mit Hannen to griepen. — Lü un Kinners! Sünd wi al so wied rünner? In en normale Welt wöör Assange, naja, nich glieks den Fredensnobelpries kriegen (vörslaan hebbt se em), avers en Medaille. In en Welt, 'neem so een bestraaft warrt, orr in en Europa, dat so een utlevert, dor stimmt ganz gewaltig wat nich; un woneem so en Welt un so en Europa op tostüürt, dat much ik mi ungeern vörstelln. In so en Europa un so en Welt will ik nich leven.


5.12.21 ...mit — an — ahn

Och, wat nehmt de Skeptikers dat nau, wenn dat heet, een weer "an Corona" storven weer he nich villicht an ganz wat anners storven, bloots mit Corona? So dat he sowiso doodbleven weer, bloots beten later? Un de Doden wüllt se nich in de Coronastatistik sehn, nee!

Un nu loopt de Intensivstaschoonen vull, un en ganz anner Aart Dode liggt in de Liekenhall: Lü, de an ganz wat anners doodblievt, wieldat se keen frie Intensivbett mehr kriegt — wegen Corona un wegen de ganzen Impfmuffels, de dor liegt. Ik kenn een, de Kreevt hett un nich opreert warrn kann. Düsse Minschen starvt ganz ahn Corona, avers doch an Corona. Ik bün dorför, dat se mit in de Coronastatistik inrekent warrt.


26.11.21 ...Drama?

Mien Leevsten sitt in sien Home-Office op' Sofa vör sien Laptop un kommenteert dat Kiekschapp, dat blangenbi löppt. "Wo weer dat, wenn een bi so'n Querdenker-Demo in de Hüüs ümrüm luder Deertendokters mit Betäubensgewehre un Blaasrohre verstekt, un de scheet denn, wenn de Demo löppt, luder Impfdosen mit Piele op de Bekloppten? Wo de denn in Panik dörnanner lopen wöörn...!" Wieldess kiek ik in Wikipedia un lann hier. In de Grafik kannst sehn: 1962 harr Hamborg al liekso veel Inwahners as vundaag. Dormalen geev dat avers veel minner Hüüs un Wahnungen... Wahnungsnoot nöömt wi dat, wat vundag herrscht; man dat sünd ehrder de Anspröök. Wi wahnt nu op dat duppelte Flach, vergleken mit dormalen. "Bedarf" nöömt de Marketinglü dat geern, wenn se wat verköpen köönt. "De Bedarf is so groot!" — Naja, ik kann nich mitsnacken, ik heff Platz noog... Man mien Leevsten sien Öllern hebbt em un sien Broder in en Tweeun'nhalv-Stuven-Wahnung grootmaakt — veer Mann hooch op minner as 60 m². Allens ganz börgerlich dormalen. Un se weern froh. Betahlen kunn een dat dormalen noch. Se seten ja ok all tohoop...

Sünd wi Drama-Queens woorn?


7.11.21 ...Kann Demokratie Klimaschuul?

Dat weer 1995 op den evangeelschen Karkendag bi uns in Hamborg. Dor geev dat en Diskuschoon, dor güng dat natüürlich al lang üm Ümwelt- un Klimaschuul (wi hebbt dat ja nich nu eerst rutfunnen; nee, nu deit dat eerst en beten weh). Un dor weer een Forderung "Wir brauchen einen Öko-Hitler". Uiuiui, dach ik al dormalen. Dat weer provokant utdrückt, avers de Richt weer kloor: Konsequente Ümweltschuul kann mit'n Demokratie nix warrn, de brukt Diktatuur. Dormalen weer dat noch veel wohrer as nu, denn dormalen dä de Ümweltkrise noch nüms so recht weh; un eerst wenn dat wehdeit, feddert dat ja de Insicht ungemein (süh hüüt). Avers dormalen weer de Tied to'n Hanneln — al lang.

Un woso schall Ümweltschuul Diktatuur bruken? Wieldat dat 1. fix gahn mutt, 2. "unpopuläre Maßnahmen" nödig sünd. Un Demokratien sünd 1. laaaangsam in de Menensbillen un noch laaangsamer in de Ümsetten dör all de Instituschonen, 2. büst du op all Lü anwiest, ok op de Dösigen, de hengaht un FDP wählt, sodraad een ehr ehr Leevlingsspeeltüüch, den SUV, wegnehmen will. Dat is ja de Grund, woso jümmers wedder de Klimakonferenzen mallöört: Nüms vun de "Anföhrers vun de frie Welt" dor will sien/ehr Wählerklientel wehdoon. Btw. de Gruppen, de em/ehr stütt — dat gellt för de Diktatoren so as Putin un Xi, de ehr Oligarchenseilschaften nich an'n Karren fohrn köönt. Hach ja, wenn ik mi de Diktatuurn so ankiek, de sünd ok nich beter. Se kunnen avers! Se hebbt so veel minner Rücksichten to nehmen. Theoretisch tominnst is so en Staat beter in de Laag, fix to reageern. Leider is dat ok de eenzige Vördeel vun en Diktatuur.

Wi hebbt al veel to veel Tied verlaren. Un liekers geiht dat in uns Demokratie nich ahn en gesamtsellschapliche Diskuschoon, ahn tominnst en Grundkonsens. Un de duuuuert... jümmers wedder hett en Intressengrupp to Meckern un en poor Döösköpp wüllt un wüllt nich kapeern... Dat kann mi reinweg to'n Vertwieveln drieven. Kost uns Demokratie uns dat Klima? Orr kost uns dat Klima de Demokratie? Köönt wi bloots een dorvun retten? Welk wöörn Se nehmen?


29.10.21 ...Weltspordag: Wahlkampf insporen!

Hüüt is Weltspoordag. Un nochmaal — sachs nich to'n letzten Maal! — dröff ik op de FDP rümhacken! Ja, klaar, de ganze Partei kannst di sporen, avers dat meen ik (dütmaal) nich. Nee, se sünd hüüt mal de levige Bewies, dat dat reinweg totaal egaal is, wat een op Wahlplakate schrifft orr in'n Wahlkampf snackt. Düsse Plakate as in dat Bild hier hebbt se ja överall ophangt, un dor dach een, na, se wüllt keen Steen op'n annern laten. Puustekoken! Nu in de Regeernsverhanneln: FDP: Schuldenbremse blifft! Pendlerpauschale blifft! Stüern för de Rieken warrt nich ännert! De Scheer in de Sellschap schall wieder opgahn! De Porsche schall wieder brummen! Allens blifft, as dat is! — Dat weer lang vör de Wahl al künnig; ik heff en Ümfraag leest, 'neem se de Wähler*schen na ehrn Verännerungswillen fraagt harrn, un de FDP-Wähler*schen weern de letzten in de Statistik: 78% wulln, dat allens so blieven schull. Klaar: Dat sünd ja ok de Lü, de dat so richtig moi geiht. (Dat passt natüürlich to de Legende vun de Wetenschaplers, de jichenswoneem an en geheime Steed sitt un an en Wunder arbeidt, dat den Klimawannel besiegt un uns jedeen Ännern in uns Levenswies erspoort.)

Nu fraagst di, woans kann so en Partei mit so en Wählerschap Spood hebben, wenn se solk Plakate opstellt?! Lösung: De Plakate sünd egaal. De Wähler*schen weet sowiso, dat de FDP nix ännern will. De Wöör op de Plakate hebbt null Bott. Se sünd dorwegen ok nich direkt en Löög — dat weer al Fiechelee. Nee, se sünd bloots Blabla. Datsülvige gellt sachs sogor för de Wahlprogramme. De Klientel weet, för wokeen de FDP dor is, un de wüllt sik dat wiederhen good gahn laten. Dor warrt de FDP för sorgen. Punkt.

Na denn kannst den ganzen Wahlkampf ja ok insporen! Kost bloots Geld (Stüergeld!), maakt Dreck un nervt!


8.10.21 ...Quo vadis, Welt?

Stimmt de Indruck eentlich, dat de Minschheit sik mehr un mehr in Gruppen opdeelt, de för ehr egen Besitt un Vördeel kämpft? Un wenn so en Grupp wat vör sik bröcht hett, brickt in't Binnere de Korrupschoon ut, un jedeen Enkelte versöcht, so veel as mööglich an sik to rieten, egaal op welk Wies? Stimmt dat? Mennig wöörn seggen, nee, Minschen weern to alle Tieden so, bloots de Middel sünd vundaag raffineerter. Ik glööv avers doch, dat dat en allgemeen Ünnerbewusstes gifft, 'neem de Minschheit mit spöört, dat de Ressourcen knapper warrt, Land, Drinkwater, ja de Lucht to'n Aten. Ik meen, en borgen Panik lett sik spören — en Endtiedgeföhl; jedereen will noch in de Reddungsbööt, wenn dat Schipp Slagsied kriggt. Düsse Laag scheedt de Spreu vun'n Weten, se scheedt de, de all Hemmungen fallen laat, vun de, de versöökt, den Laden tosamentohollen un för dat Ganze wat to doon. Ik weet nau, op welk Sied ik nich stahn kann. Ik stah avers dochen op nau düsse Sied, ahn dat ik sülven wat do — dör uns Riekdom, dör uns Festung Europa, dör de EU-Länner, de Stickelwier an de Grenzen verleggt un uns Riekdom afschotten doot. Un is ja wohr: Wat schull denn passeern, wenn de halve Welt na Europa keem?! Ik mutt mi nich entscheiden, dat doot annere för mi. Objektiv beobachten un de Tatsaken in't Gesicht kieken — kann ik, mutt ik mehr doon? Orr wat anners? Wat?

Welk, de nau dat doot, riskeert al dormit ehr Leven. De Fredensnobelpriesen hebbt se verdeent.


5.10.21 ...Nix Nieges

Opleevst wöör een dor ja de Schullern över tucken un seggen: "Dat weet wi doch lang." Ik meen de "Pandora-Papers". Man wieldat düt Schullertucken an sik al so en Schandaal is, schriff ik doch wat doröver. Nix Nieges — woans denn? Dat gifft ja nix Nieges. Enthüllung üm Enthüllung bringt jümmers wedder datsülvige vördag: De Minsch is korrupt vun Grund op. Stopp! Düt is keen Schullertucken. De Blick in Pandora ehr Büss is en Blick en Blick in den Afgrund. Rüchgrat? Null. Sünnerlich de Politikers, de sik hooch un hillig den Kampf gegen den Stüerbedrugg verschreven harrn — sünnerlich de sünd anschienen ümfulln as de Flegen. Keen Wunner nich: Se kennt de Mechanismen. Un de to kennen — to sehn, wo licht dat is —, dat is apensichtlich Verlocken pur. Dor kannst denn nich wedderstahn.

De eenfachen Lü hebbt düsse Inblicke nich. Wi weet gor nich, woans sowat geiht, un hebbt ok nix bikant to bringen. Sünd du un ik bloots noch dorwegen sauber? Wöör uns dat ok passeern — miteens hebbt wi en Breefkassen op de Caymans orr en obskure Stiftung? Gifft dat denn gor keen Mööglichkeit, sik charakterlich gegen den diskreten Charme vun't grote Geld to wohren, to wappnen? Orr sünd wi all uns binnere Korrupschoon utlevert? Ik glööv dat nich, so depri laat ik mi nich maken. Sodraad en Minsch so orr so to Geld kümmt, wesselt he de Sieden un wählt nich bloots stantepe de FDP, sünnern bedrifft af nu bedingungslos den Klassenkampf gegen de Gemeenschap? Nee, nich all; avers vele. Geld is de Pröövsteen, an den sik de Charaktere scheden doot. Man bloots: Woans kriegt wi de betern Charaktere an de wichtigen Steden?


27.9.21 ...De tödliche Witz

De Witz, över den Armin Laschet in de Flootkatastrophe so lachen müss — weer dat de tödliche Witz? De al Kriege entscheiden dä? Lange Tied weer ik mi nich seker, un wirklich hebbt de Düütschen ja opletzt doch wedder orrig konservativ wählt — avers nu saagt de egen Lü an Laschets Stohl, un dat heet denn woll doch, dat dat mit em toenn is. Un wenn dat Lachen em bloots twee, dree Perzent kost hett: De Witz weer tödlich.

Wokeen em den vertellt hett, kriggt vun Scholz en Orden.


24.9.21 ...Afbidd an Andi

De Bundsregeern hett mehr as een Milliarde Euro för Berater utgeven. En groten Happen dorvun — 200 Millioonen — hett dat Verkehrsministerium utgeven. Oh! Nu schaam ik mi avers doch. De ganze Tied heff ik dacht, Andi Scheuer is de klassische Fall vun Dunning-Kruger-Effekt — he is so dumm, dat he dat gor nich merkt. Dat stimmt nich!! He hett all de Tied wüsst, dat he unfähig weer, un hett versöcht, sik för düer Geld Hülp intoköpen! Bloots dat de Hülp apenbor ok nix döcht hett.

Orr hebbt se em bloots bi een Saak beraden? Dat is em nämlich doch lückt: Geld na Bayern hentoschustern. Sachs weer dat woll ok sien eenzige echte Opgaav. Sien Chef Söder laavt em dorför apentlich. So wöör he dat ok maken, wenn he Kanzler orr sünstwat weer. — Good, dat wi all weet, woför de CSU-Lüüd ehr Posten in'n Bund bruukt.


22.9.21 ...Wat wählen? Platt wählen!

Wenn Se de Bregen küselt vun de velen wichtigen Themen, de sik in düsse Wahl entscheiden warrt — maakt Se doch de plattdüütsche Spraak to Ehr Entscheidenskriterium! De Bundsraat för Nedderdüütsch hett för düsse Wahl wedder Wahlpröövsteen formuleert un de Parteien vörleggt, un de hebbt dorto Stellung nahmen. Beid, de Pröövsteen un de Antern vun all Parteien, de in'n Bundsdag sitten doot (minus AfD), finnt Se hier. Natüürlich sünd das eerstmal bloots Standpünkt un Verspreken — dat dor reale Politik ut warrt, dorför mööt wi wiederhen Druck maken.

Un wenn dat allens to veel för Se is, wählt Se eenfach de*n Kandidat*in mit dat schöönste Lächeln.


19.9.21 ...Binärer Kampfstoff

De Komponenten vun en binären Kampfstoff sünd för sik alleen nich ganz so gefährlich. Hest ehr separat un enkelt, denn kannst ehr ahn veel Maleschen opbewohrn. Oppassen muttst natüürlich — un jümmers schöön isoleern! Denn wenn de twee tosamenkaamt, denn eerst warrt se to den hoochgefährlichen Stoff.

So en binäre Kampfstoff, villicht de gefährlichste op de Welt — so denkt de Taliban —, besteiht ut en Uterus un en Bregen. Natüürlich is de Uterus an sik al gefährlich; dorwegen muttst de Fruuns eerst in so'n Textilgefängnis un denn in't Huus insparrn. Avers wenn to den gefährlichen Uterus ok noch Bildung kümmt, is de höllische Mixtuur trecht — dat dröff op keen Fall passeern! Dorwegen hebbt se nu de Deerns de Dören vun de högern Scholen un Unis vör de Nees toslaan. Bloots ut Besorgnis üm de naschonale Sekerheit!! 'keen weet, wat allens passeern kann, wenn Fruuns anfangt to denken???? Dat se dat ABC lehrn dröfft, is al riskant noog.

Ja, Fruuns op de Welt, laat uns ehr Beförchten wohrmaken! Wi Fruuns, de Bildung hebbt, de Bescheed weet, de studeert hebbt — wi sünd de Taliban ehr slimmste Alpdroom, un nau dat wüllt wi ween! De afghaanschen Fruuns sünd al dorbi, sik sülvst to helpen: Se organiseert wedder "Kellerscholen" för Deerns, studeerte Fruuns geevt ehr Weten privaat wieder un riskeert dorbi Lief un Leven. Laat uns de afghaanschen Fruuns bistahn un de Taliban Füür ünner ehrn unreinlichen Moors maken, woneem dat geiht! De Regeern in uns demokraatsche Länner warrt wi keen Roh nich laten, dat se mit all legale Middeln Druck op de Tailban maakt. Wat hebbt se nich allens al "Terrorismus" orr "Terror" nöömt, wenn ehr dat nich passt hett! Fruunsfiendlichkeit is veel leger. Man Terror is dat nich, denn "Terror" heet "Angst", un wi Fruuns laat uns nich bang maken. So as de in Afghanistan. Wi mööt un warrt ehr helpen.


12.9.21 ...Wiehnachtspost! Nu!

Nu mal wat Schööns. (Deit ja bannig noot na de FDP.) Katja Renfert hett mi anstuppst, dat op de smucke Cap San Diego in'n Hamborger Haven en Weltrekordversöök an't Lopen is: Dat Schipp warrt 60 Johr, un dorto wüllt se bet Dezember nich 60, nich 6000, nee, 25000 Postkoorten an Bord schrieven un insmieten laten! Udo Lindenbarg hett dorför egens welk tekent. Allerdings: De Koorten gaht eerst in'n Dezember af, wenn för den Rekord de Klapp fallt! Katja meent, se schrifft dor eenfach ehr Wiehnachtspost — de Leevkaken sünd ja ok al in de Ladens, woso also nich?

Also, wenn Se in Hamborg orr ümto wahnt un an en schönen Dag an'n Haven wat Goods blangenbi doon wüllt, maakt Se Ehr Wiehnachtspost! De Erlöös vun de Akschoon deent dorto, dat schöne Museumsschipp to bewohren.

De Biller sünd vun Katja Renfert un laat sik per Klick vergröttern!

11.9.21 ...De Wetenschapspartei

Gewaltig op'n Senkel geiht mi siet Johr un Dag ja de FDP, un nu mehr as je. Ik kann un kann nich verstahn, woso dat düsse Partei noch gifft un woans jichtenseen ehr wählen kann. Ach so, ja, doch: Se weet ja as Eenzige den nauen Weg ut de Klimakries!

Klaar, dat wi de bruukt. Sachs is dat de Partei vun de Wetenschaplers un Ingenieure, nich? Tominnst halv vun ehr Liddmaten sünd wisslich in de Natuurwetenschap togang? Kiekt sik t.B. düssen Mann an. He maakt dat, he reddt jüst de Welt. Indem dat he op sien Tablet rümdaddelt. Bet deep in de Nacht. En Held.

Ach wat, dat is gor keen Ingenieur? In de ganze Partei kannst de Wetenschaplers mit de Lupe söken? Allens Juristen, Bedreevsweertschaplers un Stüerberaders? De mit knappe Noot noch de Grundrekenaarten beherrscht un nienich in en Labor stahn orr sik de Hannen dreckig maakt hebbt? Ja wat wüllt de denn? Ach so, afsahnen wüllt se. De Arbeit schallt de annern maken, de Döösköpp, de noch richtige Arbeit doot. De schallt sik gefälligst wat infalln laten ("Innovation"), dat dat Klima uns in Roh lett. Avers nich dat, wat se bet nu vörslaagt! Nee, dat wüllt wi allns nich!


FDP: Duums daal! Quelle: Campact-Klimacheck

Denn düsse Mann an't Tablet — he heet Chrischan Lindner — weet: "Wi mööt bi'n Klimaschuul unsen Wohlstand bewohren, sünst geiht dor nüms mit!" Klaar, dor hett he recht, nich? Fraagst de Lü an de Ahr: "Wüllt ji lever keen Floogreisen maken un weniger Fleesch eten, avers sünst blifft allens, as dat weer, ji blievt lebennig un juun Hüüs blievt heil — orr wüllt ji lever op nix verzichten, keen Klimaschuul, un de Ahr haugt denn allens twei un ji versuupt?" Klaar, dat se Opschoon 2 wählt harrn, nich? Se mööt doch ehrn Wohlstand verdeffendeern! Op Floogreisen verzichten — en Tomoden! Wi verzicht op nix — egaal, wat uns dat kost! Wi wüllt wiederhen in uns Porsches op de Autobahn raasen, uns benehmen as de Axt in'n Woold — dat nöömt welk Irrsinn, wi nöömt dat "Frieheit". Un dorför steiht de Mann dor links. De keen Ingenieur is, keen Innovation vörwiesen kann, bloots afsahnen will.


Denkt sik endlich wat ut! Wi wüllt wiederraasen!

Tja, so entscheidt wi uns all. Un de FDP — de Partei vun de Nich-Wetenschaplers un Afsahners — is uns Partei.


2.9.21 ...Nichwählers in't Parlament?

De niege Wahlomat is dor, un mien Leevsten hett em glieks dörspeelt. Rut keem, he schull man en lütte Exotenpartei mit Naam "Menschliche Welt" wählen — dat is anschienen sowat Tüdeligs mit Coronaleugnen, Yoga un sowiso bloots in 2 Wahlkrinken in BaWü. "Schiet!", schimpt he — nich to'n eersten Maal —, "ik kann nüms wählen, de döögt all nix! Ik bün en politische Minsch un Nichwähler. Wi Nichwählers mööt in't Parlament repräsenteert warrn!" He will, dat de Bundsdag üm so veel verlüttert warrt, as nich wählt. De Stöhl vun de Nichwählers schulln lerrig blieven, un wenn de Nichwählers "Redetied" hebbt, steiht even nüms an't Redepult — Stillswiegen. Avers: Ahn de Nichwählers — de ja nich dor sünd — köönt se mennig Saken nich maken, t.B. keen Verfatensännern, denn keen Tweedrüttelmehrheit kümmt mehr tostann. As'n Klotz wöörn se dor in't Parlament sitten, nee, fehlen. De Partein, so denkt mien Schatz, wöörn sik denn bannig in't Tüüchs leggen, dat mehr Minschen to Wahl gaht, dat de Nichwählers minimiert warrt. Un dat wöör denn de Demokratie gooddoon. Ha!, man dat dat Realität warrt, bruukt se toeerst en Verfatensännern in den betherigen Bundsdag. Un so dösig warrt se nich ween. Sik keen Klotz an't Been binnen. Dat is bloots minschlich. Even en "Minschliche Welt."


25.8.21 ...Wedder "nienich wedder"

So vele Enden, so vele niege Anfänge mit "Nienich wedder dröff dat passeern!" So veel Reue, so veel Insicht, so vele gode Vörsätt. Srebrenica, Ruanda, Kabul... De Welt — uns Welt, de westliche Welt, de opklaarte, demokraatsche — lett Unschüllige in'n Stich, lett ehr starven. Nienich wedder dröff dat passeern! All stimmt in. Un denn passeert dat wedder. So as en Speelsüchtige jümmers wedder sien Geld verspeelt, sien Familie un Frünnen verräät, sik in utsichtslose Lagen manövreert... Dat warrt sik in'n Kampf gegen den Klimawannel wedder wiesen. De Armen, Unschülligen warrt starven as de Flegen, un wi warrt seggen: "Nienich wedder wüllt wi de Wetenschap so taagnackig ignoreern! Nienich wedder so unklook hanneln!" Un denn warrt dat doch wedder passeern... Speelsüchtige köönt en Therapie maken, avers wokeen schall de ganze Minschheit therapeern?!

Wi Minschen sünd noch nich so wied. Uns Bregen is noch to primitiv; ünner en ganz dünne Schicht sitt de Aap. De Evoluschoon mutt noch veel doon an uns. Gott geev, dat wi ehr dorto Gelegenheit laat...


13.8.21 ...Bidd üm en Putsch orr Attentat

Woneem sünd eentlich uns skrupellose Weltmächt, wenn se maal bruukt warrt? Orr sünd se miteens skrupelhaftig worrn...?? Ik meen natüürlich de USA ut de 1960er un 1970er Johr, de keen Bedenken nich harrn, Staatschefs, de ehr nich in den Kraam passen dään, mit Gewalt op de Siet to bringen — sünnerlich in ehrn "Hinterhof" Middel- un Südamerika. Wokeen sik dor gegen de Interessen vun de USA stell, bleev nich lang an de Macht — schiet op "demokratisch gewählt" un so. Nu, un wo lang schall dat nu noch duern, bet de USA kapeert, dat se den Amazonas-Regenwoold bruukt, wieldat se sünst heel un deel in't Klimachaos verbrennt? Dat Klimaschuul ehr Interess is? Ja, ik snack natüürlich vun en Attentat op Bolsonaro! Manninnetünn, Amazonien hett weltwiede Bedüden, un he holzt dat af! Hitten, Füer, Tornados, Meeresspegelanstigg, Florida geiht ünnner — de ganze Schiet kann nich verhinnert warrn, wenn Bolsonaro blifft! USA, kapeert dat! Weltpolizei!! Wo töövt ji op?? — Ach, miteens Bedenken vunwegen Völkerrecht un so'n Gedööns? Schiet sik in de Büx? Wo dat mal üm dat Richtige geiht? Mit juuch is aver ok rein gor nix los! — China, ji hebbt dat doch lang kapeert, un ji hebbt noch veel minner Skrupel, ji geevt ja nich mal vör, en Demokratie to ween! Köönt ji nich in de Bresch jumpen? Jaja, ji hebbt Corona op de Welt loslaten, un Bolsonaro hett ok richtig Corona kregen; avers dat hett em nich ümbröcht, un ehrlich, düsse Methood is mi to indirekt un hett vele Nadelen för de ganze Welt. Mutt ik mi an Putin wennen? De warrt em glieks vergiften...

In'n Eernst, bi so'n weltwied Probleem sünd naschonale territoriale Tostännigkeiten vun güstern. Amazonien, de Welt ehr Lunge, mutt en Weltnatuurschuulrebett warrn, stantepe, un wokeen dor Schaden maakt, kriggt op de Finger. Egaal vun wokeen. De UNO is noch nich so wied un kümmt sachs nie so wied, also mutt dat een vun uns skrupellose Weltmächt maken. Ik bün sünst ganz för Völkerrecht, avers dat Klima is wichtiger. Merke: Existenz ist die erste aller Eigenschaften. Matthias Claudius.


11.8.21 ...Tschüß II

In München wüllt se nu de „Erich-Kästner-Straße“ ümnöömen, wieldat Erich Kästner sik nich alltied kloor gegen de Nazis stemmt hett. Nu kannst natüürlich seggen, solk Lü döögt denn nich as Vörbild, wi köönt uns Straten beter Naams geven. Okay. Man de Bott is för mi en anner: Uns kunn dat natüürlich nich passeern. Wi sünd unfehlbor. Nienich weern wi in de dormalen Tied den ringsten Millimeter vun den hüüt bekannten Tugendpadd afwiekt; un al gor nich weern wi op de Nazis rinfulln. Wi doch nich! Dorwegen hebbt wi de moraalsche Hoheit, düsse Lü ut de Apentlichkeit uttotilgen. Tschüß. — De Wohrheit is avers: Nich een ünner dusend vun uns Hütige wöör dat henkriegen, sik so as Kästner to behaupten in en Diktatur as dormals. — So'n Hanneln weegt uns also in falsche Sülvstsekerheit.

Dat wi de histoorschen Persöönlichkeiten un ok uns hütige Politikers nich den ringsten Fehler naseht, is blangenbi nich bloots sülvstgerecht, sünnern ok heel schädlich. Dorvun kümmt doch düt ganze Wischiwaschi-Sabbeln un -Hanneln orr ok Nich-Hanneln, wat uns bi Politikers jümmers so argert!

Wat kümmt noch? Vun wo veel histoorsche Lü warrt noch rutkamen, dat se uns hütige Maatstääv nich genöögt, dat se keen Feministen, Antirassisten un Veganers weern, dat se jichenswenn wat Dummes seggt orr ok bloots verkehrt dacht hebbt? Mal 'n beten nabuddeln bi Johann Georg Mönckeberg, na den de Hamborger "Mö" (noch) nöömt is? Wiss kümmt wat rut, wat hüüt nich politisch korrekt is! Un denn weg mit den Stratennaam! — Kunnst nu ok seggen: Nöömt wi doch de Straten na de unbekannten Lü! Fruuns hebbt sowiso lang in'n Schadden stahn! Wat is mit de "Straße der unbekannten Marschbäuerin" orr "Straße der einfachen Krankenpflegerin"? — Ha! Glöövt ji denn, de eenfachen Lü weern politisch korrekt west? Glöövt ji in'n Eernst, de Marschbuersfru ut fröher Johrhunnerte weer Antirassistin un harr nienich etwa PoCs mit dat N-Woort orr Sinti un Roma mit dat Z-Woort betekenet? Nee. De eenfachen Lü weern so rassistisch as ehr Tied — un se sünd ok op de Nazis rinfulln.

Nee, nee. Dat gifft nich noog Reinheit, Moral un Hilligkeit in de Welt för all uns Straten! Blifft bloots eens: Wi mööt de Straten dörnummereern, as wi dat mit de Feernstraten un Autobahnen ja ok al maakt. In de USA klappt dat doch ok good, de nummereert ehr Straten ok in de Städer. Villicht heet de "Mö" denn bald "5. Avenue"?


21.7.21 ...Tschüß!

Milliardäre fleegt in'n Weltruum. Mit Maschinen, de Unmassen vun Drievhuusgase un Dreck utstött — Milliardäre scheert dat nich, se sünd afkoppelt vun de Wirklichkeit. Se buut sik Raketen in Penisfoorm — Reesendödels, de afsolute Pubertätsdroom. Se kennt keen Grenzen vun Anstand orr Gesetten. De Ruumfohrtüüg un dat Know-how vun de Fachlüüd is natüürlich vun Stüergeller betahlt. Ach, denkt Se nich? Bezos hett dat sülven betahlt? Avers dat Geld höört doch nich em to — dat hett he vun uns Stüertahlers in alle Welt stahlen. Dat sünd unbetahlte Stüergeller. Un för düssen verbrekerischen Schiet wüllt se ok noch bewunnert warrn. Un de Medien liegt ehr to Föten. Lang heff ik nix Obszöners mehr sehn. Ik wünsch bloots: Wenn se partu in't All wüllt, schallt se glieks dorblieven! Hier vermisst juuch keen!


18.7.21 ...Lütte Mann ganz groot

Jungejunge, Wahlkampf is je woll Krieg, un wat in'n Krieg as Eerst an glöven mutt, is ja bekanntlich de Wohrheit. Man ok hier schiedt sik kloor de Profis vun de Anfängers. En Profi is t.B. Armin Laschet — lütt vun Statuur, avers in Hüchelee een vun de ganz Groten. För dat, wat he sik al nu in de aktuelle Flootkatastrooph tosamenlagen hett, wöör Annalena Baerbock Johren bruken, un Robert Habeck wöör dat villicht nienich henkriegen. Sien blamablen Utsprook "Klimaschuul warrt bloots funscheneern, wenn he nich an unsen Wohlstand kratzt" will Laschet nu nienich seggt hebben; dorbi glööv ik nich mal, wat he kapeert, wo idiootsch de Snack is — as wöörn wi dat Klima en Bonbon schenken, un dat mutt uns dankbor ween! —, sünnern bloots, dat de nich ankümmt. Tominnst is he in gode Stimmung, entschülligt sik avers, as he merkt, dat kümmt nich an. À propos ankamen: In de Krisenregionen is he ok nienich ankamen, dat Krisenmanagement in de Nootrebetten drängt he dorhen, woneem "Bild" em best aflichten kann. Avers: "Die Lage ist zu ernst, um damit Bilder für den Wahlkampf zu machen." O-Toon Laschet. Manninnetünn, dor kannst lehren, wat Hüücheln heet!

Leider sünd mehr Politikers an Ehrlichkeit verreckt as an Lögen, wat ja ok masse utseggt över de Aart vun Politik, de wi hebbt. Dat wöör sik lohnen, dor mal en Statistik to föhren.


16.7.21 ...Klimawannel is coming home

Wat, Klimadode? In Bangladesh, oder? Dat kennt een doch. — Nee, hier bi uns. — Kann nich angahn! Ehrder in Südaafrika, 'neem dat gor nich mehr regent un de Lü eenfach verhungert? — Nee, hier bi uns.

Ja, so föhlt sik dat an. De Klimawannel kümmt opletzt ok dor an, 'neem he veruursaakt woor. In de Industriestaaten. Natüürlich föhlt sik dat nich nau so an as in Bangladesh, denn wi hebbt ja en THW un en Füerwehr un Sükenhüüs un Helikopter un Kamerateams; de in Bangladesh versuupt eenfach so. Geld maakt en Ünnerscheed. Man wenn de Klimawannel allens unberekenbor maakt, kannst ok keen Geld mehr verdenen. Dorwegen sitt de Weerschap un de Rieken dütmaal mit in't Boot; se köönt sik nich 100% afsetten un sik mit Geld ehr Sekerheit vör all Unbill köpen. De Unbill dreept ok dat Geld. Dorwegen — un leider bloots dorwegen — warrt dat, denk ik, doch noch en eernste un gemeensame Anstrengen to'n Klimaschuul geven. För uns kann dat graad noch langen. För Südaafrika nich.


4.7.21 ..."To'n Afscheed"

Dat is hitt. Ik müss bi de Post töven. An en Koortenstänner sehg ik solk 3-D-Koorten utstellt, Koorten mit stückerwat Schichten, de een opfolen kann. Geev düt un dat — Bortsdagstorten, Bottervagels, Kamele — un en Koort, bi de ik dach: Wo zynisch is dat denn?!


Klick op to'n Vergröttern!

In de Antarktis staht de Pinguine (sünd sachs Kaiserpinguine) un kiekt trurig den eersten vun ehr Kanuten na, de sien Kraam packt hett un de ole Heimat verlaten mutt, wieldat de ganze Kraam an't Smölten is. "To'n Afscheed" steiht dorünner, un bavenöver "De besten Wünsch för de Tokumst". As harrn de Pinguine en Tokumst, wenn de Antarktis ok noch afsmölt? 'n köhlere Steed warrt se je woll nich finnen... Tje, un de ganze Koort hett rein nixnich mit den Klimawannel to doon! Dor hebbt de Makers gor nich an dacht. Bloots ik.

Na, wünscht wi de Antarktis mal dat Beste för de Tokumst! Nich ganz unegennütt: Sünst stiggt hier de Waterpegel gewaltig...


15.6.21 ...Football över Lieken

Dat de Football munter un ünner Fanfarenkläng över Lieken geiht, weet wi ja. Wenn ik alleen dat vulle Stadion in Budapest seh, wo veel Corona-Infekschonen dorbi tostann kaamt! Op't best mit de fiese indische Delta-Mutaschoon... Dat de däänsche Footballer Eriksen meist op den Platz bleven is, dor dröfft wi uns al mol an wennen: In Katar warrt dat sachs Standard ween, dat de Lü ümfallt. Ik meen natüürlich de Footballspelers, nich de namenlosen Slaavenarbeiters, de de Stadien hoochtreckt. De fallt al lang üm, man op de richt sik sowiso keen Kameras... Ja, dat faire Speel!


13.6.21 ...Twee Maatstääv

"Wenn du nich wullt, dat wat bekannt warrt, denn do dat nich." So hett mal een vun de Google-Grünners de Laag in de digitale Sellschap beschreven, 'neem överall en Handy knipst un dat Internet nixnich vergeten deit. Jedeen Fehltridd, jedeen Blamaasch slöppt bloots — un kümmt mit full power wedder hooch, wenn du wat warrn wullt — womööglich noch as Fru. So is dat ok Annalena Baerbock gahn, de Kanzlersch warrn will. Sülven schuld. Dor harr se mit reken müsst.

Liekers stött dat mennig Minschen op, wat de Maatstääv doch bannig ünnerscheedlich sünd, de wi an de Politikers leggen doot. Över welk brekt wi den Staav wegen wat, wat uns sünst gor nich kümmert. Ik meen, ik weet, woso:
Wi brekt den Staav över en Politiker*sch, wenn de uns enttäuschen deit. Un dat deit se, wenn se dat, wat wi vun ehr verwacht, nich levert. Wenn also de Lü vun de "christlichen Partein" sik mit Lobbyisten-Nevenjobs un Korrupschoon de Taschen vullstoppt, mit Diktatuurn leeväugelt un mit Tähn un Klauen gegen Transparenzregeln fecht — denn sünd wi nich enttäuscht, denn so kennt wi ehr ja. Dat is bi de ganz normaal, dat verwacht wi vun ehr. Dorvun lett sik keen Unioonswähler*sch afschrecken, en FDP-Wähler*sch al lang nich. Wenn avers Annalena Baerbock ehr Wiehnachtsgeld nich angifft un en Vereensliddmatenschap in'n Levensloop verdaddelt — au weia! Enttäuschung! Dat kost Wählerstimmen.

Egentlich is dat meist en Kompliment, wenn so'n Maatstaav an een leggt warrt, nich?


28.5.21 ...Kooperaschoon?

"Kooperation statt Verbote!" Wokeen feddert dat? Villicht de Bundsverband vun de Drogendealers mit Betoog op Kokain un Heroin? Orr de Raser-Lobby vunwegen Geswindigkeitsbegrenzen un Blitzer? De Bundsverband vun de Pädophilen mit Betoog op Kinnerpornografie? Ach nee, dat is de Agrarlobby mit Betoog op Glyphosat un Ackergifte. Dat muttst di eerstmal truun. Dor warrt wat verbaden, ut goden Grund, un du fedderst den Gesettgever op, lever dorbi mittodoon — to koopereern! Natüürlich mutt dat för de Buernfamilien anner Lösungen geven, avers wat nich geiht, geiht eenfach nich. De Ökosysteme sünd an ehr Grenzen. Dat Krimmeltüüg verswinnt. Stopp is anseggt!

Ach doch nich. De Union hett wedder mal den Lobbydruck nageven, hett wedder mal för sorgt, dat de Natuurschuul na achtern schaven warrt. Na denn köönt wi ja bald verwachten, dat ok Kokain, Kinnerpornos un Tempo 180 in't Wahnrebett verlöövt warrt, ja dat de Staat "koopereert", also mitdeit, ja?

Se stellt gröne Krüüzen op an'e Feldränner. Faken denk ik, dat is wohrer, as uns leev is. Dat Gröne, de Natuur starvt, blifft op de Streck, un opletzt ok de Buernfamilien.


25.5.21 ...Schändlich

Roman Protassewitsch, en Oppositionelle ut Lukaschenkos Wittrussland, na en spraaklos maken Fleegtüüch-Kidnapping gistern ünner fadenscheinigste Vörwänn dör Lukaschenkos Schergen in Haft un Folter smeten.

Alexei Nawalny, na en Moordversöök, den he överleevt hett, kuum dat he in sien Heimatland wedder ankümmt, in't Straaflager smeten ünner Anklagen, de so dünn sünd, dat se en Verhöhnen gliekkaamt.

Maria Kolesnikowa, de tapfere, lachen wittrussische Oppositionelle — jümmers noch in Haft verswunnen. Un dusende annere Naams kunn een nömen. Wenn wi ehr kennen dään.

Schändlich! 'keen dorbi nich dat Bloot in de Adern kaakt, de hett keen Ingedööm.

Äh — Momang: Weer dor nich noch wat?

Edward Snowden, as Hoochverräter söcht un siet acht Johr op de Flucht vör de Doodsstraaf in de USA, wieldat he millioonenfache Daten-Rechtsbröök dör de USA künnig möök. Sien Flucht na Ecuador enn in Moskau, wieldat de USA eenfach sien Pass för ungüllig verklaart hebbt (in Düütschland weer dat illegal). Russland geev em Asyl, nu sitt he dor fast. Wat wöör wull passeern, wenn he in en Fleegtüüch över US-amerikaanschen Luftruum flöög...?

