Nee, de Thron is nienich lerrig!

Nörgeln un opblöhen

vun Jens-Peter Bey

Immer blots Politik-Nörgelee treckt eenen rünner. Hoffberichters hebbt dat beter un blöht op. So is mi dat gahn.

In düsse Wuch harr ik de Nees full. Ik kunn dat nich mehr hören: Rummenigge un Rolex, Hoeneß un Speelgeld, Derrick un SS-Dodenkopp,
"Brigitte" un "Radio Lotte" as Winner in de Journalisten-Lotterie, FAZ un TAZ un de "Welt" as Looser buten vör de Döör. Nich to vergeeten de Amigos in den Landdag vun Bayern, de rümschummeln doot un — Vadder, Modder, Süstern, Bröder — för godet Geld un meist pro forma instellt. Parlamentariers, de sik nich schamen doot, wenn se den 13-jährigen Söhn as Computer-Berader mit Stüergeller betahlt. Dag för Dag keem dat leger. Harst mien suer Gesicht sehn un mien Adrenalinspegel meten schullt.

Woans ik wedder rünner kamen bün in düsse Wuch? Mit 'n Pund Pikantje vun Frau Antje, süss Buddeln Amstel-Beer un 'ne orange Prück heff ik mi vör den Platt-Tivi breet makt, twee hollandsche Daag inlegt un mi frie nahmen vun all dat düütsche Gedöns, heff de Schandaale un den Swienkram vergeten un bün to'n Monarchisten muteert.

Hape Kerkeling is good, Beatrix, dat Originaal, is beter. Se hett dat mit de Moddermelk mitkreegen, de Fru Ex-Königin un hütige Prinzessin. Sogor dat Afdanken leep mit bremste Grandezza. Keen Diadem hett dat hochtoupierte Hoor verschannelt, dat dörch Dree-Wetter-Taft so'n Betonblock-Design harr. Blanke Oogen geev dat un warme, weeke Wöör. Un as Togaav 'n lütt beten Königstrakeln un twee Seute för den Söhn.

Nanu, den König vun de Harten süht Willem-Alexander nich so liek, orr?

Willem-Alexander mutt sik vörsehen. För den kleedsamen roden Märkenbook-Königsmantel mit den swatten Tüpfels in den witten Pelz sind to veele Hermelins afnibbelt. Dat gifft Arger mit de Ümweltschützers. Synthetik-Fell harr dat doch ok daan. Liekers hett he 'n gode Figur makt. Sien Döchter ok. Normalerwies krieg ik bi Blau un Geel dat Würgen. Aber wenn de lütjen Prinzessinnen so niedlich optakelt ward, is dat 'ne Oogenweid. Un eerst Maxima: Ik segg di, wenn du de Fru ankieken deist, denn begrippst du dat Bedüden von Königsblau. Dor kannst du glatt dat Kleederduell mit Schwägerin Mabel vun'n Vördag vergeeten: Datsülbige Root, de sülben Volangs. Nich to begriepen. Fröher hebbt de Fruunslüüd so'n Stried mit Rottengift klareert.

Liesbeth ut England weer nich dorbi. Dat Reisen makt ehr nix ut. Aber dat hört sik bi de beteren Lüüd so, dat de hollandsche Königs-Azubi toerst andanzen deit. Liesbeth hett Charles un den Rottweiler schickt. Camilla harr sik Bläder in't Hoor tüdelt. Lütt beten oldbacksch. Aber se kümmt bilütten ok in de Johrn. Victoria vun Schweden harr so'n fetzige diagonale Diskus-Schiev op'n Kopp. Mathilde vun Belgien kunn dat noch toppen. Dat Wagenrad op'n Kopp hett de Putzmakersche vun en Stellmaker stabiliseern laten.

Nu mark di dat een för allemal: Königskieken lenkt af un entspannt! Dat Geschwaller vun de Adelsexperten is beter uttohollen as Uli Deppendörp, de di gedankenschwanger verkloort, wat du schon lang weeßt: Düütsche Politik makt di narrsch. Wenn Du mitsnacken wullt: Abo vun "Bunte" un "Gala" ordern. Oder tweemal de Wuch Tähndokter un Babutsch besöken. Dat Heimatblatt blots noch op de Lokalsieden lesen!

Prost Amstel! "Prinz Pils", alias Willem-Alexander, schall leben un "König Beer" warrn. — Dat Hofbräu-Beer ut Bayern röhrt wi eerst wedder an, wenn dor de Amigos in 'n Wind schoten sünd un Dortmund in Wembley den Champions-Pott haalt hett.