Gretchen-Fraag

vun Karl-H.Nissen




Un dat is keen Platt?

Gistern weer Korl wedder dor to en Tass Kaffee, so as jedeen Sünnavend. Wi hebbt wedder över allens snackt, wat in de Woch so los weer, so as jedeen Sünnavend. Den Benzinpries harrn wi vör, över dat Streiken hebbt wi snackt un denn kemen wi up de Wahl in uns Land nu an'n Sünndag.

"Ik bün je en Stammwähler, al von Vadders Tieden her, man dit Johr weet ik gor nich so recht, wat ik wähl", so vertellt Korl. "Ik bün hüüt morgen noch mal hier in Lübeck na de Breed Straat gahn, dor stünnen all de bunten Sünnenschirms vun de Parteien, root, geel, gröön. Ik heff mi de Plakaten bekeken. Mal is dor en blonde Fru up, mal en Mann mit gor keen Hoor, mal en richtigen Gentleman. De een will mehr för de Bildung doon, de anner will allens frie hebben. Bi de drütten kann ik gor nich rutfinnen, wat de wüllt.

Ik heff mi denn ganz sinnig an enen Disch stellt, heff so en beten klöönt, un denn heff ik fraagt: Wo is dat denn in ehre Partei mit Plattdüütsch? Un so heff ik dat de ganze Reeg lang maakt.


Wokeen dat is? "Piraat!" seggt he. Dat anner weit sien PC

Ji glöövt dat nich. Twee orrer dree, de wüssen gor nich, wo ik vun snacken dee. Een vertell mi, sien Opa un sien Oma, de hebbt jümmers Platt snackt, man he kunn dat nich. De nächst reedt vun uns Lieblingsland un will bi Plattdüütsch doon, wat man "im Rahmen des Möglichen" doon kann. De anner meent, üm Plattdüütsch sall sik de Familie kümmern.

Nu is dat mit disse ollen Spraken avers doch so as mit olle Hüüs, as mit den Seeadler, as mit de Bööm in de Vörgoorns: dat steiht allens ünner Schutz, dor gifft dat Vörschriften. Un dat gifft en Gesett, en "Charta", un dit Gesett gellt in ganz Europa, dor will man disse lütten Spraken mit plegen.

Dat is blots so, de Lüüd in de Breed Straat wüssen dor nich veel vun. Un dorüm weet ik nich, wat ik Sünndag wählen sall."


6.5.2012


na baven