Julian Assange, in de USA "Staatsfiend", wieldat he slimmste Kriegsverbreken apentlich dokumenteert hett. In de ecuadoriaansche Bottschap in London ünnerkrapen un dor verleden Johr rechtswidrig vun de ingelschen Behörden ruthaalt, sitt in Enkelthaft (wat as Folter gellt). Wenn he an de USA utlevert warrt, drauht de Doodsstraaf.

Sien Informantin Chelsea Manning, to 35 Johr Kaschott afurdeelt, op Gnaad ut'n Knast kamen.

Ok hier kunnst noch poor Naams nömen.

Woans is dat noch? Dat Maat, dat wi anleggt, mit dat schallt wi meten warrn.

All düsse Lü — all! — hebbt Frieheit un Leven insett för en gerechte Zivilgesellschap. Wi — de Minschen weltwied, de Zivilgesellschap — sünd jüm wat schüllig.

Versluut wi nich de Ogen! Hannelt wi gegen dat Unrecht — ok bi uns.


20.5.21 ...Nienich gliekgüllig!

Nu geev dat hüüt de grote Kundgeven "Solidarität mit Israel — gegen jeden Antisemitismus", 'neem ok all de Politikers snackt hebbt. In den Titel vun de Veranstalten stekt dat ganze Dilemma un de ganze Hülplosigkeit. Natüürlich mööt wi jeden Antisemitismus afwehren, un natüürlich bruukt de jüüdschen Minschen ehren Staat. Avers "Solidarität mit Israel" kannst ok so lesen, dat du dorachter stahn schasst, wenn Israel araavsche Minschen systematisch un gewaltsam ut dat völkerrechtswidrig besette Oost-Jerusalem verdrifft (womit de aktuelle Aggewars anfungen hett). Dat is Unrecht un warrt ok nich Recht dordör, dat Hamas ok Unrecht deit. Dat is so fataal apensichtlich, so sünnenklaar, dormit kannst eenfach keen Solidarität infeddern — gegen düsse Fakten hest verlaren Spill vun Anfang. Ofschoonst (orr wieldat?) dat so is, koppelt se dat mit de richtige, wichtige Opfeddern "Gegen jeden Antisemitismus". Wenn du de Ogen nich gegen de Fakten verslüttst, büst du also Antisemit. Dat speelt dat unlautere Spill vun de israeelsche Regeern, de allens Jüüdsche op de Welt na dat Prinzip "Wokeen gegen uns is, is Antisemit" för sik in Geiselhaft nimmt. Mutt dat denn ween?! Kunn de Demo nich "Levensrecht för Israel — gegen jeden Antisemitismus" heten? Mit den Antirassismus den Deckel op de Israelkritik to hollen, dat is unwördig, hülplos un warrt op Duer nich goodgahn. De grote Gefohr dorbi is, dat de Lü na un na gliekgüllig gegen den Vörwurf "Du büst Antisemit!" warrt.

Dat schall un dröff avers nienich gliekgüllig ween.


15.5.21 ...Al wedder salomoonsch!

Wenn een in't Web Formulare utfüllt (natüürlich bloots för'n goden Zweck), kannst ja ünnerscheedlich Aarten wieswarrn, na kettelige Daten to fragen. Annerletzt harr ik al op en salomoonsche Anreed henwiest; un nu bün ik op en schöne Aart stött, dat Öller aftofragen. "70 und älter"? Nee: "70 und weiser"! Dor beduert een dat doch meist, düsse Kategorie noch nich anklicken to könen! Un wenn een denn 80, 90 un wieser warrt, kümmt een automaatsch bi Salomo sien Wiesheit an! Un lett sik solk charmante Beteknen infalln.

In dat Land, 'neem Salomo sülvst leevt hett, fehlt Wiesheit ja opstunns eklatant.


13.5.21 ...Vörsmack

In't Hillige Land raast ja bekanntlich twee Töög opnanner to, un wat wi nu seht, is bloots en Vörsmack op dat, wat dor in de neegsten Johrteihnten losween warrt. De Töög sünd de kinnerrieken Bevölkernsandele — de araavschen Lü un de Orthodoxen op de jüüdsche Siet. Vun de gemäßigt denken Israelis kriggt ja nüms so vele Göörn; dat doot ja bloots de Afdreihten, un na un na warrt de de Mehrheit warrn... De araavschen Minschen warrt ok mehr, dat Land un de Ressourcen avers nich... Wi all weet: Dor kann keen Religioon gegenan. In all hillige Böker steiht: Weest nett to'nanner! Bringt nüms üm! — Dat is in so'n Laag allens gegen den Wind spuckt. Wi weet, wo dat utgeiht. Lynchjustiz op de Straten? Gewöhnt sik al mal an. Un freit sik, dat in Düütschland de Bevölkern nich wasst. Överöllern Sellschapen sünd freedlich. De Pleegnootstand is dorgegen dat lüttere Problem.


30.4.21 ...Coronablöden

"Nehmt Se bitte en Inkoopswagen!", seggt de Gorilla an den Ingang vun'n Supermarkt to de ole Daam.
"Aver —!" De ole Daam wiest spraaklos op ehrn Rullator. "Dor heff ik doch mien Tüüchs binn! Un dor" — se wiest op den inbuuten Korv — "dor do ik ok de Woren rin!"
"Nütt nix", seggt de Gorilla. "Bloots dör de Wogens köönt wi de Kunnentall begrenzen. Se mööt en Wogen nehmen. — Ik do doch ok bloots mien Job."
"Avers ik mutt mi doch opstütten! Woans schall ik denn dor en Wogen schuven...?" De ole Daam weent meist.

Bloots en lütte Deel vun den Blöödsinn, de mit Corona blöht...


19.4.21 ...Testosteron-Totalschaden

Nich dat dat schaad üm ehr weer — man wenn de testosteronvergift'ten Egos mit de CDU fertig sünd, denn is se sachs wedder so rünner as dormalen na Kohl sien Spendenaffäär. En Schutthupen. Dat is, wat Testosteron deit.

Un wokeen röppt een denn, üm den Kraam wedder ut'n Düüstern to rieten?

Ach ja — en Fru...


14.4.21 ...Nu al Nostalgie

Över Merkels Politik kannst seggen, wat du wullt, ik stah dor ok nich achter. Man ik harr al lang prophezeit: Wenn Merkel mal nich mehr Kanzlersch is un dor wedder so en bosttrummeln Gorilla sitt, so en Macht-Macho — denn warrt wi uns noch na Merkel ehr uneitle, nüchtern sachliche Aart trüchsehnen.

Ik harr unrecht. Dat is al nu so wiet. Un destruktiv as Godzilla gegen King Kong — nu al! Kiekt sik de Unions-Kandidaten-Slacht an. Trüch in de Steentied!, is dat Motto. Dat Zentraalogran vun de bosttrummeln Gorillas, "Bild", verkünnt op ehrn Titel groot: "Machtkampf um Deutschland!" Tüdelkraam. Üm Düütschland geiht dat to allerletzt. "Machtkampf ums Ego", dat wöör passen. Woans schallt solk Ego-Süchtige jemalen vernünftige Entscheiden drepen? "Wosaken stah ik dor? Lett mi dat good utsehn? Wat seggt de Ümfragen?", dat is sünnerlich in Söder sien Bregen de eenzige Melodie. Woneem schall uns dat henföhrn? Direkt Richt Trump? Un bün ik nu fällig? Süh nerrn...


13.4.21 ...Gröten vun Erdogan

Kiekt sik mal den siet 3.4.21 frisch överhaalten Paragrafen 188 ut't Strafgesettbook an. Ik kann ja verstahn, dat mennig Politikers sik nich mehr bepöbeln laten wüllt — man dree Johr Frieheitsstraaf, wenn ik över en Politiker wat seggen do, wat em op'n Slips peddt un wo he vun denkt, dat kunn em in de Supp spien bi sien Vörhebben — seggt wi mal, de Politiker heet Gauland orr Chrupalla — kaam ik denn in't Kaschott? För dree Johr? Pardon, wat orr wokeen warrt hier schuult...? —— Midücht, dat kunn so ok vun Erdogan stammen.


10.4.21 ...Een Bidd

Dör ehr Bummeligkeit nehmt de Lännerchefs glatt en poor hunnert — orr dusend — Dode extra in Koop. Un de UEFA besteiht op: De Football-EM, Start 11.Juni, schall mit Tokiekers in de Stadien ween!

Na good. Kann ja ween, dat de Ümfraagweerten un de Stimmung in't Stadion so veel Minschenleven weert sünd.

Een Bidd heff ik bloots: Kunnen se de Naams un Adressen vun de, de starven dröfft, glieks mitlevern?


25.3.21 ...Billerradel

Hallo Lü, raadt Se mal, wat düt hier is:

a) De kathoolsche Geistlichkeit bi den Versöök, siet 2000 Johr de Sexualität vun ehr Lü to kunnerleern, sik sülven avers allens to verlöven, wo ehr de Sinn na steiht

b) De Ministerpräsident*schen-Kunferenz bi't Utprobeern vun Lockdown-Lockerungen

c) De Mallorca-Urlaubers in't Fleegtüüch trüch na Düütschland bi't Verdelen vun de brasiliaansche Virusmutatioon

Un düt is:

d) En kathoolsches Kind, dat mit een vun de notorischen Pädophilister alleen is

e) De bövelste Finanzverantwoortliche vun de düütschen Katholen bi't Lesen vun de Karkenuttridds-Statistik

f) Angela Merkel bi Ereignis b)

g) Angela Merkel bi Ereignis c)

h) Se sülvst, wenn de brasiliaansche Mutatioon hier ankamen is.

Keen Bang, Se köönt nich verleren. Tominnst nich düt Quiz. Bloots Ehr Leven.


14.3.21 ...De unsichtbore Drütte

Twee Unioonsafordnete hebbt in'n Sack hauen müsst, wieldat se sik an de Pandemie en güllen Nees hebbt verdenen wüllt. Wat mi wunnert, is, dat sik noch een doröver wunnert. Dat is doch en ole Hoot, dat de Unioonschristen op heel goden Foot mit Gott Mammon staht — se kriegt an'n mehrsten Spenden netto, an'n mehrsten Spenden vun Firmen un Interessenverbänn — wat al nehgbi de Korrupschoon steiht — un maakt den mehrsten Mammon mit Nevenjobs. Is doch woll klaar, dat düsse Lü sik so'n lukrative Pandemie nich dör de Lappen gahn laat?! Un nu hebbt se all — jedereen för sik — en "Ehrenerklärung" ünnerschreven. Steiht bloots in, dat se nich riek dör de Süük warrn wulln; de ganze anner Filz, de deit ehr "Ehr" keen Afbrook. — Solang dat so blifft, sünd düsse Lü slicht unwählbor.

Man dor wull ik ja gor nich över snacken. Kiek sik eins doch mal de Maskenaffären wat nauer an. Vermittlungsprovischoon hebbt se kregen — se hebbt also twüschen en Ver- und en Inköper vermiddelt. De Provischoon bi Nüßlein (CSU) hett 660.000 € inbröcht, de bi Löbel (CDU) noch 250.000 €. Dat heet nu avers nich, dat de Masken bloots üm so veel Euro to düür weern; de egentliche Winst is bi den Verköper. Denn welk Verköper wöör 600.000 Euro Provischoon dorför betahlen, dat he sien Masken to'n normalen Marktpries afsetten dröff?! To'n Marktpries kann he dat ja överall loswarrn. Nee, he betahlt dorför, dat em een en Dummen vermiddelt, de irrwitzige Priesen för den Kraam to betahlen redig is. Kannst di locker denken, dat för den Verköper dor noch en Millioon mehr över den realen Weert vun de Masken rutkamen is. De Verköper is also en Mafia, hoochkriminell. Un de Dumme sünd wi, de Stüertahler*schen. De hoochanstännigen, goodbörgerlichen, Krawatten-dragen Unioonsafordneten hebbt ganz eenfach de Mafia toarbeidt, indem dat se uns — ehrn Souverän — de Mafia in'n Rachen smeten hebbt. Sachs hett dor noch een bi de Ämter mitdaan, de de Masken köfft hebbt; wenn de de Marktpriesen kennt un wüsst hett, wat dor leep, denn hett he/se sachs ok noch Bestechungsgeld kregen. Düsse Minsch un de ach so ehrenwerten "Vermiddlers" sünd Kriminelle, de wi vör Gericht stelln schulln, nix Ringers. In'n Schadden blifft de mafiöse Verköper, den kriegt wi sachs nich faat; avers vun sien Firma schull de Staat nienich wedder en enkelt Krümel orr Fetzen köpen.


4.3.21 ...Dat Optimismus-Dilemma

Sünd de Düütschen en Volk vun Optimist*innen? Kunnst denken, nee, se sünd Jammer-Weltmeesters! Man liekers segg ik: Se sünd, liekso as all Minschen, blinde, notorische, nich-kureerbore Optimisten. Un -innen. Kiek di eenfach an, wat noch op uns tokümmt — soschale Krisen, Klimakrise, un ok en Pandemie warrt wedder kamen, sünnerlich wenn wi wiederhen den Levensruum vun Wilddeerten terstöört un so praktisch üm niege Zoonosen bedelt. De Schangs, dat düsse Katastrophen nich passeert, is minimal. Un an jüst düsse minimale Schangs glöövt wi. Denn sünst wöörn wi ja uns Hanneln verännern un Vörsorg drepen. Wat hett de Coronapandemie nich kost! Wo veel billiger Vörsorg as Nasorg is, dor gifft dat Reken un Reken över. Nix is klorer. Wenn en Nasorg överhaupt mööglich is. Man: Ach wat, seggt de Koptein vun de Titanic, Iesbarg? Pah, dat warrt nich passeern, du sühst dat to swatt, dat warrt schon scheefgahn. — Is dat denn ja ok.

De Minschen sünd mennigmaal eenfach nich vun de Eernsthaftigkeit vun en Gefohr to övertügen — liekso as se vun heel unwohrschienliche, afsiedige, meist irreale Gefohrn af un to glatt in Panik verfallt. De Verhaltenspsychologie kann dor sachs wat to seggen. Ik segg bloots: Wi mööt nu ümstüürn, nu op de Brems pedden — man wi sünd eenfach nich instand dorto. Nich mal dör so'n Schock as de Pandemie. Allens warrt na de Pandemie liekso orr slimmer wiedergahn as tovöör: de Rümflegerie mit Fleegtüüch warrt wedder losgahn, de Tourismusindustrie jibbert al, de Energieverbruuk hett al nu antrocken, un de Ressourcenversleudern warrt jüst mit Corona rechtfardigt ("Wi sünd al noog belast!"). Vun de Ungerechtigkeitssüük in de Welt mal stilltoswiegen ("Bloots nich mehr Stüern! Bloots keen Lieferkettengesett! Wi sünd vun Corona al noog belast!").

Nee, wi Minschen glöövt dat wirklich Negative eerst, wenn dat dor is un so richtig weh deit. Een hett mol seggt: Wenn dat eerst neegst Johr wehdoon wöör, denn wöörn Minschen sik veel fakener mit'n Hamer op'n Duum haun. Se wöörn denn ja denken: Ach wat, dat warrt schon nich wehdoon!

Solang wi solk unverbeterliche Optimisten blievt, verbetert sik nix. Dat is reinweg en Paradoxon: Werrn wi nicht so sorglos, denn harrn wi minner Grund to Sorge; un wöörn wi uns mehr op Gefohren instelln, harrn wi minner to förchten. — Köönt wi denn wirklich nix lehren? Orr warrt dat wirklich to laat ween, ümtokehren, wenn wi den Schalter denn ümleggen doot?

Ik heff de Höpen, dat de Minschheit doch jüst noch even lehrfähig noog is. Dat wi endlich noch rechttiedig lehrt, tokamen Lieden orr Lieden vun anner Minschen jüst so aftowennen, as weern se uns egen aktuelle Lieden. Dorto brukt dat bloots en beten mehr Fantasie, de Künn, en Realität, nich hier un nu is, doch as Realität to kennen. — Ik glööv dat. Dat wi dat wülln warrt. Un denn ok köönt.

Un dat is mien Optimismus. Ok unverbeterlich.


21.2.21 ...Sächsisch Roulette

Ha, nu is Sünnschien! Un in welk Bundsland fohrt wi nu nich mit'n Auto? Na Sachsen! Denn dor sünd nu ok in't Auto Snutenmasken vörschreven — ja wirklich: Maskenplicht in't Auto! Un wenn du denn noch en Sünnbrill opsettst, büst gor nich mehr to kennen. Dat wüllt de Behörden nu ok wedder nich. Also hebbt se korthannig Sünnbrilln in't Auto verbaden. Steiht de Sünn nu avends deep un du muttst na West fohrn, orr morgens na Oost, denn hangt dien Leven an'n sieden Faden; denn ok mit Ogentosamenkniepen kannst nich jümmers kennen, wat vör di is, wat dor villicht 'n Rotte Wildswien över de Straat hüppt... Dat is sächsisch Roulette. Ik bün verwachten, dat dat dor Dode gifft. Corona-Dode vun anner Aart, sotoseggen. Verrückt. Totaal verrückt. De armen Sächsinnen & Sachsen wünscht sik bloots noch eens: —— Regenweder.


19.2.21 ...Behinnert parken

De Behinnerten mutt'n ja af un an mol 'n beten behinnern, sünst sünd se opletzt gor nich mehr behinnert noog! Hm?


17.2.21 ...Salomoonsche Lösung

Dat Problem vun uns Generaschoon is ja: Woans schallt wi de nömen orr sogor ansnacken, de nich Herren un nich Damen sünd? De Nich-Binären? Dat is ganz schön eernst. Annerletzt güng de Beteken "Taucher" dör de Medien, op Platt "Dükers". Woso dat?! Na, in't Ingelsche seggt se "divers", dat is en Adjektiv, avers wenn dat en Nomen weer, wöör dat "Dükers" heten, vun "to dive" = dükern. Dor hett een sien Ingelsch heel kreativ bruukt! Man dat Probleem blifft, denn nich all Nich-Binäre sünd Dükers un annersrüm (besünners annersrüm!) ok nich.

Nu is mi avers de Lösung tomööt kamen, orr ehrder ik ehr. Ik woor mit de Lösung ansnackt! In en Online-Formulaar (süh rechts) geev dat för de Anreed de Utwahl "Fru", "Herr" un "Hallo". Avers hallo!, segg ik dor doch! Wenn dat nich salomoonsch is! Hallo is twoors för jedereen dacht, as Beteken, de de Geslechtsidentität ganz butenvör lett, man wenn een denn mal en Beteken för de Minschen bruukt, de sik nich as Daam un Herr föhlt, worüm denn nich Hallo? — Sünd wi nich all en beten hallo?


13.2.21 ...Salomoonsche Quatsch

De Landweerschapsministersche Klöckner hett wat Klokes seggt. Dat alleen is en Notiz weert, denn dat passeert nich so faken. Anlaat weer de Vörleggen vun dat tokamen Gesett, dat de Insekten redden schall, indem dat verföögt, ehrn Levensruum nich wieder to terstören (mit den Status quo schall dat Krimmeltüüchs gefälligst tofreden ween un sien Job doon!) un op dat Glyphosatgift pö à pö denn doch villicht mal langsam mehr orr minner... to verzichten. Ludes Lobbygejammer vun Agrar un Buernverband: Dat wöör mennig Buern ehr Existenz kosten. — Good, dat de Insekten nich verständlich snacken köönt, sünst harrn se to dat Thema "Existenz kosten" so düt un dat to seggen. Dat bruukt se avers gor nich, denn wenn se alltohoop weg sünd, kann de Landweerschap liekso as de ganze Minschheit dat Thema "Existenz kosten" mal so richtig utbookstabeern lehren.

Süh, un in düssen Konflikt hett de Landweerschapsministersche en salomoonschen Satz seggt. "Ahn Aartenveelfalt", hett se seggt, "gifft dat keen Landweerschap. Un ahn Landweerschap", so snack se wieder, "gifft dat keen Aartenveelfalt."

Dat Salomoonsche doran is de Utwogenheit. Fifty-fifty. Jedereen kriggt en beten Recht. Un dat Donald-Trumpsche doran is, dat de twete Halv totale Unsinn is. Tüdelkraam. Rhetorik üm de Utwogenheit willen. Orr hebbt Se mal höört, dat de Evoluschoon de Landweerschap bruukt hett, de gigantische Aartenveelfalt vun de natuurbelaten Levensrüüm to entwickeln? Warrt in'n Uurwoold plöögt? In Auenwoolden düngt? In Korallenriffe aarnt? Un woans hebbt sik bloots in all de Johrmillioonen de Levensformen entwickelt ahn den segensrieken Insatz vun Glyphosat?!

Fakt is, de Wirkung tellt. Un wenn een wat bloots faken noog seggt orr good seggt, sett sik dat fast. Mark op: Wenn wat sünnerlich good klingt, fraag glieks: "Stimmt dat?"!


18.1.21 ...To'n Koppschüdden

O Mann. Kiek di de Keerls an, de de CDU sik utkeken hett. An Laschet, den se nu nahmen hebbt, is dat Best sien Opportunismus. Dat deelt he blangenbi mit Söder. Düsse Figuren kann de Apentlichkeit dör Druck manipuleern — se folgt de Ümfragen, un dat is ja nich jümmers slecht. Wat mi besorgt, is, dat so'n grote Deel doch en Typ as Merz den Vörtoog geven wull. Dat düüdt op hen, dat dat Trump-Virus — dat Lengen na en "starken Mann" — ok in düsse Partein virulent is; in de AfD ja sowiso, de woor dorför gründt. Wosaken dat na achtern losgeiht, weet wi. Merz sien Realitätsverlust is al nu to'n Verjagen groot: Alleen de Idee, dat he as Verlerer ("Loser") liekers noch eenfach na en Amt ropen kann — Weerschapsminister warrn ... erschütternd. Erschütternd ok, dat dat wiest: He, de Profi-Lobbyist, will bloots an de Schalthebel, dat Geld ünner sien Kanuten to verdelen. Un denkt, he hett den Ansprook. So sünd de, de sik för "starke Männer" hollt. — Wenn dat nu de Lü nich vun Merz kureert, denn is jüm nich to helpen, un denn hebbt se verdeent, wat se dorvun hebbt. De USA hebbt 400.000 Coronadode kregen. De Doden hebbt dat nich verdeent.


7.1.21 ...Kopplos

Tja, bi all de Fehlers, de se hebbt — ik mutt ja togeven: Wenn de US-Demokratie so'n Putsch vun Primitiv-Psychos à la Trump to'n Opper fulln weer, denn harr ik doch dat Geföhl, de "westliche Welt" weer köppt woorn. Enthauptet. Rein as bi de Islamisten. Harr nix mehr an't Topp. Denn de EU is nu wohrlich nich praat, jichenswelk Verantwoorden to övernehmen. — Natüürlich is dat en drögerisch kondenseert Bild, denn de "westliche Welt" un ehr vöran de USA as "Föhrensmacht" sünd ja doch al siet Johren dorbi, den Kopp to verleren. Trump is bloots de (vörlöpig) letzte Akt. Wieldat dat so langsam güng, füll dat nich so op. Man dat sünst nüms so en grote un wichtige Demokratie as Föhrensmacht ersetten kann un will, dat deit schon weh. — Momang, stimmt doch gor nich! De neegste Föhrensmacht steiht doch al praat! Leider is dat — China. Ja, de warrt opstahn, de warrt jedeen Verantwoorden för sik beansproken... O nee. Düsse niege Kopp driggt en gresige Fratze.


27.12.20 ...Dat rechte Maat

Mit de Wiehnachtsdeko is dat düt Johr snaaksch. De apentliche Hand maakt in Hamborg meist nix, streikt binah. De grote Dann op den Horner Kreisel is nich smückt, vör apentliche Buwarken staht keen Dannbööm mehr. Reinweg trist. As wulln se seggen: Wi hebbt Wichtigers to doon! Un dat Hotels un Restaurants nix maakt, liggt op de Hand: Se dröfft keen Gäst bewirten, de sik dor an frein köönt.

Dorför hebbt de Privaatlü faken orrig opdreiht, sünnerlich de mit egen Hüüs un Goorns, un ok de lütten Landgemeinden laat sik nich lumpen un smückt düchtig. Man solk Lü, de ehr Hüüs sünst överböstig à la Las Vegas optakelt, hollt sik düt Johr beten trüch. Wiehnachten warrt gediegen belücht, avers doch taagnackig. De Minschen verweigert sik dat Düüster, se söökt in dat Lichterspeel Troost un drückt togliek Höpen ut. Mi dücht, dat is jüst dat richtige Maat. Dat is Tied för en taagnackig Höpen. Dat Licht is to sehn.

För Böllern avers is dat düt Johr noch to fröh.


23.12.20 ...De allens kann, dröff allens

Kaiser Caligula wull sien Peerd to'n Senater maken — nich eenfach bloots, wieldat he dat kunn, sünnern ok, dat jedereen weten schull, dat he dat kunn. Donald Trump, de Mann, vun den wi uns nu bald (vörlöpig) verafscheden mööt, hett ja mal seggt: Ik kann mi merrn op de Straat stelln un een afknalln, mien Wählers wählt mi liekers. — Wi weet, dat he leider Recht harr. Un wi schulln dat ok weten — dat is düsse Lü wichtig. Wohraftig maakt hett Trump dat to'n Glück nich. Sachs weern denn doch noch de Udels kamen un harrn em den Scheetprügel wegnahmen. Denn so ganz verlööft is dat Morden in de USA ja nu ok nich. Un opneegst, wenn Trump nich mehr Präsident is, drauht em stückerwat Klagen vunwegen Stüerbedrug un so — allens nich moi.

För Präsident Putin is dat nu anners. Siet hüüt is he dör en nieges Gesett leevlang schuult vör Straafverfolgen — un sien Familie ok. Dat gegen em wegen Stüerbedrug ermittelt wöör, is sowiso lachhaftig. Man nu kann he sik wirklich henstelln un Lü afknalln. Allens kann he maken. He will, dat jedereen dat weet — un sik vörweg al folgsam benimmt. Falls een dat doch nich deit, denn — ja denn deit Putin dat wirklich. Bringt de Lü üm. Straaflos. Geld scheffelt he sowiso. Un lacht över Trump, de afwählt woor. Un över all de annern Stackels un Hungerleiders, de sik wählen laten mööt.

Dat gifft Länner, de sünd noch beter organiseert. Dor bruukt de Basen gor keen Gesetten mehr, dat se tabu sünd. Man mit so'n Gesett, dat di vun en Regel friestellt, kannst doch wunnerbar wiesen, wat du vörhest: düsse Regel to missachten. As reine Machtgeste. Jichenswie is dat för so'n Diktater en noch schönern Slag in't Gesicht vun Volk, Recht un Gerechtigkeit. — Trump mutt fix noch en Gesett maken, dat em unafwählbor maakt. Wöör he ok. To'n Glück kann he nich.


26.11.20 ...Gnaad! Ophöörn! Dat's noog!

So bilütten langt dat. Ik heff un heff dat nu satt mit Corona hier, Corona dor. Worüm nich eenfach Maske op un dörch?! De Welt finnt statt, ahn dat wi ehr wohrnehmt! Jümmers kreist wi bloots üm Corona! He, Sky! Vör good een Johr, op den Hööcht- orr beter Deeppunkt vun den Brexitwahn, hebbt ji in Grootbritannien en egen TV-Narichtensender „Sky News Brexit-Free“ gründt — garanteert sünner Brexit-Narichten, för de Brit*innen, de al lang mit de Nerven to Foot güngen. Sowat bruukt wi nu ok! Ganz nödig! För allens, bloots nich Corona! Denn warr ik opletzt ok noch Privaat-TV-Abonnentin...


22.11.20 ...Bedeln orr bedeligen

Minschen mit groot Vermögen — so feddert mennig un nu ok de Grönen — schallt sik "mehr bedeligen" an't Lösen vun de Opgaven in de Tokumst. Na, na! Hier schull een doch Ross un Rieder en beten nauer nömen. De Minschen mit groot Vermögen bedeligt sik nämlich al överdörsnittlich an de apentliche Entwickeln: Se sünd politisch överdörsnittlich aktiv, nehmt Influss, woneem se köönt — wat ok ehr godes Recht is — un wirkt dör Parteien, Verbänn, Vereenen un Lobbys doran mit, de Tokumst so to regeln, as ehr dat good in den Kraam passt. To Wahlen gaht se al sowiso mit wied över 80%. Nee nee, dat sünd veelmehr de povern Lü, de sik nich bedeligt an't Gestalten vun de Tokumst — in typische Hartz-4-Quartiere liggt de Wahlbedeligen faken bi 30% un deper. Tja, seggt de Lü, Wählen ännert för uns doch nix, un för wat anners hebbt wi keen Nerv. Beid sünd sülvsterfüllen Prophezeihn, un so ännert sik wirklich nix.

Man dat meent de Soschaalreformers un Grönen ja gor nich. Dat, womit sik de Vermögenden bedeligen schallt, is ehr Portjuchee. Över Stüern. Dat wüllt de natüürlich nich so geern un weet sik ok dorgegen to wehren. Wenn du an anner Lü ehr Portjuchee wüllt, bruukst du gode Argumente — un Mehrheiten. De, de sik insett, de sik bedeligt — warrt belohnt.


18.11.20 ...Wi hebbt wunnen!!

Dat Düütschland dat Footballspeel gistern 0:6 verlaren hett, is en empörende Falschmellen! Fake news!!! Wohr is: Wi hebbt wunnen! Düütschland warrt dat Ergeevnis nich anerkennen. Wi bestaht dorop, dat de Tore nieg tellt warrt. Nootfalls mit de Hand. Vun unafhängige Tellers. Natüürlich dröfft bloots legale Tore tellt warrn, illegale nich. Dor weer doch ganz apensichtlich Bedrug in't Speel! De Spaniers hebbt doch Tore för Düütschland heimlich verswinnen laten un spanische Tore rinmogelt! Millioonen illegale Tore! Dat köönt wi bewiesen! Wi gaht natüürlich vör Gericht. De besten Anwälte staht paraat för den DFB, dor is uns nix to düür. Wohrschienlich staht de Spaniers ok mit de Ukraine in'n Bund, denn de fiesen Ukrainers hebbt doch apensichtlich all uns Spelers mit Corona infizeert! Nich logisch? Ha! Ümso beter. Verswörenstheorien schallt nich logisch ween, se sünd wat to'n Glöven, nich to'n Denken!

Op jeden Fall beansprookt Düütschland sienen Platz as Winner un dormit as Gruppeneerste un warrt em nich opgeven, egaal, wat de Lögenpresse seggt. Dat Speelergeevnis wöörn wi bloots denn anerkennen, wenn wi winnt. Sünst is dat slicht Bedrug. Düütschland kann nämli gor nich verleren — wieldat wi keen Losers sünd! Bloots Losers köönt verleren.


11.11.20 ...Dat Eenfachste vun de Welt

Wosaken — so fraagt sik nu de halve Welt — kriggt een Trump rut ut dat Witte Huus? Ha! Hier kümmt de Lösung: Eenfach de Slötter tuuschen, wenn he mal wedder golfen is!

Nix to danken, wi vun Plattpartu helpt jümmers geern. 50 Cent op mien Schwiezer Nummernkonto bitte.


7.11.20 ...Un nu?

De Welt is en lütt beten normaler worrn: Donald Trump is nich mehr (lang) Präsident. Wat för'n Verlichtern alleen düt Normalerwarrn is! Wi sünd bescheiden worrn... Normaler warrt de Welt; nich beter. Wi hebbt uns an veel wennt, wat nich to düllen is. Dat mutt sik ännern — wat ahn Trump villicht en beten lichter geiht. Avers doon mööt wi dat all. All un een.

Un Trump? Tja, he golft nu op'n letzten Lock. Sien Realitätsverlust is sachs irreversibel. Den Gefalln, as de klassische Möchtegeern-Napoleon (orr -Präsident) in de slaten Psychiatrie rümmertostolzeern, de Hand in de Weste schaven, den warrt he uns nich doon, un dat Rumpelstilzchen maakt he uns ok nich (snüff! so fies). He kann ja na Brasilien to sien Fründ gahn un vun dor en US-Exilregeern opmaken. Man Exil bringt wenig Publicity, un Bolsonaro is ok nich ewig in't Amt... Ik denk, Trump treckt na Europa üm: He geiht na Avignon un warrt Gegenpapst.


5.11.20 ...Endtiedstimmung

Süh, de USA verstrickt sik in ehr unmööglich Wahlrecht un in ehr skrupellose Ignoranz. Süh, gewetenlose Afkaten staht al Slang, dorför to sorgen, dat sik nix ännert. Süh — orr süh nich. Kiek eenfach weg. Ik do dat, ik verlööv mi dat. Ik heff dat allens so satt! De heillosen Gesetten un Regeln, de de Minschen opstellt, sik dormit gegensiedig to fangen, Gesetten för Staat, Sellschap, Konkretes un Afstraktes — Gesetten un Regeln ahn Sinn un Vernimm, de se plaant, utnütt, verdreiht, manipuleert — un sik opletzt dormit sülven to Streck bringt. Dat maakt soooo mööd. Ik leev bloots noch een: de Natuurgesetten. Tiedlos un klaar. Neutraal un unparteiisch. Universell güllig un unbestechlich. Wesenlos un vull Schönheit. Ja, ik leev ok dat Exponentiaalgesett, dat uns den Corona-Anstigg verpasst. Natuur un Mathematik — se warrt opletzt all düt överduern.

Endtiedstimmung.


29.10.20 ...Witzfiguurn, nich to'n Lachen

As Kind heff ik mal so'n Cartoon mit twee Monster sehn:

De Islamisten sünd so'n gröön Monster. Se kapeert dat eenfach nich. Dat Monster is sülven de Grund för sien Klaag. De Islamisten gaht sogor noch wieder: Se randaleert un meuchelt gegen de Mohammed-Karikatuurn — avers se sünd nich bloots de Grund dorför, se sünd reinweg sülven Mohammed-Karikatuurn — de bittersten un ätzendsten, de se sik wünschen köönt. Noch Fragen? Ja: Woans kaamt wi dor rut? De Raadslag vun Christen is ja klaar: Keen Wraak, keen Gegenwehr, keen Trüchslaan, Fienden leven. Na, wat dat woll klappt? — Klappt ja nich mal bi Christenlüüd.

22.10.20 ...De Supertanker bremst

Wi hebbt watweetiknichallens för Maßnahmen, meist al en halven Lockdown, un de Corona-Tallen stiegt un stiegt! Wirkt das allens denn nich??

Tja, jedereen weet, wenn een bi so'n Supertanker seggt "Vulle Kraft trüch!", denn schuuvt he noch komodig so'n poor hunnert orr mehr Meters vörut.

Corona is avers keen Supertanker. Dat is bloots en ganz lütten een. Dat duert nich lang, un wi warrt de Effekte vun de Maßnahmen sehn.

De wohre Supertanker is dat Klima. Dor warrt wi in de neegsten Dekaden Möhg un Noot op uns nehmen, un de Tempratuurn warrt liekers stiegen un stiegen.

Wi ahnt nu eerst, wo sik dat anföhlt.


18.10.20 ...Fiervolk un Covidioten

Nich bloots Donald Trump arbeidt taagnackig doran, de Wöör vun Sinn lerrig to maken; ok de Minschen, de nu jümmers vör de Kameras trocken warrt un eenstimmig seggt: "Wi wüllt fiern!" orr "Fröher heff ik dreemalen per Week fiert, dat geiht mi bannig af!" orr "Wi fiert denn even privaat!" Do fraag ik mi: Wat?? Wat fiert ji? Wiehnachten is noch wied weg. Hebbt ji en besünner Leistung vullbröcht? Is wat Schööns passeert? Halloween, ja, dat fiert ji — orr ehrder: dor fiert ji. Denn düsse Minschen fiert eentlich ahn en Anlaat. Se fiert as en alldäägliche Verrichtung. Nix Besünners. — Is dat noch Fiern? Kann een op so en freudlose Wies to fiern nich een Johr verzichten? Dorna — wenn dat vörbi is — denn, ja denn hebbt ji en wirklichen Anlaat to fiern!

De anner Stamm vun Maskenmuffels un Virenskeptikers sünd de so nöömten Covidioten, de op Demos gaht un verquaaste Theorien över Corona un de Illuminaten usw. utpackt. Se seggt, dat gifft al lang en Diktatuur vun en perfide "Elite", un se mööt nu de Demokratie retten. — Wenn dat binnerlich Stöhnen verklungen is, leven Lesers, denn Hand op't Hart: Köönt düsse Lüüd nich eentlich ganz weertvull ween? Mi sünd se lever as dat Fiervolk. Ehrn Sockenschuss un Antisemitismus un Irrsinn bisiet: Wokeen in en Diktatuur (orr wat he dorför höllt) sik opmaakt un op de Straat geiht, de Demokratie to verdeffendeern (orr wat se för de Demokratie hollt), de denkt in't Prinzip gor nich so verkehrt — wenn he ok den Anlaat missversteiht. Mit düsse Lüüd schulln wi den Dialoog nich opgeven, se höört eentlich to de Zivilsellschap dorto. Dat Fiervolk dorgegen geiht mi op den Keks.


9.10.20 ...Segg, woneem de Masken sünd

Passeert Se dat ok, leve Lesers?: Bi jedeen Maskenwäsch fehlt welk! Du weetst doch nau, vun de witte elastische Soort heff ik en Teihnerpack köfft; nu sünd bloots noch fief na. Vun de twee düren FFP2-Masken fehlt een. Un de bunte handmaakte is gor nich to sehn. Ran an dat Schapp, Taschen vun all Jacken, Mäntel un Büxen filzen: Aha, een vun de witten duukt op. De Rest is weg, eenfach weg. Sünd dat de Masken, de de Lü in de Bahn nich opsetten doot? Wieldat se ehr nich mehr hebbt? Un woneem sünd de all? As dat noch nich so veel Home-Office geven dä, verswünnen op desülvige Wies Kugelschrievers — sünnerlich de goden, de mit den weken, man fienen Strich, de so good in de Hand liggen doot. Na Douglas Adams sünd se op en annern Planeten landt — den Planeten vun de verswunnen Kugelschrievers. Na, dor is opstunns sachs orrig wat los, wenn all de verswunnen Masken dor ok opslaat! Kulturschock för de Kugelschrievers! Man bilütten, denk ik, gifft dat dor en deegten Maskenball.


3.10.20 ...Gode Betern för Trump?

