Ik warr min Straat in de Luft jagen

Düsse schöne Satire — een vun de Satiren, de ik geern sülven schreven harr — stunn in'n London Observer al an'n 26. Januar 2003. Leider heff ik't eerst nu funnen un foorts in Platt bröcht.
Marlou Lessing

Ik bün würklich begeistert vun George Bush sin letzt nöömten Grund dorför, dat he den Irak terbomben will: Sin Gedüür is toenn. Min ok!

Al'n ganze Tied verdreet mi düsse Herr Mohl, de poor Hüüs wieder de Straat lang wahnt. 'nau seggt, he un düsse Herr Pahls, de dat Reformhus hett, de verdreet mi beed. Se kiekt mi scheep an, un ik bün wiß, dat Herr Mohl jichenswat Gresiges gegen mi plaant, schoonst ik bet nu nich rutkriegen kunn, wat. Poor Malen bün ik al üm sin Gewees rümmersliekert, natokieken, wat he deit, man he hett allens good versteken. So tücksch is he. Un wat de Herr Pahls is, na, fraag mi nich woher, man ik weet — ut heel gode Quelln —, dat de Keerl in Wohrheit 'n Massenmörder is. Ik heff al in uns Straat Fleegbläer utdeelt, de Lü to wohrschuun, dat he us alle na'nanner ümbringen warrt, wenn wi nich toeerst hannelt.

Poor vun min Navers seggt, wenn ik so seker weer, woso ik nich na de Polizei güng? Dat's nu eenfach lächerlich. De Polizei warrt seggen, wenn ik min Navers beschülligen wull, bruuk se Bewiesen. Se würrn de Straat mit veel roodwitt Bänder afsperrn un sik vigeliensch anstelln vunwegen wat en Präventivslag recht un richtig weer, un de ganze Tied würr Herr Mohl sin schreckliche Plaans gegen mi trechtmaken un Herr Pahls achterrücks Lü ümbringen. To'n Glück bün ik de eenzige in uns Straat, de mit automaatsche Scheetprügel good bestückt is; dorüm is dat nu sachs min egen Opgaav, den Freden to wohren. Betherto weer dat bloots beten vertrackt, anner Lü dat klaar to maken.

Man nu hett George W. Bush klaarstellt, dat ik nix wieder daan bruuk as de Gedüür to verleren. Denn kann ik maken, woto ik Lust heff! Un sünd wi doch mal ehrlich: Mr. Bush sin sorgfältig dördachte Politik is de eenzige Weg, internaschonaalen Freden un Sekerheit to schaffen. De eenzige sekere Aart, mosleemsche fundamentalistische Sülvstmoordbomber to stoppen, is dat, 'n poor mosleemsche Länner to bombardeern, de us nienich bedrauht hebbt. Dorüm will ik ok Herrn Mohl sin Garage in de Luft jagen un sin Fru un Kinner doodmaken!

Toeerst toslaan! Dat warrt em en Lehr ween. Denn warrt he us in Roh laten un ophöörn, mi op düsse drieste Aart scheep antokieken!

Mr. Bush stellt klaar, dat he to'n Bombardeern vun Irak nix wieder weten bruukt as dat Saddam 'n echten Kotzbrocken is un dat he Massenvernichtungswaffen hett — ok wenn nüms de finnen kann. Jüst so recht is dat, dat ik Herrn Mohl sin Fru un Kinner doodmaak, dat weet ik wiß. Mr. Bush sin Langtied-Teel is dat, de Welt sekerer to maken, indem dat he "Schurkenstaaten" un "den Terrorismus" utlöscht. Dat is so en plietsches Langtied-Teel, denn woans wullt du jemalen weten, dat du dat schafft hest? Woans warrt Mr. Bush weten, wannehr he alle Terroristen utlöscht hett? Wenn elk enkelte Terrorist dood is? Man, 'n Terrorist is ja bloots 'n Terrorist, wenn he al'n terroristische Daat daan hett.

Wat is mit de Villicht-mal-Terroristen? De sünd dat, wat wi würklich utrotten wüllt, denn de mehrsten vun de bekannten Terroristen hebbt sik - as Sülvstmoordbomber - ja al sülven utlöscht. Villicht mutt Mr. Bush jedeen Minschen utlöschen, de mööglicherwies mal'n Terrorist warden kunn?

Villicht kann he nich seker ween, dat he an sin Teel anlangt is, bet jedeen Moslem-Fundamentalist dood is? Man dat kunn ween, dat poor gemäßigte Moslems sik den Fundamentalismus towendt. Villicht is de eenzige sekere Saak för Mr. Bush, dat he alle Moslems utlöscht? Dat's jüst so in min Straat. Herr Mohl un Herr Pahls sünd bloots de Topp vun'n Iesbarg. Dat gifft hier Dutzen annere Lü in de Straat, de ik nich verknusen kann un de mi - heel driest - scheep ankiekt. Nüms is würklich seker, ehrdat ik se alle utlöscht heff. Min Fru seggt, ik güng to wied, avers ik segg ehr denn bloots, ik hannel na desülvige Logik as de Präsident vun de Vereenigten Staaten. Dat maakt ehr stillswiegen. Jüst as bi Mr. Bush is min Gedüür toenn, un wenn dat as Grund good 'noog is för den Präsidenten, denn is dat ok good 'noog för mi. Ik geev de ganze Straat twee Weken - nee, 10 Daag -, dat se rutkaamt un alle Aliens un Außerirdische un galaktische Gesetzlose un interstellare Terroristen utlevert, un wenn se jüm nich nipp un nett uthännigt un dorto "Danke" seggt, denn warr ik de gesamte Straat to Gruus un Muus bomben. Dat's jüst so vernünftig as wat Mr. Bush vörhett — un, anners as bi Mr. Bush, warrt dör min Politik bloots een Straat toschannen maakt.