Tja, wat nu? Wat schall een Donald Trump wünschen? Bolsonaro is wedder sund worrn — so kann he wieder de Welt ehr gröön Hart, den Amazonas, verbrennen — un dat deit he ok. Wenn Donald Trump en lichten Covid-19-Verloop hett, kann he wieder an de Oprichten vun'n Faschismus in de USA arbeiten — un dat wöör he ok doon. Schallt wi uns sien Dood wünschen? Dat is schäbig. Em wünsch ik sien Dood op keen Fall. Ik wünsch em un mi, dat he to en Insicht kamen kann — to so veel Insicht, as dat bi sien Intelligenz man even mööglich is; un dat kann he bloots, wenn he leevt. Ik wünsch mi un em, dat he erkennt, wat he allens beter maken kann un mutt — dat he sik wirklich betert. Ja, so sehn kann ik seggen: gode Betern, Donald Trump!

Un wenn he sund warrt un sik nich betert? Dat mutt anners gahn, em lostowarrn. Op't Best natüürlich dör de Bevölkern, wenn de endlich to Verstand kamen wöör. Sik entspannen, ehr Bangnis afleggen — denn Verkrampen un Ängste liggt ja ünner düsse fatale Sucht na den "starken Mann". Un de, de Trump bewunnert un wählt, köönt ja nu nich all un een an Covid krepeern — dat kann sik wirklich nüms wünschen. Wi mööt Weeg finnen, düsse Minschen ut ehr Sackgass ruttohalen.

Wenn wi op Covid-19 anwiest sünd, uns de Faschisten vun't Lief to hollen, denn sünd wi verratzt.


1.10.20 ..."Angezählt"

Das Bild vun't Antellen kümmt ja ut den Boxsport, 'neem de Schiri, wenn en Boxer dalgeiht, anfangt to tellen: Een, twee, ... In'n överdragen Sinn seggt dat, dat dor een al bannig wat op sien Karvholt hett. So sehn is Andi Scheuer dat Musterbispill för en Politiker, de antellt is — för dat, wat he sik an Schandalen gönnt hett, kunnst glatt teihn Ministers rutsmieten. Bloots dank de enorme Dickfelligkeit vun sien CSU hett sik Andi bet hüüt hollen. Kuum to glöven, avers wohr.

Nu sitt he avers doch bannig in de Kniep. He hett versöcht, den Trump to maken un driest to lögen, un in Europa geiht dat af un to doch noch scheef. Hüüt Nacht noch kann dat passeern, dat de Schiri "...acht, negen!" seggt, un denn ——

Ja, wat is, wenn de Schiri denn nich "Ut!" röppt, sünnern eenfach wiedertellt? "...twintig, eenuntwintig..." Dat Karvholt för Politikers, Lobbyisten un Funkschonäre is hüüt nich mehr so kott as fröher, un dat warrt jümmers länger. "...sössunfofftig, söbenunfofftig..." Un Scheuer blifft un blifft un blifft... un Trump ok... Orr nich?

De Schiri, dat sünd nämlich wi. De Börgerschen un Börgers. De Wähler*schen.


30.9.20 ...Wedder keen Rumpelstilzchen

Mien Gott, wat för Versagers hett Joe Biden in sien Wahlkampteam! Hebbt Se de Debatte verleden Nacht sehn? Wokeen so willig, so redig, so verleevt in den Exzess is as Trump — wokeen so üm bedelt, sik in Raasch to bringen, bringen to laten — dat mutt doch mööglich ween, so een mit en poor good platzeerte Sätz in'n apenlichen Kollaps to drieven!? In'n Schriegkramp in't Live-TV? Een Satz an jeden wunden Punkt, em lächerlich maken, so lächerlich, as he is, un as letzt seggen, dat he ganz wiss en korten Schniedel hett — denn, ja denn mutt Trump doch dörknalln un sik krieschen op'n Borrn wälzen? So dat se em bloots aftoföhren bruukt, un he beleevt de Wahl in de slaten Psychiatrie? Also ik denk, ik wöör dat henkriegen. Nee, nix mit seriös un sachlich, dat geiht nich mit Trump, un ja nich bang ween; jümmers in de wunden Flanken steken, noch un noch, dat he jümmers höger swingt as en Schaukel. Resonanzkatastrophe. Dat is't. Düsse TV-Diskuschoonsformate sünd sowiso nich dorto dor, to informeern orr to övertügen, sünnern bloots dat de Kandidaten sik blameern köönt. Orr sik sülven vernichten. Gründlich. Weer dat nich schöön?

Nu is to laat. De TV-Senders wüllt nu de Regeln ännern, so dat dat ziviler warrt. Schiet. Och, warr ik dat noch jemalen sehn, dat een uns live dat Rumpelstilzchen maakt?!


20.9.20 ...De "Ohnemichel"

En Studie över Rassismus bi de Polizei? Nee. "Mit mi", so schüddköppt uns Binnenminister Hotte Seehofer, "warrt dat dat nich geven!" — Pardon, ik harr mi ok gor nich vörstellt, dat Hotte bi de Wetenschaplers mitmaken schull! Dat köönt de al alleen, dor bruukt se em nich to. He hett ja ok man na de Middelschool bloots en Verwaltungsschool besöcht — för so'n Studie bruukt dat avers sachs studeerte Soziologen. Also warrt dat de Studie wirklich nich mit em geven! Man geven warrt se 't doch. Hotte is twoors de Baas vun de Udels, man ünnersöken kannst sowat ok ahn sien Verlööv. De Fachlüüd ünnersöcht un ünnersöcht, un Hotte steiht dorblangen un verbeedt dat anduernd. Villicht maakt he ja ok dat Rumpelstilzchen — man "ahn mi" heet ja nich "över mien Liek" — dat is denn doch beten dramaatsch — nee, ahn mi!


9.9.20 ...Segg dat mit Sinatra

De britische Regeern will mit en "Binnenmarkt- un Finanzgesett" för ehr Land de Regeln för Noordirland ut den Verdrag mit de EU över de Kant schuven. Rechtens is dat nich. Dat geevt se ok ganz apen to. "Ja", seggt ehr Noordirlandminister Lewis, "dat geiht gegen internaschonales Recht — avers man in en ganz spezifische un besünner Wies."

Orr, mit Sinatra seggt: I did it my way.

Ach so.


5.8.20 ...Sack Ries

In dat Wirecard-Desaster maakt Finanzminister Scholz sien Huus keen gode Figuur. Se hebbt fröh Henwiesen hatt, se harrn ingriepen kunnt... De Wirecard-Schandaal, heet dat nu allerwegens, de behinnert Olaf Scholz bi sien SPD-Kanzlerkandidatuur för de Wahl 2021, o ja, ganz gewaltig behinnert he em...!

Na und?

Opneegst warrt de ole Utdruck "Un wenn in China 'n Sack Ries ümfallt..." för "dat is totaal egaal" afännert warrn in "Un wenn de SPD 'n Kanzlerkandidaten opstellt...". Weer sogor noch beter, de SPD stellt en Sack Ries as Kandidaten op; denn köönt se em de Schuld för de neegste Wahlpleite geven.

Avers wenn de Union Friedrich Merz opstellt, winnt villicht de Sack Ries de Wahl. Denn mööt wi em bloots noch as Merkel anplünnen, un all sünd glücklich.


26.7.20 ...USA, China, Platt

Wieldess de ole Hegemoniaalmacht mehr un mehr in en modernen Faschismus afglitt, steiht al de niege Hegemon paraat un strahlt vör Knööv, technische Perfekschoon un afsolute Unminschlichkeit. Noch steilt se sik gegen'anner — de weltwied perfekteste Diktatuur vun hüüt gegen dat weltwied mächtigste Militär. Jungejunge, in wat för Tieden stüert wi rin. Un ik snack Platt. Warrt dat Tied, de schöne trööstliche Spraak to laten un dat allens in en Spraak to seggen, de de Massen verstaht? Warrt dat so eernst? Warr ik mal seggen: "Ja, in de Tieden, as dat passeer, heff ik en Websiet in en lierlütt utstarven Spraak beschickt, wat anners wüss ik nich to doon"? Ik weet, dat warrt uns drepen — Faschisten möögt keen Minnerheiten un China keen Spraak, de dat nich kunnerleern kann; man lang ehrdat de Gewalt vun buten kamen kann, kann dat ween, dat ik dat sülven opgeven do?

Schiet. Ik mag nich in en Welt leven, in de Plattsnacken en gewetenlose Luxus is.


16.7.20 ...Frünnen un Helpers

Wokeen schast to Hülp ropen, wenn du vun de Polizei bedrauht warrst? In düsse Laag sünd opstunns de Fruuns, de sachs vun hessische Polizisten ünner den unsääglichen Naam "NSU 2.0" mit Moord bedrauht un schamfeert warrt. Dat is eernst. De eerste NSU hett 10 Lü ümbröcht; Verschoon 2.0 hett sik villicht noch mehr vörnahmen. Wat schast maken, wenn de ehr Drauhn wohrmaakt un bi di tohuus opslaagt? Na, hett jichenseen en Idee? Nee, un dor will sachs ok nüms helpen. Orr woso findt se de Schülligen nich? Nichmal op en lütte Personentall ingrenzen köönt se dat; se köönt mit de IP-Adress twoors den Finger op dat Polizeirevier leggen, woneem de persöönlichen Daten vun de Bedrauhten vun den Polizeicomputer haalt woorn, un de Tied vun't Datenafropen is ok bekannt — dat is keen grote Tall vun Verdächtige. Avers etwa all, de infraag kaamt, nipp un nau ünnersöken?! Dat doot se apensichtlich nich. — Mag ween, de Polizei, dat sünd Frünnen un Helpers — avers för wokeen? Nazis?

Dwars dör den Goorn vun't linksliberale Spektrum gaht de Drecksbottschapen — man een un all gaht an Fruuns. Journalistinnen, Politikerinnen, Künstlerinnen. Dat sprickt en klore Spraak, denn achter all Aggreschoon stekt Angst. Fruuns maakt düsse Fruunsfienden al sowiso bang; avers wenn se denn noch an de Apentlichkeit gaht un den Mund opmaakt, muttst ehr foorts ümbringen. — Dat is nipp un nau de Denke vun de Taliban. So sünd de Nazis: se wüllt dat sellschapliche Rad gaaanz wied trüchdreihn, bet in de Steentied. — Dat düsse Swienjacken sik vör starke Fruuns in de Büx maakt, schull uns Motivaschoon noog ween. Nu eerst recht!


9.7.20 ...Lichte Dackschaden

Nu is dat wetenschaplich nawiest: Wokeen Covid-19 licht nehmen deit, hett en Dackschaden. — Ach nee, dor steiht ja wat anners: Wokeen bi Covid-19 en lichten Verloop bi de Lung hett, kann en Dackschaden trüchbehollen, en "brain disorder", also en stöörten Bregen. Ha!, Bolsonaro warrst dat nich anmerken, he hett al lang en Dackschaden. Trump un de ganze Lichtnehmer-Bande ok. Bolsonaro is nu infizeert, un mennig Minschen drückt em de Duums — anner drückt dat Virus de Duums...


5.7.20 ...Wat för'n Symbool II

Donald Trump will nu en "naschonalen Heldengoorn" buun laten mit Statuen vun de "gröttsten Amerikaners, de jemalen leevt hebbt". Dat hett he natüürlich utrekent in Mount Rushmore ankünnigt (also in Lakotah). Na Prost. Wenn de Statuen liekso groot warrn schallt as dor, köönt se de ja glieks in de Muur na Mexiko mit inbuun! Ik bün avers beförchten, dat t.B. Rosa Parks' Afbild nich in so'n Monument opduken warrt — villicht jüst noch dat vun Martin Luther King, pro forma (staats "pro forma" wull ik toeerst "anstandshalber" schrieven, avers jichenswie stimm dat nich...). Denn bi Trump warrt so'n naschonale Monumentenshow unweigerlich en Manifest vun white male power, de Macht vun witte Mannsminschen. Man in de Fraag vun'n Rassismus is "de dunkle Siet vun de Macht" dütmal de richtige, helle Siet. De Siet vun de Ünnerdrückten, de wi ut anboren Gerechtigkeitssinn innehmen doot.

In mien persöönlichen Heldengoorn kümmt een, vun den wi sünst sachs Afscheed nehmen mööt: Wumbaba. De witte Swatte Wumbaba. Dor is al een vun de Probleme, denn de Woortwitz vun sien Existenz stekt in dat N-Woort, dat wi avers nich mehr bruken wüllt, wieldat dat en böse Geschicht hett un verletzen kann. Ok sien Naam un de Teknen vun em hier op dat Book wiest Stereotype op, de en rassistische Geschicht hebbt. Ik bün beförchten, wi mööt Wumbaba Tschüß seggen. Schaad, denn güntsiets de Stereotype is he so'n Erzsympath. He steiht, nee, flüggt souverään över all Vörurdelen, he nimmt den Rassismus de Wapen ut de Hand — dat Karikaturhaftige, dat N-Woort — un bruukt ehr op de helle, gode Siet vun de Macht. Wumbaba is uns gemeensame Vörfohr un villicht uns gemeensaam Tokumst. He is en lächeln Symbool för vereente Ünnerscheed, freedvulle Synthese un överhaupt för en Welt, in de wi leven, uns licht föhlen un tosamen lachen wüllt. Weer dat nich wumbaba?

Avers is dat nich bloots en Wunschdroom vun witte Minschen as mi, de, de ünner Rassismus lieden mööt, muchen endlich över ehrn Schadden jumpen un sik nich mehr beklagen? Dat dröff nich ween! De Klaag över Rassismus is nich lästig, sünnern nödig; un de Minschen, de bedrapen sünd, bestimmt sülvst, wat ehr stöört. Wenn een över sien Schadden jumpen mutt, denn sünd dat de bevördeelten Minschen so as ik. Wenn ik also Wumbaba Tschüß seggen mutt, is dat recht so. Bloots in mien binnern Heldengoorn blifft sien füllig smüüstern Persöönlichkeit stahn — orr sweven — wenn he bi Maandschien ut de Wischen stiggt...


4.7.20 ...Wat för'n Symbool!

In Hongkong herrscht nu de festlandchineesche Diktatur mit ehr "Sekerheitsgesett", dat nümsnich sekerer maakt as bloots de Diktatuur sülven. Wokeen Butenlänners kennt, is, wenn China dat will, Terrorist (Kollaboration, Spionage). Wokeen de fief Fingers vun sien Hand hoochhöllt, is Terrorist (Symbool för de fief Frieheitsrechte, de de Demokratiebewegen feddert). Wokeen en Regenscherm driggt, sowiso (Symbool vun'e Demokratiebewegen). Nu demonstreert de jungen Lü jümmers noch — alleen dat! —, un se demonstreert mit lerrige Plakate un Transparente — dat nüms ehr anti-chineesche Propaganda vörsmieten kunn. Kann natüürlich doch — mit so'n Gesett, as se nu hebbt, geiht allens. Un dat lerrige Plakat warrt wiss gau as Terrorsymbool afstempelt. Terror överall, bet nix mehr geiht, keen Aten, keen Bewegen, nich mal mehr en stummes Plakat. Dat seggt mehr as allens, wat op so'n Plakat passt. Wat'n Symbool!

Wi schulln mal lever nich den Kopp to deep in'n Rachen vun de Bestie leggen. In Hongkong seht wi, wo dat is, wenn se tobitt.


27.6.20 ...Corona maakt Ferien?!

Wo aggro, wo pampig de Lü opstunns warrt, wenn een ehr an de Coronaregeln erinnert, dat hett Aart. In Bus un Bahn kannst dat beleven; ok an de Strände, wenn du Afstand hollen wullt, drängelt sik jümmers noch en Familie mit ehr Stranddeck un Kind un Kegel dortwüschen, meckern is sinnlos, dor kannst glieks dat Feld rümen. Ik harr Friedag en Beleevnis vun de beten charmantere Aart: Ik stieg morgens in'n Lift (dor dröff dank Corona jümmers bloots 1 Persoon in fohrn) un will rop na Arbeit. De Lift fohrt avers eerstmal rünner in'n Keller! Dor geiht de Dör op — un en Putzkolonne drängt rin, Putzwagen vörut. Ik, in de Eck drängt, japs noch: "Corona!", wieldess ik hastig mien Maske hoochtreck. De hünenhaftige Putzbaas grient mi maskenlos an: "Corona maakt Ferien!"

Wenn du di de Strände ankiekst, gellt ehrder: Ferien maakt Corona. Bün ik beförchten.


21.6.20 ...Bahnbreken Erkenntnis

Erst am Dienstag hatte der Ethikrat Stellung zur bezogen. "Ökonomisches Kalkül kann mit der moralischen Vernunft in einen Widerstreit geraten", stellten die Wissenschaftler fest. Genau darum geht es.

Düt Zitaat stammt mal wedder ut de Süüddüütsche (hach, op Platt kann een en Woort mit 4 ü dorut maken, dor kann mien törksche Fründ Lütfü Güler mit sien 3 ü nich mal mithollen! Un dree Duppelbookstaven an'nanner! Platt is grandios!). Hmmm, dor is nu en lütt Ratespeel för Se. Wat kann woll dat swatt maakte Woort ween? (Nich in de Süüddüütsche nakieken! Dat is unfair!) Naa, üm wat geiht dat sachs? Hett dor wedder en Firma Gift in de Ümwelt verklappt, staats dat düür to entsorgen? Hett en Immobilienhai en arme Familie rutsmeten un de Miete verduppelt, staats op Profit to verzichten? Orr sünd wi etwa deep in de Geschichte, un dat geiht üm de Slaavenhollers, de wüssen, dat se Unrecht dään, avers de Gratisarbeiders op ehr Plantagen good bruken kunnen? Orr sünd dat du un ik in'n Supermarkt vör de Wahl, Bio orr normaal to köpen?

Fast steiht, de Ethikraat hett hier en bahnbreken Erkenntnis wunnen, sotoseggen en Slötel to uns ganze Welt. Ja, moraalsche Vernimm un de Leevde to't Geld staht faken in Konflikt! Oh! — Wo veel kriggt eentlich so en Ethikraat-Liddmaat betahlt? Un steiht dat jichenswie in Wedderstriet mit de ehr moraalsche Vernunft, dat Geld antonehmen un bloots Platitüden aftolevern?

(Wenn Se't weten wüllt: Tierhaltung. Dat is dat Woort, dat dor fehlt. Also sünd wi mit den Tipp Supermarkt un Bioregaal al teemlich dicht bi. Dat geiht üm Tönnies. Üm de armen Swien. De mit 4 un mit 2 Been. Also de mit Ringelsteert [warrt de konventionellen Swien meist all afknepen] un de Arbeiders, de ehr slacht un terleggt. Fuustregel: Swienfleesch bloots mit Ringelsteert köpen!)


13.6.20 ...Probleme löschen

De Grönen hebbt nu vörslaan, dat Woort "Rasse" ut't Grundgesett to löschen. Wenn't man so eenfach weer! Wenn een dat Woort dörpieken kunn as en Voodoo-Popp, un de verhasste Realität wöör denn dordörch glieks dood ümfalln — jaaa, denn harrn wi al lang dat Woort "Geslecht" ut't Grundgesett streken un dormit den Sexismus ut de Welt schafft un Fruuns- un Mannslüüd vull gliekstellt. Wenn't man so güng!

In't Grundgesett steiht, dat nüms vunwegen sien "Rasse" slechter behannelt warrn orr Nadelen hebben dröff. De Woort-Fetischisten stellt düssen Satz (!) nu meist as rassistisch hen — wieldat dat Woort "Rasse" dor vörkümmt! Wo narrsch is dat denn?

Wi weet all un sünd all övereen, dat een Rassismus löschen mutt — ut Grundgesetten, ut den Alldag un ut allens, 'neem he vörkümmt. Avers staats dat hebbt dat Biologen nun hild to versekern, dat dat gor keen Minschenrassen gifft. Dat lett ja al mal höpen. Natüürlich sünd Minschen nich as Automodelle, de een kloor in Schuuvladen sorteern kann, un to'n Glück köönt Minschen sik ok ünnernanner verleven un vermischen. Man jümmers noch seht Minschen ünnerscheedlich ut — wat een dat nu "Rasse" nöömt orr "Fridolin" —, un welk warrt dorwegen benadeligt. Avers wi warrt uns denn all beter föhlen, denn wi hebbt ja dat Woort streken un sünd nu fein politisch korrekt; op düsse Lorbeeren sett wi uns to Roh! — Nee, dat dröff nich ween. Schafft endlich de Benadeligen af, den schepen Blick, de Afsaag bi de Bewerbung bloots vunwegen dat Foto, de Bildungsungerechtigkeit! Denn is dat Woort opletzt ok egaal.


11.6.20 ...Woso hett nüms Corona leev?

Bild Gesa Tams-Koll, Gesas Biller

4.6.20 ...Verswörenstheorie

Wat is de Wohrheit? Liggt se apen to Dag orr is se borgen in de Deepden? Is se eenfach orr bloots wat för de Wiesen, Künnigen, Inwiehten? Is se verännerlich?

Verännerbor is de Wohrheit op jeden Fall. Dat passeert, wenn se to lang vun Licht un Luft feernhollen warrt. Wohrheit brukt nämlich Licht un Luft un de Münner un Bregens vun de Minschen, de an ehr denkt un över ehr snackt. Sünst geiht de Wohrheit togrunn. Nimm an, du vertellst hüüt en ganz normales chineesches Schoolkind, dat dat vör 31 Johr in China en groten Opstand geven hett, de blödig dalslaan woor. Jüst nu an'n 4. Juni hebbt se Dusende mit Panzers överrullt — merrn op den gröttsten Platz vun de Hööfdstadt. Siet de Tied warrt düt grote apentliche Massaker as en Geheimsaak behannelt, un nüms dröff vun snacken. — Dat Schoolkind fraagt: "Wat? Un woso weet nüms wat vun so en kaptale Saak?" "Na wieldat dat geheim is. De Regeern lett jedeen verswinnen, de dor vun snackt. Wirklich!" — Dat Schoolkind tippt sik doch an'n Kopp: Wedder so en irre Verswörenstheoretiker! Jedereen weet doch: En Verswören, wo dat op ankümmt, dat Dusende Lü den Mund hollt, dat klappt nienich! Sowat gifft dat nich. Bloots Spinner seggt dat.

Kannst natüürlich den Bewies antreden: apentlich an dat Massaker erinnern un di ruckzuck verhaften laten. Äh — keen Lust? De Wohrheit kann töven?

Villicht nich.


31.5.20 ...Trump is dat Programm

Trumps Swiegersöhn un Allround-Berader Kushner will för de Wahl in'n Harvst (wenn dat düt Johr denn klappt), dat dat Wahlprogramm vun de Republikaners op Westentaschenformat — Friedrich Merz wöör seggen: op de Grött vun en Bierdeckel — verlüttert warrn schall. Klaar: De Wählerschap intresseert sik nich för Programme un will nix lesen, al lang nich mehr as en Beerdeckel. Se hebbt eenfach to veel Ängste un wüllt dorwegen een, de den "Starken Mann" markeert. Noch wichtiger: Kushner will dat Programm an de Lesefähigkeit vun den Spitzenkandidaten anpassen. Weer doch nett, wenn de dat Programm kennen dä... Avers wichtig is dat eentlich ok nich. Trump kennt sien Wählers. He is dat Programm. Jüst dat Programm, dat op allens, wat he nich versteiht (Virus, Klimawannel, Proteste gegen dat himmelschriegen rassistische Unrecht), opleevst ballern wöör. Düt Programm passt wirklich op en Beerdeckel. Kann ween, he warrt wählt.


24.5.20 ...China is dat Virus

De Demokratie in Hongkong warrt vör uns Ogen to Dode wörgt. Vör uns Ogen. Vör de Ogen vun de Welt. China söcht keen Fiegenblatt mehr dorför, bemäntelt dat nich mehr. Se denkt, se hebbt dat nich mehr nödig — sünd mächtig noog.

Denk hier nich een, dat China mit Hongkong ophalen wöör. Al hett dat de swäckeren Noch-Demokratien orr Jüst-so-even-noch-Demokratien in Europa un Asien in sien (ökonomische) Fuust. Se warrt de nich mehr rutlaten. As en Krake, orr beter: as en Virus warrt sik dat wesenlose System vun pure Macht över Minschen un Länner utbreden — en Virus, veel gefährlicher, döödlicher as Corona. Wenn wi nu nich konsequent warrt un Hongkong un Taiwan bispringt un klaarmaakt, dat wi nich to köpen sünd — denn warrt bald uns Börgerrechten un Minschenrechten liekso afwörgt, und frie Presse kasseert un uns Denken fremdbestimmt. Denn is de Muulkorv un de mediale Lobotomie nich mehr wied. Ik will dat nich — egaal wat dat kost.


Diskussioon in'n Achtergrunn: hier!


21.5.20 ...Iedelkeit is männlich

Düsse Pandemie maakt de Errungenschapen vun Generaschoonen vun Feministinnen tonicht, klaagt nich bloots Moira Donegan. Stimmt ok, nich? Op den eersten Blick süht dat in mennig Familien so ut as in de 1950er Johr: All sitt tohoop in de drange Wohnung, Moder kümmert sik üm de Göörn, Moder ersett de Lehrersch, Moder kaakt (wieldat Kantine, Restaurant un Mensa flachfallt), Moder klareert de Bude, Moder maakt vun ehrn Job, wat se denn noch schafft. Vadder maakt sien Home-Office un verdrückt sik, wo he kann. Nee, dat gifft ok Vadders, de sik mächtig rinhängt. Bi de kümmt dat Kiekschapp vörbi un filmt. — Dat is övertekent, man een Saak stimmt: In en Nootlaag doot Fruuns, wat nödig is. In en Nootlaag gaht Fruuns dorhen, 'neem dat weh deit. In en Nootlaag kiekt Fruuns nich op sik, sünnern sorgt dorför, dat de Laden löppt. Mehrfachbelasten? Eendoon!

Sünd se also dumm? Un: Schull een dat utnütten? Ehr överall de Drecksjobs an't Been binnen? Schulln Lü, de so tickt, nix to seggen hebben?

Kiekt Se op de Länner, de vun Fruuns regeert warrt. Se kaamt beter dör de Kries as de Länner, de vun bost-trummeln Gorillakeerls (Trump, Bolsonaro, Duterte, Putin, Johnson usw.) kommandeert warrt. Nix as Iedelkeit is ehr Motor, "Woans stah ik dor? Wat seggt de Lüüd vun mi?" Se bevert in eensento üm ehr Image un schiet sik in de Büx vör de lüttste Blamage. In en Nootlaag is dat Modell "starke Mann" genau dat verkehrte! Eentlich is dat jümmers dat verkehrte. De KP vun China kunn toeerst gor nich togeven, dat dat en Probleem geev! Un as de dat endlich togeven harrn, müss Trump dat jümmers noch nieg lehren... Nee, liekso as mennig Saken, de uns Corona lehrt hett, schulln wi ut de Kries mitnehmen, dat de Aart, woans Fruuns an Probleme rangaht, ok in Politik, Weerschap un Verwaltung de betere Wahl is. Dat heet nich, dat Fruuns all Jobs maken schulln. Jedeen Minsch kann dat lehren! Jedeen Minsch kann ümdenken. Ik heff de Mannslüüd as Ganzes noch nich opgeven. Ganz un gor nich!


16.5.20 ...Regeln för de Galerie

Kiek, uns Verkehrskasper un Autominister Scheuer will de niegen Bußgeldregeln in de Stratenverkehrsordnung al wedder opwieken — wieldat em kloorworrn is, dat de Rasers denn ja wirklich so veel betahlen mööt! Un sogor ehrn Lappen för'n Tied afgeven mööt! Orr villicht hett he Order kregen vun sien egentliche Bosse, de Autolobby: so geiht dat nich, do wat! —— De Football-Liga striekt fix de Quarantänevörschriften tosamen, denn wenn se de befolgt, köönt se ja wirklich nich spelen! (Dat mööt wi doch insehn, nich?) —— De Grenzwert is överschritten? Och, nu sünd wi wirklich trurig, avers wiedermaken mööt wi, wi köönt doch nich eenfach de Produkschoon instelln — de Straat afsparrn — wat ännern...

Regeln? Regeln gellt genau so lang, bet se griept — bet se reale Folgen hebbt. Düsse Lü behannelt Regeln un Gesetten so as Trump de Demokratie orr en Diktatuur de Minschenrechte: Nett, sowat to hebben, dat kann een sik fierdags an't Revers steken, süht good ut. — Befolgen?! Ik lach mi dood...


5.5.20 ...Arroganz staats Relevanz

Regeln? Ja geern, avers doch nich för uns! — Welk köönt dat eenfach nich begriepen, dat dat mal för ehr keen Extrawust gifft. Ik heff ja dörchut en Hart för Football, avers wat de DFL nu aftreckt, is kooltsnutige Driestigkeit. Twee, dree Infizeerte in de Mannschap, heet dat nich Quarantäne för dat ganze Team? Sünnerlich wenn se sik so ünnernanner afklatscht, as de Hertha-Profi Kalou dat jüst filmt hett? — Ach wat! Quarantäne, denn kunnst ja nich spelen; dat mutt doch jedereen insehn, nich? Bavento laat wi de ganzen Mannschapen ja anduernd testen. De Tests warrt twoors annerwegens nödiger bruukt, avers för den Football mutt een Opper bringen. En anner natüürlich. — Nee! De Football (also de Männer-Football in de 1. un 2. Bundsliga, gifft dat sünst noch een?) is nich systemrelevant! He kann ophöörn. Un vunwegen dat de Fruunsfootball sang- un klanglos sien EM-Johr 2021 opgeven hett, dat de Männer dor ehr verschaven EM spelen köönt, wiest de lieke Arroganz. "Solidarität" hebbt se dat nöömt — in Wohrheit is dat dat Gegendeel.

Un nu wull ik egentlich noch wat schrieven över de Autolobby, de ok denkt, se harr eenfach Ansprook op uns Geld, wieldat se ja soooo systemrelevant sünd, un wenn wi ehr dat Geld nich bi'n Autokoop geevt, denn haalt se sik dat even ut'n Stüersäckel un geevt dat an ehr Boni-Hengste wieder —— avers dor heff ik nu keen Nerv mehr för. Düsse Mentalität mutt mal ophaaln. Wennehr, wenn nich nu?!


20.4.20 ...Veer Lehren ut Corona

Mit de Corona-Kries warrt wi sachs fertig warrn, so schient dat. Kosten warrt dat veel, ok noch veel Tied; wi sünd dor noch lang nich dör. Man Düütschland is na vele weltwiede Statistiken de sekerste Steed, wat Corona angeiht.

Lehrt wi wat dorut? För de neegste grote Kries, de Klimakries, de al in Gang is, man veeeeel langsamer, so dat wi dat meist nich wieswarrt? So dat wi denkt: Wi mööt ja noch nix doon, is ja allens noch wied weg? Corona is en Kinnerspeel dorgegen.

1. Tied is de grote Faktor. Wi hebbt annerletzt veel lehrt över exponentiellen Anstigg un Kurven, de wi flach hollen schulln. Dennso is hier de Kurve för den CO2-Utstötten-Lockdown, de uns bevörsteiht, wenn wi dat Teel vun't Pariser Afkamen inhollen wüllt: 1,5°C bet 2°C globalen Tempratuuranstigg. Anklicken = Vergröttern.

Je länger wi töövt, desto brutaler mutt de Lockdown warrn. Harrn wi 2016 anfungen, de Industrie un den Verkehr ümtobuun, denn harrn wi en relativ weken Övergang henkregen. Harrn wi noch fröher anfungen, harrn wi noch veel betere Bedingen hatt. Wi sünd nu al bi de lila Kurv, un dat is to beförchten, dat wi op de rode Kurv tostüert. Aftöven? Warrt doch nich so slimm? — Wi benehmt uns as Donald Trump in de Corona-Kries!

2. Veel kümmt op den Tostand an, wenn dat Ümstüern insett. Wat du 2, 200 orr 20000 Infizeerte in't Land hest, maakt veel ut, wenn du mit de Gegenmaatnahmen anfangst. Wenn du 2 Infizeerte hest, kannst all Kontakte fein naverfolgen; hest du 20000, dennso kriggst en Lawine, egaal wo hart du den Lockdown anknipst. Je beter de Startbedingen sünd, je milder köönt de Maatnahmen utfalln!

3. Dat sünd Supertanker. Faken höört wi nu "De Wirken vun de Maatnahmen warrt wi eerst in 2 Weken sehn" orr "De Daten vun hüüt hebbt ehr Uursaak in dat, wat vör 2 Weken passeert is." Welk bruukt ok direkt dat Bild vun't grote Schipp: "Dat System is as en Supertanker, wenn du dor de Brems treckst, fohrt de noch en ganze Tied graadut." (Schepen hebbt keen Brems, avers naja.) Wat dat System Weltklima angeiht, sünd twee Weken en Klacks — dat is en noch veel gröttere Supertanker. Dat heet: Wenn wi de Emissionswende starten doot, fohrt de Tanker noch wat länger in Richt Gefohr un Verdarven, bet dat wirkt. Un: Wi bruukt Gedüür; wi köönt nich verwachten, dat allens foorts rosig utsüht, wenn wi uns mal en beten anstrengt.

4. Höört op de Wetenschaplers! Lehrt Mathe! — De Konsequenzen vun Bereken sünd faken afstrakt un nich so intuitiv to faten. Se sünd avers wohr, un se eernst to nehmen is alternativlos. De Politik höört nu op de Viroloog*schen, wieldat se sünst ganz hülplos weern. Liekso schulln se dat mit de Klimatoloog*schen maken. De mathematischen Modelle dor sünd noch komplexer, man se wiest de Richt. Un: Dat wöör gor nix schaden, en gode mathematische Grundkompetenz in de Bevölkern to hebben. De Schoolmathe bet to't Abitur to kennen maakt veel ut. De is relevant un rejell!

Dat is de Wohrheit. Ik höp, wi lehrt dat.



13.4.20 ...Karkenchristen un Omadrückers

Op mennig Minschen wirkt düsse Corona-Lockdown-Tied ja irreaal. Ik dorgegen glööv meddewiel, ik heff dröömt, wat de Tied vör Corona angeiht. Is dat wirklich wohr: Vör Corona, hebbt de Lü dor bi jede Gelegenheit de Grootöllern op'n Schoot seten — utnahmen sünndags, wo se allemann in de Karken rönnt sünd? Ik mutt dröömt hebben. Ik erinner mi dunkel an en Land mit teemlich lerrige Karken (ik gah dor nämlich wirklich af un an hen) un Minschen, de sään: "Och nöö, nich al wedder na Oma! Dor weern wi al vör Wiehnachten! Dat is so langwielig!" Dat is as mit de Parlamentariers: Nu jammert se, dat se bi 2 m Afstand nich all in den Bundsdag rinpasst, man fröher hebbt se sik üm jede Sitten drückt. Jo — wat de Minschen nich kriegen köönt, dat wüllt se miteens hebben. Wüllt höpen, dat se sik na Corona dor noch an erinnert, wo dull se dorna lengt hebbt! Slütt een dor Wetten op af?

Wenn ik't recht bedenken do, is dat en ole Trick. So hett mien Moder mi as Lüttdeern optrocken — denn ik weer en Trutzkopp: Wenn se wull, dat ik wat do, hett se dat verbaden. "Hüüt dröffst du dien Schrank avers partu nich oprümen, dat will'k nich hebben!" Foorts woor dat för mi intressant, un ik heff mien Unafhängigkeit wiest, indem dat ik nau dat daan heff. — Villicht kunn Vadder Staat dor wat vun mien Moder lehrn un af un an wat verbeden...?


8.4.20 ...All hangt an een Tau

De Senioren, so schient mi dat, warrt na un na so richtig fuchtig. Keen Wunner, de Nerven liegt blank. De ganze Corona-Shutdown schall ja tomehrst de Olen, Swacken un Kranken schuulen, so heet dat. 90% vun de, de an Corona doodblievst, stammt ut düsse Grupp. Welk vun de Senioren köönt dat gor nich uthollen, dat dat "för ehr" passern schall; se sünd ehrdaag nienich nüms to Last fulln un föhlt sik reinweg schüllig. "Öllersschaam" is en Woort, dat denn fallt. Anner wehrt dat dullerhorig af: Den Schoh treckt se sik nich an! Se hebbt nix verbraken! De Sellschap söcht bloots en Sündenbuck un hackt dorüm op de Olen rüm! — Un in'n Achterkopp luert de Horror: Insparrt ween in so'n Olenheim-Kassen, wenn de Süük em tofaat hett — un eensam dor afnippeln, ahn de Leevsten nochmal to sehn!

Ik denk, beid liggt verkehrt. Dat wi düssen Shutdown maakt, passeert ut Solidarität, dat stimmt; avers Solidarität bedüüdt: Ik identifizeer mi mit den annern. Wat em dreept, dreept ok mi. Dat is also nich de olen Lü ehr Problem, sünnern dat Problem vun uns all. Dat antonehmen, wenn een to de Gefährdeten höört, is sachs sworer as dat to geven — so as jümmers. Avers beid warrt lichter, je mehr sik all Minschen mit de annern identifizeert. Cord Denker schrifft dorto: "Dütt Bild steiht mi nu vör Ogen: Een Wandergrupp op Afstand man mit een Tau von een' na den annern. Un so sünd se ünnerwegens op unseker Grund un in Gefohr. Een steiht för den annern in... Ik wünsch uns dat, dat wi dor ankaamt, wo de Grund wedder fast is. Un dat wi uns denn ok frei'n köönt, dat wi dat mit Glück schafft hebbt, un unsen Schöpfer danken."


5.4.20 ...Social Distancing: Afstandholler

Hier en poor Vörslääg, den richtigen Afstand in de Apentlichkeit to wohren: Wenn jedereen so'n Regenscherm dragen wöör, harrn wi glieks den rechten 2-m-Afstand, wenn de twee Regenschirmkanten sik beröhrt!

Man nu is schönes Weder! Staats Regenscherm kunn dor de ole Krinoline wedder to Ehren kamen. Mit den richtigen Reifrock kann di nüms nehger kamen as de Radius vun de Krinoline!

För Mannslüüd is dat aver keen Lösung. Wat avers nienich ut de Mood kümmt, is de gode ole Beerbuuk! Je na Drinkerfliet is de Radius variabel.

Wat doon, wenn de Afstand alleen nich mehr langt? Wenn de Behörden verlangt, dat wi uns Snuut bedecken doot? Wenn wi nich all as Hannibal Lecter rümlopen wüllt, bruukt wi Fantasie. Nee, de Maske rechterhand is ganz un gor verkehrt!!! Un en Muulkorv ut'n Plastikblomenpott — so süht dat hier nerrn meist ut — schuult nich good!

Keen Problem: Mundschuul "Huusmaker Aart" geiht ok mit'n Boxershort. Veel Spaaß!

P.S. Fuustregel: Ansteken is gor nich slecht, wi mööt na un na sowiso all dat Virus kriegen, dat wi immun warrt. Man bloots: laaaaaangsam! Nich to vele op eenmaal!


31.3.20 ...Krisensekere Versorgen

Tja, nu is de drütte Week vun'n Corona-Utnahmtostand anbraken, leven Lüüd, un allerbest verklaren deit uns dat hier en Dokter op Platt. Meddewiel hebbt sik mennig Lüüd ümkeken — Club dicht, Restaurant dicht, Kino dicht, Footballstadion dicht, Kneipe dicht — un miteens Bekanntschap mit ehrn Partner un ehr Kinner maakt. Hallo, lang nich sehn! Un nu miteens sitt mennig Familien sik ganz dicht op de Pell. Dat dat överall goodgeiht, is nich to verwachten. Wichtig: Mischt sik in, wenn Gewalt in Familien utbreken deit! Soschale Transparenz kannst ok mit 2 m Afstand hebben!

För den 2-m-Afstand eet mennig Lü ja eenfach so'n Knuuflook-Knoll. Schall wirken — de Lü hollt Afstand... Frische Krüder un Grööntüüch kriggst ja noch; sünst laat de Supermärkt vermoden, Covid-19 weer en Dörfallerkrankung mit nafolgen Hungerdood. Soveel ik weet, is in China un Italien nüms Hungers storven... Avers de Minsch is even Jäger un Sammler. "Schatz, ik heff 2 Lasagne schaten!" — Wenn sik dat wedder normaliseert, warrt de Lü 2 Johr lang Büssenfoder un Deepköhlpizza eten möten, bet wedder Platz in de Spieskamern is — un in de Ladens warrt de Konserven un dat Klopapeer as Blie in de Regalen liggen. Ok nich schöön!

Meddewiel rüst se överall för Videokonferenzen un HomeOffice. In de neegste Tied warrt Internet-Bandbreed dat Wild ween, dat alle jagen warrt. Un dat is nich so licht to erleggen as Lasagne.


20.3.20 ...Krisensekere Profeschoonen

Ha!, schrifft mi op mien gestrige Klagen en Lesersch, ha! De Taschendeven schulln "nich quaken, sünnern so as anner anstännige Lüüd in't Home-Office gahn un as Internet-Kriminelle wiedermaken!" Dank för de Idee! Dat is en gode Vörslag för de, de dat nödige Plie dorför hebbt, t.B. Viren to entwickeln (Computer-Viren natüürlich!). Avers kann dat jedeen Taschendeev? Liekers gifft dat Karriereschangsen ok för de minner hellen Köpp, denn ole niege Berope kaamt op, so as Swattmarkthändler. Is al beobacht woorn: Vör en Supermarkt in Norderstedt hett en Fründ vun mi sehn, wo de Lü, de binnen dat Klopapeer weghamstert harrn, dat buten op den Parkplatz för den duppelten Pries wedder vertickt hebbt. Güng allens weg. — So lang Klopapeer noch de Woor is un nich de Währung, is dat nich so leeg.


19.3.20 ...Virus mit Kollateralschäden

Dat SARS-CoV-2-Virus, vulgo Coronavirus, leevt ja vun den Hang vun uns Minschen to Neegde un Kontakt, Handslag un Kuschelee, Tosamenkamen un Gedränge. Op düsse Egenaart vun uns Minschen is dat Virus anwiest, sünst kümmt dat nich wieder op sienen Weg üm den Globus. (De Pesterreger harr dormalen den Rattenfloh as Vehikel, avers so'n Trick kennt Corona (noch) nich.) Un an düsse Steed wüllt wi dat jüst bekämpen, afknippsen, lahmleggen — indem dat wi op düsse Kontakte verzichten doot. En Virus gellt nich as Deertenaart; dat is also nich gegen den Aartenschuul, wenn wi versöökt, so en Kreatuur mit Stump un Stiel uttorotten. Weer dat ok man bloots en Worm orr en Qualle, wöör dat al anners utsehn. Pick hatt, Virus, wi laat di nu an'n stiefen Arm verhungern, indem dat wi uns (also di) isoleert.

Man natüürlich gifft dat bi düsse Strategie Kollateraalschäden: annere Parasiten, de op Neegde, Kontakt un Gedränge anwiest sünd un de as högere Deerten — sogor Minschen — woll Anrecht op Schuul hebbt. Ik denk dor t.B. an de Spezies vun de Taschendeven. Jungedi, düsse armen Kreaturen warrt verhungern! 2 m Afstand överall, keen Festen un Veranstalten mehr, un al wenn en lütt Koppel Lü tosamensteiht, kümmt dat Ordnungsamt! Bedrauhte Beroopsfeller so as Ladenbedrievers, Frieberooplers usw. schallt Hülp kriegen; wat is mit de Taschendeven? Wo is dat Regeernsprogramm, dat ehr helpt, de Durststreck to överstahn?!

Wat mi hüüt noch opfull:

  • Na Klopapeer warrt nu ok Melkprodukten, Eier un frische Levensmiddel hamstert; Deepköhlwaren un Konserven sünd al weg. Woso kööpt de Lü so veel Eetkraam?! Na klaar: De ganze Bude is vull Klopapeer, un dat Klopapeer schall ja ok wat to doon kriegen...!
  • De Parlamente sitt nu fien op Lücke. Se dröfft bloots noch to'n Deel tosamenkamen, t.B. etwa een Föfftel vun alle Afordneten, dat de Lü schöön mit Afstand sitten köönt. Se hebbt sik avers verstännigt, dat nümsnich de Beslussfähigkeit in Fraag stelln will. Ach wat?! Mehr as en Föfftel is doch sowiso nienich dor west! Kiekt sik doch de Bundsdagsbiller vun fröher an... gaapen lerrig de Saal, bloots in de Midd en poor Lü... Harrst de op Lücke sett, harr dat nipp so utsehn as nu. Un vunwegen de Beslussfähigkeit — düsse Afspraak gifft dat sachs al jümmers. Sünst wöör nienich wat beslaten.
  • De Club Militerranee röppt wedder to de Oosterferien, un all Reservisten kaamt! Dat Reservistenwesen bi't Militär hett wat Romantisches, ok wat Soziaalromantisches för mi (ja, dat is albern, ik weet), un dat wiest eendüdig, för wat en Wehrplicht good is; denn mit en reine Beroopsarmee hest dat so nich. Reservisten warrt inberopen, wenn de Staat mobil maakt! "SARS macht mobil bei Arbeit, Sport und Spiel" —— orr wo güng de Jingle noch...?

18.3.20 ...Virus mit Nevenwirken

So eenfach geiht dat. Een Virus, un dat bedingungslose Grundinkamen — betherto as völlig unmööglich, illusorisch un Dummtüüch afstempelt — is to'n Griepen neeg! Donald Trump, de Kapitalist per se, will de US-Amerikaners 1000 Dollar per Kopp schenken. Un ok bi uns is miteens noog Geld för allens dor. Ehrlich, ik harr ja nich ganz glöövt, dat de Staat so lichtfarig op de ganzen Winste vun de Weerschap fleit, bloots üm de Leven vun ole, swacke un süke Minschen to redden. Sünst bün ik ja al en Optimist un Soziaalromatikersch, avers hier harr ik uns Staat doch noch mehr Zynismus totruut — un bün positiv överrascht. Nu kann noch mehr Godes ut dat Virus kamen! Dat Schietding is en Schangs för sellschaplichen Foortschritt — wokeen harr dat dacht! Pleegberopen warrt beter ansehn, Home-Office warrt Standard, un de "Swatte Null" fallt. Bün spannt, wat wi noch an Nevenwirken sehn warrt.


14.3.20 ...Video staats Besöök!

So eenfach geiht dat. Een Virus, un dat ganze Gejachter un Gerenne maakt Hollstopp. Wenn sik Blaise Pascal hüüt ümkieken wöör, müss he uns för en glückliche Sellschap hollen. "Das ganze Unglück der Menschen rührt allein daher, dass sie nicht ruhig in einem Zimmer zu bleiben vermögen", weer al vör knapp 400 Johr sien Utsprook. Ha, se köönt! Straten blievt lerrig, Fleegtüüch blievt an'n Borrn, allens is slaten — un staats Staatsbesöök gifft't nu Videokonferenzen! För Staatsbesöök schull dat jümmers gellen! Wo veel Megatunnen CO2 düt Virus inspoort! De Ümwelt lacht sik in't Fäustchen — ach nee, korrekterwies deit een dat ja in de Ellenbogenböög. Un wokeen weet — opletzt, ganz opletzt, wenn de Minschen sik wirklich en Lock in'n Buuk langwielt ——— villicht fangt se denn ok wedder an, Böker to lesen! Se weet villicht noch, Böker, düsse dicken Dinger vun Papier... Ik do dat nich, ik maak nu en Spazeergang. De schöne Landschap un de blage Heven sünd nämlich nich slaten.


12.3.20 ...Bruukt juun Tähn!

Mit de Geslechtergliekheit is dat ja noch lang nich wied her; dat sühst wedder mal an, dat mit Elizabeth Warren utrekent de beste Kandidatin ut dat US-Präsidentschapsrennen rut is — wieldat se de eenzige Fru weer. Ja, dorwegen. Vertell mi nich, dat dat nau so lopen weer, weer se en Mann west! Denn harr se sik ok nich de Hoor blondeern bruukt... Nich to faten, wat vun Fruuns noch verlangt warrt — un liekers kriggt se keen Been an'n Borrn... Tominnst woor meist pünktlich to den Weltfruunsdag dat Ekel Weinstein nu ok orrig verknackt. Sien Undaten wiest, wo veel Fruuns sik noch sülven gefalln laat, ok dör rein soschale orr psychische Gewalt. Woans is dat sünst to verklaarn, wat Weinstein allens gegen de Fruuns dörsetten kunn? Orale Vergewaltigung weer dorbi, also Oralsex gegen den Willn vun de Fru! Woans kunn dat angahn, dat he sik so seker föhlen dä, dat he dat wagen dä? Wenn he dat mit mi versöken wöör (neee!, dat mag ik mi nich vörstelln), harr he foorts keen Schniedel mehr, denn ik heff noch Tähn. Jede Fru hett Tähn! Man de Oppers hebbt sik apensichtlich förcht; orr se hebbt dat Wohl vun den mächtigen Mann vör ehr egen sett... Wi Fruuns hebbt noch en wieden Weg to gahn, dat wi ok bi so nöömte "mächtige Männer" eenfach tobiet, op jede Evene. Fruuns, ji köönt de Typen ehr Macht un Herrlichkeit afbieten, överall! Dat sünd Papiertiger. In den Schniedel is keen Knaken, un achter all ehr pompöös Gedoo is nix as Iedelkeit un Inbillen. Biet ehr dat af! Orr drückt de ganzen Weinstein-aardigen Kotzbrocken in de Tunn. Wenn ik de al seh, denk ik glieks, ik bruk en Ganzkörperkondom. Man de sünd ja opstunns bestimmt nich mehr to kriegen — vunwegen Corona un Co.


5.3.20 ...Bedenken second!

Jaja, de FDP wedder. Nu maakt se Druck, vunwegen dat de Regeern un Behörden nix doot gegen dat Coronavirus, dat weer schändlich, unverantwoortlich weer dat! De Politik mutt hanneln!, röppt Christian Lindner. He, Lindner, sülven wull all de Ünnerlatenssünden opschrieven, dat he ehr de Regeern later vörhollen kann — later, wenn de Katastrooph uns inhaalt hett. Wat unweigerlich passeert, wieldat nüms nix deit.

Och FDP, woher de Bedenken? Cool down! Denkt doch mal an, wat ji bi anner drauhn Katastrophen empfehlt: Wiedermaken as betherto un op töven, dat de Wetenschap sik wat infalln lett! Bestimmt kümmt bald en Impfstoff, wenn wi bloots fast an glöövt, un so lang leevt wi eenfach uns schönes Leven wieder! Opregen lohnt gor nich! Quarantäne? Ha, de wüllt bloots nich arbeiten, as de Schölers an'n Friedag! Un vör allen: Sükenschuul schulln ji mal de Profis överlaten!


22.2.20 ...Frömde rut

Ferhat, Gökhan, Hamza, Said Nessar, Mercedes, Sedat, Kaloyan, Fatih un Vili. Dat sünd de Naams vun de Doden vun Hanau. Frömde Naams. Frömde Naams? Gökhan, Said un Vili sünd Naams vun Frünnen vun mi. Un ik kunn noch anner Naams optelln, de frömd klingt un achter de Frünnen staht, Gesichter vun Frünnen, vertruutes Smüüstern, Leeftalligkeit. "Frömde sünd Frünnen, de een noch nich kennen lehrt hett", seggt en beten afdruschen Wiesheit. Stimmt avers.

Un düsse Frünnen harrn doot ween kunnt, wenn de Mörder vun Hanau bi ehr vörbikamen weer.

Ja, dat gifft ok Minschen, de een jümmers frömd blievt. Dat sünd de mit den Hass in't Hart un dat Gewehr in de Hand. Un mehr noch de, de mit düssen Hass koolt kalkuleert. De Killers in Gedanken, Wöör un Wark. De, de hasst, hebbt egentlich Bang; all Aggreschoon is Bangnis. Man de, de op de Klaviatur vun düsse Bangnis speelt to ehrn Vördeel, de de Lü ophisst, dat sünd de Frömden. In uns Land. In en Land, 'neem all Minschen vun goden Willn tosamenstaht. Dat is mien Land, un anners düll ik dat nich.

De Frömden, de Hetzer un Killer, de köönt geern verswinnen. 'neem se herkamen sünd. To'n Düvel.


16.2.20 ...Spegelfechterien

To mien Jöögd, in de 1970er, 1980er Johr, weer de nukleare Overkill en reaale Gefohr, de jeden Dag drauh, konkret, mit Hannen to griepen. Dorgegen hebbt wi demonstreert, as nu de Fridays for Future gegen den Klimawannel — so as hüüt güng dat üm uns Tokumst. Dat is en ganze Tied her. Un wat sünd Atomraketen hüüt? Dat gifft ehr noch; avers snaaksch is, woans se sik wannelt hebbt mit den Fall vun den iesern Vörhang. Hüüt schient se mi meist en ganz afstrakte, rein symbolische Waff. Utnahmen villicht in Kaschmir, drauht hüüt narms mehr de direkte Insatz. Liekers schient dat wichtig to ween, wokeen wo veel hett, vun en "nuklearen Schirm" is de Reed — as weer dat en rein passive, defensive Saak — un dat Europa keen hett. Dat höört sik allens in mien Ohren as Gelalle vun Verrückte an. Wi hebbt ganz anner Problemen vör de Bost, de de Sekerheit un den Wohlstand vun de ganze Welt bedrauht! Wat t.B., wenn bloots dat Coronavirus sik in Swattaafrika utbreden dä? Kann morgen passeern! Un dat is een vun de lüttern Probleme.

De Minschen, de uns Sekerheit verhannelt, denkt in en Sphäär vun afstrakte Macht- un Rangfolgen — dor gellt Nuklearwaffen noch as "Sekerheit". Avers düsse Afstrakschoon kann sik versülvstständigen un grote Wirken hebben. En vergliekbor mächtige Afstrakschoon is Geld. Kannst konkret nix mit anfangen; bloots wieldat un solang all an glöövt, is dat wichtig — un wieldat dat all doot, geiht nix mehr ahn Geld. Dat Problem mit de Rüstung is nu, dat se jüst de Unsummen vun düt Geld verslingt, de wi bruken wöörn, de wirklich konkreten Probleme to lösen. Dat lett wohraftig so: Wi kriegt en niegen Rüstungswettloop, bi den wi ok noch flietig mitmaakt, un verballert dormit uns letzte Chancen, den Planeten bewahnbor to hollen. Opletzt gifft dat bloots Verlerers. — Mennigmaal glööv ik, wi sünd de Bewahners vun en Irrenhuus op'n Utfloog in en grote Geisterbahn mit luter künstliche Popanze, de wi alltohoop för reaal hollt un de uns den letzten Rest Verstand kosten doot. Geevt mi mal en nuklearen Schirm, de gegen Wahnsinn schuult.


7.2.20 ...Dr. Li is doot

De chineesche Dokter, de as een vun de Eersten op dat niege Corona-Virus henwiest hett, is hüüt an datsülvige Virus dootbleven. As he dat nieg funnen Virus publik möök, hebbt de lokalen Behörden em verhaft un dwungen, en Geständnis to ünnerschrieven, he harr lagen un wöör dat nu laten. So woor he, ahn dat he dat wull, to dat, wat wi en "Whistleblower" nöömt.

To de Tied harrn se de Epidemie noch licht ünner Kuntrull kriegen kunnt. Man nee — en Problem? Bi us? Dor wöörn wi ja slecht utsehn! Dat dröff keen Problem geven, also gifft dat keen. — Un nu hebbt se den Salaat. Dat Land mit 1 Milliarde Minschen steiht still, de weerschapliche Schaden weltwied is unafsehbor. Un Dr. Li is doot.

In China is allens stramm op Linie. Se arbeit ieverig doran, dat Verhalten un sogor dat Denken vun de Minschen to kunnerleern. Man dat Virus keem poor Johr to fröh, se hebbt noch nich allens ünner totale Kuntrull — un nu schüümt de Woot vun de Minschen hooch; Dr. Li is ehr Held, se feddert miteens frie Reed, denn jedereen dor kennt dat, wenn een de Staat orr de Bangnis vör em den Mund verslaat. Jüst de Perfekschoon vun't chineesche System kann also sien Ünnergang ween — as wi hier al körtens faststellt hebbt. Un jüst sien Ünnergang kann en Reddung ween; denn wenn dat Kuntrullsystem eerst so wied entwickelt is, dat nix mehr dördringt, egaal wo gefährlich dat is — wo kann dat enden, för China un de Welt?!


7.2.20 ...'keen mit den Düvel fröhstücken will, brukt en laaaangen Lepel

Wi all wüssen, dat Nazis böse sünd; avers so böse — nee! Wat de AfD för fiese Typen sünd, dat sühst an, wat se nu in Thüringen maakt hebbt. Böösaardig un achtertücksch hebbt se den redlichen FDP-Kandidaten gegen sien Willn to'n Ministerpräsidenten wählt. Dor harr de doch nie mit rekent! As he sä "Ik nehm de Wahl an", hett he ok noch dacht, de ganzen Stimmen, de he kreeg, kemen vun de Linkspartei un de Grönen, un dat de AfD-Kandidat null Stimmen harr, leeg doran, dat de AfD-Lüüd alltohoop för Ramelow stimmt harrn... oder so ähnlich. Nienich harr he dacht, dat Nazistimmen sien witte West besudeln wöörn! He doch nich!! Naivität un Unschuld kiekt em doch rein ut de Ogen!

Un nu gifft dat Niegwahlen, un dorna gifft dat natüürlich keen FDP-Frakschoon mehr in Thüringen. Wuhuu! Dat wull de AfD: de FDP tweimaken! Vernichten! En unschüllige Partei! De dat allens gor nich ahnt harr! So fies is dat ok, wenn de Medien nu seggt, Lindner & Co. harrn dat allens tovöör utrekent un mit de thüringer CDU un AfD afsnackt; un nu, as de Versööksballon na achtern losgüng, belöögt se uns all un speelt bloots de Ahnungslosen. Dorbi is de FDP dat Opper! En Nazi-Opper sotoseggen! Jedereen, de in Lindner sien redliche Visaasch kiekt, weet dat!

Wi all wüssen, dat Nazis Kriege un KZs op't Geweten hebbt; avers de FDP ieskoolt in't Metz lopen to laten — dat is...

...endlich mal en gode Daat!


23.1.20 ...Twee Prozessen

In düsse Tied staht in USA twee ganz ähnliche Typen vör ganz ünnerscheedlich Gerichten: Harvey Weinstein vör en Strafgericht un Donald Trump vör sien Impietschment. Un wat dat ok för Typen sünd: jümmers noch findt se Lü, de ehr Saak vertreedt. (Weinstein findt solk Lü sachs bloots noch för Geld.) Un dat is ok recht so. Verdeffendeern mutt ween. Un hest du nich sehn: Weinstein warrt vun en Fru verdeffendeert. Un Trump sogor vun en Demokraten. Also en Liddmaat vun de Opposischoon. — Sünd dat villicht Verräters?

Mit düsse Beschülligen schulln wi vörsichtig ween. Mal afsehn dorvun, dat Weinstein sien Afkaatsche dat rein üm Geld deit (he höört to den Slag, för den nüms wat deit as üm Geld): Wat een meent un to welk Grupp een tohöört, dat schall man schöön unafhängig ween. Wi hebbt al veel to veel vun düsse so nöömte "Identitätspolitik", 'neem dat jümmers heet: "Du büst so een? Denn muttst du doch so un so denken!" En Fru kann fruunsfiendlich ween, en Swatte Rassist, un en Mann kann Feminist un ok en gode Gliekstellensbeopdraagte ween. Wat wi sünd, bestimmt nich, wat wi denkt; un en Argument tellt för sik sülvst, egaal, vun wokeen dat kümmt. Dat gellt sünnerlich, wenn wi in en Grupp rinboren warrt as in uns Geslecht, Kultuur orr Ethnie. — Weer dat anners, dennso weern wi nich beter as de Stammes-Sellschapen, 'neem de Parlamente 1:1 de ethnische Verdelen vun't Land afbildt. Un 'neem een, de utscheert, würklich "Verräter" nöömt warrt. Dat is archaisch un primitiv. Wi bildt uns uns egen Menen frie vun uns Herkamen. Ok wenn dat mal so endt, dat en Demokrat gegen Trumps Impietschment is. Orr en Fru Weinstein verdeffendeert.


5.1.20 ...I did it my way

Düsse Drohnenmorde, düsse "gezielten Tötungen" (nix dorvun kannst op Platt seggen; dat is keen Tofall, denk ik), düsse Raketen, de överall op de Welt ut dat Unsichtbore dalsusen köönt — en Moordtechnik, de al ünner Obama grasseern dä —, sünd de nich eentlich völkerrechtswidrig? Nee, meent de US-Regeern; de General, de dütmaal dat Teel weer, weer ja en Kämper vun de Gegensiet. Solk hentorichten, ok ahn Kriegstostand, dat hett de Regeern sik sülvst verlöövt, also legaliseert. Un wenn blangenbi noch Zivilisten to Schaden kaamt, also "Kollateralschäden", denn deit ehr dat leed — un is dorwegen ok okay. Schall uns dat nu beruhigen? Mi dücht, dat schull uns noch wied mehr beunruhigen, wenn sowat legal is, as wenn dat verbaden weer! Dat Letztere wöör heten, de Regeern brickt dat Gesett — dat kennt wi, is nix Nieges, narms. Man dat Eerstere wöör heten, mit de Gesetten orr de Gesettgeven stimmt wat nich. En Demokratie mutt sowat foorts afstelln. Sünst blifft se villicht nich mehr lang Demokratie.

Nu hebbt se den iraanschen General also afschaten. Plus söss annere mit em. Op irakisch Gelänn. Nich överall in Nahoost truert se; welk fiert dat ok, t.B. in Syrien, 'neem de General dat Assad-Regime stütt hett. En Fiesling par excellence weer he ja. Ok in Iran sünd sien "Revoluschoonsgarden" verhasst. Se ünnerdrückt de Lü un stoppt sik sülven de Taschen vull; jedereen weet dat dor. — Woans kann't denn angahn, dat de USA doch wedder allens vermasselt hebbt? Dat kümmt vun ehr unnachahmliche Arroganz. Ehr Aart — "my way". De Gedankenlosigkeit, mit de se sik över allens wegsett, maakt fassungslos. Wat in anner Minschen, Sellschapen, Naschoonen vörgeiht, is ehr nich bloots egaal — se sünd ok unfähig, sik dat uttomalen. Ok dütmal hebbt se dat wedder henkregen, dat in Iran allens in naschonale Woot schüümt un Irak sien US-"Verbündten" rutsmiet. Un wenn di noch de Mund apensteiht, woans een so dumm ween kann, denn sett Trump noch een bavenop. De Iraners hett he nu drauht, he wöör ehr Kultursteden bombardeern laten (en klores Kriegsverbreken — dütmal ahn Slupplock). Jungedi, nu warrt dat wirklich swoor, sik noch dümmer to benehmen. Mien Fantasie is al afhangt. Fallt Se noch wat in, wat de Laag slimmer maken kunn? — Na, villicht kümmt bald en Twitter-Tweet...

De Drohn, mit de se dat Morden in't Wark sett hebbt, hett blangenbi den zynischen Naam Reaper = Plücker, Aarner, Sensenmann. Dormit warrt avers nich bloots aarnt; bi elk Moord warrt ok wat utseiht. En ohnmächtige Woot. Hass. Un wenn dorvun de Aarn ansteiht, much ik lever nich dorbiween.


2.1.20 ...Niege Dschungelpröven

RTL dreiht sien Krawall-Reality-Dschungelcamp-Show ja in Australien. Beten wieder in'n Noorn, man liekers. Schall ok düt Johr so'n Show geven. Betherto warrt de Kandidaten dor in sonöömte "Dschungelprüfungen" ja mehrst mit Insekten un Ekeltüüchs konfronteert. Man Insekten sünd totaal out, vun gistern, untiedgemäß! Ik slah niege Dschungelpröven vör:

  • Wegrennen vör de Füerfront. Wokeen kann de Füerwalze entwischen? De Winner winnt keen Pünkt, sünnern sien Leven.
  • Koalas redden. Fisch in twee Minuten de söten Koalas ut de hitte Asch! Dorbi muttst du rennen, denn de Bodden is hitt. Een Punkt pro Koala.
  • Löschen. Dat Dschungelcamp brennt, wokeen löscht best? Dat gifft Schuumlöschers, Water, Löschdecken. Wegrennen geiht nich. De Utweeg sünd afsparrt. Wedder geiht dat nich üm Pünkt, sünnern üm't Leven. De Kameralüüd filmt natüürlich wieder, staats to helpen. —— Reality-TV vun hüüt. Dat warrt en Spaaß!

1.1.20 ...Positiv denken!

Ik glööv, ik bün gistern to melanklöterig west. Man hüüt is de 1.1.20! Hach, wat'n schönes Datum! So licht un kompakt! Ja, wi mööt de Saken ok mal vun de positive Siet sehn! Den Klimawannel to'n Bispill. De hett ja nich bloots Nadelen — villicht is he ja ganz to Unrecht in Verroop?! Vun de Arktis un Antarktis wüllt wi mal gor nich snacken. Man wenn bloots dat Binnlandies vun ganz Grönland smölten wöör, stiggt de Meeresspegel üm ca. 7 m an. Un dat kann een ok positiv sehn! Kiekt doch mal na Australien: Mennig Gegenden, 'neem dat nu so dull brennt, sünd denn sachs ünner Water un köönt gor nich mehr brennen! Orr kiekt na de Oostsee — en siedes Meer, en Brackwatermeer. Dat is eentlich bloots för Bernsteen good. Un wenn de Oostsee endlich wedder anstiegen un de Woolden ümrüm överswemmen kann — denn entsteiht niege Bernsteen! Endlich! Is dat nich schöön? De Insekten ut uns Tied warrt ok endlich, vun Harz överrullt, in de See versenkt un kaamt as Smuckstücken wedder vörtüüg! Oh — äh — de Insekten vun uns Tied? Naja, nu nich so negativ: Dat gifft noch en poor! Un so warrt se doch best konserveert!

Okay, dat duert, man nu heff ik noch en unslagbor Argument: De ganze Stried üm de Hamborger Elbvertiefung is bileggt! Dat maakt de Meeresspegel ganz vun sülvst — ahn Baggern un Slickaflagern! De Elv stiggt eenfach an, kost keen Geld. De dicksten Scheep köönt denn prima dorhen fohrn, 'neem fröher de Hamborger Haven west ween warrt. Klasse, nich?

Wat? Wokeen seggt: "Dor hebbt wi doch sülven gor nix mehr vun!"? Nu mal nich so egoistisch ween! Een mutt ok...

...an tokamen Generaschoonen denken!


31.12.19 ...Niejohrsanspraak

Angela Merkel. Den Kopp jümmers beten to Siet dreiht, dat se de Kamera — also uns Börgers — nich frontal, sünnern mehr so peripher in't Oog faat. Wennehr deit se schon mal wat frontal? Is even nich ehr Stil. Man se snackt vun'n Klimawannel un dat een fixer hanneln mutt. Angela Merkel! Fix hanneln! — Ja, de Tieden ännert sik. Jümmer gauer. Weet Se noch den Schandaal, as mal bi Helmut Kohl de Anspraak vun't Johr tovöör utsendt woor? Un nüms hett dat toeerst merkt. So weern de Niejohrsanspraken, un so snack Kohl. — Dat weern de goden olen Tieden, as een Johr dat anner glieken dä. Se kaamt nich wedder.


29.12.19 ...Trüch in de Tokumst!

Nu hett de WDR dor en Kinnerleed produzeern laten, 'neem se Oma as "Umweltsau" betekent. Ts, ts. All sünd ok al bannig reumödig un hebbt dat hild mit Begööschern. Weer nich so meent usw., weer Satire! — Un as Satire bedüüdt dat denn also dat Gegendeel, ja? Liekso as bi't Wiesen mit den Wiesfinger all de annern Finger op een trüchwiest? — Genau. Un so en Satire is ok bannig nödig! Ik bün ja ganz op de Sied vun FFF (Fridays for Future) in ehr Angreep gegen de aktuelle Politik un de ehr Feigheit; avers mit'n Finger op de Oma-Generaschoon wiesen köönt se alltohoop nich. Dat is denn de Generaschoon Plastik, de mit'n Finger op de Generaschoon Botterbrootpapeer wiest. Un denn wiest wohraftig all annern Fingers op se torüch.

Ik bün in de 1970er Johr opwussen, un dat Leven weer dor nich slecht. Vun Computer un Internet afsehn — op de ik nich verzichten much —, kunn ik stantepe wedder in den Levensstil trüchkehren, bild ik mi in. Ok mit Telefoonzelle staats Handy kunn ik nootfalls leven. Duert denn allens even beten länger. Un Himmelherrgott, köönt de Kiddies sik hüüt eentlich noch vörstelln, wat för'n lütten CO2-Footafdruck wi harrn? Okay, över't Internet mööt wi snacken. Dat is keen Klacks. Man wat allens annere angeiht, kann ik bloots op düssen genialen Text verwiesen, den dat in't Internet an poor Steden gifft. Ik heff em hier op Hoochdüütsch laten, man för Ehrn Komfort as egen Plattpartu-Dokment afleggt. — Dat is de Kloortext to dat "Satire"-Leed. Un, blangenbi: Demonstreert hebbt wi dormalen ok, un nich to knapp. Gegen Rüstung un Krieg. Wi sünd natüürlich mit de Bahn na de Demos henfohrt.


22.12.19 ...Impietschment

Tja, nu warrt Donald Trump impietscht. So warrt dat ja utspraken. Un sien Republikaners in't Repräsentantenhuus staht een un all achter em as een Mann. Dat nütt ehr nu, in düssen Momang, villicht ok noch bi de neegste Kandidatur. Avers markt sik dat good, ji Repräsentanten un -onkels: Trump to ünnerstütten is en Risiko, en Glücksspeel. He is en "loose cannon", he is unberekenbor un kann sik in jeden Ogenblick in en groten Schaden verwanneln, mit den denn nüms mehr wat to doon hebben will. Erinnert sik an den Irakkrieg un woans later jedeen Kandidat fraagt woor un Rekenschap afleggen müss, worüm he/se dormalen bi de Afstimmen de Hand för düssen Krieg hoochhollen harr? Hillary Clinton hung dat swaar na, dat se dormalen nich Nee seggt harr. Se mummel wat vun Patriotismus. Nee: Dat weer klipp un klaar as de Dag, dat dat Opportunismus west weer. So en Flecken kriggst nich wedder ut de witte West wuschen. Erfolg warrt överall anbeedt, un Trump is jüst nu noch Trumpkoort, de Favorit; man wokeen ok övermorgen noch glöövhaft ween will, schull man beter tweemaal nadenken.


15.12.19 ...Blinde Panik

De Welt is as en Supertanker: Wenn de Koptein ok al "Vulle Kraft trüchwarts!" kommandeert hett, schuuvt sik dat grote Schipp doch noch en good Stück graadut — rein ut Traagheit. Tja, un uns Welt hett nich mal so'n Koptein, un "Vulle Kraft trüchwarts!" hett de al gor nich ropen. Liekers weet wi, de Kurs ännert sik; he mutt sik ännern.

Man as dat ok jümmers so is, füert dat ole Weerschapssystem toletzt noch sien prächtigste Raketen af: De Klimakonferenz in Madrid versackt in Partikularinteressen. De Börsen-Niegstarter Saudi Aramco is op een Slag de "weertvullste" Firma vun de Welt — se maakt in Ööl, en Energiefoorm vun de Vergangenheit. Mehr Lü as je tovöör kööpt sik 'n SUV. Un wieldat all Minschen binnerlich wies warrt, dat de Probleme in de Welt ungeheuer komplex sünd un noch wasst, — wieldat dat so is, wählt mennig Völker sik ut blinde Panik Regeern, de vun Komplexität nix weten wüllt un eenfache Lösungen versprekt. Allens kann blieven, as dat is. Wo schöön weer dat doch, wenn dat helpen wöör, den Kopp in den Sand to steken! Wenn dat helpen wöör, wöör villicht ok ik dat doon.

Man wi mööt opwussen warrn. Dat warrt noch'n beten slechter warrn, ehrdat dat beter warrt, man opwussen to warrn is en gode Vörsatt för 2020, meent Se nich?


3.12.19 ...Se wählt dat Oginaal?!

"Maakt nich de AfD na, de rechten Wählers to gefalln!", so warrt de börgerlichen Partein jümmers an't Hart leggt; denn: "De Wählers gaht denn hen un wählt glieks dat Oginaal, nich de Kopie!" Un düsse Wohrschuug mach wohr ween, wat de AfD angeiht. En beten leed deit mi, dat dat anschienend bloots för de AfD gellt. Un nich ok, to'n Bispeel, för de SPD. De Unionspartein hebbt wiss un wohraftig in de verleden Johrn teemlich veel vun de SPD övernahmen, ja Angela Merkel warrt sogoor naseggt, se harr de SPD all de besten Pünkt ut de ehr Programm klaut (denn kann dat ja nich wied her west ween mit dat Programm...). Man wat de Wählers sünd, gaht de nu hen un seggt, denn wählt wi glieks dat Oginaal? — Dor is nix vun to merken west...

Ja, ik geev to, de SPD deit mi leed. Ik meen, wi köönt op düsse Partei nich verzichten — alleen vun't Entertainment her...


30.11.19 ...Leven tötet

En Gericht in Hessen hett de NPD Verlööf tospraken för ehrn Slogan "Migration tötet". Dat weer keen Volksverhetzen, un solk Plakate, meent de Richter, dröff de Gemeen nich afhängen laten. Hett se nämlich maakt. To de Europawahl. Un de NPD harr klaagt. Na, mit den Richter harrn se sachs Glück, de Nazis: He hett sik de Möhg maakt un histoorsche Belege sammelt, woans Migration al döödlich west is. För de Indianer etwa. Bravo! "Migration tötet" also. Man liekso kunnst seggen: Migration reddt Leven. Un dor kann ik di dreeduppelt so veel Belege wiesen. Fangt wi mal bi de Juden an, de sik vör de Nazis in Sekerheit hebbt bringen möten. Orr bi de fröhen Minschen, de ut Oostafrika migriert sünd? Bi de Vörrerasiaten ut de Jungsteentied, de uns Ackerbu un den Ploog bröcht hebbt? — Dat is doch allens Dummtüüch. Liekso kunn ik seggen "Strom tötet" orr "Pflanzen töten" (ja! Giftplanten!) orr "Wasser tötet". Kannst ja ok in versupen! Wo veel Nichswemmers sünd al verdrunken! Woter is gefährlich! Un wi bestaht to meist 80% dor ut. Un wo is dat mit dat Leven sülvst? Geiht to 100% döödlich ut. Leven tötet. So is dat! Warrt Tied, dat endlich mal een dat Volk de Wohrheit seggt!

Argumenten op düt Niveau sünd keen Argumenten, dat sühst kloor. Man dat is jüst dat Niveau vun de Nazis: blööd noog, dat ok de Dösigste "denken" kann, he wüss Bescheed, un in Panik kümmt; un togliek so allgemeen, dat se ehr egen Woort in ehrn Mund ümdreihn köönt, wenn dat nödig is (t.B. vör Gericht) — wenn de Richter dat nich för ehr deit, as hier. Op düt Niveau schulln wi uns mit düsse Typen gor nich inlaten. Dat wüllt se bloots: dat wi anfangt, ehr Parolen mit ehr to diskereern. Üm ehr Parolen geiht dat nich. Nich wat se seggt, sünnern wat se doot un wüllt, is dat Kriminelle.


24.11.19 ...Krieg mit Stüern

Olaf Scholz will SPD-Baas warrn. Un later — drömen dröffst ja — villicht Kanzler. Ik weet nich, wat he dorto vun kritische Organisaschoonen to beförchten hett, avers geven mutt dat wat, un dor schulln wi mal en genauern Blick op smieten. Denn woto will Scholz een na de anner kritische NGOs kooltstelln, indem dat he ehr de Gemeennüttigkeit striedig maakt? För so en Vereen bedüüdt dat, dat he keen Spennen mehr kriegt, wieldat de nich mehr vun de Stüer aftosetten sünd; dat he sülven miteens Stüern betahlen, ja för Johren nabetahlen mutt as en kommerzielle Firma — för mennig Vereen is dat de Genickbrook.

Attac is al siet Johren afsaagt — ünner Mithülp vun Wolfgang Schäuble, Ex-Finanzminister un jümmers noch en schillern Figur. Mit de Finanztransaktionsstüür, vun Attac utdacht un propagiert, will de SPD nu de niege Grundrente finanzeern. Genehm is dat even bloots, wenn dat passt. Ok de Vereen Campact is siet 2019 nich mehr gemeennüttig. Hebbt se Scholz eenmaal to faken argert? Un de ruhmrieke Düütsche Ümwelthülp, de so veel Schandalen opdeckt un Ümweltbedregers to Streck bröcht hett, steiht (jüst dorwegen!) al lang hooch baven op de Doodslist vun de konzernhörige Politik. Ok anner Vereenen geiht dat an den Kragen. Begrünnen? All düsse Vereenen harrn sik to veel in de Daagspolitik inmischt! — Düt Argument vun Politikers, de vun ehr parteinahe Stiftungen (een un all natüürlich gemeennüttig!) vörn un achtern bi ehr daagspolitische Arbeit ünnerstütt warrt. Un totaal uneigennützig, soschaal un dorwegen gemeennütt is ok de Vereen vun de Rüstungslobby. Natüürlich stöört de keen beten bi de Daagspolitik! Oh ja, wi weet: Ok wenn de letzte Deertenschuulvereen sien Gemeennüttigkeit verlaren hett, ok wenn sülvst dat Rode Krüüz nich mehr stüerbefriet is: De Parteistiftungen un Lobbys warr ehr Vördeel as allerletzt verleren!

Dat is mehr as de rosa Luftballon vunwegen Gender-Gliekstelln. Dat is Serienkillerie an de Zivilsellschap. Scholz missbruukt dorbi de Finanzämter as Wapen för sien Daagspolitik. De bruukt nich gemeennüttig ween, is dat ganz wiss nich, nee — man dat is ja sien Politik. Un dorbi schallt em kritische Ogen gefälligst nich op de Finger kieken un kritische Stimmen em in Roh laten. So denkt nich bloots Scholz, so denkt se all. Un swingt grote Reden över Demokratie.

Dat schulln wi ehr nich dörgahn laten.


14.11.19 ...En Luftballon

Un wedder mutt ik seggen: Wi bruukt de SPD nödig — al to'n Polit-Entertainment. Finanzminister Scholz will nu — mit een Oog schuult he op den SPD-Vörsitt, mit dat anner op en Kanzlerkandidatur — all reine Männervereens den Gemeennütt-Status un dormit den Stüer-Vördeel wegnehmen. Gifft ja anschienen noch Klubs, de prinzipiell soziale Telen hebbt un dorwegen stüerfrie sünd, avers keen Fruuns opnehmt. Mit düssen Vörslag fischt Scholz natüürlich ünner Feminist*innen. As wenn de em dorför wählen wöörn! Un dat is so dörsichtig: Klappen kann't sowiso nich, denn na dat grundgesetzliche Diskrimineerns-Verbot mutt denn ok reine Fruunsvereens de Gemeennützigkeit wegnahmen warrn; dat drippt denn tominnst een Vereen, in den ik Liddmaat bün. Dat wöör avers nüms versöken, de bi Verstand is. Du kannst Mannsminschen Fruuns opdrängen, avers nich annersrüm. Denn warrst nich wählt. Punkt.

Dat is also en bunte Luftballon, de schöön utsehn schall, bet dat he platzt.

Avers wat is mit de Vereens, 'neem Fruuns twoors as (tahlen) Liddmaten tolaten sünd, avers sünst nix to seggen hebbt? Will Scholz de Friemuurers, Moscheevereens, jüüdschen Kultusgemeenen un amenn de kathoolsche Kark an de Wäsch? Dat weer doch mal en lohnen Teel! Keen Liddmatenschap ahn Partizipaschoon (so heet dat hüüt, wenn een gliekberechtigt mitmaken kann). Avers dat is so'n dicken Happen vun'n Koken, dat Scholz den al wedder nich afbieten warrt. Op de Steertinknieperie vun de SPD is ja jümmers noch Verlaat.


31.10.19 ...De Redder

Ach ja, wedder dat leidige Halloween! Wat harrn wi uns höögt, dat de Briten hüüt Hals över Kopp ut de EU pultern wulln! Chips un Popcorn all torechtleggt! Dat Spitakel fallt nu ut. Hett nich klappt. Nix klappt. Vun de Klimareddung wüllt wi ja gor nich eerst snacken — man wokeen reddt intwischen t.B. mal de SPD? Schafft wi wenigstens dat? De hebbt dat tominnst so nödig as dat Klima! Un dat muttst ehr togestahn: Vele wulln sik as Redder*sche versöken. Veer sünd nableven (also 2 x 2). Schaad is ja, dat se Stegner nich hebben wulln. De Flunsch, den he treckt, de is doch anboren!! Dor kann de Mann gor nix för. Dorwegen hett he noch lang keen slechte Luun orr to wenig Humor — ganz in't Gegendeel, dat is en lustige Broder!

Naja, nu is de SPD nich to helpen, se wüllt dat nich. Un vun de, de se nu hebbt, kann ehr nüms helpen. Dat gifft bloots een, de ehr wedder ophelpen kann. Fiete Merz. En echte Weddergänger — de brukt sik to Halloween gor nich verkleiden, he mutt bloots sien Dodenschädel-Gesicht henhollen, un all Lüüd hollt Stegner för en echte Stimmungskanoon. Wenn Fiete Merz dat schafft an de Spitz vun de CDU — egaal wat in de Grote Koalischoon orr nich —, denn geiht dat de SPD foorts beter.

Man beleven much ik dat doch nich.


24.10.19 ...De Ingenieure vun de FDP

Sietdat de Klimakrise sik ok bi'n slechtesten Willn nich mehr översehn lett, is een Partei dorbi, dat Loffleed vun de Wetenschap to singen. Nee, nich dat Loffleed vun de Wetenschap, de al siet 30, 40 Johr vör jüst düsse Klimakrise wohrschuugt, sünnern vun de Wetenschap, de uns dor ruthülpt, ahn dat wi en Finger krumm maken mööt. De Wetenschap, de uns den Pelz blitzblank wascht, ahn dat wi ok bloots een Druppen Water afkriegen mööt. Wat dat düsse Wetenschap överhaupt gifft, is ehr eendoon — solang se bloots keen Finger krumm maken mööt. De Partei, Se ahnt dat al, is utrekent de Juristenpartei FDP, de nich för ehrn sünnerlich hogen Ingenieurs-Andeel beropen is. Desto höger is anschienen ehr Vertruun in de Ingenieurskunst. "Överlaat den Klimawannel de Profis!", tönen se Richt "Fridays for Future". Gegen dat (sowiso al windelweke) Klimapaket stänkert se: "Allens verkehrt! Rutsmeten Geld! Laat doch den Klimaschuul! Keen Mobilitätswende! Keen Energiewende! De Wetenschap warrt bald wat erfinnen, wat uns all Möhg erspoort! Innovation, Innovation!", so töönt se — un meent mit "Innovation", dat allens so komodig un rentabel blieven schall, as dat is. För ehr sülven. De Wetenschaplers dröfft geern de Drecksarbeit maken. Düt Mantra hett uns ganze Sellschap al meist so lang vör sik hen beedt, dat dat längst to laat is för de wetenschapliche Wunnertüüt. Niege Entwickeln bruukt nämlich Johrteihnte, ehrdat se ehr technisch Wirken in en Sellschap entfalten doot.

Jungs, so funscheneert Wetenschap nich, un dorför is se ok nich dor. Wetenschap hölpt ju, de Realität to verstahn; se levert juuch nich dat Alibi, dat ji juun Moors nich in de Hööcht kriegt un juun Levensstil nich ännern mööt. Wenn dat juuch dat Wichtigst is, is juuch nich to hölpen — vun keen Wetenschap in de Welt. Ji köönt ja avers achterna mit juristische Middeln gegen de Natuur vörgahn un ehr nawiesen, dat se verplicht is, juuch unbegrenzt kostenfrie allens to Verfögen to stelln, wat ji hebben un verjuxen wüllt. Veel Glück.


17.10.19 ...De Kotzbrocken vun de AfD

De AfD-Afordnete Brandner warrt — mit Recht — dorför angrepen, dat he en Tweet wiederleit hett, 'neem in stünn, "woso de Lü denn mit Karsen un Blomen vör Moscheen un Synagogen rümmerlungert, wo de twee Oppers vun Halle doch Düütsche weern". Nu hett he sik ok entschülligt — orr, as de Politikers dat so unsääglich doot, "distanzeert". Ik much geern nocheens ganz kloor maken, woso solk Sätz afsolut nich angaht: In Synagogen un ok in Moscheen sitt ok Düütsche. Dat Düütsche partu Christ*innen ween mööt, denkt de AfD wiss nich, avers Jüd*innen köönt för ehr keen "echte" Düütsche ween. Wokeen avers so denkt, steiht in de ideoloogsche Nafolg vun de Nazis. Punkt.


10.10.19 ...De Schann vun Halle

Över de Anslääg vun Halle kann dat keen twee Menen geven, dat is klaar. Aver nu kümmt Bundspräsident Steinmeier. He harr ja man eenfach seggen kunnt: "Dies ist ein Tag der Trauer für unser Land." Avers he hett seggt: "Dies ist ein Tag der Scham und der Schande für unser Land."

Wohrschuug, Herr Steinmeier! Wokeen schall sik schamen? De Deder, wisslich. Wokeen noch? De Polizei, de sik bi de Gefohrenlaag verdaan hett? Orr: All Düütschen?

Also ok de jüüdschen Düütschen?

För wat?

Mit düsse Wöör treckt Se, Herr Steinmeier, en Trennlinie dör uns Land. Natüürlich bruukt sik de jüüdschen Düütschen nich schamen. Se sünd ja de Oppers. De, de sik schamen schallt, stellt Se op de Siet vun den Deder. Apensichtlich ok sik sülven. Ik glööv Se dat, dat Se sik oprichtig schaamt. Man Se gaht biester. Sünd Se en Sympathisant vun solk Lü as den Deder west? Wiss nich. Se schaamt sik för uns Land. Düt is avers keen Kollektivverbreken, keen Staatsverbreken as de Holocaust. Also wat is de Schann vun Halle? Wenn Se de AfD-Inpietschers meent, köönt Se dat apen seggen.

Noch gefährlicher finn ik de Rull vun de Lüüd, de sik nich schamen bruukt. Dat sünd denn nämlich "de annern". Also "nich wi". Keen "richtige Düütsche". Denn "wi" — uns Land — schallt sik ja schamen. Dat deit nüms geern. Un wokeen hebbt wi dat to verdanken? De annern... To de much ik denn wiss nich geern hören. Wi weet, wat solk Minnerheiten passeern kann — wi sünd in Düütschland. Ja: Dat wi dat weet, wat passeern kann, dat is en Grund to'n Schamen. Ok hüüt noch un jümmer wedder.

Treckt Se keen Trennlinien, Herr Steinmeier. Nazitum un Rassismus is hüüt nich mehr "wi" un "uns Land". Wi sünd alltohoop op de Sied vun de Oppers. Wi schaamt uns nich för Nazis, wi hasst ehr. Schaam un Schann trennt Minschen. Truur verbindt Minschen! Düt is en Dag vun Truur, sünst nix.


29.9.19 ...Keen Wedderreed!

Wosaken kunn dat woll passeern, dat China so slecht op de Opstänn in Hongkong vörbereidt weer? Normaal harrn se de al in'n Anfang utspioneert un klookkregen, harrn dat dösige Utleverns-Gesett gor nich eerst anfungen, de Bewegen so den Wind ut de Seils nahmen, poor zentrale Figuurn verhaft un versleept (Utlevern geiht ja nich) un den Rest munddoot maakt. Bekannt woorn weer dorvun nix, al gor nich internaschonaal. Keen Luud. So funscheneert en perfekte Ünnerdrückens-Apparaat.

De vun China nich mehr. Un ik denk, dat kümmt, wieldat se ehr Macht to afsoluut hebben wulln. Dat gifft nüms mehr, de ehr seggt: Ji maakt dor wat verkehrt. Ji irrt sik. Ji gaht biester. — Wenn du solk Lü ok all een Kopp kötter maakst, is dat Biestergahn praktisch programmeert. De Diktatuur warrt dumm. Afsolute Macht is afsolute Dösigkeit. — Nix wöör mi mehr frein, as wenn Chinas Diktatuur ut düsse Fehlers ok wedder nix lehrt un gewaltig op de Nees fallt. — Wi mit uns lüttkareerte Demokratien mit dat vele Gezeter un Gekabbel un dat ganze Reden un Räsoneern sünd doch beter dran.

Avers hier arbeidt ja en poor Genies intensiv doran, ok de Demokratie dumm to maken.


17.9.19 ...Denkfehler in Bielefeld

Bielefeld, de arme Stadt, de to en fasten Witz worrn is, hett dat nu satt hatt, dat enerworrns de Lü grient "Hehe, juun Stadt, de gifft dat doch gor nich!" Se hebbt en Wettstried utschreven: De, de bewiesen kunn, dat dat Bielefeld nich geven dä, de schull 1 Millioon kriegen. Euros. Na, mennig Spaaßvagels hebbt sik an de Arbeit maakt, man natüürlich hett nüms wunnen, wieldat dat nich to bewiesen is; un nu hebbt de Stadtvadders un -mudders vun Bielefeld verkünnt, dormit weer de Existenz vun ehr Stadt endgüllig bewiest. Sogor en Denksteen hebbt se sett. Dormit is denn ja allens klaar, nich? — Ja? Nee!!

Dat is wirklich de eenfachste un billigste Denkfehler, den se maakt. Wenn en Saak sik nich bewiesen lett, is nich automaatsch dat Gegendeel wohr. Bewiest Se mi mal, dat dat Nessie nich geven deit! Köönt Se nich? Also gifft dat Nessie! — Dat is de Bielefellers ehr Logik. Un wenn ik behaupten do: Ik heff Buteneerdsche sehn, un in'n Eerd-Orbit kreist en rosa Koffikann, denn gellt datsülvige...

Dat gifft en ganzen Barg Saken, de een nich wedderlegen kann. Dormit sünd se avers nich bewiest. Dorto höört blangen Nessie un de rosa Koffikann ok so schöne Saken as Elfen, Engel un de leve Gott. Se all blievt ahn Bewies. Un so kannst driest wieder behaupten, dat dat Bielefeld nich gifft. Orr tominnst: keen Verstand in Bielefeld. Un dat Letztere is — dör ehr egen Tüffeligkeit — sogor bewiest.


14.9.19 ...Kandidatensöök

De US-Demokraten sünd op de Söök: Wokeen kann bi de neegsten Wahlen Trump slaan? En Mann, en Fru? — Nee, en Fru kann dat nich. Trump is doch en Männchen — he will sogor dat gröttste Männchen vun'e Eerd ween, de Eerdmännchen-King sotoseggen. Un wi all, de wi vör 1965 boren sünd, wi weet, dat de eenzige, de düssen Möchtegern-King Trump övermann is, Kalle Wirsch heet! He is de eenzig wohre Kandidat! Düsse Wiesheit geiht in uns Tied eenfach so verlaren! Worüm warrt de Augsborger Poppenkist nich as Plichtprogramm in de USA exporteert?! Dat wöör en Barg Möhg un Kosten sporen. — Nu mutt Kalle Wirsch bloots noch funnen warrn. Denn hett he exzellente Wahlchancen, denn he verbindt Integrität mit en spektakuläre roodblonne Frisur, op de de US-Wählers apensichtlich so scharp sünd.


11.9.19 ...Putin dankt

Soso, Benjamin Netanjahu hett ankünnigt, dat he düt, dat un ok sünst noch wat opneegst to Israels Staatsrebett toslaan will. Un he warrt dorwegen "stark kritiseert". Na denn. — Putin lacht sik eins. Wokeen kann nu noch mit Sankschonen drohen vunwegen de Annexion vun'e Krim? "Stark kritiseern" lett Putin sik gefalln, dat deit ja nich weh. Un de ganze restliche Opstand, de üm de Krim maakt woor? — Pah. In de Welt herrscht Anarchie, un jedereen deit, wat he sik leisten kann; mal mehr, mal minner, je nadem. Allens annere is Hüchelee. Dat is de Bott vun düt Hanneln — vun dat coole Ankünnigen tovör — un ok vun de Kritik.

Wi schulln uns Mallorca ünnern Nagel rieten, ehrdat en anner dat deit.


3.9.19 ...Na de Wahl

In de Nedderlaag wiest sik de Charakter, heet dat. So ok bi de Partein, de Wählers verlaren hebbt. De Lü wulln düsse Partein, wulln ehr Programm nich hebben. Wat seggst nu, wenn du so'n Partei büst?

Dor hebbt wi etwa de Linkspartei. Se hebbt de Methode "Erfolganbeterie" wählt un laat ehr Programm, dat se betherto hoochhollen hebbt, falln as en hitt Kantüffel — as weern se de ganze Tied biestergahn. "Wi hebbt verstahn, wat de Wählers uns seggen wüllt! Wi warrt uns ganz nieg opstelln!" Dat is keen Verraat an ehr Övertügen; dat is en Nawies, dat se gor keen Övertügen hebbt. Düsse Partein leggt ehr Programm as en Woor in't Schaufenster; dor liggt jümmers dat, wat de Lüüd geern kööpt.

Anners maakt dat de FDP. Bi ehr weer dat ja noch richtig, wenn se ehr betherigs Programm kumplett över Bord smieten wöörn; avers se wiest en Ansatz vun Charakter, sett sik hen un seggt: "Wi blievt dorbi; wi sünd vun uns Programm övertüügt." Na dat is doch mal wat. Un denn seggt se: "Man wi kunnen dat de Wählers nich richtig vermiddeln." In'n Klaartext: "Leider weern de Lü to dösig, to kapeern, wo basig wi sünd." Dat nöömt sik de Methode "Publikumsbeschimpfung".

Ganz selten mal kriegt wi de Methode "Luther" to sehn: "Hier stah ik, ik kann nich anners." Konsequente Övertüügte, de cool de Folgen hennehmt. Kennt se een?


25.8.19 ...Dat Plastikproblem

Överall fallt Plastikmüll an. "Warrt wi dat Plastikproblem jemalen in den Griff kriegen?", fraag annerletzt en Journalist in't Kiekschapp. Dat klingt, as weer dat en Süük as Kreevt, siet Johrhunnerte nich uttorotten, orr sowat deep Verwötteltes as de minschliche Egoismus... Hallo? Wo lang hebbt wi dat Plastikproblem denn?! In de 1970er, as ik Kind weer, harrn wi keen. Un wi hebbt good leevt. Dat weer överall mööglich, sünner Plastik uttokamen. Is nüms bi doodbleven. Wat hinnert us, trüchtogahn na de 1970er Johr un unsen Levensstandard dor? Na good, utnahmen dat Internet. Man anners wöör ik nich veel missen. Wi kunnen doch eenfach mal verzichten un... äh... kunnen wi...?

Ik glööv, dat Plastikproblem is doch deep verwuddelt. As de minschliche Egoismus.


20.8.19 ...De SPD hett keen Problem


Nu mutt ik dat ingestahn. Ik heff annerletzt bi de SPD Sleswig-Holsteen nasurft, ik heff sogor nakeken, wat een dor intreden schull. Nich dat ik dorto entslaten weer. Kannst ja mal kieken. Jichenswat mutt een ja doon in uns Tied, un ik tööv jümmers noch op de Bewegung, Grupp orr Partei, de mi rümmerkriegen kann. Avers dor harr ik mi keen Sorgen maken müsst — de SPD sülven bewohrt uns vör solk Fehlers. De Intreden-Siet is dood. Angeevlich is de Server dal. Wat he woll ünner de velen Anfragen to'n Intreden tosamenbraken is?

Dat is so siet tominnst dree Daag. Dor heff ik dat sehn. Un ik heff ok an de Lü mailt, dat dat dor nich flutscht. Nix is passeert. Is allens noch so.

Düsse Partei kann keen Probleem hebben. Bloots sik sülvst.


19.8.19 ...Hassverbreken

Hassverbreken sünd dat Slimmste hüüt. Gegen Hassverbrekers sünd normale Verbrekers reine Engel. Un wat is en Hassverbreken? Wenn een hasst? Is dat Geföhl al dat Verbreken? Sünd wi denn al ünner Orwells Gedankenpolizei un begaht Gedankenverbreken? Orr is de Hass dat besünners verwerfliche Motiv achter en ganz normaal Verbreken? Etwa Moord? Is also en Moord ut, seggt wi mal, Gier minner slimm as en Moord ut Hass? Wenn ik den Arvonkel üm't Eck bring, ümdat ik sien Penunzen krieg, is dat okay; wenn ik em afmurks, wieldat ik em hassen do, bün ik dat Achterletzte. Is dat so?

De mehrsten Hassverbreken warrt angeevlich in't Internet opfunnen. Dor hannelt sik dat denn üm potenzielle Pöbelien, Bedrauhn, Beleidigen usw. — eentlich noch keen swore Verbreken. Man de Hass as Motiv maakt ehr slimmer as allens. Dorwegen gifft de Staat dor sien Tostännigkeit ok af, so köönt private Internetfirmen gegen düsse Verbreken vörgahn, ja se mööt dat sogor, se mööt Task Forces insetten un löschen, wat dat Tüüch hergifft. Man bloots de ut Hass! Beleidigen un Bedrauhn ut persöönliche Motive, in koolt Bloot orr as reine Provokaschoon — de dröfft se stahn laten. Orr mööt se?

Ik denk ja, Hass gifft dat eentlich gor nich, dat is allens Angst un Swackde. Man dat föhrt hier to wied. Ik much nu geern weten: Wat passeert eentlich mit Verbreken ut anner Geföhle? Wat is t.B. mit de Verbreken ut Gliekgülligkeit? De Gliekgülligkeitsverbreken, dat is en wiedes Feld, dor bruukt wi nödig en Task Force! Un de Egoismusverbreken, na dor kiekst di avers üm! De Gedankenpolizei mutt utswarmen! — Een Glück hebbt wi noch keen Sensoren to'n Gedankenlesen in'n Bregen. Man China arbeidt wiss as verdull dor an.


18.8.19 ...Mien Hart is in Hongkong

Dat mutt ik togeven: Mien Hart is düsse Daag mit de Hongkonger Bevölkern, de de Wörgslang vun de Diktatuur üm ehrn Hals spöört un langsam an sticken warrt, wenn se todrückt. Se whert sik noch! Se wehrt sik vertwievelt, dat geiht üm ehr Leven.

De chineesche Diktatuur is de Gewaltherrschap vun morgen: Gewalt sülvst, de ole, physische Gewalt, warrt meist nich mehr utöövt; dorför warrt nipp för sorgt, wat de Lü to denken un to weten kriegt. De Minschen warrt in eensento bregenwuschen, se warrt in ehr egen Köpp regeert — so warrt se gor nich mehr wies, dat se nich frie sünd. China hett vullendt, wat de Nazis dröömt hebbt. Un mit de Digitaliseern hüüt hebbt se en kumplette "Gedankenpolizei" inclusive Belohn- un Straafsystem; de Minschen warrt dresseert as Rotten in't Labyrinth.

De Hongkongers ehr Ogen sünd noch apen; se seht dat; se seht, wat sik üm ehr tosamentreckt. Un in de chineeschen Staatsmedien (un anner gifft dat dor nich mehr) warrt se slechtmaakt un verleumdt. Woso kann de so nöömte "frie Welt" (en beten frier as China sünd wi noch...) nich för sorgen, dat de Chinesen de Wohrheit över de Proteste to weten kriegt? Wieldat uns Regeern to feig sünd. — De Hongkonger Demokraten fecht hüüt den Stried ut, den wi morgen utfechten mööt. Wat för'n Höpen kann dat op lange Sicht för ehr geven? Ik höp as verdull, dat se den Stied winnt.

Un wenn se verleert, dat se bi uns Asyl findt.


4.8.19 ...Ethische Säuberung

Uns Städer sünd histoorsch wussen. De Straten — un ok Buwarken, Unis etc. — draagt faken de Naams vun Minschen, de to de Tied, as de Straten anleggt woorn, beropen orr hooch ansehn weern. Tomehrst sünd dat Mannslüüd, wat mennig Minschen nich good finnt; man histoorsch kaamt wi ja ut patriarchalisch Tieden. Dat Ansehn vun de Stratennaamspaten hett sik in'n Tiedloop mennigmaal ännert. Mennig grote Naams vun fröher sünd hüüt eenfach unbekannt. Man för en poor gellt: Wokeen fröher beropen weer, is hüüt villicht verropen. Dat is en Problem. Denn geiht dat an't Ümnömen.

In Berlin schallt nu wedder Straten ümnöömt warrn. De Petersallee t.B. schall Anna-Mungunda-Allee heten, en anner Afsnitt Maji-Maji-Allee. Ok Lüderitz un Nachtigal schallt ut de Stratennaams verswinnen. Se all weern Vertreders vun't europääsche Kolonialregime in Afrika — Militärs un Rassisten. De niegen Naams schallt Oppers un afrikaansche Börgerrechtler*sche in'n Vörrergrund rücken. Fiene Saak, oder?

Ja, solk Ümnöömen is en Teken, dat de moraalschen Maatstääv vun de Minschheit jümmers beter, ansprooksvuller warrt. Rassisten un Ex-Nazis rut ut den apentlichen Naams-Ruum! Bloots noch astreine Stratennaams! Dat is en Aart Säuberung — ethisch, nich ethnisch. Ik heff dorbi Buukgrimmen. Denn wokeen is de Maatstääv vun de Tokumst wussen?! All de Minschen, de nu tilgt warrt, weern to ehr egen Tied moraalsch vull in'n "grönen Beriek". Dormalen weer dat normaal, antonehmen, dat "de Neger" beten wat Minners weern as "wi". Meist jedereen dach dat. Dat Militäär woor verehrt — allns annere weer nich anstännig. Pazifisten söökst dormalen meist vergeevs. Naschonalismus weer överall begäng, in jedeen Naschoon. Dat weer dormalen dat politisch Korrekte! De Stratennaamspaten weern Kinner vun ehr Tied. So as wi Kinner vun uns Tied sünd. Wat för grote Ümnööm-Akschonen höllt de Tokumst för uns praat?!

Dat warrt so lopen: Eerstmal warrt all de Lü utstreken, de keen Feministen weern. (In en deep patriarchaalsche Tied en harte Anfordern, ok an Fruuns!) Dat bringt sachs all de Goethe-Straten to Fall — un mennig annere. Se warrt dör politisch korrekte Fruuns ersett. Jedereen, de mal en antisemitischen Anfloog wiest hett, is al lang rut. Man nu fleegt ok noch de rut, de mal Schwulenfiendlichkeit wiest hebbt. Oha! Dat Wark vun all Dichters mutt nipp dörkämmt warrn. Ehr Naams warrt dör de vun feministische, antirassistische Schwulenaktivist*innen ersett. — De neegste Generaschoon, de üm 2050, hett ehr Maatstääv avers wieder verbetert! Nu is Ümweltschuul un Vegetarismus Staatsteel. Plopp, fleegt all de Naams vun Lü rut, de keen Vegetariers orr Deertenrechtlers weern. Leider mööt denn ok welk Humanismus-Leuchten vun fröher — ok Anna Mungunda un en poor Schwulenaktivisten — wedder Platz maken, denn se hebbt nawieslich Fleesch eten orr sünd mal Fleegtüüch flagen. Ja, ok de Hilligen vun fröher fallt nu dal! Se warrt dör de Naams vun Lü ersett, de dör all Epochen vun de Geschichte nienich "Kinner vun ehr Tied", sünnern al jümmers Demokraten, Antinaschonalisten, Antifaschisten, Pazifisten, Feministen un Vegetariers weern. (All Beteknen natüürlich m/w/d [also männlich, weiblich, divers].) De neegste Generaschoon hett noch härtere Anfordern...

Wi söökt also Minschen, de jümmers al wüsst hebbt, wat in Tokumst richtig is — Lü, de de eenzig richtige Menen jümmers hatt hebbt. Sünd Se een? Orr kennt Se tominnst welk? Wo kannst de an kennen? Mi dücht, an den Wiesfinger: se loopt nu al mit'n utreckten Wiesfinger rüm.

Ja: Nazis un Kolonialisten un Antisemiten, dat sünd allns Kotzbrocken. Man ik kann mi nich vörstelln, dat de Beterweters moie Tiedgenossen sünd.


3.8.19 ...Floogschaam

"Floogschaam" is de niege Beteknen dorför, dat welk vun de fleeglustigen Tiedgenossen langsam dämmert, dat dat ok dat een orr anner Probleem mit de Flegerie gifft. "Floogschaam" bedüüdt avers ok, dat se sik mit mehr orr minner slecht Geweten doch wedder in de Slang bi'n Floogschalter anstellt. Is komodiger, geiht fixer, un överhaupt, schallt doch de annern anfangen! — Wat nütt dat, wenn sik blangen dat Bewusstween nix ännert?!

Ik ligg op mien Dackterrass un kiek in'n Heven. Dor baven duukt en witte Punkt miteens ut dat Loof vun mien Pappel op, flüggt langsam vun de Pappel na den Bargahorn röver un verswinnt in dat Loof vun den Bargahorn. En Fleegtüüch. Vull mit Minschen, de sik schaamt, un solk, de sik nich schaamt, un solk, de dat eendoon is. Un all fleegt. Ik ligg hier nerrn ünner mien Bööm un bün vullkamen glücklich. Dat gifft keen Steed op de Welt, 'neem ik henmutt, an de een bloots per Fleger kamen kann. Un dat gifft keen Minschen, den ik benieden do. Ji all wüllt jichenswo hen, ik nich. Dat Leven is herrlich. — Wat glöövt ji wohl, is en Leven sünner Flegen mööglich?


28.7.19 ...Grimms Märken in't Morgenland

In dat Märken vun de "Göösmagd" (dat is dat Märken mit Falada, dat Peerd) mutt an'n Sluss de böse falsche Bruut en Urdeel spreken: Wat schall mit de passeern, de düt un dat maakt hett? — De Böse erkennt nich, dat vun ehr sülvst de Reed is, un verhängt en gresig, ja sadistisch Straaf.

Dat is nich antonehmen, dat Grootbritannien sik nich klaar is, vun wokeen se snackt, wenn se nu över de"Piraterie" vun Iran klaagt. Se denkt bloots, dat se dormit dörkaamt. Un dat warrt se sachs ok. Denn Grootbritannien is dat west, de toeerst en iraanschen Tanker fastsett hebbt, nämlich de "Grace 1" an'n 4. Juli vör Gibraltar (in britische Hoheitsgewässer). Angeevlich harrn se den Verdacht, de Tanker schull Ööl entgegen bestimmte Sanktionen na Syrien levern. Dat is windig. (Un dat weer noch nich mal de bekloppte Boris Johnson! Wat nu woll noch kümmt?) Prompt hett sik Iran in den persschen Golf en britisch Schipp snappt un ganz slicht en Tuusch anbaden. Geiseltuusch. Logisch, nich? Wat hebbt de Briten denn verwacht?! — Nee, dat is nu "maritime Terrorismus" un "Piraterie"! Wat de Iraners maakt natüürlich. Bloots dat. Wat de britischen (Ex-)Koloniaalherrn vun de halve Welt doot, is ehr egen Saak, dor hett nüms rintosnacken. Man en europääsch Strietmacht schall nu opmarscheern, wenn sik so en Stackelstaat as Iran truut, datsülvige to doon. Un de CDU is ok al wedder Füer un Flamm dorför. För wo dösig wüllt de uns verköpen?!

In't Märken mutt de Böse de Straaf, de se ehr egen Doon tometen hett, wirklich antreden. Ik glööv avers keen Momang, dat so en "europääsche Schutzmissioon" sik ok gegen de Briten wendt un iraansche Geisel-Scheep liekso as britische Geisel-Scheep friesett. Sowat gifft dat — liek as snacken dode Peer — bloots in't Märken. Sogor wenn se sadistisch sünd, sünd Märken noch gerechter as de Welt.


22.7.19 ...Uschis Multi-Kulti-Trupp

Wokeen much nu sachs geern in Ursula von der Leyens Huut stecken? Se mutt ehr Regeern billen, ehr Kommischoon; man dat dröff se gor nich sülven doon. Jedeen Land schickt ehr sien Kandidaten för den Kommissarsposten, de dat Land tosteiht. Dor töövt se nu op. Uschi hett also sotoseggen en "blind date" mit 28 Lü togliek, de se nich kennt un tomehrst nich versteiht (bloots över Ingelsch orr Dolmetschers), de sik deelwies politisch gor nich gröön sünd, ut ganz konträre ideoloogsche Lagers stammt, ja de deelwies ok Uschis egen "Programm" aflehnt, sik dwarsleggt — ok en Brite/en Britin warrt vöreerst noch dorbi ween! — un mit de se in de tokamen fief Johr nix Ringers stemmen schall as de Welt to redden. Super Job, echt.

Wenn Uschi Pick hett, sünd dat wirklich allens Kandidaten, keen Kandidatinnen; ehr breedspurig Verspreken, de Kommischoon fifty-fifty mit Fruuns- un Mannslüüd to besetten, is eenlich en Bittgang an de 28 naschonalen Regeern, ehr doch bitte Fruuns to schicken. Wenn nich, kann se nix maken. Bloots veer Länner wüllt bet nu seker en Fru schicken. — De Lü trüchwiesen kann Uschi normal nich; dat kann avers dat Parlament. Ja: Uschi schall düssen bunten Multi-Kulti-Hupen an dat Parlament verköpen as "ehr" Kommischoon, ehr Regeern also (ok wenn dat gor nich ehr egen Wahl is); avers de Parlamentariers doot liekers mit de enkelten Kommissarkandidat*innen noch dat, wat in de USA "grillen" orr "rösten" heet: se nehmt se enkelt in't Krüüzverhör, un wenn ehr wat nich passt, warrt de Kandidat*in trüchwiest. Oder glieks dat ganze Team. Batz, sitt Uschi dor. Na'n Tied kriggt se wedder wen anners vörsett — un kann opnieg dormit anfangen, de ganze Melange to en Team tosamentobinnen. Un dat kann sik hentrecken as bi Sisyphos. Dat Parlament hett mit de naschonaaln Regeern noch en Reken apen. Kann ween, dat Uschi dat utbaden mutt. Kann ok noch ween, dat se bi't Baden verdrinkt.

Schöne Badeferien, Uschi.


12.7.19 ...Probleme vun morgen

Ik heff en Patenkind vun de "Kinnernoothülp", de lütte Bridget in Uganda. En supersöte Deern, jüst söven Johr, geiht dank de Kinnerpatenschap to School un allens. Un se hett ok Süstern un Bröders: negen Stück. En ganz normale Familie dor. Bridget will ok mal so en Familie hebben. Un ehr Öllern sünd noch jung; se hebbt dat Kinnertügen noch lang nich instellt...

Ja, Afrika verduppelt sik in de neegsten Johrteihnten. Dat is en Problem för uns all. Een Bridget is en Schatz, een Millioon mehr Bridgets sünd en regionales Probleem, un een Milliarde mehr Bridgets sünd en Katastrophe. Nich verwesseln: jedeen enkelte Minsch is jümmers noch en Schatz, jedeen enkelte kiekt di as Mitminsch in de Ogen. De Milliarde nich. Dorbi sünd de Bridgets noch nich mal so en Problem as ehr Bröders. De hebbt nämli nix to doon. In vele Länner op de Welt. Fruuns hebbt ja jümmers wat to doon, sünnerlich solang dat Mannslüüd gifft — de maakt ja Arbeit un Dreck, mööt achterherrüümt, eit un pleegt warrn. Man de jungen Mannslüüd sünd mennigmaal eenfach över — un wi seht ehr wedder in de Utwannererbööt op't Middelmeer. Flucht mag ik dat nich nömen, solang de Fruuns dat in de Länner uthollen köönt.

Un to allens dat kümmt opneegst noch de Klimaverännern. Wat schallt de Jungs ok maken?! So sünd vör 100, 200 Johr ok ut Europa de Lü utwannert. Liekers mutt Europa natüürlich wat dorgegen maken, un twoors hoochnödig. Dat geiht bloots in de afrikaanschen Länner sülvst. De Politikers dor hebbt dat noch nich kapeert. Nawiest is: Fruuns stärken un Deerns utbillen, dat is dat Allerbest, dat de Bevölkern minner wasst. Ik denk, in 10, 15 Johr, wenn se orrig wat lehrt hett, will Bridget ok keen 10 Kinner mehr...

Un de Jungs in de Bööt? Dor is dat to laat, kannst nix mehr maken as redden. Wenn Se Twievel hebbt, wat dat richtig is, de Lü to redden, denkt Se sik eenfach, dat de Lü in dat Boot keen dunkelhüütige Ungebildete weern, sünnern — blonde, witthüütige Akademikers. Un wenn Se dor en Ünnerscheed maakt, hebbt Se wat to'n Nadenken.


4.7.19 ...Schöne Schiet

O Gott, Flinten-Uschi kümmt na Brüssel! Wenn se dor al so wied dal sünd, maak ik mi wirklich Sorgen. Un Manfred Weber hebbt se wohraftig vun vörn un achtern lackmeiert. — De SPD is ja ok dorgegen. Womit kann Mama Merkel ehr wedder begöschern? Etwa mit dat Verteidigungsministerium? Ha! De SPD is twoors in'n Sülvstterstörensmodus, avers so dull nu ok nich! Nüms, de noch bi Vernimm is, will doch de Opsicht över den naschonalen Schrotthupen Bundswehr!

Laat Weber dat doch maken! Denn is he nich bloots vun vörn un achtern, sünnern ok vun baven un nerrn lackmeiert. Man he is en CSU-Mann; de SPD warrt dat gefalln, so hett se endlich ok mal wedder wat to lachen. As wi all. Denn de CSU — un bloots ehr — is dat tototruun, dat se sik ok denn noch wichtig föhlt un maakt.


30.6.19 ...Schöne düütsche Nedderlagen

Geiht dat mit Düütschland bargdaal? Ach wat. Naschonale Loyalität geiht bi mi nich wied. Wi sünd nich mehr Papst, wi warrt (siet gistern Avend) nich mehr Footballweltmeester, un EU-Kommissioonspräsident warrt "wi" nu ok nich. Un jedeenmaal, finn ik, is dat en düüdliche Verbetern! Franziskus is beter as Ratzinger, över de Leistung vun de düütschen Football-Deerns gistern wüllt wi mal eerst gor keen Woort verleren — un Frans Timmermanns is en veeeel betere EU-Kommissioonspräsident as Weber. Ik höp, he warrt dat.

Jedeen Job maakt de Beste, dat weer doch en schöne Welt. Man bloots, dat wi ok dat Footballspelen de annern överlaten mööt — dat kunnen wi ja mal wedder ännern.


21.6.19 ...Kuunhahn à l'Iran

De Bombers weern al in de Luft; man denn hett de gnädige Herrscher ehr trüchfleit't, wieldat em de velen Doden duurn dään, de dat geven harr. So is de Legenn, de Donald Trump hüüt vun sik in de Welt sett hett, as he angeevlich den Angriff op den Iran hett afbreken laten. He kann Dusende Iraners bombardeern un starven laten, o ja, dat kann he; un he kann ehr begnadigen, so as hüüt; so as de Präsident an Thanksgiving tradischonell en Kuunhahn begnadigt un nich braden lett. Un so as de begnadigte Puter schallt sik de Iraners ok föhlen; se schallt bevern, noch lang, un Donald Trump mit bevern Lippen de Fööt küssen.
Un dat allens vunwegen den Afschuss vun en unbemannte Drohn! En Drohn, de hööchstwohrschienlich wirklich in den iraanschen Luftruum rümmerflagen is — so kennt wi doch de US-Drohnen, nich?

Düsse widerliche Scheinhinrichtung — denn dat weer dat, wat Trump dor inszeneert hett — is keen Politik un keen Krieg mehr, dat is de pure Macht-Gestus. Anner Minschen bit op de Knaken verfehren, ehr wiesen, dat du ehr Leven in dien Hand hest un ehr jedeen Momang terquetschen kannst as en Mier. An solk perverse Veranstalten hett bloots en gewisse Aart Lü Spaaß: impotente ole Kotzbrocken, de anners keen mehr hoochkriegt. Leider warrt de Welt vun düsse Aart regeert. Se süht ok dorna ut. Dat mutt endlich en Enn hebben.

Alleen dat wi uns dor Gedanken över maakt, is doch en unwördig Reverenz an düsse obszöne Macht. Wi schulln uns Gedanken lever op veel wichtigere Themen richten. Mien Hart is opstunns bi de Minschen in Hongkong. Wat se nu beleevt, dat kann uns in wenig Johren bevörstahn: Se verleert ehr Heimat, nämli den Rechtsstaat. Dör en anner Aart vun schiere Macht warrt se langsam strangeleert. Se mööt villicht utwannern. Man noch kämpft se.

So vele Minschen hebbt en Metz an de Kehl. Ik bün op ehr Siet — to dusend Perzent.


14.6.19 ...Hollywood, bitte övernehmen!

Is dat nu al en Foortschritt? Fröher, vör poorhunnert Johr, woorn Kriege ganz ungeniert anfungen: Wokeen Lust harr, greep sien Gegner an — un güll bi allens dat as Held un tapfere Strieder. Dat hett sik ännert: Hüüt warrt nich mehr ungeniert Krieg anfungen, sünnern — naja, even geniert. So'n muntere kriegslüstern Angriep geiht nich mehr, dat mutt na Verteidigung utsehn — de anner mutt schuld ween. Överhaupt, Kriegslüsternheit is keen Döögd mehr; hüüt muttst de Traan in't Knopplock dragen, wenn du en Krieg anfangst — un wenn't en Krokodilstraan is. Muttst hüücheln. Dat is de Foortschritt. De ganze.

Jümmers noch warrt Kriege anfungen, un jümmers noch grippt normalerwies de Stärkere den Swäckern an — orr de, de sik betere Schangsen utrekent, den vörutsichtlichen Verlerer. Wenn Se de Iran weern, wöörn Se dat mit de USA opnehmen wulln? Dat weer Sülvstmoord. — Naja, annersrüm is't ok nich to verstahn; avers keen Sülvstmoord. To verstahn is dat allens nich, so un so nich, un ik mutt seggen, wenn de so nöömten Video-Bewiesen, dat de Iran de Ööltankers in'n pers'schen Golf saboteert, — also wenn dat mal wedder "alternative Fakten", vulgo: Fälschungen sünd (un wokeen vun uns erinnert sik nich an den armen, loyalen Colin Powell, de sik wünn vör Schaam, mit de plump improviseerten "Bewiesen" gegen Saddam vör'n UN-Sekerheitsraat en Krieg to verlangen?), denn kann ik de US-Regeern bloots raden, mal vun de US-Oost- an de Westküst to fohrn. Dor gifft dat en Stadt mit Naam Hollywood, un dor leevt Profis, de kennt sik mit alternative Fakten vun Beroops wegen ut. De maakt di de schöönsten, afsolut authentischen Trickvideos vun böse Iraners un fiese Haftminen — echter as de Wirklichkeit! Ok den ganzen Krieg köönt ji dor bestelln, fertig simuleert un dörchtrickst. Trump kann dor sogor dat Gesicht vun, seggt wi mal, 60% Bruce Willis un 40% George Clooney kriegen. Denn kann he ok veel beter de Kummertranen hüücheln üm den Freden. Wenn dat denn wirklich so is. Meist wunner ik mi över mi sülven, dat ik tendenziell den Iran ehrder glööv as Trump. Avers in Wohrheit gor nüms. De USA, uns Verbündte, köönt sik dorför bi sik sülven bedanken.


10.6.19 ...Afstiegskampf

Oh, ik weet, dat is so billig, düsse Vergliek, avers de SPD is nu mal de HSV ünner de Partein. Wenn dat Geschäft för all gliek slecht löppt, maakt de SPD dat Slechteste dor ut. Mit düt Talent sünd se boren, avers dat maakt ehr liekers nich glücklich. Dorwegen wesselt se ehr Trainers liek so faken as de HSV... Nu bruukt se wedder een, un dat is doch klaar, dat Bruno Labbadia kamen mutt — as niege SPD-Vörsitter. He mutt ehr vör den Afstieg retten! Labba kann Afstiegskampf.

Och, ik heff vergeten, de SPD-Vörsitt is veel slechter betahlt as de Trainerposten... Tje, de SPD is even noch slechter dran as de HSV — se is de Loser ünner de Losers.


30.5.19 ...Enn vun de Volkspartein?

Dat lett so, as weern wi in en niege mathematische Phase in de Binnenpolitik kamen. Dat gifft opmaal en Regel so as: Je "Volkspartei", desto minner Profil, desto minner Wähler, desto minner Volkspartei, desto mehr Profil usw. Dat kannst ok so formuleern:

Profilscharpde · Parteiengrött = const.

"Wi mööt weg vun den Gemischtwarenladen, 'neem dat jichenswie allens för all gifft", seggt ok de neddersässsche Ministerpräsi Stephan Weil över de SPD. Dat heet, se sünd nu in de Phase, 'neem se al so wenig Wählers hebbt, dat se ehr Profil wedder scharpen köönt — orr mööt: Denn winnt se wedder mehr Wählers. Bi de Grönen sleit dat Pennel jüst in de anner Richt — Richt veel Wählers un Gemischtwarenladen. Woneem sünd de Tieden, 'neem de gröne Parteidag Petra Kelly attackeert hett, wieldat se an ehr Süster in de USA wohraftig Luftpostbreven schreven hett?! Oh ja, dat weer al dormalen kloor, dat Flegen en swore Sünn is — avers dormalen, Äonen is dat her, hett de gröne Fundi-Partei dat ok noch radikal bekämpt! Hüüt is bloots en Schullertucken nableven, un dat Krüüz bi de Grönen maakt den Wahlzedel to'n Aflasszedel för de hippen Veelflegers vun hüüt... "Wenn der Wahlzettel im Kasten klingt, die Seele aus dem Klimawandel springt"... Leider bloots de Seel. — Ja, de Grönen sünd op den Weg Richt profillose Volkspartei, 'neem de SPD jüst herkümmt.

Pennelt dor wat üm en Liekgewicht? Nu, en Liekgewicht mutt dat nich ween, ok penneln mutt dat nich — mennig lütte Partein verharrt in een Tostand; dat sünd de Övertügensdeders, de nich op de Jagd na Mehrheiten sünd. Bi ehr is even in de Glieken "Profilscharpde · Parteiengrött = const." de Konstante "const" teemlich lütt. Aver ik fünn dat gor nich slecht, wenn sik de Mehrheitsjägers periodisch anpassen mööt. Dat heet, Volkspartein — Gemischtwarenläden — warrt dat jümmers (wedder) geven. Man nich jümmers desülvigen.


19.5.19 ...Narööp

Okay, de rassistische Argumentaschoon haugt nich hin. (Dat is blangenbi ok wat, wat de Rechtspopel sik achter de Lepen schrieven kunnen — sünnerlich wenn sik de Rassismus mal gegen se sülvst (as Öösterriekers) wennen deit.) Dat liggt also nich an't Öösterrieker-Ween, ok nich an den Akzent (so ganz övertüügt bün ik dor noch nich...), dat liggt an de Gesinnung à la "Keen Macht för nüms, bloots för mi en beten" un "Law and Order för all, bloots för mi nich". Nu warrt düsse Gesinnung all "rechtspopulistische" Minschen ünnerstellt. Is dat nich ok wat Rassistischs? Gifft dat villicht ok anstännige Rechtspopel? Hallo? Bitte mellen!

Op jeden Fall much ik Strache & Co. op ehrn Weg na den Müllhupen vun de Geschichte noch twee Wöör naropen. Dat een is oolt un kannst ok singen:

Üb immer Treu und Redlichkeit
bis an dein kühles Grab
und weiche keinen Finger breit
von Gottes Wegen ab!

Dat anner is minner moralisch, mehr wat pragmatischer un moderner. Een vun de Google-Grünners hett över uns moderne Tied mit de allgegenwärtigen Medien un Multiplikatoren seggt: "Wenn du nich wullt, dat wat bekannt warrt, denn do dat eenfach nich!" Bekannt warrt hüüt nämli allens. Tja, to laat nadacht, Herr — äh — ik heff den Naam al vergeten.

Avers Öösterriek is un blifft en Operettenstaat!


18.5.19 ...Sooo fies!!!

Nu segg ik mal wat Rassistisches. (Hüüt warrt dat nämli "rassistisch" nöömt, wenn een en ethnische Grupp rünnermaken deit.) Also: Wenn ik al so'n Öösterrieker snacken hör, so mit ehrn Akzent, dor weet ik al, nie un nimmer köönt dat seriöse Lü ween. — Na, un wenn denn rutkümmt, dat so een en waschechten Kriminellen is, denn överrascht mi dat keen beten. So as nu bi den Rechtsbuten Strache un sien Adlatus, de stantepe ehr Land un den Rechtsstaat (un villicht ok noch ehr Grootmoder) an en russ'sche Oligarchin verköpen wulln — för Swattgeld un Wahlkamphülp. Dat is nipp un nau dat, wat mi de öösterrieksche Akzent al tovör mitdeelt hett: So sünd düsse Lü. Schubberjacken. Windig bet op de Knaken. Wenn een dat Video ankiekt, woneem Strache den kedensmöken Proll in't Ünnerhemd gifft, un denn noch den öösterriekschen Akzent dorto — dat is meist to veel, is dat. Unglöövhaftig. As en slechte Schauspeler. Un doch wohr! Tu felix Austria, menti!

Avers de Öösterriekers hebbt ok Levensart, un de besteiht tomehrst dorin, dat dat to allens noch en Klacks Sahne bavenop gifft. In düssen Fall weer de Sahneklacks, dat desülvige Strache sik vör de Press stellt un beklaagt, wo gemein se mit em ümgahn sünd, dat se em Gelegenheit geven hebbt, sien Gemeinheit to wiesen. So fies!!! Un dat Slimmste: De Russin weer gor keen Oligarchin. Rinleggt hebbt se em, dör Bedrug hebbt se em togeven maakt, dat he en Bedreger is! Dorför gifft dat bloots een Woort, un Strache kennt dat: Perfidie.

Applaus! Wi Sleswig-Holsteners hebbt ja en Hart för de perfiden Saftigkeiten ut dat politische Gruselkabinett, wi weet so en Glanzstück to wördigen. Nadrag: Nu hett sik de öösterrieksche Präsident mit den holländschen Naam van der Bellen mellt mit de Bott: "So sind wir nicht! So ist Österreich nicht!" Hach ja, en frame Wunsch. Wat kann Öösterriek retten? Villicht en beten mehr Holland, en beten mehr annere un frömde Lü, en beten mehr Globaliseern?


6.5.19 ...Bunt Völkchen

Hamborg, du hest dat beter. Mien Schatz is Hamborger, un he hett mit sien Wahlünnerlagen en Musterstimmzedel för de Europawahl kregen (för de Bezirkswahl ok, de is noch dicker). Jungedi, de maakt Moot! 40 Parteien, nipp dörnummereert, elk mit 10 Naams op de List. Ja, de Demokratie leevt. Sünnerlich mang de högeren Nummern. (Vörn sünd de öövlichen Verdächtigen.) Op Platz 13 steiht t.B. de "Familienpartei Deutschlands" — all 10 Kandidaten sünd Männer. Se maakt de Politik, üm de Familien kümmert sik ehr Fruuns. Dor weet wi doch, wat vun de to verwachten is! Ok de Bayernpartei kannst wählen; se hebbt immerhin 2 Fruuns op de List kregen.

Noch mehr as de Demokratie manifesteert sik de düütsche Vereinsgeist in den Wahlzedel. Jedereen beackert sien Blomenpott. Kommunisten, Marxisten-Leninisten un de "Sozialistische Gliekheitspartei (4. Internaschonale)" gifft dat in mehrere Varianten, sotoseggen för jeden Smack een. Noch fienere Ünnerscheed in de Smacksnoten maakt de Deertenschuul: dor gifft dat "Tierschutz hier!, Aktion Partei für Tierschutz, das Original", de "Tierschutzallianz" un denn ganz achtern mit de Nummer 38 noch de "Partei für die Tiere". Ok Griese un Panthers (falls sik dat an öllere Lüüd wendt) gifft dat mehrere. Wokeen "Das Leben des Brian" kennt, warrt vermoden, dat de ähnlichsten Partein dör de deepste Fiendschap verbunnen sünd. Un denn gifft dat noch so schöne Partein as "Volt" un "Liebe". Wi sünd en bunt Völkchen!

Un as jümmers gifft dat wedder dat ole Dilemma: Giff mi en Partei mit Wirkmacht, mit Hebelarm, avers een, de nich korrupt un nich lobbyhörig is; en Partei, de wirklich wat ännert un konsequent ökoloogsche Politik maakt, avers keen Sellschapsmodell ut de 1950er Johr hett... bi all de Utwahl finn ik wedder nix to'n Wählen.


3.5.19 ...Dat geiht bargdal mit de SPD

De Uni Freiborg hett in en Studie ünnersöcht, woans dat mit de SPD wiedergeiht. Dor is de Liddmatenschwund ja meddewiel chronisch — jümmer mehr Minschen tredt ut. Un dat warrt nich beter: Bit 2060, seggt de Studie, warrt de SPD nochmal de Hälft vun ehr Anhängers verleren. Denn warrt se ok finanziell in't Slingern kamen. Un wat deit de SPD? Geiht wieder in de Richt vun Beliebigkeit. Apen na all Richten! Nüms argern! All Minschen "dor afhalen, 'neem se staht". Üm ja keen enkelten Minschen to verleern, verwatert se sik so, dat se opletzt all verleern warrt. Vun ehr Parteiprogramm is sowiso bloots noch "Weest nett to'nanner" na. Un wenn maal een en provokantes Woort seggt, warrt he glieks vör de Döör jaagt, un all hebbt dat hild to versekern, nee, dat is nich de Menen vun de SPD!

Oh, äh, ik heff mi wedder versehn. Ersett Se man in den Text baven "SPD" dör "Kark" un "Parteiprogramm" dör "Lehren". Bloots en Wunner kann beid retten.


28.4.19 ...Wat Jupiter dröff

"Quod licet Iovi, non licet bovi." Wat Jupiter dröff, dröff de Oss noch lang nich. Hefft al de olen Römers wüsst. De Arbeitsminister will dorför sorgen, dat ok för Niedriglöhner — so as t.B. de notorisch utbüüdten Paketboten — Soziaalafgaven tahlt warrt. Wenn nich vun den Subünnernehmer, denn even vun den Hööfd-Ünnernehmer. Soziaalafgaven mööt ja tahlt warrn, nich? Is doch Gesett. — Aver Hollstopp!, seggt de Weerschapsminister. Gesetten intohollen is en to grote Belastung för de Weerschap! Dat is ehr nich totomoden. Na düsse Maxime verfohrt wi ja al lang mit de Autoindustrie, mit de Dokumentatioonsplicht för de Arbeitstied bi Mindestlöhners usw. usw. Gesetten sünd ja good un schöön un höört sik för de Medien fein an. Avers wenn de ok noch inhollen warrn schallt, nee ok!!!!

Wat anners is dat natüürlich bi de, äh, annern. De eenfachen Lü is de Tru to de Gesetten dörchut totomoden. De Hartzers is de Kuntrull totomoden. Un de Paketboten de Öllersarmoot. Klaar.


20.4.19 ...Bedarf

"Der Bedarf an Ferienwohnungen in Norderney", lees ik, "steigt weiter."

Wat?!

"Der Bedarf an Ferienwohnungen". Wat is dat denn för en Bedarf?! Bedarf is, wat wi bruukt. Starvt dor een, wenn he orr se keen so'n Ferienwahnung kriggt?

Fakt is doch, düsse "Bedarf" is keen Bedarf, sünnern en blote Nafraag. Vun Lü, de betahlen köönt! In'n Kapitalismus warrt so'n Nafraag nich mehr in Fraag stellt. De Markt befehlt! Dat's afsolut. Dat's as good as en Bedarf. Ok wenn dat pure Luxusgüter sünd. Orr Gifte. Orr wat, dat totaal schädlich is. Ingriepen, stüern, verbeden?! Dat's Diktatur, DDR, Stalinismus — Schandaal! Nee, nee, dor mutt de Insel schon nageven. Un sik sülven heel un deel an Feriengäst verköpen. En wussen, authentisch Inselbevölkern, en intakte Natuur? Hä? De Markt hett ropen! Juun Gott! Hebbt ji nich höört? Also kusch, Platz dor, scheert sik weg — dat Geld kümmt!

De Wohrheit is doch: De Tied is dor, dat wi de Wahl hebbt twüschen Kapitalismus un Överleven. Bald, nu, opstunns.


18.4.19 ...Slimme Bottschapen

Eerst de Kathedralenbrand, un nu ok noch 29 dode Urlaubers, 29 Truerfäll in Familien to Oostern! De Hiobsbotten reet nich af. Dat lett, as dreep een dat deper to en Tied, wenn wi Freud verwacht. De Politik, de nienich rohn un rasten dröff, deit, wat se kann: Minister Maas is na Madeira fohrt. Will he de Överlevenen trüch na Düütschland bringen? Denn Wohrschuu: Bloots nich mit de Floogbereitschap vun de Bundswehr!

Nich noch mehr Dode. Wi hebbt doch al noog vun de Hiobsbotten.


30.3.19 ...Pottslaan

In de Ukraine wählt se morgen sachs ein Fernsehkomiker to'n Präsidenten. Dat is nich (bloots) komisch, sünnern op een Aart ok tragisch, denn dat wiest, wo vertwievelt de Lü meddewiel sünd. Wo wied rünner se mit ehr Anspröök al gaht. Ok wenn de Komiker keen Rechtsbuten is, steiht sien Erfolg in een Linie mit de Wahlen vun Duterte op de Philippinen un Bolsonaro in Brasilien — un, ja, mit Trump in de USA. De Minschen wählt Lü, de bloots anners sünd as dat etablierte Versager-System, Lü, vun de ehr politisch Willn un Künn een nix afweet. Se wählt sotoseggen blind. Se probeert mal. Mi kümmt dat jümmers vör as dat ole Kinnerspeel Pottslaan: Dat Kind kriggt de Ogen tobunnen un en Kaaklepel in de Hand un krüppt so op den Footbodden rüm. Mit den Kaaklepel kloppt dat mal hier un mal dor — jichenswoneem steiht ja de Pott mit de Leckerie dorünner. De annern Kinner staht ümrüm un höögt sik, roopt "warm!" orr "koolt!" orr verschuuvt den Pott...

Denkt Se sik de annern Kinner mal weg, dennso hebbt se de Aart, wo düsse Minschen wählt. Un faken is dat noch de beste Wahl, de se hebbt... So wied rünner sünd wi hier noch nich, avers de Tendenz seh ik hier ok: Lü ut den Politikbedriev kannst nich mehr truun, beter is't, wenn de Kandidat so politikfeern as mööglich is... Is de Politik wirklich so'n dreckig Geschäft?


23.3.19 ...Wahnen in en Vörnaam?

Ik kann mi vörstelln, dat in Kasachstan jüst mennig Lü de Nees vull hebbt: Wedder niege Visitenkoorten drucken laten! Niege Stempel un niege Kataloge! Dor warrt nämlich eenfach de Hööfdstadt ümnöömt — na den langjährigen, jüst trüchtreden Diktator Nursultan Nasarbajew. Astana heet nu "Nursultan". Dat is alltohoop de föffte Naam vun de Stadt. Villicht hebbt se dor gor keen Stempel un Visitenkoorten — is praktischer... Stellt sik vör, Berlin weer to en bestimmte Tied in "Helmut" ümnöömt woorn un wöör opneegst, wedder to en geven Anlass, in "Angela" ümdöfft... un Bonn müss op ewig "Konrad" heten (denn in Bonn ännert sik ja so bald nix mehr). Nee, also so'n Dwangs-Ehrung vun enkelte Politchargen kannst mi schenken. Ik much nich in Konrad, Nursultan, Helmut orr Angela wahnen. Dat överlaat ik de, de de Politikers achtern rinkruupt.


21.3.19 ...Krim? Verwesselt!

Süh, Präsident Trump weet ok, wennehr dat Tied is, sik mit de realen Fakten tofredentogeven! Nu wüllt de USA de Herrschap vun Russland över de Krim anerkennen. Völkerrecht hen orr her, seggt Trump, Russland hett de Krim in sien Hannen un warrt ehr wiss nich mehr hergeven, de is strategisch veel to wichtig, un denn kannst ok mal Roh geven un dat anerkennen. Dat ganze "Internationale Recht" is doch en Barg Anstellerie un Arftentellerie, dat is överhaupt wat för Swächlinge. De Krim gellt vun nu an nich mehr as "besett" un as fremdes Territorium, sünnern as en Deel vun Russland. Basta.

Oh, upps, ik heff mi versehn. Dat weer nich Russland un de Krim, dat weer Israel un de Golan. Kannst ja mal verwesseln. Sorry. Tuuscht Se man de Naams sülven ut!


11.3.19 ...Verständlich predigen

De Druck warrt stärker: Muslimische Imame schallt bloots noch op Düütsch predigen, feddert de Politik un de Mehrheitssellschap. Dat geiht ja nich an, dat vun de Nich-Towannerten nümsnich versteiht, wat dor predigt warrt! Is dat amenn Unsinn?

Leve Imame, dat gifft bloots eens för ju: Predigt Plattdüütsch! Kaamt denn de Behörden un wüllt ju dat verbeden, kriegt se dat mit uns Plattdüütsche to doon; dat warrt se nich riskeern. Blangenbi lehrt so juun frame Beders en vernünftige Spraak. Un op Plattdüütsch warrt sowiso keen Dummtüüchs predigt, dorwegen sünd ji fix ut'n Snieder! Okay? Okay!


8.3.19 ...Weltfruunsdag

Wat an Moderdag passeert, is klaar: Moder kriggt Blomen un Fröhstück an't Bett (wenn se "Huusfru" is un "nich arbeiten mutt" — as wenn Huusfruun nich arbeiten dään!!). Dat Fröhstückstüüch afwaschen kann se denn al wedder alleen. Ja, de Moderdag is en Saak vun güstern. Orr ehrgüstern.

Fröher passeer meist dat Lieke an'n Weltfruunsdag: 1 x kort henkieken, en Statistik ankieken, "Oh! Fruuns verdeent ja veel weniger as Mannslüüd!" orr "Oh! Öllersarmoot dreept ja mehrst Fruuns!" orr "Oh! Meist jeden drütten Dag sleit en Mann in Düütschland sien Partnerin doot!", avers jümmers bloots een so'n Statistik, nich all dree opmaal in een Johr! Un neegsten Dag glieks vergeten. Denn denn is ja wedder Männerdag, as jümmers.

De Tieden sünd vörbi. De Sellschap is waak woorn, wi beleevt dat live mit, un ik bün heel froh, in düsse Tieden to leven. Villicht köönt wi den Fruunsdag bald afschaffen — denn dat mutt ja dat Teel ween.

Is eentlich de nedderdüütsche Kultur dor wat bummeliger as de hoochdüütsche? Mi dücht, ja. Nee, nich bi uns in Plattpartu — hier weer de Feminismus al jümmers tohuus. Wi sünd vun hüüt, nich vun güstern. Man denkt Se mal an de nedderdüütsche Mainstream-Kultur. Witze un Döntjes mit dat Sellschapsbild ut de 1950er Johr sünd dor keen Seltenheit. Ik wöör mi wünschen, dat dat anners warrt. Wenn de nedderdüütsche Kultur morgen noch leven will, mutt se vun morgen ween — nich vun ehrgüstern.


8.3.19 ...Nieges vun'n Apen Kanaal Lübeck

Hier dat Niegste vun den Apen Kanaal Lübeck för all, de bi't eerste Drepen noch nich dorbi weern:

Leeve Plattsnackers,

unser erstes Treffen am 26.1.2019 im Offenen Kanal Lübeck war sehr motivierend, Aufnahmegeräte sind mitgenommen worden und auch einen neuen Termin haben wir gefunden, zu dem ich hiermit herzlich einlade:

Sa., 23. März 2019, 14 Uhr im Offenen Kanal Lübeck

Wir wollen versuchen, eine regelmäßige Platt-Redaktion zu gründen, und vielleicht 1x im Monat auf Sendung gehen (Podcasts wurden auch angedacht). Hierzu benötigen wir nun Beiträge, Geschichten, Interviews, Anekdoten, Kurioses ... und viele Mitstreiter und Mitstreiterinnen!
Neben Inhaltlichem werden wir uns am 23. März auch ein wenig der Technik widmen (Schnitt, Aufnahmen im Studio).
Ich hoffe, wir sehen uns am 23. März und gerne weiteren Plattsnackern von unserem Treffen erzählen!

Kerstin Wehrmann
wehrmann@okluebeck.de
Lübeck FM
Offener Kanal Lübeck
Kanalstr. 42 - 48
23552 Lübeck
Tel.: 0451-7050020


16.2.19 ..."Sekerheits"konferenz

Un nu is de Münchner Sekerheitskonferenz ok wedder in Gang. Sekerheitskonferenz? Militär un Butenpolitik un wedder Militär. Dat dat Militär sien Gewarv as "Sekerheit" verköfft, weer to'n Lachen, wenn't nicht to'n Hulen weer. Föhlt Se sik villicht seker, wenn allens vun Wapen starrt?! Wenn wi wedder niege Atoomraketen na Düütschland kriegt? Dat sünd de Sekerheiten, de de Militärs beedt. Denn Gewalt is nich ehr ultima ratio, sünnern ehr sola ratio, ehr eenzig Middel. Sekerheitspolitik weer ganz wat anners. Sekerer wöörn wi, wenn de Ressourcen in de Welt gerechter opdeelt un schuult wöörn; wenn de Unbildung bekämpft wöör; wenn Kulturen, Ethnien un Ideologien mit'nanner den Utgliek söken wöörn; wenn Völker för ehr Tokumst vörsorgen kunnen; wenn de Schäden dör dat kippen Klima so lütt as mööglich hollen wöörn. Wetenschaplersche un Forschers, Lehrersche, Soziologen un Mediziniers, Diplomaten un Geistliche ut de ganze Welt schulln sik drepen un weltwiede Strategien för Utgliek un Versöhnen besnacken — dat weer en Sekerheitskonferenz. Düt in München is en Kriegskonferenz.

Man jichenswie bün ik mi seker: de Militärs un ehr Toarbeiders wöörn dat tweitomaken weten. Ik bün ja eentlich en Optimistin, avers in mien swatte Momangen denk ik jümmers: Dorachter mutt jichenswo Geld steken. Meent Se dat ok?

Dat warrt wohraftig Tied, dat de Klimawannel de Minschheit endlich mal vör so'n groot gemeenschaplich Problem stellt, dat se sik nich mehr mit de Schoolhoff-Klopperien befaten köönt un lehrt, sik tosamentodoon! Hett ja doch allens sien Godes.


10.2.19 ...Wettrüsten — na klasse!

Op en List vun all de Saken, de de Welt nich brukt, steiht en nieges Wettrüsten sachs ganz baven an Platz 1 — noch vör "Germany's next Topfmodel" un de FDP. Man hollt sik fast, leven Lü: En Wettrüsten is sachs nau dat, wat wi kriegt. Den annern Dreck hebbt wi ja ok al.

De INF-Verdrag is opkünnigt, nüms will em mehr, de USA wüllt den niegen Konkurrenten China ehr Starkde wiesen — un verschuldt sik (bi China), üm dat to betahlen. "De USA forscht an niege Raketen — wi warrt datsülvige maken", seggt Putin. De Forschers op beid Sieden (keen Forscherinnen sachs; so'n Dummtüüchs maakt bloots Mannslüüd) warrt dat Rad also wedder simultan tweemal erfinnen. Bloots dat is keen Rad, dat to wat nütt is, sünnern dat sünd niege Raketen. De denn bi Tests de Ümwelt verdreckt un achterna vör sik hen rust. En himmelschriegen Verswennen vun Geld, Rohstuff un minschlichen Plie! Un dat mit nix Ringers as den Klimawannel vör de Bost, 'neem wi jeden Cent un jeden fitten Bregen för brukt, üm Lösungen för de echten Probleme to finnen. Man nee, wie fangt en Wettrüsten an. Na klasse. — De Minschheit is so dösig, de hett dat sachs verdeent, wenn se nich överleevt.

De Klimawannel sülvst warrt ut düsse Perspektiev na un na jümmers sympathischer. Meddewiel höp ik, dat dat fix geiht un de Länner de Middel to so'n Wettrüsten eenfach ut de Hand sleit.


29.1.19 ...Frohe Oostern

En Koppel Lungenärzte hebbt rutfunnen, de Schaadstuff-Grenzweerten sünd veel to strikt; de sünd doch, ja: "en Witz"! De Minsch kunn good dat Duppelte verdragen. 3000 annere Lungenärzte seggt dat nich, man de hebbt sachs ok keen dicke Dieselautos... Batz suust de Autominister Scheuer na Brüssel un will de Grenzweerten inrieten. De gellt nu nich mehr, de hett ja een antwievelt!

100 Porschefahrers hebbt rutfunnen, dat de Tempobeschränken op 50 km/h in Städer "en Witz" is. Dor geiht licht dat Duppelte! Autominister Scheuer suust na Brüssel...

Supermarkt: De Ooster-Snoopkraam is dor! Hasen, Eier, Eier, Hasen. Na den Klenner duert dat noch bet Oostern, man de Klenner is doch en Witz! Oostern kann licht duppelt so fröh ween, Punkt. Af na Brüssel, Klenner ännern. Frohe Oostern.


27.1.19 ...Recht op Ignoranz

Holocaust-Gedenkdag. Meist 80 Johr her. De mehrsten Överlevenen dood. Woans dat Gedenken in de Tokumst redden, woans dat oprechthollen? Ok Weten is vergänglich. Interess, Opmarken un Andeelnahm is de roorste Substanz in de Welt — in de digitaliseerte Informatschoons-Welt vun vundaag. Woans also...?

Een hett mal seggt, dat beste Holocaust-Mahnmal — beter as dat Stelenfeld in Berlin — weer, 1 km düütsche Autobahn mit Koppsteen to plastern. Orr so: för jeden Doden 1 Koppsteen. Dat wöörn de Lüüd merken. Man dat geiht natüürlich överhaupt nich — dat wöörn de Lüüd ja merken! Dat Gedenken kunnst denn ja nich eenfach afstelln — unkomodig. Un för Autos! Dat geiht in Düütschland gor nich. Un dat schall för't Gedenken an dode Juden ween?! Na dor wöörn wi natüürlich de lebennigen Juden för hassen.

As de letzten Överlevenden in Auschwitz befriet woorn, weer dat Winter as nu, bloots koolder, un se legen meist nakelt op hatte Holtpritschen. Alleen, eensam, utlevert, ahn en Naricht vun ehr Leevsten. Naföhlen köönt wi dat nich. Nich mal in Ansätt. Tominnst de Küll? En Aart Gedenken kunn ween, 1 Dag all Heizungen uttomaken. Man nee, wi wöörn elektrische Heizlüfter anknipsen. Tominnst de Unsekerheit, alleen un ahn Naricht to ween? En Aart Gedenken kunn ween, 1 Dag all TV- un Radiosenders uttoschalten, all Telefonstaschoonen — un dat Internet. Man nee, dat kost ja Geld, volksweerschaplich, un ok Leven, vunwegen de telefoonschen Nootropen, un överhaupt: wat warrt ut dat Finale in't RTL-Dschungelcamp?! Nee, nee, dat maakt wi nich mit. Överhaupt: Woso wi? — Gegenfraag: Woso de Juden, de Sinti un Roma? — Och, al wedder de! Natüürlich wöörn wi ehr dorför hassen. Hilde Walter sä eis: "Auschwitz warrt de Düütschen de Juden nienich vergeven!" Tja. Shit happens.

En Dwangs-Gedenken kann't nich geven, hüüt, in de Demokratie; ok wenn dat, 'neem an dacht warrn schall, Dwang is, Dwang un Ünnerdrücken. In de Demokratie hett jedereen sien Recht op Ignoranz. Wi wüllt in Roh laten warrn. Den komodigen Panzer, den de Zivilisaschoon üm uns lieflich Existenz leggt, den leggt wi üm uns Seel. Un dwingt uns een dor rut — den hasst wi dorför.


13.1.19 ...Rosa Luxemburg un de Brexit

Mal ehrlich, glöövt Se nich eentlich ok, dat de Weerschap de Politik in'n Griff hett? Dat seggt sik so licht. "De Weerschap"! Mien Öllern weern ok Ünnernehmers, lütte Ünnernehmers... un ik bün ok een. Man wi weet, wat wi mit "de Weerschap" meent: de Aart Ünnernehmen, de sik ut de Stüerkass bedenen kann, staats ehr to füllen. Dat jichenswat gegen de Interessen vun düsse mächtige Schicht passeern kann, dat heff ik eentlich nienich glöövt. Hier in Düütschland ja nu wiss nich. Ik segg bloots VW un Co.

Tja, dat hebbt wi dacht; de Welt is en korruptes Geldlock, hebbt wi dacht, un Wahlen köönt bloots ganz begrenzt wat ännern. — Un nu kiek sik een den Brexit an!! Konträär gegen de Intressen vun all Weerschapsünnernehmen geiht düsse Amokloop vun en ganzes (orr tominnst halves) Volk. Ik heff lang, lang nich glöövt, dat dat wohraftig to den Brexit kümmt; avers nu süht dat ja ganz dorna ut. In teihn Weken kunnen se weg ween, de Briten!

Natüürlich weer dat nich de Politik, de de Weerschap vun de Fahn gahn is, sünnern en poor Populisten — un en ganzen Barg Lü. Dat gifft Historikers, de meent, de Briten harrn eenfach bloots dorwegen för den Brexit stimmt, wieldat se endlich mal wedder sehn wulln, dat ehr Afstimmen jichenswat vun Bedüden ännert. Ok wenn dat unsinnig weer. So as Lü mit bestimmte psychische Störungen sik sülvst in't Fleesch sniedt, üm "sik to föhlen" — to föhlen, dat se noch lebennig sünd — wenn dat Blood kümmt. Süh, un dat gifft mi an den Brexit wedder Höpen. Dat is reinweg dat Gode an em. Villicht hebbt de mächtigen, influssrieken Lobbies usw. jüst nich oppasst, dat nich eernst nahmen — avers dat güng. Un so leed mi dat deit, dat de Briten gaht: Dorwegen bün ik nu ok noch nich för en twetes Referendum. Denn wöör dat laten, as weer allens, wat gegen den Mainstream güng, doch nich reaal west. Eerst in poor Johr, ja, denn wöör ik mi frein, wenn de Briten in de EU trüchkamen dään. Denn natüürlich to reguläre Kondischoonen, ahn "Briten-Rabatt".

"Wokeen sik nich röögt, de spöört sien Fesseln nich" — düt kloke Woort hett Rosa Luxemburg seggt, de vör 100 Johr feig un vull Spiet ermoordt woor. De Briten hebbt sik röögt — un spöört, dat de Fesseln nich so fast sitt. Maakt dat good, leve Frünnen vun de Inseln! Wi töövt op ju, bit ji wedder in de Gemeenschap vun Europäers kaamt, 'neem ji henhöört. Dat kann duern. Avers "Geduld ist die Tugend der Revolutionäre". Ok dat wüss Rosa Luxemburg.


6.1.19 ...Gode Vörsätt: Mehr Platt!

Tja, nu staht de goden Vörsätt för 2019 op de Proov, mööt sik in'n Alldag bewiesen — un de eersten liegt al dood an'n Wegrand, taxeer ik. Ik heff hier en Vörsatt as Naschuuv un Ersatt; dat is en Vörsatt, de sik licht inholln lett un Spaaß maakt: Mehr Platt in'n Alldag snacken un schrieven! Överall fehlt dat an Platt. Un wenn Se nu entslaten sünd, dat to versöken, denn hebbt Se hier ok glieks en Inladen na Lübeck in't Radio:

Leeve Plattsnackers,

im Offenen Kanal Lübeck, dem Bürgerradiosender Lübeck FM auf 98,8 MHz, fehlt es an plattdeutschen Beiträgen!

Aus diesem Grund lade ich recht herzlich am Samstag, 26. Januar 2019 ab 14 Uhr zu einem Treffen in den Offenen Kanal, Kanalstr. 42-48, 2. Stock in Lübeck ein.

Hier wollen wir uns kennenlernen, austauschen, die Möglichkeiten im Offenen Kanal zu senden ausloten und (hoffentlich) viele Ideen entwickeln. Frei nach dem Motto: Platt is nich uncool! Dat givt so vööl to vertelln, un dulle Musik op Platt givt dat ook.

Ich hoffe auf zahlreiches Interesse! Melden Sie sich bei mir, wenn Sie kommen möchten und erzählen Sie gerne weiteren Plattsnackern von unserem Treffen.

Ich freue mich auf Ihr Kommen!

Mit fründlich Gröten

Kerstin Wehrmann
wehrmann@okluebeck.de
Lübeck FM
Offener Kanal Lübeck
Kanalstr. 42 - 48
23552 Lübeck
Tel.: 0451-7050020

Nu man ran! Villicht seht wi uns dor ja.


23.12.18 ...Mal "Stopp!" seggen

Wenn 1 kg Kerosin to CO2 verbrennt, kaamt ca. 3,2 kg CO2 tostann. Dat Ööl-Fördern, Herstelln vun Kerosin un de ganze Tank-Zirkus ümrüm kost nocheens knapp 0,6 kg "indirekte CO2-Emission" per Kilo Kerosin. Maakt alltohoop ca. 3,8 kg CO2. En Airbus A380 sluckt op 100 km knapp 1500 kg Kerosin. De warrt denn to 5,7 Tonnen CO2. De Produkschoon vun dat Fleegtüch is dor noch gor nich inrekent.

Villicht hebbt de Drohnenpiloten vun London-Gatwick bloots de Welt retten wullt, as se den Airport lahmleggt hebbt. Villlicht hebbt se för ehr Kinner wat Goods doon wullt. Dat hebbt se ja ok daan. Nu sitt se in Haft.

Un de Fleegtüüch fleegt wedder. Un fleegt. Un fleegt.


16.12.18 ...Dementia natalis

"Und bunte Lichter ohne Zahl, die brannten ringsumher", heet dat in en Wiehnachtsleed ut dat 19. Johrhunnert. Dor is vun en Droom de Reed. Leider warrt düsse Droom hüüttodaags wohr, un de Gemeine Wiehnachtsirrsinn (dementia natalis) grasseert. Dat is ja schöön, dat LEDs so sporsam sünd un wenig Stroom verbruukt, avers se föddert en slimme Wohrheit an'n Dag: Dat gifft jümmer mehr Wiehnachtsirre!!

Geihst du dör de Wahnrebetten, denn jumpt di mennigeen Huus un Goorn al vun wied as en willes Roofdeert an. In grelle Neonklöören bleckt un blinkt dat, as güng dat üm en Nootsignaal op hoge See. Wokeen sik keen Eenfamilienhus leisten deit, versöcht, ganz Las Vegas op een eenzigen Mietwahnungsbalkon to quetschen — un vele schafft dat. För de Navers, sünnerlich de vis-a-vis wahnt, een eenzige Terror. Un: dat Gegendeel vun wiehnachtlich!!!

Nu is dat sachs nich so, dat dat düsse Irren fröher nich ok al geven hett. Man bloots, se woorn dör de Stroompriesen en beten in Schach hollen. Nich mehr mit LED! Nu gaht se hemmungslos tokehr. So is dat, wenn de Foortschritt di de Illusionen nimmt.


30.11.18 ...Un wedder mal G20 ...

... un de Realitätsverweigerer hebbt sik noch entslatener vun de Fakten verafscheedt. "Wi wüllt en eenfachere Welt!", roopt se.
"De gifft dat nich! Se warrt nich eenfacher! Ok nich, wenn ji regeert!"
"Dorför hasst wi ehr noch veel mehr!"

Un dat is eerst G20. Dorna kümmt de Klimakonferenz in Kattowitz. Ja: Klimakonferenz in Kattowitz. Fakten? Sünd nich inlaadt...


23.11.18 ...Noch so en Priesfraag...

Kriegt Se ok so veel Bitten üm Spenden opstunns? Jaja, vör Wiehnachten... Un jümmers hangt en Överwiesensbeleg dor an. — Ik mag ja keen gode Saak ahn en Spende afwiesen. 10 orr 20 Euro mööt för so en Bittsteller över ween, wenn de Instituschoon seriös is un de Saak fördernswördig. De Helpsorganisaschoonen seggt dat natüürlich ünnernanner wieder, dat bi mi wat to halen is. Dorwegen mutt ik in düsse Tied en ganzen Barg Nummern in mien Online-Banking intippen. Jedeen Spendenanlaat hett ja en Nummer, jedeen Organisaschoon en IBAN.

Fröher, dor weer dat licht: Dor heff ik de ganzen Överwiesensdreger eenfach ünnerschreven, bün denn mal bi de Bank vörbifohrt un heff ehr alltohoop insteken. Un hüüt? Een Euro föfftig nimmt mien Bank vun mi pro Papeeröverwiesen! Een Euro föfftig!!!

To'n Glück spiekert dat Onlinebanking ja de Adressen, bi de ik sowiso faken spennen do. Avers nu hebbt mi poor niege anschreven. Also tipp ik niege Nummern, bit mi de Finger blöödt, un denk dorbi an de Minschen, de in Düütschland an'n mehrsten spendt: öllere Fruuns. De hebbt mehrstendeels noch keen Onlinebanking, un för de ehr Mildtätigkeit kasseert de Banken jedeen Mal een Euro föfftig extra!

Dat schient mi, as wenn de Banken dat de fördernswördige Saak sülven klaut. De olen Damen kunnen ja amenn 1,50 € mehr spennen, wenn de Bank dat nich kasseern wöör! För 1,50 € mehr Medikamente för Kinner in Jemen! Wokeen hett dat sachs nödiger?

Mien Bank heff ik dat al utricht, un ik denk, dat warrt Tied, dat all Banken un Sporkassen ganz offiziell op de Överwiesensgebühr bi Spennen verzicht. De Wiehnachtstied is en gode Gelegenheit dorto.


21.11.18 ...Priesfraag!

"Trump, as wi all, höllt dat för good mööglich, ja för wohrschienlich, dat de saudische Chef-Prinz achter den Moord an den Schrieversmann Kashoggi steken deit. Liekers will Trump ok in Tokumst an dat Bündnis mit Saudi-Arabien fasthollen."

Priesfraag: Wat is verkehrt an de Naricht baven? Na? Richtig: Dat Woort "liekers". Korrekt weer: "dorwegen". För Trump is so'n Journalistenmoord ja nix Verwerflichs nich; in't Gegendeel, he kunn di stantepe 10 Journalisten nömen, de he ok geern in lüttje Stücken snieden un in'n Woold verbuddeln laten much. Heimlich niedt he den Saudi düssen Blankoscheck, düt Över-dat-Recht-Stahn. Weer dat nich veel schöner, wenn de USA ok so'n Erbmonarchie weern, mit so Gottkönigen, de nixnich wat anhebben kann? Un mit grote Harems natüürlich, 1000 Fruuns för jedenen Keerl? — Sogor Trump weet, wo ketzerisch düsse Gedanken sünd, un denkt sik heimlich "Ach wo goot, dat nümsnich weit, wo mi de Demokratie op'n Wecker geiht!"

Tja, un as dat so mit Trump is: Dor is he scheep wickelt. Jedereen weet dat. Jedereen kann in sien Visaag' lesen as in en apen Book.

Bloots Spaaß maakt dat nich.


16.11.18 ...Who wants to be a millionaire?

Friedrich Merz hett nu also "togeven", dat he Millionär is. Dat harrn wi ja nu nich dacht vun een, de twee Privatjets besitten deit! Man he will gor keen echte, typische Millionär ween, nee, he will mit allns dat to de "Middelschicht" tohöörn, so seggt he: Ik bün Middelschicht; un de Bild-Zeitung, de em de ganze Tied as verdull pushen deit, lett em dat natüürlich dörgahn, ofschoonst dat Dummtüüch is. — Ik glööv ja nich, dat Merz sik to de Middelschicht rekent, wieldat dor sien Hart sleit — so as de witte Fru, de swatt ween wull, orr de Mann, de meen, he weer sülvst Juud; ik glööv, he maakt sik en witte Poot as de Wulf in'n Märken, de de söben Geißlein verdummdüveln will. De Geißlein sünd wi Wählerschen un Wählers.

Mal ehrlich: Millionär?! Wat heet dat denn hüüt? Vermögens-Millionärin büst du al, wenn du hüüt dien Oma ehr lütt Hüsen in'n Speckgördel vun Hamborg arvst. Vermögensmillionärin to ween heet gor nix mehr. Wenn du dat Geld hüüt anleggen deist, muttst du ok recht bescheiden leven, wenn du bloots vun de Zinsen leven un nich arbeiten wull. Dat gifft Millionäre, de Middelschicht sünd.

Avers Merz is keen dorvun. De wirklichen Rieken fangt bi de Inkamens-Millionäre an, un ik denk, dat hett Merz ok heemlich meent. Wenn een as he mit all sien Posten keen Inkamensmillionär is — also nich mehr as een Millioon per Johr innimmt ("verdeent" mag ik nich schrieven) —, denn funscheneert de Kapitalismus nich mehr, Punkt. Un wenn Merz mal Kanzlerkandidat warrn schull, much ik geern weten, woneemher he sien Inkamen hett — dat warrt denn nämli wichtig; ik much, dat he sien Stüerverklaarn apentlich maakt — so dat as in de USA begäng weer, bet Trump keem. Natüürlich warrt wi dat nich beleven; vun Trump lehren heet ja winnen lehren. Orr?

Foto: Katja Renfert

6.11.18 ...Kopp af

Woot is so unsouverän. Woot is dat Gegendeel vun cool. Woot is en Teken vun Swackheit. En Minschen in Woot to bringen is en Machtgeste. Dorüm leev ik ok düsse lütten Schalter, düsse Trigger, de enorme Effekte utlööst un ganze Völker to'n Rasen bringt. De Rumpelstilzchen-Momente. De Rumpelstilzchens sünd natüürlich alle Mannslüüd. Un dat gifft ganze Völker vun Rumpelstilzchens — also Völker, 'neem de Mannslüüd alltohoop Rumpelstilzchens sünd. Pakistan is so een. Dor jaagt se de Gedankens in anner Lüüd ehrn Kopp un terreet sik, wenn se ehr nich faatkriegen köönt. Se köönt nich uthollen, dat du un ik anners denkt as se. Ik weet, wenn ik vör ehr stünn, kunn ik se in Raserie störten, to'n Veitsdanz bringen — bloots mit en Woort, ja en Smüüstern, en Kniepöögen. Bloots mit mien Existenz. Ik kunn ca. 10 Sekunnen tokieken, wo se toovt.

Un glieks dorna weer ik dood.

De pakistanischen Rumpelstilzchens hett mal wedder en Fru to'n Rasen bröcht. Fruuns köönt dat besünners good, denn eentlich schulln Fruuns gor nix doon un seggen dörven, dorwegen is allens, wat Fruuns doot un seggt, al en Beleidigen in sik. — Asia Bibi is Christin un betahlt dat siet 8 Johr mit Isolationshaft. Se glöövt nich an Mohammed un also hett se em lästert, weer de Vörwurf; se schull starven. Man dat geev keen Bewiesen — also mutt se frielaten warrn, sään de Richter, de nu mit Moord bedrauht warrt un den Steert inkniept. Feigheit is dat nich — Millioonen Rumpelstilzchens wüllt ehr ünner ehr Fööt terstampen, dor kannst woll bang warrn.

Wokeen Mohammed lästert hebben kunn, mutt starven; de Verdacht langt. Also mutt de ganze Minschheit hinricht warrn. Opletzt sleit sik de letzte Scharprichter den Kopp sülven af. Dorna kann nümsnich mehr Mohammed lästern, nümsnich mehr anners denken as Rumpelstilzchen. Rumpelstilzchen sülven is denn ja ok dood — vörsorglich, dat dat nich etwa Mohammed lästert orr to denken anfangt. Denken deit Rumpelstilzchen eentlich nie, Denken is dat Gefährlichste in de Welt, eentlich en Blasphemie in sik, liek as Fruuns, de eentlich ok afschafft höört. Rumpelstilzchen glöövt. Glöven heet, een stoppt di wat vun buten in den Kopp (etwa den Koran), un du lettst dat so un ännerst dor nienich wat an. Glöven heet: keen Verännern. Bi't Denken dorgegen ännert sik jümmers wat, dor kann allens passeern, dor weetst nienich — Denken mutt afsluuts ünnerbunnen warrn, Punkt.

Jedeen Kopp, de nich ganz un gor holl is, mutt af.

Nu bün ik to'n Glück wied weg vun dor, un hier in mien relative Sekerheit denk ik ganz wat anners as ji, ji pakistaanschen Rumpels! Hallo! Ja, wat ik denk, dor wöör juuch Höörn un Sehn bi vergahn! Wat seggt ji dorto? Kaamt ji man fein in Raasch! Ji köönt nich an mi ran! — "Das hat dir der Teufel gesagt, das hat dir der Teufel gesagt", schrie das Männlein und stieß mit dem rechten Fuß vor Zorn so tief in die Erde, dass es bis an den Leib hineinfuhr, dann packte es in seiner Wut den linken Fuß mit beiden Händen und riss sich selbst mitten entzwei. — Ik höp ja jümmers noch, dat ik maleis seh, woans se sik terreet, düsse Rumpelstilzchens mit Atoomwapen.


28.10.18 ...Bloots anners!

Nee, wi wüllt hüüt nich över Hessen snacken. Dat veel wichtigere Brasilien wählt hüüt ok. Un dor wählt se sachs en Minschen, de sik apen to Diktatur, Nazis, Folter un Vergewaltigen bekennt. Sünd etwa de Brasilianerschen un Brasilianers all för Nazis, Folter un Vergewaltigen?! Nee. Avers sachs för Diktatur.

Demokraten wählt de Demokratie af. Dat passeert in letzte Tied veel — nich bloots de oosteuropääschen un italieenschen Sorgenkinners fallt uns in — de Lü dor wirkt ja tominnst noch halvwegs manierlich un ziviliseert —, man ok so unsäägliche Typen as Duterte op de Philippinen, Trump in de USA orr even Bolsonaro in Brasilien warrt dör düssen Trend na baven spöölt. Woso?

Dat lett, as weern de Minschen meddewiel so wied, jederenen to wählen, wenn bloots maal endlich wat wirklich anners warrt. Un wenn se Frankensteins Monster wählen mööt. Denn mit de bekannten Minschen un Parteien ännert sik nix. Un dor mutt sik wat ännern — veel. Dat weet de Wählerschen un Wählers ganz genau, beter as de etablierten Politikers. De Krake, de unsen Globus in sien untellbor vele Arms terquetscht, de Ümwelt stranguleert, de Minschen utsuugt un de Sellschapen in krasseste Ungliekheit dwingt, is de unbeherrschte, regellose Kapitalismus. De Börgers föhlt sienen Druck veel mehr as de Politik. Welk wünscht sik in de 1950er Johr torüch mit ehr homogene Sellschap, 'neem Fruuns ehrn Platz kennen un Schwule nich vörkemen; welk wüllt bloots Lösungen för ehr drängendste Probleme un Ängste. Se kriegt keen.

Dat is en enormes Versagen vun de Demokratie. De Demokratie hett sik an den Kapitalismus verköfft. Wi all kennt de versteckte Korrupschoon un friewillige Willfährigkeit, wi all weet, welk Lü nienich wehdaan warrt, as weer dat en Natuurgesett. (De Linkspartei is de letzte Partei, de keen Industriespennen kriggt!) Eens Dags, wenn ok de Banken vun Italien dör Stüergeller "reddt" woorn sünd un de Minschen 18 Stünnen per Dag arbeiten mööt, dat se ehr Miete betahlen köönt — eens Dags warrt villicht ok hier en Slägertyp optreden mit dat Motto "Miet-Haie? À la lanterne!" (nee, ehrder "Miet-Haie? Opknütten!", denn Franzöösch snackt solk Lü nich) — un denn warrt de Problemen, de hüüt villicht noch freedvull lööst warrn kunnen, in Gewalt ümslaan — un sachs ok nich lööst. In de USA kunn dat en veritablen Börgerkrieg geven — veel Spaaß mit all de Wapen dor! Un wenn Bolsonaro wohraftig, as he ankünnigt hett, de Amazonas-Uurwoold roden will, denn geiht villicht vun düt Demokratieversagen de Welt ünner. Bookstäävlich.


25.10.18 ...Bibbern in Hessen

Kollegin Monika — se is HSV-Fan — begrööt mi vundaag mit den niegsten HSV-Witz: "Moin, ik heff hüüt verslapen, is Hannes Wolf noch HSV-Trainer?" De HSV hüert un füert sien Trainers ja as nix, as — ja, as de SPD ehr Vörsitter(schen). Dat warrt un warrt nix, Panikpanik, fix wedder en nieges Gesicht her!

Ach, un nu is dor de arme Torsten Schäfer-Gümbel! Wohraftig en Gesicht mit sien Biederkeit un Brillenglöös. Wat schall he nu bloots maken? Wenn he mit de hessische SPD an'n Sünndag jichenswat anners deit as erbärmlich aftosupen — wenn de SPD mit em man bloots respektabel afsniedt — denn, ja denn warrt TSG (dat is de Afkörten för sien reinweg symphonischen Naam Torsten Schäfer-Gümbel) ja stantepe to den niegen SPD-Messias utropen, na Berlin befördert, kriggt dat Amt vun Andrea Nahles ophalst un schall den Karren ut'n Dreck trecken. Dör Töverkraft! Man bloots, dat kann nüms. TSG weet dat ok.

Villicht höpt he dorwegen heimlich, dat dat för de SPD nich good utgeiht in Hessen. Ganz afwegig kannst düsse Höpen ja nich nömen. Man wat passeert denn?! Denn warrt de SPD in Berlin ganz un gor in Raasch kamen un batz de Koalischoon opkünnigen. Un denn höpen, dat dat beter warrt. Bet to de neegsten Wahlen. Dorna weet se denn: An de Koalischoon hett dat ok nich legen...

De SPD is wirklich de HSV ünner de Parteien.


5.10.18 ...Gode Narichten

Föhlt sik dat nich good an, düsse Fredensnobelpriesen? Is nich för jeden spontan klaar, wo natürlich un richtig düsse Prämierungen sünd? Un markt Se dat nich ok?: Foorts is dat wedder dor, düt unsinnige Vertruun in den Vernimm vun de Minschheit, düsse Toversicht, ja Optimismus, dat opletzt de Minschen dat Ruder doch in de rechte Richt ümleggt un to'n Goden stüert. Wi seht doch, dat geiht. Een gode Naricht langt!

Man dat gifft mehr as een! Verlichtern överall: De Hambacher Woold dröff vöreerst blieven, RWE dröff nich roden. Noch een Johr dröfft de legendären Maiglöckchen vun'n "Hambi" ünner de urolen Böken blöhn; se mööt nich starven, wieldat se op Bruunkahl staht. To verdanken is dat den BUND, de vör Gericht gahn is, ünner annern wegen de seltene Bechsteinfladdermuus, de dor wahnt (is dat villicht de Fladdermuus, de de Klaviere vun de bekannte Marke "Bechstein" buut, de so hooch spelen köönt, dat se sogor in'n Ultraschall speelt...? Gifft dat ok Steinway-Fladdermüüs?). Danke, Fladdermuus! Hambi leevt! Boomhüüs warrt wedder erricht warrn. Een Johr is veel Tied, in de de Minsch vernünftiger warrn kann! Villicht warrt dorna överhaupt niich mehr vun Rodung snackt — wenn wi mit de Vernunft un mit entslaten Willn för dat Gode wiederhen Druck maakt op de Bruunkahlenverbrenners un annern Ewiggestrigen.


28.9.18 ...Plastik: Ja, avers ...

Annerletzt weer ik ja füünsch op dat Plastik, dat uns överall ümgifft. So ganz berechtigt is dat nich. Plastik is en genialen Warkstoff, sien veelfältige Egenschapen un dorbi sien ringes Gewicht mööt eenfach jeden övertügen. Dat is ja keen Tofall nich, dat wi överall Plastik seht un dat de Plastikfloot üm uns höger un höger swappt.

Natüürlich is dat to billig. Dat gellt för allens, wat wi ut de Natuur nehmt: Dat Priesschild stimmt nich. Dat Plastik, dat mien Kollegin dormalen op'n Disch harr, harr mehr kosten müsst as de ganze Salaat. Dat wi uns an wennt hebbt, sowat wegtosmieten — heel funkschoonsfähig Geschirr, Massen an Folie, opwendigste Verpacken —, dat is en groot Övelstand. Düsse Einweg-Mentalität wedder ut de Köpp ruttokriegen, dat warrt en hart Stück Arbeit, sünnerlich bi de jüngeren Generaschoonen, de nienich wat anners kennen lehrt hebbt.

Woso?, fraagt Se nu, dat warrt doch allens recycelt? — Nee. Kann gor nich.

Eerstmaal kümmt ja bloots en lütten Deel in de Recycling-Tunn. Un dat Müllsorteern dor maakt ja allens Maschinen. Un de sünd apensichtlich dumm. Se hebbt wiss ok al höört, dat Joghurtbekers, an de noch de Alu-Deckel bummelt, nich to recyceln sünd. De Maschien kann dat nich trennen. Beid — Plastik un Alu — wannert in't Füer orr in de Deponie. Is'n Armootstüüchnis, sowat, un al gor nich snacken wüllt wi vun de gresige Verswendung vun Aluminiumfolie. Hallo VW, ji sünd doch Spezialisten för wunnerwarken Software-Updates! Hier sünd Maschinen, de bruukt juun Expertise!

Man en anner groot Hindernis för't effiziente Recycling sünd de velen ünnerscheedlichen Plastikvarianten, de hüüt op'n Markt sünd. Un dor mutt mal eenfach de Gesettgever ran. Wi bruukt en radikale Verringern vun de Plastikveelfalt. Een PE, een PET, een PP — all mit meistto gliek Molekularwicht, physikaalsche Egenschapen un Tosattstoffen as Weekmakers usw. Denn warrt de Komfort för uns "Verbrukers" twoors beten ringer; dorför kunn een de ünnerscheedlichen Plastike sortenrein trennen, wedder insmölten un för wirklich ansprooksvulle Zwecken wedderverwenden — nich bloots för Schotter un minnerwertige Parkbänke.

Nich etwa, dat ik glööv, dat warrt passeern. Ach wo. Keen Partei, keen Parlament warrt so'n Gesett dördrücken. Is politische Sülvstmoord. Dor kunnst ja glieks Stüer op Kerosin erheben un Inlandsflöög verbeden!


24.9.18 ...Allens nieg

Verkehrsminister Scheuer (bitte keen billige Woortspelen mit sien Naam!) hett en echt besch-, äh, bekloppten Vörslag gegen de Dieselkrise: He will nich öllere Fohrtüüg narüsten, sünnern glieks "die ganze Diesel-Flotte erneuern". Schall heten, all öllere Diesel-Autos wegsmieten un niege anschaffen. Natüürlich hett en Auto, wenn dat eerstmal buut is, al 70% vun sien Ümweltschäden anricht — all de Rohstoffen, Metall usw. fördern, transporteern, verarbeiten... Scheuer weet dat ok, avers he is even en reinrassigen Lobbyknecht, so reinrassig, as bloots de CSU se tüchten kann. Maaßen warrt to'n Dank för sien Plichtverletzen befördert (nu tominnst nich bestraaft); de bedrögerische Autoindustrie dröff to'n Dank för ehrn Bedrug massenhaftig niege Autos verköpen. So geiht dat.

Ik much Scheuers Vörslag liekers geern annehmen, mit en lüttje Modifikation. De Hardware-Narüsten lehnt he ja dorwegen af, wieldat se op Kosten vun de Autoherstellers gahn schull: dat defekte Fohrtüüch mutt ja repareert warrn. Ik meen, wenn glieks de ganze "Flotte erneuert" warrn schall, denn geiht dat ok op Kosten vun de Herstellers. Se mööt elkeen Kunden, de en fehlerhaftigen Diesel köfft hett, en niegen Diesel schenken! Wenn de defekte Waar nich repareert warrt, kann de Kunde ja op en kostenlosen Ersatz bestahn, nich?

Schasst sehn, wo fix Scheuer sik to de Hardware-Ümrüsten bekehrt! Ik heff düsse Lü so satt.


23.9.18 ...De Kompass

O Gott, nu sünd se all an't Ümnehmen vunwegen Maaßen sien Befördern. "Wi hebbt uns irrt." Un mit wat? Mit de Idee, dat Maaßen de richtige Mann för den Job weer? Nee, bloots mit de Idee, dat ji dormit bi de Lü dörkamen wöörn.

Dat weer de ole Kant, de seggt hett: "Twee Saken gifft dat, de mien Gemööt jümmer mehr wunnerwarken maakt, je mehr ik doröver nadenken do: de Heven vull Steerns över mi un dat moraalsche Gesett binn mi." Tja, uns Tied neigt sowiso nich to'n Wunnerwarken; man de Lü, de in uns Sellschap na baven kaamt, sünd nich de, de dör so'n lästiges moraalsches Gesett binn ehr behinnert warrt. En gresigen Slag Lü is dat, de in uns System na baven spöölt warrt. De binnere Kompass vun solk as de Parteipolitikers sünd — Ümfragen. Dat gifft gor keen Richt, in de se gahn wüllt, bloots ehr Lobbies bedenen un an de lukrativen Pöstchen wüllt se — un de Leitplanken dorför geevt ehr de Ümfragen. So weet se ok bloots, wenn de Ümfragen sinkt, dat se ehrn Kurs ännern mööt. Se kennt nich Richtig un Falsch, sünnern bloots "erfolgreich" un "unbeleevt"; se höört op keen binnere Stimm, sünnern bloots op den Applaus vun buten. So versöökt se de obszönsten Saken dörtodrücken; mal kieken, wat de Lü dat överhaupt merkt orr wenn ja, wat se to luud to murren anfangt... Un wenn dat passeert, nehmt se fix üm un seggt ganz beflissen: Wir haben einen Fehler gemacht! Un se meent bloots den Fehler, antonehmen, dat se dormit dörkaamt. — Avers mit dat allermehrste kaamt se ja dör! Un wenn se so ehr Mäntelchen na'n Wind hangt, nöömt se dat ok noch Demokratie. Se söcht ja doch den Applaus vun de Mehrheit, nich?

Ja, de Demokratie htt dat nich licht opstunns. Wii wüllt ehr den Rüch stärken, woneem wi köönt — gerecht hanneln, annere tohöörn, fair to all ween. Kümmst nich na baven dormit in uns Sellschap; avers villicht köönt wi ehr langsam vun binnen verännern. Ik geev dat nich op. Dor is ja jümmers noch de Heven vull Steerns över uns. Allens is mööglich. Ok Wunnerwarken.


16.9.18 ...De Katastrooph överall

De Bruunkahl, en Energieform vun gistern, vernicht nu noch Woolden, Dörpen un Landschapen — för nix as för de Profite vun RWE. Ehr Enn is beslaten, bloots de Profite mööt noch infohrt warrn — dat kann anner Minschen un de Natuur kosten, wat dat will. En Mietpreisbrems gifft dat bloots, solang se nix bewirkt, un de Autoindustrie kann sowiso maken, wat se will, un warrt nienich belangt. Dat is de Bottschap, dat de Minschen opfangt: Egaal, wat politisch entscheden warrt, eens is wiss: de ganz Rieken un Mächtigen nehmt keen Schaden, de warrt op jeden Fall schoont. Wirkliche Tokunftsfragen warrt bloots dor anpackt, 'neem dat de Grootkoppeten nich wehdeit. De Politik, de wählten Volksvertreders, hannelt as dat dat Kaninken vör de Slang: gor nich.

So is de Demokratie wirklich to'n Ünnergang verdammt.


7.9.18 ...De Katastrooph in't Amt

De bövelste Verfatensschützer Maaßen maakt uns den Trump un stellt Narichten un Videos ut Chemnitz driest as fake news hen, un de Bundsbinnenminister deit allns, wat he kann, dat desülvigen Nazi-Kotzbrocken em un sien Partei doch bittebitte wählen doot. Düsse twee Mannslüüd schallt uns Verfaten un Demokratie verdeffendeern un sekern! Jungedi!, uns arme Verfaten! Wokeen solk Frünnen hett, bruukt keen Fienden mehr!

Man uns arme Verfaten hett ja bavento noch Fienden. De börgerliche Midd dröögt ut, de Extreme wasst. Woneemher dat kümmt? Seehofer meent ja, vun de Migration. De is för em de "Moder vun all Probleme". Natüürlich weer dat en Fehler, en CSU-Mann överhaupt ut Bayern na Berlin kamen to laten; düsse Migration hett wohraftig mennig Problemen maakt. Ansünsten liggt Seehofer en beten scheef; in'n 1. Timotheus 6, Vers 10 steiht dat richtig: De Geldgier is de Wöttel vun allens Lege. Wat uns Welt togrunn richt, is de gnadenlose Kapitalismus. He terstöört uns Levensgrunnlagen, ritt uns Sellschapen twei un terfritt Harten un Seelen vun de Minschen — rein unvörstellbore Afsurditäten bringt de Geldgier tostann. Man nümsnich kann sik noch vörstelln, dat dat jemalen anners warrn orr ween kann...
Wi leevt in en irre Tied.


26.8.18 ...De Katastrooph op den Disch

An'n Dunnersdag weer't, dat mien Kollegin Nurcan en lütte Paus möök un ehr Portjucheee greep, sik wat to eten to halen. Dat "Mercado" is neegbi, dat Inkoopszentrum in Altona; dor gifft dat mennig Läden för fertiges Minschenfoder. Nurcan keem torüch un harr sik en Salaat köfft.

Wi seten uns dal, ik leist ehr Sellschap. As se losgüng, harr se bloots ehr Portjuchee in de Tasch; nu harr se en Plastikbüdel in de Hand. Ut den Plastikbüdel keem en solide dörsichtige Plastikschöttel mit en Plastikdeckel. Se nehm em af. Dorünner weer noch so en Plastikfolie, de dat Binnere luftdicht verslööt. Nurcan tröck de Folie af. Binnen weer links dat Grööntüüchs; rechts weer en solide Plastikinsatz mit twee Näpfe; in een Napf weern de Keeswörpel, in den annern de Putenstriepen. Beid Näpfe harrn Plastikdeckel. In dat Grööntüüchs rindrückt weer noch en Extranapf mit Deckel. Dorbinn weer de Salaatsooß. En Plastikgavel kröön dat ganze Desaster.

Bedripst keken wi beid dat Mallöör an. Nurcan harr Hunger hatt, man nu schien dat, as weer ehr de Aptiet vergahn. 20% Grööntüüch, 80% Plastik legen vör uns op den Disch. Se hett dat denn doch opeten, un dat Plastik keem ok allens in den Müll; en Recyclingtunn gifft dat dor, 'neem wi arbeidt, nich. — Wi hebbt denn noch lang över ökoloogsche Footafdrück snackt. Mien liggt licht över den Dörsnitt, denn ik heff en Auto. Nurcans ok, se maakt Floogreisen (ik nienich). Un denn, to all dat, düt Plastik — as wi Kinner weern, geev dat sowat nich... un leven kunnst ok, in de 1970er Johr...

Köönt wi nich dorhen torüch? Solang wi dat nich schafft, warrt wi keen Lösung finnen. Wi sünd en Deel vun dat Problem.


25.8.18 ...Stadt un Land

De Bundspräsi hett nu seggt, dat he besorgt is vunwegen dat mennig Lü nich mehr op't Land leven wüllt. Dat Land, meent he, müss wedder attraktiver warrn. De Ünnerscheed vun Stadt un Land dröffen nich to groot warrn.

Mennigmaal denk ik ja, ik verstah keen Hoochdüütsch, wenn ik sowat höör. Hä? Woans kann dat Land denn anners attraktiver warrn as dör Ünnerscheed vun de Stadt? Ünnerscheed in de Tempratuur (in de Stadt kunnst bi de Hitten nich slapen, op't Land ja), in'n Lärmpegel (Stillnis. Echte Stillnis...), in de Schöönheit (kantige Betonkästen gegen Holsteiner Auenland, wokeen winnt dor wohl?), in de Priesen (Mieten!), in de Levensqualität? Wenn düsse Ünnerscheed afnehmt, warrt dat Land doch nich attraktiver?! Na good, ok op't Land bruukt wi Dokters, Scholen un Busse. Mehrstendeels hebbt wi de ok, kunnen poor mehr ween, man dat kriegt wi hen. In de Stadt avers fehlt Woolden, Frieruum un Roh — un dat kriegt de nich hen.

Ik segg ju wat. De Lü, de in de Stadt gornix misst un bloots op't Land trecken wöörn, wenn dat dor so weer as in de Stadt — de Lü schallt man fein in ehr Megacities verkümmern. För de schall dat Land bitte nich attraktiver warrn!


21.8.18 ...Nationalisten aller Länder...

...vereinigt euch! Köönt Se sik sowat vörstelln? De naschonalistische Internaschonale? Hm, woso nich, ehr Mentalität is doch överall liek, nich? Mennigmaal süht dat ja ok ut, as verstunnen se sik ganz good — anfangs un wenn dat üm nix geiht... "Ik toeerst! Wi sünd de besten!" So denkt se all, dat müss doch en gode Basis för Tosamenarbeit ween, t.B. in internaschonale Projekten... äh... wennehr hebbt Naschonalisten toletzt en groot internaschonaal Projekt op de Been stellt? — Och, in't verleden Johrhunnert is dat mehrmalen vörkamen. Dor weer de 1. Weltkrieg, de 2. Weltkrieg, de Kole Krieg...

Ja: Wenn Naschonalisten sik enig sünd, gifft dat bloots eens: Krieg.


20.8.18 ...Braken Lüchttoorns

De Höpen op en gode Tokumst warrt vundaag nich mehr vun de jungen Minschen dragen; de mehrsten vun ehr hebbt anschienend opgeven, resigneert, treckt sik torüch in ehr Privatleven. Wo veel stärker wirkt dat Bild vun en olen Minschen, de sik siendaag de Höpen un de Integrität bewohrt hett — op't best dör en langes Leven! Solk Minschen sünd Lüchttoorns, se wiest, dat en Leven in Integrität un Engagement mööglich is; un de Höpen, de se draagt, wirkt dordör ümso stärker.

Solk en Lüchttoorn is hüüt braken. Uri Avnery is dood. Een vun de letzten, de in't hillige Land för Versöhnen striedt hebbt. Un dat sien heel Leven lang. Düsse eenzigaardige Persöönlichkeit — vull histoorsch Bewusstween, liekers frie vun Vörurdelen, sülvstlos un vull Minschenleev — is man bloots en Randnotiz in sien Starven. Dat schient, de Höpen op en freedvull Mit'nanner vun de Völker in't hillige Land is al vör em doodbleven. Nüms will mehr mahnen Stimmen hören, all wüllt sik bloots terfleischen. — Roh du in Freden, Uri Avnery!

Uri Avnery hett bit toletzt de Politik in Israel, Palästina un de Welt in Kommentare analyseert, de op Düütsch översett un publizeert woorn. Nalesen kannst de all hier: uri-avnery.de.


8.8.18 ...Tit for tat

Europa verschuuvt sien Grenzen nu al in de Sahara; dor warrt nu de Flüchtlinge un Utwannerers afwehrt, de wi hier nich hebben wüllt (also praktisch all afrikaanschen Lü).

Avers de Wööst is en höfflich Wööst un maakt en Gegenbesöök: De Sahara verlagert ehr Grenzen eenfach merrn na Europa. Spanien haalt se sik sowiso, Portugal brennt af, un kiekt sik mal bi uns üm... ja, de Sahara kümmt. Un wi hebbt ehr inlaadt mit uns Klimapolitik.

"Da man als Politiker ohnehin nie weiß, wie das, was man tut, sich auswirken wird, kann man gleich das Anständige tun." — Hett Winston Churchill dacht. Meten doran, wat de Politikers wirklich doot, schient dat nich so licht to ween.


5.8.18 ...Dank seggen

Dat gifft een Koppel Lüüd, de ik al lang vun Harten Dank seggen much; un nu in düt Wööstenklima is dat fällig: Dat sünd uns friewillige Füerwehrlüüd. Un ok de Hööfdamtlichen. — In de gresige Hitten bi en Nootroop sik ahn Tögern de swore Uniform antüdern un sik friewillig de gröttste Gefohr stelln, dorvör heff ik allerhööchsten Respekt un en Hart vull Dank. Wo veel Leven un Weerten hebbt se nich all reddt in düssen Sommer! Wat weern wi ahn ehr, in wat för Gefohren un Ängsten wöörn wi sweven? Dor gifft dat keen Wenn un keen Aver, de Füerwehr sünd de Heldinnen un Helden vun'n Sommer 2018. Sogor wenn de Footballers wunnen harrn — de Füerwehr harrn se nich utsteken kunnt. Avers se sünd ja fröh rutflagen, un dor köönt wi ok ganz froh ween, denn de Politik harr mal wedder so düt un dat in'n Windschadden vun de WM vör. In de Gruppenphase hebbt se sik eerstmal glieks 25 Millionen mehr Geld för de Parteien genehmigt. (Un Putin hett bi sik en fiese Rentenreform dördrückt, ok in'n WM-Windschadden.) 'keen weet, wat se noch allens beslaten harrn, wenn de düütsche Mannschap wiederkamen weer?! Nee, de Millionäre hebbt versaagt, un de Ehrenamtlichen, de gor keen Geld kriegt un keen Ruhm un Ehr wüllt, bloots redden un helpen — de hebbt allens dat verdeent. In en betere Welt wöörn se dat ok kriegen. Uns Dank is ehr wiss.


15.7.18 ...Geschäftsdüchtig

Twee Perzent! Veer Perzent! Opneegst tweehunnert Perzent! Donald Trump is gor nich to stoppen in sien Feddern, wat de europääschen Nato-Liddmaten — sünnerlich Düütschland — allens för de Rüstung utgeven schallt. Dorbi sünd all Rüstungsgüter doch sobiso stinkdüre Müll, de Schrott vun morgen, för nix dor (hööpt wi...) as to rosten un unmodern to warrn — en Geldgraff. Schallt wi wirklich veer Perzent vun uns hoges BSP dorför utgeven?! Dat sünd Unsummen...

Ik bün vun Menen, wi schulln keen Spier mehr as sünst vun dat Kriegsspeeltüüch köpen. Mien Vörslag: Merkel maakt en Deal mit Krauss-Maffei un de ganze Rüstungsbande. De Firmen schrievt för ehr Panzers, Heevschruvers un U-Bööt opmaal dat Sössfache op de Reken. De Bundsregeern betahlt dat — un hest nich sehn, wi hebbt op een Slag 4% för Rüstung utgeven! Trump kann nix mehr seggen. Ok 10% sünd so ut'n Stand mööglich. Dat 200% nich gaht, mutt jichenswen anners Trump verklaarn. — Dorbi haalt sik de düütsche Staat dat Geld achterrücks över Stüern wedder trüch — bet op en lütten Bonus, de Firmen maakt sowat ja ok nich to'n Spaaß. Dorna warrt dat Geld in vernünftige Saken stekt. 4% orr 10% sünd eenfach en Speel op't Papeer! Bi de PKW-Maut wulln se dat ja so ähnlich maken — eerst Maut vun all kasseern un dat denn de Düütschen över de Stüer wedder trüchgeven. Över blifft de Butenlänner-Maut. So'n sauber Geschäft kriegt wi mit de Rüstung al lang hen! In Geschäfte kennt Trump sik ja angeevlich ut — dat he de Tricks to'n Bescheten kennt, glööv ik em sogor. He gellt as "geschäftsdüchtig" — en Woort mit veelschichtig Bedüden. Lehrt wi vun em!

Ach ja, un ok bi den Sold för de Suldat*innen leggt wi mal kräftig to! Den Deel haalt sik de Staat avers nich wedder trüch. Hett ja allens Grenzen. Ok de Geschäftsdüchtigkeit.


10.7.18 ...Dat is de Bewies!

Ha! Nu is dat rut! Un rutfunnen hebbt dat Wetenschaplers ut Sleswig-Holsteen — för mi als Landsfru en lokalpatriotische Triumph! Jümmers hebbt wi uns fraagt, woso richt eentlich de Männer mit Slips so veel Schaden in de Welt an? Wi weet ja, dat se dumm sünd, wenn wi ehr bloots seht, avers so dumm, as se sik benehmt, köönt se doch gor nich utsehn! — So hebbt wi wunnerwarkt, siet Johrteihnten, un nu is de wetenschapliche Bewies dor: De Slipsdrägers sünd de gefährlichsten Lü op de Welt, wieldat se 1. Mannslüüd sünd, 2. sik ok noch dat letzte beten Vernimm künstlich afklemmt: De Slips is schuld! Keen Bloot kümmt mehr in'n Bregen an — de Dösigkeit löppt Amok... De Slipsmoord an Wieverfastnacht is för de Männerwelt reinweg en Erlösen, ehr IQ nimmt dör dat Entslipsen üm tominnst 10 Pünkt to, un dat hett de ehr IQ ja ok bannig nödig!

Wi, de wi alltied för Nonkonformismus un Matriarchat weern, föhlt uns op ganze Linie bestätigt, nich?


8.7.18 ...Wat is hier eentlich los?

Wat is eentlich los bi uns?! Woso terfallt Europa? Woso hebbt de Populisten opstunns överall wunnen Speel, wenn se bloots Piep seggt? Hier mien Denken in Listenform:

  1. Wenn Naschoonen un Völker tosamenarbeidt un sik tosamenslaten hebbt, weer dat en Winst för beid Sieden — en "Win-win-Geschäft". Dat gell bit vör poor Johr — orr hööchstens Johrteihnte.
  2. Man düt Geföhl hett ophöört. De Eer löppt sichtbor vull mit Minschen, de Grenzen vun de Ressourcen un Ökosysteme kaamt in Sicht. De Eer is op. Mehr gifft't nich.
  3. Dorwegen wannelt sik de Perspektive vun de Minschen op ehr Mitminschen un vun Völker op ehr Mitvölker. Se denkt, dat dat Tosamenleven mit anner en "Win-lose-Geschäft" is — dat een bloots dat winnen kann, wat en anner verleert.
  4. Dat Ergeevnis is en gewisse Panik: Jedereen will sien Besittstand wohren, nix afgeven un sik düüdlich afgrenzen gegen anner Völker. De Maxime "Wi gegen de" kümmt vörtüüg.
  5. Lü mit Angst tendeert na autoritäre Sellschapsmodelle. Süh Oosteuropa, USA.
  6. Üm dat "Wi" un dat "de" to defineern, warrt Naschonalismus, Rassismus, Religionismus (Se weet al, wat ik meen — en -ismus kannst ut jede Religion maken) un stückerwat Phobien bruukt.
  7. De unvermeidliche Folg vun "Wi gegen de" sünd Kriege üm Ressourcen. Ok de egen Kultur- orr Rassen-Homogenität is en Ressource.
  8. De Ressourcenkrise lööst Migration ut.
  9. Warrt de Migration direkt dör Kriege utlööst, kannst nich veel dorgegen seggen — d.h. wi sünd moralisch noch nich so wied (rünnerkamen), Kriegsflüchtlinge in'n Krieg torüchtojagen. (Dat kann sik ännern, wenn de letzten düütschen Weltkriegs-Kriegsflüchtlinge starvt.)
  10. Armutsmigration warrt dorgegen to en legitimes Fiendbild. "De wüllt uns' Geld un godes Leven!" Armutsmigranten warrt as Deven ansehn.
  11. Afrika verduppelt sien Bevölkern in de neegsten Johrteihnte. Keen Wirtschapswassdom kann so en Bevölkernswassdom affangen.
  12. De Vörhut vun de Armutsmigration sünd junge Mannslüüd, de "över" sünd. Dat weer al jümmers so, ok "Jürnjakob Swehn, de Amerikafohrer" weer so'n överschüssigen jungen Mann.
  13. Dat en gewisse Perzentsatz vun düsse jungen Mannslüüd starvt, weer al jümmers so. Dat höllt den Rest nich op.

Nee, nu keen Panik! Dat is de Laag. Fakten un historisch-sellschapliche Natuurgesetten. Dor mööt wi dör. Wi hebbt nu twee Alternativen:

  1. De Uursaken vun't Problem mit Plie un Moot lösen
    orr
  2. de Verteilungskämpfe mit Gewalt föhren. Also ok Kriege föhren.

Beid Weeg warrt Geld kosten, avers bloots op den eersten Weg kriggst en Lösung för dat Geld. Lösungen gifft dat; dat Energieproblem vun'e Minschheit lett sik licht lösen, dat Bevölkernsproblem lööst sik in de Folg dör Wohlstand un Bildung; ok för de Probleme vun Ernährung un Natuurbewohren gifft dat Lösungen — een mutt avers wullen.

Nee, nich een; dat sünd leider nich Individuen, de sik entscheiden mööt, sünnern ganze Sellschapen. Un Sellschapen entscheidt na dat Geföhl. Dat Geföhl wahnt noch in de Steentied. Ik glööv, dat warrt noch lang duern; dat warrt so lang duern, bit dat richtig wehdeit. Ok bi uns. Denn avers — denn kriggt de Minschheit de Kurv. Wissdoch.


6.7.18 ...Prost Afschrecken!

De Fifa wiest ehr wohres Gesicht — un dat is natüürlich dat Gesicht vun Onkel Dagobert Duck mit de lüttjen Dollarteken in de Pupille. De kroatische Footballmannschap hett sik gegen de unerbittlichen Marketing-Gesetten vun de Fifa versündigt — se hebbt en falschen Energie-Drink drunken. Verlöövt sünd ja bloots de Saken, de de Fifa-Sponsoren verkööpt. Wat anners dröffst nich drinken, rund üm de Stadien nich usw. usw. De Kroaten harrn en illegale Buddel. Weer angeevlich in't TV to sehn, man bloots ganz kort, avers för sowat hett de Fifa en Oog. Dor will een ehrn Profit antasten, ok bloots üm een Penn! Dat is Terrorismus is dat, jawoll! 60000 Euro Straaf! Sösstigdusend. To betahlen natüürlich an de Fifa.

En Exempel, klaar. Dat schall afschrecken. Avers dat is ok en Steilvörlaag. Weer ik Kroatien, wöör ik nich betahlen. Mal kieken, wat de Fifa deit. Villicht sluut se de Kroaten denn vun de WM ut un wiest dormit endlich, üm wat dat ehr geiht: Geld un sünst nix. De kroatische Mannschap kunn denn en groten Werbespot mit dat illegale Getränk maken, orr beter en ganze Kampagne: Drinken för de Frieheit! De Wedderstand is fleten! — Mit Kommerz gegen den Kommerz. So verhasst, as de Fifa is, warrt dat en Renner. Dormit verdeent de Kroaten mehr as 60000 Euro — sünnerlich wenn se in't Turnier noch wied kaamt. Weer doch klasse, wenn de Weltmeester de Fifa blootstelln wöör... avers nee, Weltmeester warrt de Kroaten nich.


3.7.18 ...Luft anhollen un afschrecken

Also ganz so oginell weer dat ja nich, wat Seehofer dor levert hett. "Wenn ik mien Willn nich krigg, treed ik trüch!" Dat is ja nich nieg. Wo weer dat mit'n Hungerstreik? Dat is twoors ok nich nieg, avers gifft de Merkel-Regeern so'n Anstrich vun Unrechtsregime, denn Hungerstreik maakt ja ok veele Opper vun Diktatuurn, Dissidenten in't Gefängnis un so... Dumm, dat Seehofer nich bloots Opper, sünnern ok (noch) Liddmaat vun de Regeern is. Tja, wo weer dat denn mit de Methode Möllemann? "Wenn ik mien Willn nich krigg, jump ik ut't Fleegtüüch!" De Nadeel vun düsse Methood is apensichtlich: Achterna kannst keen Interviews mehr geven. En Instant-Erpressungsmethood is dorgegen de Trotzphasen-Technik: "Wenn ik mien Willn nich krigg, holl ik de Luft an!" Dat erspoort uns 8-Stünnen-Sitzungen un sorgt gau för klore Verhältnisse. Un Mutti Merkel wöör sogor denn noch inknicken un seggen, "Haal man beten Luft, du kriggst ja dien Willn, tominnst en beten."

Nu mutt utrekent Seehofer de Verhandlungen mit de Naverlänner föhren, dat se de Migranten trüchnehmt. Na da kann he ja mal fein sien Erpressungstechniken öven! De christlichen Krüüzkrieger ut Bayern laavt ja den "Afschreckungseffekt", wenn en Boot vull Afrikaner in't Middelmeer versuupt. Wenn Seehofer de Luft anhollen wöör, bet he an sien egen Gift erstickt, dat weer doch en gode Afschreckung!


24.6.18 ...Eerster warrn

Eerster warrn, Eerster ween — en ole Minschheitsdroom, villicht ok mehr en ole Mannslüüd-Droom. Eerster in Amerika, Eerster an'n Süüdpol, Eerster op'n Maand — allens dat hett een schafft, in Wohrheit avers jümmers en Team. Vörbi. De Eer is afgraast, op'n Mars geiht't noch nich, un uns Generatioon mutt sik mit de Football-WM tofredengeven. Tja, Jogis Jungs schafft dat villicht, den olen Männerdroom vun't Eersterween. Villicht ok nich. Avers ok wenn nich — wi sünd bescheiden, uns blifft de niege Minschheitsdroom, dat Unerreichbore in't Virtuelle:

Eerster bi Google!


21.6.18 ...Mission "Merkel retten"?

Merkel merkelt ganz alleen vör sik hen, de lege CSU an't Been an en Klotz Blei. "Mit de Fru kann ik nich mehr arbeiten", schall Seehofer seggt hebben. Vun dat Verb arbeiten mal afsehn, stimmt dat: Mit en Fru to "arbeiten" is för Seehofer un siensglieken sowiso en Tomoden — en Fru kannst doch nich eernstnehmen! —, un mit en rationale, nüchterne, unweibliche Fru nu eerst recht. Jungs speelt nich mit solk Deerns. Denn Seehofer speelt. För Seehofer, Söder & Co. is de so nöömte Politik bloots een Speelfeld ünner vele. Dat kunn ok Weerschap, Geld orr Sport ween. Düsse Mannslüüd wüllt ehr Kräfft meten, en Hierarchie utfechten, ehr Gegners imponieren, ehr ünnerwerfen, de Stärkste warrn — eendoon, op welk Speelfeld. Se provozeert, trickst, foult, brüllt, reckt de Füüst un trommelt sik op de Bost. Vun't Wesen her sünd se ganz unpolitisch, un se maakt ehr "Politik" ok för unpolitische Lüüd. Dat sühst an de velen Emotionen, de se dor rinbringt. Nadenken un Argumente sünd ehr lästig. Mit düssen Stil kann nu wedder Merkel nix anfangen — un ok nich mithollen.

Paradox, avers de Reddung vun Merkels Kanzlerschap hangt nu ok vun jüst düssen archaischen emotioonsbeladen Kampfsport af. Wenn Jogi sien Jungs wiederhen so en jämmerlich Bild afgeevt, sinkt Angies Chancen wieder. Wi weet ja: Winnt de Mannschap, winnt ok de Regeern. (Notabene: De CSU tellt wi nich to de Regeern, sünnern to de Opposischoon.) Un dat schull de Kickers nu wirklich Damp in de Büxen maken: Sünst kümmt opneegst nich mehr Angie in de Halvtiedpaus in de Kabine, sünnern Seehofer — orr sogor Gauland. Wokeen nu nich panisch Tore scheet, hett keen Fantasie.


31.5.18 ...Broot un Spelen

Dor sühst wedder, wo wichtig so'n Qualifikatioonsturnier is! Italien hett nu Regeernskries; harrn se sik för de WM qualifizeert, dennso harrn se nu ganz anner Sorgen. Un wenn se de WM winnen kunnen, eerst recht. Wi weet ja: Winnt de Mannschap, winnt de Regeern de Wahl...

Noch beter weer dat, wöör de FIFA endlich verlöven, dat WM-Deelnehmerplätz verköfft warrn köönt. Denn kunn sik Italien nu fix en Platz köpen vun en Hungerleiderland, dat sik qualifizeert hett. (Un sik dorför noch beten mehr verschüllen — who cares!) Dat Plätz to köpen weern, weer doch ganz in der Reeg mit de FIFA ehr Prinzipien. Un se kunnen dormit nu den Euro, Europa, ja de Weltweerschap retten! Geiz is geil un Korrupschoon reddt de Welt. Broot un Spelen even.


19.5.18 ...Firma verklaagt Kapitalismus

"A1 mobil" heet de Firma, de en Stück vun de Autobahn Hamborg-Bremen renoveert hett un daför 30 Johr lang privaat de Maut kasseert — Autobahnprivatiseern even, en groot Geschäft, na dat mennig Firmen lechzt un dat mennig Börgers förchten doot. In ehr Logo drauht "A1 mobil" ok mit den Sprook "Zukunft erfahren!" Ohauaha. — Annerletzt nu hett avers düsse Firma de Bundsrepublik (also uns all) verklaagt. Wi sünd wegen de Finanzkries na 2008 nich noog mit'n Laster op ehr Autobahnstück rümfohrt, so dat se to wenig Maut kasseert hebbt. Se harrn sik mehr dorvun verspraken. Dat schulln wi ehr nu utglieken, in bar. So üm un bi 700 Millioonen Euro.

Wi kennt dat ja, dat welk Ünnernehmers (avers lang nich all!) dat gewaltige "ünnernehmerische Risiko" ziteert, üm to begrünnen, woso se sik (to'n Troost!) hoge Gehälter spendeert; avers wenn dat ünnernehmerische Risiko denn tosleit, kaamt se doch geern bi'n Staat (also bi uns all) an un wüllt de Lasten afnahmen kriegen. Dat Originelle hier is, dat "A1 mobil" sik wegen de Folgen vun de Finanzkries beklaagt, also wegen en Utwuss vun dat irre woorn kapitalistische System, vun dat se sülven en Deel sünd. Autobahnprivatiseern un Investmentbanking-Irrsinn sünd ja op een Holt wussen. Driestheit wasst avers apensichtlich op datsülve Holt.

Dat Gericht hett de Klaag avers nu trüchwiest. Op de een Siet hett "A1 mobil" ja recht: Natüürlich is dat en Aart Staatsversagen, dat dat Finanzkapitaal so Amok lopen kunn; avers liekers müss dat Gericht so entscheiden, denn: Allens, wat dat Finanzkapitaal deit, is eendüdig Högere Gewalt. En Natuurkatastroph. Denn Egennutz un Gier sünd ja de Natuur vun'n Minschen, nich?


13.5.18 ...Allens flütt

Israel is, wat wi ehr vun Harten günnt, rein ramdösig vör Freud — denn se hebbt a) den europääschen Gesangswettstried wunnen und b) Donald Trump. Wat wichtiger is, dat wesselt, man beid hangt jichenswie tosamen, denn beid geevt ehr dat Geföhl, rein allens to könen, un dat's en good Geföhl. Trump formuleert dat so: "Jedeen souveräne Staat hett dat Recht, sülven to bestimmen, woneem sien Hööfdstadt liggt." Un Israel will even Jerusalem as ehr Hööfdstadt. Dat dat deelwies op en anner Naschoon ehr Territorium liggt, dröff dor keen Hinnerungsgrund ween, nich? Ach wat, wokeen wull denn so kleinlich ween! Se nehmt ja offiziell eerstmal ok bloots ehren Deel dorvun. — Finnt Se Berlin egentlich schöön? So as Hööfdstadt? Ik nich. Wi sünd doch en souveräne Staat, wo weer dat denn mit so'n smucke Stadt as Florenz as düütsche Hööfdstadt? Orr Istanbul mit sien spektakuäre Laag an'n Bosporus? Orr ok Jerusalem?

Dat Ganze passt in de gegenwäärtige Debatte vun "Fletenheit", op Ingelsch "Liquidity". Hüüt kannst allens frie wählen — dien Naam, Geslecht, Huutfarv un Naschoon. Gender Liquidity heet de mennig mööglichen Geslechter hüüt, för de du di frie na dien binner Geföhl entscheiden kannst, un ok de fleten Övergäng twüschen ehr. "Panta rhei", allens flütt, as al de ollen greekschen Filosofen sään. (Ja, ok de Rechtschrieven flütt!) Un nu fangt ok de Hööfdstäder an to fleten. Keen Wunner nich, denn de Kontinente fleet ja apenbor al — sünst harr Israel ja nich den europääschen Songwettstried winnen kunnt un kunn ok nich in de UEFA ween, denn Israel liggt ja in Asien, jüst as Kasachstan. Avers allens is hüüt mööglich, dank Trump un de Fletenheit, un dor wüllt wi dankbor för ween! Un mit Kasachstan un Israel speelt wi ja geern Football, denn de köönt wi licht besiegen

Wat ik nu noch op tööv? Liquid Age. Dat jedereen sik sien Öller frie wählen kann. Poor Pioniere gifft't ok dor, ik erinner bloots an Silvio Berlusconi (ogottogott, de Keerl kunn opletzt nocheens in Italien an de Macht kamen!); man dor blifft noch veel to doon. Donald, krempel de Ärmel op! Bloots du kriggst dat hin!


6.5.18 ...Huch?!

Algorithmen — also mathematische Aflööp — bestimmt ja angeevlich so veel in't Web. Avers mennigmaal maakt se mi spraaklos. Düt Bild kreeg ik hüüt to sehn:


Klick op to'n Vergröttern!

Ik harr jüst tostimmt, de Organisaschoon "Abgeordnetenwatch" op Twittter to folgen. Normaal kriggst denn ja ähnliche Vörslääg nalevert; ik krigg "LobbyControl" vörslaan un "Transparency Germany" un — äh? — Christian Lindner. Also twee Ähnliche un een Gegendeel. Lindner is ja nu wirklich dat Gegendeel vun Transparenz, Korruptionsbekämpfen un Lobby-Kuntrull! Ik heff bloots twee Erklären dorför:

  1. De veelbesnackten Algorithmen sünd noch en beten dumm.
  2. De Algorithmen sünd in't Gegendeel heel plietsch: Twitter will mi nich in de "Filterblaas" sitten laten un biddt mi dorwegen ok mal ganz wat anners an as mien normale Vörleven.

Also ik mutt seggen, ik finn dat ganz nett, sünnerlich de twete Lösung. Ofschoonst Lindner to "folgen", ok bloots op Twitter — dat warr ik nu wohraftig nich doon. Nee, dor bliff ik doch in mien Filterblaas!


6.5.18 ...Kalle Marx hett Bortsdag

Tja, hüüt hett he sien runden Bortsdag, de Karl. Schallt wi em beglückwünschen, wieldat he mit sien Theorien in so mennig Pünkt recht behollen hett? Glücklich is he dor sachs nich över. Un in vele Pünkt is he ja ok biestergahn: De Lüüd laat sik allens gefalln, wenn se man Broot un Spelen hebbt; dor kümmt keen Revoluschoon; de Minschen wählt wiederhen taagnackig gegen ehr egen Intressen; se laat sik mit een Mohrrööv vör de Nees Johrhunnerten lang as Esel föhren. Se wüllt nich Gerechtigkeit för alle, se wüllt Riekdom för sik sülven un denn de Freuden vun'n Kapitalismus geneten. Dorwegen speelt se Lotto — denn anners geiht dat ja nich. Ehrliche Arbeit föhrt al lang to nix mehr. Dat weet wi all. Nix ännert sik. Doch: dat warrt slechter un slechter.

Marx meen dat good, avers he weer sachs keen Minschenkenner.

Wat weer eentlich, wenn de Erfinner vun'n Kapitalismus an een Dag in't Johr Bortsdag harr? Un af un to en runden? Wat wöörn wi denn för Bilanzen trecken? Mennig glöövt ja, de Kapitalismus leeg in de Natuur vun'n Minschen un sien Erfinner weer also sotoseggen Gott. Wenn ik dor nu op ingahn schull, kaamt wi nich ahn Jesus, Erlösung, den Niegen Minschen, Kamele un Nadelöhre ut, also laat wi dat. Wiss is: De Kapitalismus hett vele Vör- un Nadelen. Meddewiel hett he sik op mennig Rebeden blameert, de Natuur vun unsen Planeten meist ruineert un dormit de Tokumst neegto vör de Wand fohrt. (Jaja, ik weet, de Sozialismus hett sik ok blameert un ok de Natuur ruineert; avers he kann dat nu nich mehr, nu is dat de Kapitalismus, de dat deit.) Un liekers höllt he sik wied över all Kritik! As weer en anner System gor nich denkbor! — Dor liggt wirklich veel vun in de Natuur vun'n Minschen, anners kunn dat nich angahn. Man de besten Egenschapen sünd dat nich. Marx hett op de besten Egenschapen in'n Minschen höpt; villicht weer dat sien Fehler. De Kapitalismus verlett sik op de slechtesten. Dat klappt jümmers.

De Erfinner vun'n Kapitalismus weer en exzellente Minschenkenner. Un en brutalen Zyniker. En Unsympath. En Genie, avers en Kotzbrocken.

Dat weer wiss nich Gott.


29.4.18 ...Bottervagelslalom

O nee, nu warrt dat Autofohrn noch vigelienscher! Nu mutt ik nich bloots Snickenslalom fohrn op de Landstraat, sünnern ok noch Bottervagel-Slalom! Wieldat de Insekten doch so roor warrt, tru ik mi nich, een dorvun doottofohrn. Mit de annern Insekten kannst dat ja nich, wieldat du ehr nich gau noog wies warrst; avers de Bottervagels, de sühst vörut över de Straat rümfladdern. (Se seht doran, dat ik gaaaanz vernünftig, sinnig Tempo fohr!) Un ik wiek ehr denn ut. — Wat en Lekschoon, dat de Insekten so kostbor warrt, dat wi op de enkelten Deerten acht hebben mööt!! Wi mit uns grote Autos! — Wi Minschen hebbt noch veel to lehren, un wüllt höpen, dat dat ahn veel Pieen vunstatten geiht.


13.4.18 ...Simuleerte Welt

Wahlmanipulation över Facebook, Kriegsverklaarn över Twitter — köönt wi uns noch sülven eernst nehmen? Wat wi dat köönt, weet ik nich, avers wi doot dat nich — sünst weer mehr Bang. In'n Kolen Krieg harrn wi veel Bang vör en Weltünnergang, hüüt gor nich, ok wenn wi vun möögliche Weltünnnergäng reinweg ümzingelt sünd. Wi glöövt nich, dat dat allens wohr is orr wohr warrt — sünd doch bloots Medien. Allens is Medien vundaag. Villicht is de ganze Welt en super Computeranimation. Avers nich as in "Matrix" — dor harr dat Ganze noch en Bedüden, de hett uns Welt nich. Wi laat ehr wiedermaken, de Banken, de Autoindustrie, de Lobbies, de Weltvergifters — un geevt bloots uns' Facebook-"Likes" dorto. De Medien vertellt uns jedeen Dag, dat wedder en Fru vun ehrn Mann ümbröcht woor; un vun de russischen Diplomaten à la Lavrov hangt af, wat dat en Atoomkrieg geven kann. Op de ehr Besonnenheit sünd wi anwiest, Trump un den Westen kannst vergessen. Dormit kannst leven, nich? Muttst ja nich liken, schullertucken langt.

Villicht is allens doch en Computersimulation. Höpt wi dat.


25.3.18 ...Wat höört to Düütschland?

Wetenschap is för de Politik so'n Dings, da muttst eerstmal kieken: Passt mi dat? De kriegt ja Fakten rut, un Fakten köönt heel unkomodig ween; avers ok heel willkamen, je nadem. Wenn ja, denn laat sogor de Trump-Lüüd mal so'n Wetenschapler dörgahn; wenn nich, döcht de ganze Wetenschap nix, lüggt orr geiht biester... Nu bi uns kannst Seehofer & Co. as Historikers to Hoochfoorm oplopen sehn: Se weet nau, wat in de Geschichte al jümmers to Düütschland höört hett!

Dat is so dösig, dor mööt wi gor nich över diskereern. Natüürlich gifft dat keen "al jümmers", un natüürlich sünd de mehrsten Saken un Phänomene, de unsen Alldag präägt, heel jung. De Bildzeitung (siet 1952) is t.B. bloots 9 Johr öller as de törksche Arbeitsmigration, de 1961 anfüng. All düt gifft dat in Düütschland, etwa gliek lang. Avers — wat heet "dortohöörn"?

"Dat höört to Düütschland dorto" heet för mi, dat a) een Düütschland nich wedderkennen wöör orr b) Düütschland nich mehr funscheneern kunn ahn de Saak, de nu mal dortohöört. As bi mien Huulbessen: ahn sien roden Korpus wöör ik em nich wedderkennen; ahn den Stoffbüdel binnen funscheneert he nich. — Insofeern höört Arftensupp un Goethe ganz kloor nich to Düütschland, denn de Lü köönt wunnerbor dorop verzichten; Football un Deepköhlpizza avers höört dorto, denn ahn ehr wöörn mennig Düütsche eenfach verhungern. Dortohöörn deit dat Handy, so jung dat is, denn ahn em wöör hier nix mehr flutschen; nich dortohöörn deit, so leed mi dat deit, dat Christendom. Dat fehlt hüüt sowiso enerworrns, sünnerlich in den Oost vun uns Land, 'neem de AfD miteens so grote Stücken op't Christendom to hollen hüüchelt; liekers misst dat nüms, un allens funscheneert ganz good. De Kapitalismus funscheneert sogor best ahn Christendom orr jichenseen Religioon. Höört villicht Atheismus to Düütschland...? Koolt, köhler, ieskoolt warrt dat in uns Land.

Ok nich dortohöörn deit na düsse Kriterien de AfD un Horst Seehofer —— oh, ik merk, ik bün al wedder bi Wahlbeinflussen. Sorry.


23.3.18 ...Wahlbeinflussen

Nee, sowat aver ok! Dor hett wohraftig en Firma versöcht, över Facebook Lü vunwegen en Wahl to beinflussen! Nee, nich de Wahl vun en Produkt, dat se köpen schallt — dat passeert ja all Daag. Nee, för de Wahl vun Donald Trump. Igitt!!!

Uns Politikers loopt nu hitt. Dat hebbt wi al in de letzten Johr sehn, as ehr de Macht vun soschaale Nettwarken dämmern dä. Missbruuk!, schriegt se. Politische Wahlen beinflussen, keen anstännige Minsch wöör sowat maken! Bloots Politikers even. Ja? Ja, äh — se nöömt dat Wahlkampf. Siet korte Tioed ok online. Avers nüms anners dröff dat! Al gor nich so'n obskure Firma. Utnahmen, de Politikers sülven geevt ehr den Opdrag. So as hier.

Dumm bloots, dat du nüms so richtig för de Facebook-Saak belangen kannst. Zuckerbarg maakt sik nu twoors lütt un speelt den Reuigen, avers bloots för den Aktienkurs; de Staatsanwalt kann em nix. Nüms hett Gesetten braken, nich mol Regeln; bi Reklaam för Produkte löppt dat jüst so. Allens legaal. Ok Obama hett düsse Tricks al för sien Wahl nütt. That's Facebook, Lüüd! Jüst dat is ja dat Problem.

Naja, bi dat Problem kannst dör Regeln un Gesetten wat maken. Dat gröttere Problem sünd de Lü, de en Trump wählt, egaal wat bi Facebook steiht. Nüms bringt mi ja gegen mien Willn dorto, dat ik etwa de AfD wählen do. De Lüüd sünd praat un redig, se staht dor as de Dominosteens, un so'n Webkampagne stött bloots den eersten an. Gegen den Bregenschaden vun de Lü muttst wat doon!

Oha, markst Müüs, wat ik hier maak? Wahlbeinflussen... Pfui!


14.3.18 ...Pi Day

What next? Wi sünd nu verwachten, wat Donald Trump as Neegst deit — un wi hebbt nich den ringsten Schemer, wat dat ween kunn. Or doch? Ik heff ja so'n Verdacht, dat he na China schuult. Dor hebbt s' ja nu ehrn Präsidenten op Levenstied inthroniseert. Mi dücht, dat kann Trump nich op sik sitten laten, dat he weniger weert ween schall as Xi Jinping! — Bloots Noordkoreas Kim Il Sung kann dat toppen: He is ok över den Dood rut, ja op all Ewigkeit Ehrenpräsident vun sien Land! Snaaksch eentlich, dat de Lü, de partu an nix glöövt, dat so mit de Ewigkeit hebbt... Avers mit wat Ringers kann Trump sik doch nu nich tofreden geven! Na los, Donald, Verfaten ännern un ran! Vun Noordkorea lehren heet siegen lehren!

Tja, un denn is hüüt Stephen Hawking dootbleven. Ahn Nobelpries, so as Gandhi. Keen slechte Sellschap. — Wenn ok de Nobelpries fehlt, passt doch wat anners: Hüüt, sien Doodsdag, is Pi Day. Pi-Dag. Dat heet so, wieldat de US-Amerikaners den 14.3. so schrievt: 3/14. Un de Krinktall Pi is ja 3,14 (un noch beten wat achterran). Passt! Is dat nu en lütte Reverenz, en lütt Kniepöögen vun't Universum? Snaaksch, denn Hawking harr dat ok nich so mit den leven Gott un de högern Mächte. Un nu dat. Vör den himmlischen Humor is even nüms seker.


11.3.18 ...Nieges Wahlrecht?

De Weltfruunsdag an'n verleden Dunnersdag weer ja en besünnern een. Worüm? Wieldat vör nipp un nau 100 Johr dat Fruunswahlrecht beslaten woor! — Laat noog! Man wat mien Leevsten is, de hett ja jümmers so snaaksche Ideen: Nu will he to düt Jubiläum dat Wahlrecht al wedder reformeern. Dorto hett he sik düt utdacht:

  • Jedeen Börger*sch kriggt per Johr 100 Wahlpünkt.
  • Elkeen Week gifft dat 2 bit 3 Volksafstimmen över wichtige Themen, bi de all mitmaken köönt, de noch Wahlpünkt hebbt.
  • Jedereen kann bi de Afstimmen 1 bit 100 vun sien/ehr Pünkt insetten. Wenn de Saak di wichtig is, verknallst all dien Pünkt för düsse een Afstimmen un stimmst mit hunnertfach Gewicht. Wenn se di egaal is, stimmst du gor nich orr mit bloots een Punkt af.
  • De Saak, de de mehrsten Pünkt kregen hett, winnt de Afstimmen — un warrt verbindlich ümsett. Punkt.

Düt System is direkte Demokratie in Foorm vun so'n Aart permanenten Wahl-o-mat. Dat heet, dat dat keen Parteien mehr gifft un nich mal en Regeern. Grote Verlichtern!!! Bloots noch en Verwaltung is nödig — un natüürlich dat Gremium, dat fastsett, welk Themen wennehr to Afstimmen stellt warrt. Düt Gremium is mächtig un mutt mit Ajess utwählt warrn. Wenn dat korrekt geiht, kann dat keen Politikverdreet mehr geven. Dat Volk weer anduernd bi to diskereern, jedereen kunn sik dor wedderfinnen.

Tja, un denn bruksen wi sachs noch so'n Repräsentaschoons-Automaat as de ingelsche Queen, de en fastleggte Regeernsverklaarn vörleest. För düssen Job wöör mien Schatz geern sülvst kandideern. — Ik glööv, bi so'n Wahlrecht harrn wi veel Spaaß! Nich, dat dat jemalen kamen wöör...

Avers an dat Fruunswahlrecht hett lange Tied tovör ok nüms glöövt.


11.2.18 ...De Sleudersitz

Över de SPD lästern? Nee. Is allens doch längst seggt. Un wi wüllt ja nich napedden, wenn een al an'n Borrn liggt. De SPD is wirklich de HSV ünner de Partein. Un wokeen ehr Vörsitter warrn will, is as de HSV-Trainer: Wenn he wat verkehrt maakt, geiht he vör de Hunnen. Wenn he allens richtig maakt, ok. Is en Sleudersitz.

Martin Schulz hett sik tragisch verdaan, man he hett nich dat Tüüchs to'n tragischen Helden — wieldat em dat üm sik sülven güng staats üm de Saak —, un so blifft he en Hanswust, en trurige Figur. Ik glööv ja, dat he mal en integren Mann weer (för en Politiker). He is gor nich glatt un glau noog, he is to eenfach, as dat he so richtig plietsch (also: politisch) ween kunn. Man denn keem de Ehrgiez...

Kann de Macht wedder in linke Hannen kamen? Höört se dor överhaupt hen? Kann de, de an de Macht will, links blieven? — Macht is vun Natuur konservativ. Wokeen de Macht hett, will ehr nich wedder afgeven — he will de bestahn (Macht-)Verhältnissen nich ännern. De, de apen sünd un sellschapliche Verännern wirklich wüllt, sünd mehrst keen richtige Machtminschen. Villicht hebbt linke politische Kräfft dat dorüm so swoor. Ok de lütten Lüüd bi uns schient dat unbewusst to denken: Macht höört to de Mächtigen, dat Volk orr linke Partein köönt se sik jümmers bloots för en korte Tied vun de Mächtigen borgen. De laat se ehr as en Speeltüüch; man richtig wehdoon laat se sik nich. Wi Minschen hebbt en Instinkt för Hierarchien, un de mehrsten Minschen ordnet sik dor mehr orr minner willig in. Dorüm wunnerwarkt Linke jümmers, wenn se miteens Macht in de Hannen hebbt, un stellt sik faken tapsig dormit an — orr verleevt sik in ehr un höört op, Linke to ween. Dat is, as wenn Fruunslüüd nich inparken köönt: Se verwacht dat al un blameert ehr ganz Geslecht un schaamt sik. Wenn en Mannsminsch nich inparken kann — naja, kümmt mal vör.

Dat gifft en deep Misstruun gegen de Macht un gegen de, de ehr hebbt — sünnerlich bi Linke, ok in de SPD. Wi Minschen weet: Eerst kriggt een Macht, avers denn kriggt de Macht em. Denn anverwannelt he sik an de Mächtigen. Wokeen eerst noch apen is, slütt sik langsam to — warrt konservativ. Villicht is de SPD dorwegen so terreten? De Basis verdächtigt ehr Protagonisten licht, dat Machtspeel to spelen, wenn de Kompromissen maakt. Un villicht hebbt se recht.

Egaal, wat links, wat rechts: Wi mööt den Verstand mehr truun as de Hierarchien. Wi mööt uns sülvst vertruun. Ok de SPD mutt Föhrungsfiguurn finnen, de se truut, de integer sünd, ahn lüttkariert to ween. Un linke Kräfft mööt — äh — Hm, villicht is HSV-Trainer doch de lichtere Job.


29.1.18 ...En Apenschann!

De Autoindustrie is apensichtlich dörch un dörch kriminell. Keen Wunner — woneem veel Geld lockt, kümmt dat Slechteste in'n Minschen vördag. Man nu kümmt rut: Se hebbt ok Afgasversöken mit Apen maakt! So fies! So'n Aap is en unschüllig Deert un weet ja gor nich, wat em passeert! Woto is dat nödig? Dat gifft doch al lang Minschenversöök mit Millioonen vun Testpersonen — de Labors dorto sünd uns Binnenstäder...


26.1.18 ...Kort vör twölf?!

Wi sünd ja verwöhnt. Wenn uns Sekerheit un Komfort mal nich ganz perfekt is, seht wi glieks de Welt ünnergahn. Atoomwetenschaplers hebbt nu ehr "Doomsday Clock", de "Weltende-Klock", op twee Minuten vör twölf stellt. Dat heet, se hebbt gaaaanz grote Bedenken, dat de Minschheit utrott warrn kann. Wat?!

Also de Minschheit is nich op de rode List vun bedrauhte Spezies, so veel is kloor. Dor sünd en ganzen Barg anner Leevwesen, de de Minschheit in Gefohr bröcht hett; Gefohr för de Minschheit gifft dat hööchstens dör ehr sülvst. — Jüst de meent ja ok de Atoomwetenschaplers; un wissdoch, bi en globalen Atoomkrieg kann dat allerdings fix gahn. Man vun en globalen Atoomkrieg is överhaupt nixnich narms an keen Horizont to sehn. Nee, ok nich in Korea! Punkt. Un wat de ganzen annern Gefohren angeiht — Klimaverännern, resistente Keime, Terror usw. —, woans schall dat de Minschheit utrotten?! Uns Tall stiggt jümmers noch rasant! Na klaar warrt dat Millioonen Oppers geven — Milliarden sachs; un villicht sünd ok wi sülven ünner de Oppers — sogor wi hier in't sekere, rieke Noordeuropa; avers de Minsch as Deertenaart warrt dat allens överleven, dat is wiss. Wi sünd flexibel un findig as de Rotten, köönt uns an jede Situaschoon anpassen un to Noot wedder in Höhlen wahnen. Wi överleevt. Wi dröfft dor ganz unsentimental ween. Dusende Planten- un Deertenaarten rott wi ut un vernicht ehrn Levensruum. Ok Minschen: Dat is nu al beslaten, dat Bangladesh ünnergahn warrt un de povern Lü dor ehr Heimat un sachs ok ehr Leven verleert. Wi schullertuckt un maakt wieder mit uns klimaschädlich Levenswannel. Liekso cool mööt wi ok ween, wenn de Konsequenzen uns sülven dreept. Jichenswelk anner Minschen warrt denn jichenswo op den Globus överleven un de Spezies wedder utbreden. Sachs mit de glieke Unkultur un Gier as hüüt. Orr, as Wilhelm Busch sä:

Sehr tadelnswert ist unser Tun;
wir sind nicht brav und bieder.
Gesetzt den Fall, es käme nun
die Sündflut noch mal wieder?

Das wär ein Zappeln und Geschreck!
Wir gingen alle unter;
dann kröchen wir wieder aus dem Dreck
und wären, wie sonst, recht munter.


16.1.18 ...Hasen in Sicht!

Villicht is düt ja ehrder en Natuur-Notiz? Op jeden Fall is de Levensruum vun den gemeinen Schoko-Oosterhasen (Lepus paschalis schokoladicus) de Supermarkt. Dor weer ik hüüt kort na Fieravend, mal nakieken, wat noch Wiehnachtsreste dor sünd. Un dor prangen se — de Oosterhasenbatterien! De Wiehnachtsreste weern liekers noch da, beten bisiet packt. Nu is dat sachs bald so wiet, dat Wiehnachten un Oostern op een Dag fallt — in een Regal sünd se binah al. Bavento heff ik hüüt en groten Togvagelswarm sehn, de ut jichenseen Grund ünnerwegens na Noordwest weer. Dorto de Hasensichtung an'n 16.1. — Januar, de Lent is dor!


15.1.18 ...Platt warrt wichtig

Al lang — lang ok vör den NSA-Schandaal — weer ja bekannt, dat Emails usw. vun US-amerikaansche Snüffelneesen automaatsch na Henwiesen op gefährliche Lü dörsöcht warrt. Rudi Witzke un ik hebbt siet 2002 veel op Plattdüütsch mailt un Saken diskereert. So'n undörsichtige Spraak as Plattdüütsch — dat müss de US-Snüfflers doch argern! Ehr noch mehr to tarren, hebbt wi merrn in uns plattdüütschen Kontext lütte Slötelwöör inbuut, so as Bomb attack orr sogor Kill Bush. Wi wüssen, de Textscanner wöör de Slötelwöör finnen un uns Mails ut den allgemeenen Datenstroom rutfischen, ehr nehger to ünnersöken. Un wat wöörn se lesen? Platt! — Dat wöör ehr keen Roh nich laten. Denn müssen se also een finnen, de ehr dat översetten kunn... Wat schall ik seggen: Lange Johr hebbt wi uns höögt, dat wi en Arbeitsplatz för en Plattdüütsche/n bi de CIA schafft hebbt. Wi hebbt em/ehr sogor in uns Mails grööt — op Platt, versteiht sik. Ja, beten naiv weer dat, de ganze Terrorparanoia weer na 2001 noch frisch, un nüms wüss, dat miteens de Geheimpolizei in de Buud stahn kunn... Hüüt sünd wi all künnige Börgers vun de Terror-Ära, sünd heel vörsichtig woorn un hebbt de Sülvstzensur verbinnerlicht. Wokeen truut sik hüüt noch, sowat to maken as Rudi un ik?

Nu hebbt wi dat Nettwarkdörsettensgesett (NetzDG) an'n Hals. Dat heet, Meinungsfrieheit in soschale Nettwarken is privatiseert — Se weet al. Bloots de Gedanken sünd noch frie. Ja? Nee, dat kümmt natüürlich op an, woans Se de Gedanken künnigmaakt un wat de Privatzensoren dat lesen köönt. Un hier kaamt de lütten Spraken in't Speel, so as Platt. Düsse Spraken köönt heel wichtig warrn, wieldat se Frierüüm buut för lütte Communities, frie mitnanner to snacken. Dat weltwiede Coca-Cola-Ingelsch versteiht hüüt jede Maschien. Man all de lütten Spraken, de hüüt so ünner Druck sünd, de warrt bloots vun richtige Minschen snackt un verstahn. In'n 2. Weltkrieg hebbt de Navajo, de in de US-Armee Suldaten weern, unverslötelt över Funk snackt, wieldat keen Minsch jemalen de Navajo-Spraak lehren kunn, de nich dormit opwussen is. De Spraak weer de Code. Verstaht Se...? Öövt Se man düchtig Platt, dat kann noch wichtig warrn. För Se sülvst.


Öllere Notizen: Hier klicken


na baven